DEĊIŻJONI TAL-KUMMISSJONI

tat-28 ta’ April 2008

li tawtorizza metodi għall-klassifika ta’ karkassi ta’ majjali fil-Litwanja

(notifikata taħt id-dokument numru C(2008) 1595)

(It-test bil-Litwan biss huwa awtentiku)

(2008/364/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KEE) Nru 3220/84 tat-13 ta’ Novembru 1984 li jiddetermina l-iskala Komunitarja għall-klassifika ta’ karkassi tal-majjali (1), u b'mod partikolari l-Artikolu 5(2) tiegħu,

Billi:

(1)

Skond l-Artikolu 2(3) tar-Regolament (KEE) Nru 3220/84, il-klassifika ta’ karkassi tal-majjali għandha tiġi determinata billi jiġi stmat il-kontenut tad-dgħif permezz ta’ metodi ta’ valutazzjoni pprovati statistikament ibbażati fuq il-qies fiżiku ta’ waħda jew aktar mill-partijiet anatomiċi tal-karkassa tal-majjal. L-awtorizzazzjoni ta’ metodi ta’ klassifika għandha tkun soġġetta għal konformità b’tolleranza massima għal żball statistiku fil-valutazzjoni. Din it-tolleranza hija definita fl-Artikolu 3(2) tar-Regolament tal-Kummissjoni (KEE) Nru 2967/85 ta’ l-24 ta’ Ottubru 1985 li jistabbilixxi regoli dettaljati għall-applikazzjoni ta’ l-iskala Komunitarja għall-gradazzjoni tal-karkassi tal-majjali (2).

(2)	Il-gvern tal-Litwanja talab lill-Kummissjoni biex tawtorizza erba’ metodi ta’ klassifika ta’ karkassi tal-majjali u ppreżenta r-riżultati tal-provi tad-dissezzjoni fit-tieni parti tal-protokoll previst fl-Artikolu 3(3) tar-Regolament (KEE) Nru 2967/85.

(3)	Eżami ta’ din it-talba wera li l-kundizzjonijiet għall-awtorizzazzjoni ta’ dawk il-metodi ta’ klassifika huma sodisfatti.

(4)	L-ebda modifika fl-apparat jew fil-metodi ta’ klassifika ma tista' tiġi awtorizzata ħlief permezz ta’ Deċiżjoni ġdida tal-Kummissjoni adottata fid-dawl ta’ l-esperjenza miksuba. Għal din ir-raġuni, din l-awtorizzazzjoni tista' tiġi mħassra.

(5)	Il-miżuri previsti f'din id-Deċiżjoni huma skond l-opinjoni tal-Kumitat ta’ Ġestjoni tal-Laħam tal-Majjal,

ADOTTAT DIN ID-DEĊIŻJONI:

Artikolu 1

L-użu tal-metodi li ġejjin huwa b’dan awtorizzat għall-klassifika tal-karkassi tal-majjali fil-Litwanja skond ir-Regolament (KEE) Nru 3220/84:

(1)	l-apparat “Fat-O-Meat’er (FOM)” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti 1 ta’ l-Anness,

(2)	l-apparat “Hennessy Grading Probe (HGP 7)” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti 2 ta’ l-Anness,

(3)	l-apparat “IM-03” u l-metodi ta’ valutazzjoni marbuta miegħu, li d-dettalji tagħhom jinstabu fil-Parti 3 ta’ l-Anness.

(4)	l-apparat “Two point method (ZP) measuring by ruler (ruler method)” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti 4 ta’ l-Anness.

Il-metodu manwali (ZP) jista’ jiġi applikat biss fil-biċċeriji fejn ma jinqatlux aktar minn 200 majjal fil-ġimgħa.

Artikolu 2

Modifiki fl-apparat jew fil-metodi ta’ valutazzjoni m'għandhomx jiġu awtorizzati.

Artikolu 3

Din id-Deċiżjoni hija indirizzata lir-Repubblika tal-Litwanja.

Magħmula fi Brussell, 28 ta’ April 2008.

Għall-Kummissjoni

Mariann FISCHER BOEL

Membru tal-Kummissjoni

(1) ĠU L 301, 20.11.1984, p. 1. Ir-Regolament kif emendat l-aħħar bir-Regolament (KE) Nru 3513/93 (ĠU L 320, 22.12.1993, p. 5).

(2) ĠU L 285, 25.10.1985, p. 39. Ir-Regolament kif emendat l-aħħar bir-Regolament (KE) Nru 1197/2006 (ĠU L 217, 8.8.2006, p. 6).

ANNESS

METODI GĦALL-KLASSIFIKA TA' KARKASSI TAL-MAJJALI FIL-LITWANJA

Parti 1

FAT-O-MEAT’ER (FOM)

Il-klassifika tal-karkassi tal-majjali issir permezz ta' l-apparat magħruf bħala “Fat-O-Meat’er (FOM)”.

L-apparat għandu jkun mgħammar bi probe b'dijametru ta' 6 millimetri li jkun fiha photodiode tat-tip Siemens SFH 950/960 u li jkollha distanza operattiva ta' bejn 3 u 103 millimetru. Ir-riżultati tal-kejl jiġu kkonvertiti f'kontenut ta' dgħif stmat permezz ta' kompjuter.

Il-kontenut ta’ dgħif tal-karkassa għandu jiġi kkalkulat skond il-formula li ġejja:

= 59,98500 – 0,20051 × F1 – 0,62340 × F2 + 0,21878 × M2

fejn:

	=	il-perċentwali stmat ta’ dgħif fil-karkassa,
F1	=	il-ħxuna tax-xaħam (inkluż il-ġilda) f’millimetri, imkejla bejn it-tielet u r-raba’ rukkell tas-sinsla tad-dahar, 8 ċentimetri mil-linja tat-tbiċċir,
F2	=	il-ħxuna tax-xaħam (inkluż il-ġilda) f’millimetri, imkejla bejn it-tielet u r-raba’ kustilja t’isfel, 6 ċentimetri mil-linja tat-tbiċċir,
M2	=	il-ħxuna tax-xaħam f’millimetri, imkejla bejn it-tielet u r-raba’ kustilja t’isfel, 6 ċentimetri mil-linja tat-tbiċċir,

Din il-formula għandha tkun valida għall-karkassi bil-piż bejn 50 u 110 kilogramma.

Parti 2

HENNESSY GRADING PROBE (HGP7)

Il-klassifika ta' karkassi tal-majjali issir bl-użu ta' l-apparat magħruf bħala “Hennessy Grading Probe (HGP 7)”.

L-apparat għandu jkun mgħammar bi probe b'dijametru ta' 5.9 millimetri (u jkun fih xafra ta’ 6.3 millimetru fuq kull naħa tal-probe fuq nett) li jkun fiha photodiode (Siemens LED tat-tip LYU 260-EO u photodetector tat-tip 58 MR) u li jkollha distanza operattiva ta' bejn 0 u 120 millimetru. Ir-riżultati tal-kejl għandhom jiġu ttrasformati f’termini ta’ kontenut ta’ dgħif stmat permezz tal-HGP 7 stess kif ukoll ta’ kompjuter ikkonnetjat miegħu.

Il-kontenut ta’ dgħif tal-karkassa għandu jiġi kkalkulat skond il-formula li ġejja:

= 62,56600 – 0,85013 × F2 + 0,16150 × M2

fejn:

il-perċentwali stmat ta’ dgħif fil-karkassa,

il-ħxuna tax-xaħam (inkluż il-ġilda) f’millimetri, imkejla bejn it-tielet u r-raba’ kustilja t’isfel, 6 ċentimetri mil-linja tat-tbiċċir,

il-ħxuna tax-xaħam f’millimetri, imkejla bejn it-tielet u r-raba’ kustilja t’isfel, 6 ċentimetri mil-linja tat-tbiċċir,

Din il-formula għandha tkun valida għall-karkassi bil-piż bejn 50 u 110 kilogramma.

Parti 3

IM-03

Il-klassifika tal-karkassi tal-majjali issir bl-użu ta’ l-apparat magħruf bħala “IM-03”.

L-apparat għandu jkun mgħammar bi probe ottiku forma ta’ labra (single line scanner SLS01) b’dijametru ta’ 7 millimetri. Il-probe fih il-linja ta’ sensors li jagħmlu kuntatt dirett ma’ l-oġġett [contact image sensors (CIS)] u dajowd li jagħti dawl aħdar. Id-distanza operattiva hija bejn 0 u 132 millimetru.

Il-kontenut ta’ dgħif tal-karkassa għandu jiġi kkalkulat skond il-formula li ġejja:

= 62,01600 – 0,78101 × F2 + 0,17202 × M2 – 0,03763 × W

fejn:

	=	il-perċentwali stmat ta’ dgħif fil-karkassa,
F2	=	il-ħxuna tax-xaħam (inkluż il-ġilda) f’millimetri, imkejla bejn it-tielet u r-raba’ kustilja t’isfel, 6 ċentimetri mil-linja tat-tbiċċir,
M2	=	il-ħxuna tad-dgħif f’millimetri, imkejla bejn it-tielet u r-raba’ kustilja t’isfel, 6 ċentimetri mil-linja tat-tbiċċir,
W	=	il-piż ta’ karkassa sħuna f’kilogrammi.

Din il-formula għandha tkun valida għall-karkassi bil-piż bejn 50 u 110 kilogramma.

Parti 4

IL-METODU MANWALI (ZP)

Il-klassifika ta’ karkassi ta’ majjali issir permezz ta' l-użu tal-metodu manwali (ZP) jew tat-“two point method” (metodu ta' żewġ punti) mkejjel b’riga.

Dan il-metodu jista’ jiġi implimentat bl-użu ta’ riga, u l-klassifika tiġi determinata abbażi ta’ l-ekwazzjoni ta’ previżjoni. Huwa bbażat fuq il-kejl manwali mal-linja tan-nofs tal-karkassa maqsuma tal-ħxuna tax-xaħam u l-ħxuna tal-muskolu.

Il-kontenut ta’ dgħif tal-karkassi għandu jiġi kkalkulat skond il-formula li ġejja:

= 54,57800 – 0,47534 × F + 0,27035 × M – 0,09201 × W

fejn:

	=	il-perċentwali stmat tad-dgħif fil-karkassa,
F	=	il-ħxuna tax-xaħam (inkluż il-ġilda) f’millimetri, imkejla mal-linja tat-tbiċċir fil-post l-aktar irqiq 'il fuq mill-musculus gluteus medius,
M	=	il-ħxuna tal-muskolu tal-ġenbejn f’millimetri, imkejla mal-linja tat-tbiċċir tal-karkassa fil-post l-aktar qasir mit-tarf tal-musculus gluteus medius (in-naħa tar-ras) sat-tarf ta’ fuq tal-kanal ta' l-ispina (dorsali),
W	=	il-piż ta’ karkassa sħuna f’kilogrammi.

Il-formula għandha tkun valida għall-karkassi bil-piż bejn 50 u 110 kilogramma.