|
22.6.2007 |
MT |
Il-Ġurnal Uffiċjali ta’ l-Unjoni Ewropea |
L 161/1 |
REGOLAMENT TAL-KUNSILL (KE) Nru 700/2007
tal-11 ta’ Ġunju 2007
dwar it-tqegħid fis-suq tal-laħam ta’ l-annimali bovini ta’ età ta’ tnax-il xahar jew anqas
IL-KUNSILL TA’ L-UNJONI EWROPEA,
Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 37 (2) tiegħu,
Wara li kkunsidra l-proposta mill-Kummissjoni,
Wara li kkunsidra l-opinjoni tal-Parlament Ewropew,
Billi:
|
(1) |
It-tieni subparagrafu ta’ l-Artikolu 2, flimkien mal-punt (b) ta’ l-ewwel subparagrafu ta’ dak l-Artikolu, tar-Regolament tal-Kunsill (KE) Nru 1254/1999 tas-17 ta’ Mejju 1999 dwar l-organizzazzjoni tas-suq taċ-ċanga u l-vitella (1) jipprevedi li l-Kunsill għandu jadotta regoli ġenerali dwar miżuri għall-promozzjoni ta’ organizzazzjoni aħjar tal-produzzjoni, l-ipproċessar u t-tqegħid fis-suq. |
|
(2) |
Is-sistemi ta’ produzzjoni ta’ l-annimali bovini ta’ età ta’ tnax-il xahar jew anqas u l-karatteristiċi tagħhom fi żmien il-qatla ta’ spiss ikunu differenti minn Stat Membru wieħed għal ieħor. Fis-swieq ewlenija tal-konsumatur fil-Komunità, il-laħam minn dawn is-sistemi differenti ta’ produzzjoni jitqiegħed ġeneralment fis-suq taħt deskrizzjoni unika ta’ bejgħ. |
|
(3) |
L-esperjenza turi li din il-prattika tista' tfixkel il-kummerċ u tħeġġeġ kompetizzjoni inġusta. Konsegwentement, għandha effett dirett fuq l-istabbiliment u l-funzjonament tas-suq intern. |
|
(4) |
Din il-prattika tista' wkoll toħloq konfużjoni għall-konsumaturi u x'aktarx tqarraq bihom. |
|
(5) |
Biex jitjieb il-funzjonament tas-suq intern, it-tqegħid fis-suq tal-laħam ta’ l-annimali bovini ta’ età ta’ tnax-il xahar jew anqas għandu jkun organizzat b'tali mod li jkun kemm jista' jkun trasparenti. Dan jippermetti wkoll li tali produzzjoni tkun organizzata aħjar. Għal dak il-għan, id-deskrizzjonijiet ta’ bejgħ li għandhom jintużaw f'kull lingwa ta’ l-Istati Membri għat-tqegħid fis-suq tal-laħam ta’ l-annimali bovini ta’ età ta’ tnax-il xahar jew anqas għandha tiġi speċifikata. Dan ser itejjeb ukoll l-informazzjoni għall-konsumaturi. |
|
(6) |
F'ċerti każijiet, il-laħam ta’ l-annimali bovini ta’ età ta’ tnax-il xahar jew anqas igawdi minn protezzjoni taħt ir-Regolament tal-Kunsill (KE) Nru 510/2006 ta’ l-20 ta’ Marzu 2006 dwar il-protezzjoni ta’ l-indikazzjonijiet ġeografiċi u d-denominazzjonijiet ta’ l-oriġini għal prodotti agrikoli u oġġetti ta’ l-ikel (2). F'dawk il-każijiet, huwa jitqiegħed fis-suq taħt l-indikazzjoni jew id-denominazzjoni protetta u, bħala riżultat, jista' jiġi identifikat b'mod preċiż mill-operaturi u l-konsumaturi. Għaldaqstant, dan ir-Regolament m'għandux jolqot dawk l-indikazzjonijiet u denominazzjonijiet protetti. |
|
(7) |
Diversi studji wrew li l-karatteristiċi organolettiċi tal-laħam, bħat-tarizza, it-togħma u l-kulur, jinbidlu ma’ l-età ta’ l-annimali li minnhom dan jinkiseb u skond l-għalf użat. |
|
(8) |
Skond konsultazzjoni pubblika organizzata mill-Kummissjoni fl-2005, għall-maġġoranza tal-konsumaturi l-età ta’ l-annimali u dak li jkunu ġew mitmugħa huma kriterji importanti għad-determinazzjoni tal-karatteristiċi tal-laħam tagħhom. Min-naħa l-oħra, il-piż ta’ l-annimali għall-qatla jidher li huwa anqas importanti. |
|
(9) |
Is-sistemi ta’ produzzjoni u t-tip ta’ għalf użat għall-annimali ta’ età ta’ tnax-il xahar jew anqas huma marbuta ma’ l-età meta l-annimali imorru għall-qatla. Huwa iktar faċli li jsir monitoraġġ fuq l-età tal-qatla milli fuq it-tip ta’ għalf użat. B'konsegwenza ta’ dan, l-użu ta’ deskrizzjonijiet differenti ta’ bejgħ skond l-età ta’ l-annimali għandu jkun biżżejjed sabiex tiġi pprovduta t-trasparenza meħtieġa. |
|
(10) |
Skond l-istess konsultazzjoni, il-biċċa l-kbira tal-konsumaturi jikkunsidraw li l-annimali ta’ età ta’ tmien xhur jew anqas jiffurmaw kategorija għalihom. Dak il-limitu ta’ età jintuża wkoll fl-Artikolu 130 tar-Regolament tal-Kunsill (KE) Nru 1782/2003 tad-29 ta’ Settembru 2003 li jistabbilixxi regoli komuni għal skemi diretti ta’ appoġġ fi ħdan il-politika agrikola komuni u li jistabbilixxi ċerti skemi ta’ appoġġ għall-bdiewa (3) sabiex tiġi determinata l-eliġibbiltà ta’ l-annimali għall-premium għall-qatla. Għaldaqstant, dak il-limitu ta’ età għandu jintuża sabiex il-kategorija ta’ annimali ta’ età ta’ tnax-il xahar jew anqas tinqasam f'żewġ sotto-kategoriji. |
|
(11) |
Il-konsultazzjoni wriet ukoll li, skond l-Istat Membru, l-aspettattivi tal-konsumatur ta’ l-istess deskrizzjoni ta’ bejgħ jistgħu jkunu differenti. Għalhekk, meta tintgħażel id-deskrizzjoni ta’ bejgħ, tagħmel sens li jittieħed kont safejn possibbli ta’ l-użanzi u t-tradizzjonijiet kulturali sabiex jgħinu lill-konsumaturi jagħmlu għażla skond l-aspettattivi tagħhom. |
|
(12) |
Għandu jkun hemm dispożizzjoni għal-laħam ta’ l-annimali bovini ta’ età ta’ tnax-il xahar jew anqas sabiex dawn jiġu identifikati b'ittra li tirrapreżenta l-kategorija li huma jiffurmaw. |
|
(13) |
L-operaturi li jixtiequ jissupplimentaw id-deskrizzjonijiet ta’ bejgħ previsti f'dan ir-Regolament b'informazzjoni volontarja oħra għandhom ikunu jistgħu jagħmlu dan skond il-proċedura prevista fl-Artikoli 16 jew 17 tar-Regolament (KE) Nru 1760/2000 tal-Parlament Ewropew u tal-Kunsill tas-17 ta’ Lulju 2000 li jistabbilixxi sistema għall-identifikazzjoni u r-reġistrazzjoni tal-bhejjem tal-fart u dwar it-tikkettjar tal-laħam taċ-ċanga u tal-prodotti tal-laħam taċ-ċanga (4). |
|
(14) |
