9.2.2008   

MT

Il-Ġurnal Uffiċjali ta’ l-Unjoni Ewropea

L 36/7

(1)

Id-Direttivi 86/362/KEE u 90/642/KEE jistipulaw li l-Kummissjoni għandha taħdem b’mod progressiv sabiex tikseb sistema li tkun tista’ tippermetti l-istima ta’ l-esponiment għall-pestiċidi fid-dieta. Biex isiru valutazzjonijiet realistiċi, it-tagħrif dwar il-monitoraġġ tar-residwi ta’ pestiċidi għandu jkun disponibbli f’għadd ta’ prodotti ta’ l-ikel li jkunu jifformaw parti ewlenija mid-dieta Ewropea. Huwa ġeneralment magħruf li partijiet prinċipali tad-dieta Ewropea huma magħmula minn 20-30 prodott ta’ l-ikel. Fid-dawl tar-riżorsi disponibbli fil-livell nazzjonali għall-monitoraġġ tar-residwi tal-pestiċidi, l-Istati Membri jistgħu janalizzaw biss kampjuni ta’ tmien prodotti kull sena fi ħdan programm ikkoordinat ta’ monitoraġġ. L-użi tal-pestiċidi juru tibdil fi ħdan żmien ċikliku ta’ tliet snin. Għalhekk ġeneralment għal kull pestiċida jrid isir monitoraġġ f’20-30 prodott ta’ l-ikel fuq serje ta’ ċikli ta’ tliet snin.

(2)

Ir-residwi tal-pestiċidi koperti minn din ir-Rakkomandazzjoni għandhom ikunu sorveljati fl-2008, billi dan jippermetti li din id-data tintuża għall-istima ta’ esponiment djetetiku konkret għalihom. Minħabba li l-monitoraġġ irid ikopri ċikli ta’ tliet snin u sabiex tippermetti lill-Istati Membri jippreżentaw il-programmi ta’ monitoraġġ tagħhom għall-2009, din ir-Rakkomandazzjoni għandha tistipula b’mod ulterjuri indikazzjonijiet għall-monitoraġġ li għandu jitwettaq fl-2009 u l-2010.

(3)

Fuq bażi ta’ distribuzzjoni ta’ probabilità binomjali, jista’ jiġi kkalkulat li l-eżaminar ta’ 642 kampjun tippermetti b’ċertezza ta’ aktar minn 99 %, l-iżvelar ta’ kampjun li jkun fih ammont ta’ residwi ta’ pestiċidi ogħla mil-limitu ta’ determinazzjoni (LOD), bil-kundizzjoni li mhux anqas minn 1 % mill-prodotti li joriġinaw mill-pjanti jkun fihom residwi ta’ livell ogħla minn dak il-limitu. Il-ġbir ta’ dawn il-kampjuni jrid ikun allokat bejn l-Istati Membri fuq il-bażi tal-popolazzjoni u l-għadd ta’ konsumaturi, bil-valur minimu ta’ 12-il kampjun għal kull prodott fis-sena.

(4)

Linji ta’ gwida dwar “il-Proċeduri għall-Kontroll tal-Kwalità fl-Analiżi tar-Residwi tal-Pestiċidi” huma ppubblikati fuq il-websajt tal-Kummissjoni (3). Huwa miftiehem li dawn il-linji ta’ gwida għandhom jiġu applikati kemm jista’ jkun mil-laboratorji analitiċi ta’ l-Istati Membri u għandhom ikunu riveduti kontinwament fid-dawl ta’ l-esperjenza miksuba fil-programmi ta’ monitoraġġ.

(5)

Id-Direttiva tal-Kummissjoni 2002/63/KE tal-11 ta’ Lulju 2002 li tistabbilixxi metodi ta’ teħid ta’ kampjuni tal-Komunità għall-kontroll uffiċjail tar-residwi tal-pestiċidi ġo u fuq prodotti li joriġinaw mill-pjanti u l-annimali u li tirrevoka d-Direttiva 79/700/KEE (4) tinkorpora l-metodi u l-proċeduri ta’ teħid ta’ kampjuni rrakkomandati mill-Kummissjoni Codex Alimentarius.

(6)

Fir-rigward ta’ l-analiżi ta’ prodotti ta’ l-annimali li mistennija titwettaq mill-2009 ‘l quddiem, il-laboratorji uffiċjali jeħtieġu li jkunu jafu bil-quddiem sewwa sabiex ikunu adattati għal din ir-rakkomandazzjoni, liema pestiċidi u komoditajiet ta’ oriġini ta’ l-annimali se jkunu mfittxija; dawn il-kombinazzjonijiet huma indikati fl-Anness I b’(d).

(7)

