(1)

Ir-Regolament tal-Kunsill (KE) Nru 974/98 tat-3 ta’ Mejju 1998 dwar l-introduzzjoni ta’ l-euro (2) jipprevedi s-sostituzzjoni bl-euro tal-muniti ta’ l-Istati Membri li jkunu ssodisfaw il-kundizzjonijiet meħtieġa għall-adozzjoni tal-munita unika fiż-żmien meta l-Komunità tkun daħlet fit-tielet stadju ta’ l-unjoni ekonomika u monetarja.

(2)

Ir-Regolament (KE) Nru 2596/2000 (3) emenda r-Regolament (KE) Nru 974/98 biex jipprevedi s-sostituzzjoni tal-munita tal-Greċja bl-euro.

(3)

Ir-Regolament (KE) Nru 2169/2005 (4) emenda r-Regolament (KE) Nru 974/98 sabiex iħejji għal introduzzjonijiet sussegwenti ta’ l-euro fl-Istati Membri li għadhom ma adottawx l-euro bħala l-munita unika.

(4)

Ir-Regolament (KE) Nru 1647/2006 (5) emenda r-Regolament (KE) Nru 974/98 biex jipprevedi s-sostituzzjoni tal-munita tas-Slovenja bl-euro.

(5)

Skond l-Artikolu 4 ta’ l-Att ta’ l-Adeżjoni, Ċipru huwa Stat Membru b’deroga kif definit fl-Artikolu 122 tat-Trattat.

(6)

Skond id-Deċiżjoni tal-Kunsill 2007/503/KE ta’ l-10 ta’ Lulju 2007 f’konformità ma’ l-Artikolu 122(2) tat-Trattat dwar l-adozzjoni min-naħa ta’ Ċipru tal-munita unika fl-1 ta’ Jannar 2008 (6), Ċipru jissodisfa l-kundizzjonijiet meħtieġa għall-adozzjoni tal-munita unika u d-deroga favur Ċipru għandha titħassar b’seħħ mill-1 ta’ Jannar 2008.

(7)

L-introduzzjoni ta’ l-euro f’Ċipru tirrikjedi li d-dispożizzjonijiet eżistenti dwar l-introduzzjoni ta’ l-euro stabbiliti fir-Regolament (KE) Nru 974/98 jiġu estiżi għal Ċipru.

(8)

Il-pjan ta’ bidla ta’ Ċipru jispeċifika li l-karti tal-flus u l-muniti ta’ l-euro għandhom isiru valuta legali f’dak l-Istat Membru fil-ġurnata ta’ l-introduzzjoni ta’ l-euro bħala l-munita tiegħu. B’konsegwenza ta’ dan, id-data ta’ l-introduzzjoni ta’ l-euro u d-data ta’ bidla fil-flus kontanti għandha tkun l-1 ta’ Jannar 2008. M’ għandu japplika l-ebda perjodu “ta’ tneħħija gradwali”.

(9)

Ir-Regolament (KE) Nru 974/98 għandu għaldaqstant jiġi emendat skond dan,