Sabiex jiġi żgurat l-użu korrett ta’ l-informazzjoni dwar it-tikkettar skond dan ir-Regolament, id-data li tippermetti li tiġi verifikata l-korrettezza ta’ l-informazzjoni dwar it-tikkettar għandha tiġi rreġistrata fl-istadji kollha tal-produzzjoni u t-tqegħid fis-suq. Għal dan l-għan, għandha tkun tista' tiġi applikata s-sistema ta’ reġistrazzjoni msemmija fl-Artikolu 1 tar-Regolament tal-Kummissjoni (KE) Nru 1825/2000 tal-25 ta’ Awwissu 2000 li jistabbilixxi regoli ddettaljati għall-applikazzjoni tar-Regolament (KE) Nru 1760/2000 tal-Parlament Ewropew u tal-Kunsill fir-rigward tat-tikkettar taċ-ċanga u tal-prodotti taċ-ċanga (5), suġġett għall-adattamenti meħtieġa. |
|
(15) |
L-Istati Membri għandhom jaħtru l-awtoritajiet kompetenti sabiex iwettqu l-kontrolli relatati mal-kondizzjonijiet stipulati f'dan ir-Regolament u għandu jsir provvediment sabiex il-Kummissjoni tiżgura, fejn meħtieġ permezz ta’ kontrolli fuq il-post, li jiġu sodisfatti l-kondizzjonijiet. |
|
(16) |
Għal raġunijiet ta’ konsistenza, għandu jsir provvediment sabiex jiġi żgurat li l-laħam importat minn pajjiżi terzi jissodisfa r-rekwiżiti ta’ dan ir-Regolament. Għal dak l-għan, meta jitwettqu kontrolli minn parti terza indipendenti, dak il-korp għandu jipprovdi assigurazzjoni sħiħa ta’ kompetenza, imparzjalità u objettività. |
|
(17) |
L-Istati Membri għandhom jistabbilixxu regoli dwar il-penali applikabbli għal ksur tad-dispożizzjonijiet ta’ dan ir-Regolament u jiżguraw li huma implimentati. Dawk il-penali għandhom ikunu effettivi, proporzjonati u dissważivi. |
|
(18) |
Il-miżuri meħtieġa għall-implimentazzjoni ta’ dan ir-Regolament għandhom jiġu adottati skond id-Deċiżjoni tal-Kunsill 1999/468/KE tat-28 ta’ Ġunju 1999 li tipprovdi l-proċeduri għall-eżerċizzju tas-setgħat ta’ l-implimentazzjoni konferiti fuq il-Kummissjoni (6), |
ADOTTA DAN IR-REGOLAMENT:
Artikolu 1
Fini u kamp ta’ applikazzjoni
1. Dan ir-Regolament jistabbilixxi l-kondizzjonijiet għat-tqegħid fis-suq fil-Komunità tal-laħam ta’ l-annimali bovini ta’ età ta’ tnax-il xahar jew anqas, b'mod partikolari d-deskrizzjonijiet ta’ bejgħ li għandhom jintużaw.
Huwa għandu japplika għal-laħam ta’ l-annimali bovini ta’ età ta’ tnax-il xahar jew anqas maqtula wara l-1 ta’ Lulju 2008, kemm jekk prodott fil-Komunità jew importat minn pajjiżi terzi.
2. Dan ir-Regolament għandu japplika bla ħsara għar-Regolament tal-Kunsill (KE) Nru 1183/2006 ta’ l-24 ta’ Lulju 2006 dwar l-iskala Komunitarja għall-klassifikazzjoni ta’ karkassi ta’ annimali bovini adulti (7).
3. Dan ir-Regolament m'għandux japplika għal-laħam ta’ annimali bovini li għalih ġiet irreġistrata denominazzjoni ta’ l-oriġini protetta jew indikazzjoni ġeografika skond ir-Regolament (KE) Nru 510/2006, qabel id-29 ta’ Ġunju 2007.
Artikolu 2
Definizzjoni
Għall-finijiet ta’ dan ir-Regolament, “laħam” tfisser il-karkassi kollha, il-laħam bl-għadma jew mingħajr u l-ġewwieni, kemm maqtugħ jew le, maħsub għall-konsum mill-bniedem, miksuba mill-annimali bovini ta’ età ta’ tnax-il xahar jew anqas, ippreżentati friski, iffriżati jew surġelati, kemm jekk imgeżwra jew ippakkjati kif ukoll jekk mhumiex.
Artikolu 3
Klassifikazzjoni ta’ l-annimali bovini fil-biċċerija
Mal-qatla, l-annimali bovini kollha ta’ età ta’ tnax-il xahar jew anqas għandhom jiġu kklassifikati mill-operaturi, taħt is-superviżjoni ta’ l-awtorità kompetenti msemmija fl-Artikolu 8(1), f'waħda mill-kategoriji elenkati fl-Anness I.
Artikolu 4
Deskrizzjonijiet ta’ bejgħ
1. Id-deskrizzjoni ta’ bejgħ huwa l-isem li taħtu jinbiegħ oġġett ta’ l-ikel, fis-sens ta’ l-Artikolu 5(1) tad-Direttiva 2000/13/KE tal-Parlament Ewropew u tal-Kunsill ta’ l-20 ta’ Marzu 2000 fuq l-approssimazzjoni ta’ liġijiet ta’ l-Istati Membri li għandhom x'jaqsmu ma’ tikkettjar, preżentazzjoni u riklamar ta’ oġġetti ta’ l-ikel (8).
Il-laħam ta’ l-annimali bovini ta’ età ta’ tnax-il xahar jew anqas għandu jitqiegħed fis-suq fl-Istati Membri taħt id-deskrizzjoni(jiet) ta’ bejgħ elenkati fl-Anness II stabbiliti għal kull Stat Membru.
Id-deskrizzjonijiet ta’ bejgħ imsemmija fl-ewwel subparagrafu jistgħu jiġu ssupplimentati b'indikazzjoni ta’ l-isem jew id-denominazzjoni tal-laħam jew il-ġewwieni kkonċernat.
2. Id-deskrizzjonijiet ta’ bejgħ elenkati fl-Anness II, Parti A, u kwalunkwe isem ġdid derivat minn dawk id-deskrizzjonijiet ta’ bejgħ għandhom jintużaw biss jekk jiġu sodisfatti r-rekwiżiti kollha ta’ dan ir-Regolament.
B'mod partikolari, it-termini “veau”, “teleci”, “Kalb”, “μοσχάρι”, “ternera”, “kalv”, “veal”, “vitello”, “vitella”, “kalf”, “vitela” u “teletina” m'għandhomx jintużaw f'deskrizzjonijiet ta’ bejgħ jew jiġu indikati fuq it-tikkettar tal-laħam ta’ l-annimali bovini ta’ età ta’ aktar minn tnax-il xahar.
Artikolu 5
Informazzjoni obbligatorja fuq it-tikketta
1. Bla ħsara għall-Artikolu 3(1) tad-Direttiva 2000/13/KE u l-Artikoli 13, 14 u 15 tar-Regolament (KE) Nru 1760/2000, f'kull stadju ta’ produzzjoni u tqegħid fis-suq, l-operaturi għandhom jittikkettaw il-laħam ta’ l-annimali bovini ta’ età ta’ tnax-il xahar jew anqas bl-informazzjoni li ġejja:
|
(a) |
l-età ta’ l-annimali għall-qatla, indikata, skond il-każ, fuq il-formola “età mal-qatla: sa 8 xhur” fil-każ ta’ annimali ta’ età ta’ tmien xhur jew anqas, jew “età mal-qatla: minn 8 xhur sa 12-il xahar” fil-każ ta’ annimali ta’ età ta’ aktar minn tmien xhur iżda mhux aktar minn tnax-il xahar; |
|
(b) |
id-deskrizzjoni ta’ bejgħ skond l-Artikolu 4 ta’ dan ir-Regolament. |
Madankollu, b'deroga mis-subparagrafu (a), l-operaturi jistgħu, f'kull stadju ta’ produzzjoni u tqegħid fis-suq, ħlief ir-rilaxx lill-konsumatur finali, jissostitwixxu l-età mal-qatla bl-ittra ta’ identifikazzjoni tal-kategorija kif definit fl-Anness I ma’ dan ir-Regolament.
2. Fil-każ tal-laħam ta’ l-annimali bovini ta’ età ta’ tnax-il xahar jew anqas ippreżentat għall-bejgħ mhux ippakkjat minn qabel fil-punt ta’ bejgħ bl-imnut lill-konsumatur finali, l-Istati Membri għandhom jistabbilixxu r-regoli dwar kif l-informazzjoni msemmija fil-paragrafu 1 għandha tiġi indikata.
Artikolu 6
Informazzjoni fakultattiva fuq it-tikketta
L-operaturi jistgħu jissupplimentaw l-informazzjoni obbligatorja msemmija fl-Artikolu 5 b'informazzjoni fakultattiva approvata skond il-proċedura prevista fl-Artikolu 16 jew fl-Artikolu 17 tar-Regolament (KE) Nru 1760/2000.
Artikolu 7
Reġistrazzjoni
F'kull stadju ta’ produzzjoni u tqegħid fis-suq tal-laħam ta’ l-annimali bovini ta’ età ta’ tnax-il xahar jew anqas, l-operaturi għandhom, sabiex jiggarantixxu l-akkuratezza ta’ l-informazzjoni ta’ tikkettar imsemmija fl-Artikoli 5 u 6, jirreġistraw b'mod partikolari l-informazzjoni li ġejja:
|
(a) |
indikazzjoni tan-numru ta’ identifikazzjoni u d-data ta’ twelid ta’ l-annimali, fil-livell ta’ biċċerija biss; |
|
(b) |
indikazzjoni ta’ numru ta’ referenza li jagħmilha possibbli li tiġi stabbilita rabta bejn, minn naħa, l-identifikazzjoni ta’ l-annimali li minnhom joriġina l-laħam u, min-naħa l-oħra, id-deskrizzjoni ta’ bejgħ, l-età mal-qatla u l-ittra ta’ identifikazzjoni tal-kategorija mogħtija fuq it-tikketta tal-laħam; |
|
(ċ) |
indikazzjoni tad-data ta’ wasla u tluq ta’ l-annimali u l-laħam fl-istabbiliment, sabiex jiġi żgurat l-istabbiliment ta’ korrelazzjoni bejn wasliet u tluq. |
Artikolu 8
Kontrolli uffiċjali
1. Qabel l-1 ta’ Lulju 2008 l-Istati Membri għandhom jaħtru l-awtorità jew awtoritajiet kompetenti responsabbli għall-kontrolli uffiċjali mwettqa sabiex tiġi verifikata l-applikazzjoni ta’ dan ir-Regolament u jinfurmaw lill-Kummissjoni b'dan.
2. Il-kontrolli uffiċjali għandhom jitwettqu mill-awtorità jew awtoritajiet kompetenti skond il-prinċipji ġenerali stabbiliti fir-Regolament (KE) Nru 882/2004 tal-Parlament Ewropew u tal-Kunsill tad-29 ta’ April 2004 dwar il-kontrolli uffiċjali mwettqa sabiex tiġi żgurata l-verifika tal-konformità mal-liġi dwar l-għalf u l-ikel, is-saħħa ta’ l-annimali u r-regoli dwar il-benesseri ta’ l-annimali (9).
3. Il-Kummissjoni għandha, flimkien ma’ l-awtoritajiet kompetenti, tiżgura li l-Istati Membri qed jikkonformaw mad-dispożizzjonijiet ta’ dan ir-Regolament.
L-esperti tal-Kummissjoni għandhom iwettqu, fejn meħtieġ, flimkien ma’ l-awtoritajiet kompetenti kkonċernati, u fejn applikabbli, ma’ l-esperti ta’ l-Istati Membri, verifiki fuq il-post sabiex jiżguraw li jiġi implimentat dan ir-Regolament.
Kwalunkwe Stat Membru li fit-territorju tiegħu jitwettqu kontrolli għandu jipprovdi lill-Kummissjoni l-assistenza kollha meħtieġa li tista' teħtieġ għat-twettiq tal-kompiti tagħha.
Artikolu 9
Laħam importat minn pajjiżi terzi
1. Il-laħam ta’ l-annimali bovini ta’ età ta’ tnax-il xahar jew anqas importat minn pajjiżi terzi għandu jitqiegħed fis-suq fil-Komunità skond dan ir-Regolament.
2. L-operaturi minn pajjiż terz li jixtiequ jqiegħdu fis-suq Komunitarju laħam kif imsemmi fil-paragrafu 1 għandhom jissuġġettaw l-attivitajiet tagħhom għal kontrolli minn awtorità kompetenti maħtura minn dak il-pajjiż terz jew, fin-nuqqas ta’ dan, minn korp terz indipendenti. Il-korp indipendenti għandu jipprovdi assigurazzjoni sħiħa ta’ konformità mal-kondizzjonijiet stabbiliti fl-istandard Ewropew EN 45011 jew l-ISO/IEC Guide 65 (“Rekwiżiti ġenerali għall-korpi li jħaddmu sistemi ta’ ċertifikazzjoni tal-prodotti”).
L-awtorità kompetenti maħtura jew, fejn applikabbli, il-korp terz indipendenti għandhom jiżguraw li jiġu sodisfatti r-rekwiżiti ta’ dan ir-Regolament.
Artikolu 10
Penali
L-Istati Membri għandhom jistabbilixxu r-regoli dwar penali applikabbli għall-ksur tad-dispożizzjonijiet ta’ dan ir-Regolament u għandhom jieħdu l-miżuri kollha sabiex jiżguraw li jiġu implimentati. Il-penali previsti għandhom ikunu effettivi, propozjonati u dissważivi. L-Istati Membri għandhom jinnotifikaw dawk id-dispożizzjonijiet lill-Kummissjoni sa mhux aktar tard mill-1 ta’ Lulju 2009 u għandhom jinformawha mingħajr dewmien dwar kwalunkwe emenda sussegwenti li tkun tinċidi fuqhom.
Artikolu 11
Miżuri implimentattivi
1. Il-miżuri meħtieġa għall-implimentazzjoni ta’ dan ir-Regolament għandhom jiġu adottati skond il-proċedura msemmija fl-Artikolu 12(2). Tali miżuri għandhom jirrigwardaw partikolarment:
|
(a) |
il-metodu prattiku ta’ l-indikazzjoni ta’ l-ittra ta’ identifikazzjoni tal-kategorija kif definit fl-Anness I, fir-rigward tal-post u d-daqs ta’ l-ittri użati; |
|
(b) |
l-importazzjoni ta’ laħam minn pajjiżi terzi kif imsemmi fl-Artikolu 9, fir-rigward tal-metodu ta’ verifika tal-konformità ma’ dan ir-Regolament. |
2. Il-Parti B fl-Anness II tista' tiġi emendata skond il-proċedura msemmija fl-Artikolu 12(2).
Artikolu 12
Kumitat
1. Il-Kummissjoni għandha tkun assistita mill-Kumitat ta’ Amministrazzjoni għaċ-Ċanga u l-Vitella stabbilit mill-Artikolu 42 tar-Regolament (KE) Nru 1254/1999.
2. Fejn issir referenza għal dan l-Artikolu, għandhom japplikaw l-Artikolu 4 u 7 tad-Deċiżjoni 1999/468/KE.
Il-perijodu stabbilit fl-Artikolu 4(3) tad-Deċiżjoni 1999/468/KE għandu jkun ta’ xahar.
Artikolu 13
Miżuri transizzjonali
Il-laħam mill-annimali bovini ta’ età ta’ tnax-il xahar jew anqas u maqtula qabel l-1 ta’ Lulju 2008 jista' jkompli jitqiegħed fis-suq mingħajr ma jissodisfa r-rekwiżiti ta’ dan ir-Regolament.
Artikolu 14
Dħul fis-seħħ
Dan ir-Regolament jidħol fis-seħħ fis-seba' jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.
Għandu japplika mill-1 ta’ Lulju 2008.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fil-Lussemburgu, 11 ta’ Ġunju 2007.
Għall-Kunsill
Il-President
H. SEEHOFER
(1) ĠU L 160, 26.6.1999, p. 21. Regolament kif l-aħħar emendat bir-Regolament (KE) Nru 1913/2005 (ĠU L 307, 25.11.2005, p. 2).
(2) ĠU L 93, 31.3.2006, p. 12. Regolament kif emendat mir-Regolament (KE) Nru 1791/2006 (ĠU L 363, 20.12.2006, p. 1).
(3) ĠU L 270, 21.10.2003 p. 1. Ir-Regolament kif emendat l-aħħar mir-Regolament tal-Kummissjoni (KE) Nru 552/2007 (ĠU L 131, 23.5.2007, p. 10).
(4) ĠU L 204, 11.8.2000, p. 1. Ir-Regolament kif emendat l-aħħar mir-Regolament (KE) Nru 1791/2006.
(5) ĠU L 216, 26.8.2000, p. 8. Ir-Regolament kif emendat mir-Regolament (KE) Nru 275/2007 (ĠU L 76, 16.3.2007, p. 12).
(6) ĠU L 184, 17.7.1999, p. 23. Id-Deċiżjoni kif emendata mid-Deċiżjoni 2006/512/KE (ĠU L 200, 22.7.2006, p. 11).
(8) ĠU L 109, 6.5.2000, p. 29.
(9) ĠU L 165, 30.4.2004, p. 1.
ANNESS I
Kategoriji ta’ annimali bovini ta’ età ta’ tnax-il xahar jew anqas
Mal-qatla, l-annimali bovini ta’ età ta’ tnax-il xahar jew anqas għandhom jiġu kklassifikati f'waħda miż-żewġ kategoriji li ġejjin:
|
(A) |
Kategorija V: annimali bovini ta’ età ta’ tmien xhur jew anqas Ittra ta’ identifikazzjoni tal-kategorija: V; |
|
(B) |
Kategorija Z: annimali bovini ta’ età ta’ aktar minn tmien xhur iżda mhux aktar minn tnax-il xahar Ittra ta’ identifikazzjoni tal-kategorija: Z. |
Fl-Istati Membri, din il-klassifikazzjoni għandha titwettaq abbażi ta’ l-informazzjoni li tinsab fil-passaport li jakkumpanja l-annimali bovini jew, fin-nuqqas ta’ dan, abbażi tad-data li tinsab fid-database kompjuterizzata prevista fl-Artikolu 5 tar-Regolament (KE) Nru 1760/2000.
ANNESS II
Lista ta' deskrizzjonijiet ta' bejgħ imsemmija fl-Artikolu 4
|
(A) |
Għal-laħam ta' l-annimali bovini fil-kategorija V:
|
|
(B) |
Għal-laħam ta' l-annimali bovini fil-kategorija Z:
|