26.4.2008   

MT

Il-Ġurnal Uffiċjali ta’ l-Unjoni Ewropea

L 114/88

(1)

Id-Direttiva 2004/40/KE tal-Parlament u tal-Kunsill (3) tistabbilixxi l-ħtiġijiet minimi tas-sigurtà u tas-saħħa għall-protezzjoni ta’ ħaddiema kontra r-riskji li jirriżultaw minn espożizzjoni għal kampi elettro-manjetiċi. L-Artikolu 13(1) tad-Direttiva msemmija, jistipula li l-Istati Membri għandhom idaħħlu fis-seħħ id-dispożizzjonijiet leġislattivi, regolamentari u amministrattivi biex jikkonformaw mad-Direttiva mhux aktar tard mit-30 ta’ April 2008,

(2)

Id-Direttiva 2004/40/KE tistipula valuri li jinstigaw l-azzjoni u valuri limiti bbażati fuq ir-rakkomandazzjonijiet tal-Kummissjoni internazzjonali għall-protezzjoni kontra r-raġġi mhux jonizzanti (ICNIRP). Studji xjentifiċi ġodda rigward l-effetti fuq is-saħħa ta’ espożizzjonijiet għar-raġġi elettro-manjetiċi, li saru pubbliċi wara l-adozzjoni tad-direttiva, ġew mgħarrfa lill-Parlament Ewropew, lill-Kunsill u lill-Kummissjoni. Ir-riżultati ta’ dawn l-istudji xjentifiċi bħalissa qed ikunu eżaminati mill-Kummissjoni internazzjonali għall-protezzjoni kontra r-raġġi mhux jonizzanti fid-dawl tar-reviżjoni li għaddejja attwalment tar-rakkomandazzjonijiet tagħha, min-naħa l-waħda, u mill-Organizzazzjoni Dinjija tas-Saħħa fid-dawl tar-reviżjoni tal-“kriterji ta’ iġjene ta’ l-ambjent” tagħha, min-naħa l-oħra. Dawn ir-rakkomandazzjonijiet ġodda, li l-pubblikazzjoni tagħhom mistennija li ssir sa l-aħħar tas-sena 2008, huma suxxettibbli li jżommu elementi li jistgħu jwasslu għal emendi sostanzjali ta’ valuri li jattivaw l-azzjoni u ta’ valuri limiti,

(3)

F’dan il-kuntest, ikun jaqbel li jkun eżaminat mill-ġdid b’mod profond l-effett eventwali tad-dħul fis-seħħ tad-Direttiva 2004/40/KE fuq l-użu ta’ proċeduri mediċi fuq l-immaġni medika u fuq ċerti attivitajiet industrijali. Ġie mniedi studju mill-Kummissjoni biex tkun ivvalutata b’mod dirett u kwantitattiv is-sitwazzjoni f’dak li jirrigwarda l-immaġni medika. Ikun jaqbel għalissa li jingħata kas tar-riżultati ta’ dan l-istudju, li huma mistennija fil-bidu tas-sena 2008, u dawk ta’ studji simili li tnedew fl-Istati Membri, biex ikun assigurat il-bilanċ bejn il-prevenzjoni ta’ riskji potenzjali għas-saħħa tal-ħaddiema u l-aċċess għall-benefiċċji permessi mill-użu effikaċi ta’ teknoloġiji mediċi kkonċernati,

(4)

L-Artikolu 3(3) tad-Direttiva 2004/40/KE jistipula li l-valutazzjoni, kejl u/jew kalkolu ta’ l-espożizzjoni tal-ħaddiema għal kampi elettro-manjetiċi huma regolati minn normi Ewropej armonizzati stabbiliti mill-Kumitat Ewropew għall-Istandardizzazzjoni Elektroteknika (Cenelec). Dawn in-normi armonizzati, li huma essenzjali biex tiġi żgurata l-applikazzjoni mingħajr problemi tad-Direttiva, għandhom jiġu meqjusa u huma mistennija għas-sena 2008,

(5)

Iż-żmien meħtieġ biex tinkiseb u tkun analizzata informazzjoni ġdida kif ukoll biex titfassal u tiġi adottata proposta ġdida ta’ direttiva, tiġġustifika l-posponiment ta’ erba’ snin tad-data ta’ skadenza għat-traspożizzjoni tad-Direttiva 2004/40/KE,