Id-Direttivi 86/362/KEE u 90/642/KEE jobbligaw lill-Istati Membri biex jispeċifikaw il-kriterji applikati fit-tfassil tal-programmi nazzjonali tagħhom ta’ l-ispezzjonijiet. Informazzjoni bħal din għandha tinkludi l-kriterji applikati fid-determinazzjoni tan-numri ta’ kampjuni li għandhom jittieħdu u ta’ l-analiżi li għandha titwettaq u l-livelli ta’ rapportar applikati, il-kriterji applikati fit-tfassil tal-livelli ta’ rapportar u d-dettalji dwar l-akkreditazzjoni skond ir-Regolament (KE) 882/2004 tal-Parlament Ewropew u tal-Kunsill tad-29 ta’ April 2004 dwar kontrolli uffiċjali li jkunu saru biex jiżguraw il-verifika ta’ konformità mal-liġi ta’ l-għalf u ta’ l-ikel, ir-regoli tas-saħħa ta’ l-annimali u l-benesseri ta’ l-annimali (5). F’dak li għandu x’jaqsam ma’ l-akkreditazzjoni ta’ laboratorji, għandha titqies id-deroga prevista fl-Artikolu 18 tar-Regolament tal-Kummissjoni (KE) Nru 2076/2005 tal-5 ta’ Diċembru 2005 li jistabbilixxi l-arranġamenti tranżitorji għall-implimentazzjoni tar-Regolamenti (KE) Nru 853/2004, (KE) Nru 854/2004 u (KE) Nru 882/2004 tal-Parlament Ewropew u tal-Kunsill u li jemenda r-Regolamenti (KE) Nru 853/2004 u (KE) Nru 854/2004 (6). L-għadd u t-tip ta’ ksur li nstab u l-azzjoni meħuda għandha tkun indikata wkoll.

(8)

Il-livelli massimi ta’ residwi għall-ikel tat-trabi ġew stabbiliti skond l-Artikolu 6 tad-Direttiva tal-Kummissjoni 91/321/KEE ta’ l-14 ta’ Mejju 1991 dwar il-formulae tat-trabi u l-formulae tal-prosegwiment (7), u l-Artikolu 7 tad-Direttiva tal-Kunsill 2006/125/KE tal-5 ta’ Diċembru 2006, dwar ikel ipproċessat ibbażat fuq ċereali u ikel tat-trabi u tat-tfal żgħar (8).

(9)

L-informazzjoni dwar ir-riżultati tal-programmi ta’ monitoraġġ għandha siwi partikolari f’dak li għandu x’jaqsam mat-trattament, il-ħażna u t-trażmissjoni b’metodi elettroniċi u ta’ l-informatika. Ġew żviluppati formati apposta għall-provvista ta’ data bil-posta elettronika mill-Istati Membri għall-Kummissjoni. Għalhekk l-Istati Membri għandhom jibagħtu r-rapporti tagħhom lill-Kummissjoni fil-format standard. L-iżvilupp ulterjuri ta’ dan it-tip ta’ format standard huwa l-aktar effettiv meta jitwettaq bl-iżvilupp ta’ linji ta’ gwida mill-Kummissjoni.

(10)

Il-miżuri previsti f’din ir-rakkomandazzjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,

(1)

L-Istati Membri huma mistiedna, matul is-sena 2008, sabiex jieħdu u janalizzaw kampjuni għall-permutazzjonijiet ta’ residwu minn pestiċida/prodott stipulati fl-Anness I ħlief għall-prodotti ta’ l-annimali (d) li se jseħħu mill-2009 ‘l quddiem. L-għadd ta’ kampjuni ta’ kull prodott huma allokati lilhom fl-Anness II, li jirrifletti kif xieraq is-sehem nazzjonali, Komunitarju u dak ta’ pajjiż terz ta’ suq ta’ l-Istat Membru.

Il-lott li għandu jittieħed minnu l-kampjun għandu jingħażel bil-polza, skond l-istrateġja ta’ monitoraġġ.

Il-proċedura ta’ teħid ta’ kampjuni, inkluż l-għadd ta’ unitajiet, trid tkun konformi mad-Direttiva 2002/63/KE.

(2)

Il-kampjuni meħudin u analizzati minn kull Stat Membru skond l-Annessi I u II, għandhom jinkludu mill-inqas:

(3)

L-Istati Membri mistiedna jirrappurtaw ir-riżultati mill-analiżi tal-kampjuni ttestjati għall-permutazzjonijiet ta’ residwu minn pestiċida/prodott stipulati fl-Anness I sa mhux iktar tard mill-31 ta’ Awwissu 2009, u jindikaw:

(4)

Ir-rapport irid isir skond format – inkluż il-format elettroniku – li huwa konformi mal-linji ta’ gwida għall-Istati Membri dwar l-implimentazzjoni tar-rakkomandazzjonijiet tal-Kummissjoni dwar programmi kkoordinati ta’ monitoraġġ tal-Komunità fornuti mill-Kumitat Permanenti dwar il-Katina Alimentari u s-Saħħa ta’ l-Annimali.

Ir-riżultati relatati mal-kampjuni li ttieħdu mill-ikel tat-trabi u minn kampjuni meħuda minn għalla li toriġina minn biedja organika għandhom jiġu rrappurtati fuq formoli separati tad-data.

(5)

L-Istati Membri huma mistiedna jibagħtu lill-Kummissjoni u lill-Istati Membri l-oħra, sa mhux aktar tard mill-31 ta’ Awwissu 2008, it-tagħrif kollu obbligat skond l-Artikolu 7(3) tad-Direttiva 86/362/KEE u l-Artikolu 4(3) tad-Direttiva 90/642/KEE dwar l-eżerċizzju ta’ monitoraġġ ta’ l-2007, biex tkun żgurata, mill-inqas b’kampjun ta’ verifika, il-konformità ma’ l-ogħla livelli ta’ residwu ta’ pestiċida inklużi:

(6)

L-Istati Membri huma mistiedna biex, sa mhux aktar tard mit-30 ta’ Settembru 2008, jibagħtu lill-Kummissjoni, il-programm nazzjonali tagħhom maħsub għall-monitoraġġ ta’ l-ogħla livelli ta’ residwu ta’ pestiċidi stabbiliti bid-Direttivi 90/642/KEE u 86/362/KEE għas-sena 2009, inkluż it-tagħrif dwar: