31.12.2008   

MT

Il-Ġurnal Uffiċjali ta’ l-Unjoni Ewropea

1005

(1)

Fit-30 ta' Novembru 2000, bir-Regolament (KE) Nru 2603/2000 (3), il-Kunsill impona dazji kumpensatorji fuq l-importazzjoni ta' ċertu polyethylene terephthalate (“PET”) li joriġina fl-Indja, fil-Malasja, u fit-Tajlandja (“il-pajjiżi konċernati”) (“l-investigazzjoni oriġinali”). Il-miżuri imposti kienu bbażati fuq investigazzjoni tal-miżuri kumpensatorji mibdija skond l-Artikolu 10 tar-Regolament bażiku. Fl-istess ħin, bir-Regolament (KE) Nru 2604/2000 (4), il-Kunsill impona dazji anti-dumping definittivi fuq importazzjonijiet ta' l-istess prodott li joriġinaw fl-istess pajjiżi. Il-miżuri imposti kienu bbażati fuq investigazzjoni anti-dumping mibdija skond l-Artikolu 5 tar-Regolament (KE) Nru 384/96.

(2)

L-emendi magħmula għar-Regolament (KE) Nru 2604/2000 kienu r-riżultat jew ta' investigazzjonijiet ta' reviżjoni mibdija skond l-Artikolu 11(3) u (4) tar-Regolament (KE) Nru 384/96 jew tal-garanziji tal-prezzijiet li ġew aċċettati skond l-Artikolu 8(1) tiegħu.

(3)

Barra minn hekk, bir-Regolament (KE) Nru 1467/2004 (5), il-Kunsill impona dazji anti-dumping definittivi fuq importazzjonijiet ta' ċertu PET li joriġina fl-Awstralja u fir-Repubblika Popolari taċ-Ċina (“PRĊ”) u temm il-proċediment fuq l-importazzjonijiet ta' PET li joriġina fil-Pakistan.

(4)

Fil-11 ta' Ottubru 2005, il-Kunsill emenda l-livell tal-miżuri kumpensatorji fis-seħħ kontra importazzjonijiet ta' PET mill-Indja (6). L-emendi kienu r-riżultat ta' reviżjoni aċċellerata mibdija skond l-Artikolu 20 tar-Regolament bażiku.

(5)

Wara l-pubblikazzjoni ta' avviż ta' skadenza imminenti, il-Kummissjoni, fit-30 ta' Awwissu 2005, irċeviet talba sabiex tirrevedi l-miżuri fis-seħħ skond l-Artikolu 18 tar-Regolament bażiku (“reviżjoni ta' skadenza”).

(6)

It-talba ġiet depożitata fit-30 ta' Awwissu 2005 mill-Kumitat għall-Polyethylene Terephthalate ta' Plastics Europe (“l-applikant”) f'isem il-produtturi li jirrappreżentaw proporzjon kbir, f'dan il-każ ta' aktar minn 90 % tal-produzzjoni Komunitarja totali ta' PET.

(7)

It-talba għar-reviżjoni ta' skadenza kienet ibbażata fuq il-bażi li t-tmiem tal-miżuri probabbli jirriżulta fil-kontinwazzjoni jew ripetizzjoni ta' sussidju u dannu għall-industrija tal-Komunità.

(8)

Wara li ddeterminat, wara konsultazzjoni mal-Kumitat Konsultattiv, li kienet teżisti evidenza suffiċjenti għall-bidu tar-reviżjoni, skond l-Artikolu 18 tar-Regolament bażiku rispettivament, il-Kummissjoni bdiet dawn ir-reviżjonijiet fl-1 ta' Diċembru 2005 (7).

(9)

Ta' min jinnota li qabel il-bidu tar-reviżjoni ta' skadenza, u skond l-Artikoli 22(1) u 10(9) tar-Regolament bażiku, il-Kummissjoni għarrfet lill-Gvern ta' l-Indja (“GOI”) li hija kienet irċeviet talba għal reviżjoni dokumentata kif għandu jkun u stiednet lill-GOI għal konsultazzjonijiet bil-għan li tiġi ċċarata s-sitwazzjoni fir-rigward tal-kontenut ta' l-ilment u biex tinstab soluzzjoni maqbula b'mod reċiproku. Madankollu, il-Kummissjoni ma rċeviet ebda tweġiba mill-GOI rigward l-offerta tagħha għal konsultazzjoni.

(10)

Fl-1 ta' Diċembru 2005, il-Kummissjoni fetħet ukoll reviżjoni skond l-Artikolu 11(2) tar-Regolament (KE) Nru 384/96 (8) dwar il-miżuri anti-dumping fis-seħħ kontra importazzjonijiet ta' PET li joriġinaw fl-Indja, fl-Indoneżja, fil-Malasja, fir-Repubblika tal-Korea, fit-Tajlandja u fit-Tajwan (8). Fl-istess ħin kienet mibdija reviżjoni interim parzjali skond l-Artikolu 11(3) tar-Regolament (KE) Nru 384/96, limitata għad-dumping, fir-rigward ta' importazzjonijiet ta' l-istess prodott li joriġinaw fir-Repubblika tal-Korea u fit-Tajwan (8).

(11)

Il-perijodu ta' investigazzjoni tar-reviżjoni (RIP) kopra l-perijodu mill-1 ta' Ottubru 2004 sat-30 ta' Settembru 2005. L-eżami tax-xejriet fil-kuntest tad-dannu kopra l-perijodu mill-1 ta' Jannar 2002 sat-tmiem tar-RIP (minn hawn 'il quddiem msejjaħ bħala “il-perijodu kkunsidrat”).

(12)

Il-Kummissjoni avżat uffiċjalment lill-produtturi esportaturi, lir-rappreżentanti tal-pajjiżi esportaturi, lill-importaturi, lill-produtturi tal-Komunità, lill-utenti u lill-applikant dwar il-bidu tar-reviżjoni ta' skadenza. Il-partijiet interessati ngħataw l-opportunità biex jagħmlu l-fehmiet tagħhom magħrufa bil-miktub u biex jitolbu smigħ saż-żmien stabbilit fl-avviż ta' bidu. Il-partijiet interessati kollha li talbu u wrew li kien hemm raġunijiet partikolari għaliex kellhom jinstemgħu, ingħataw smigħ.

(13)

Minħabba n-numru apparentement kbir ta' produtturi esportaturi Indjani kif ukoll ta' produtturi u importaturi Komunitarji elenkati fit-talba għar-reviżjonijiet ta' skadenza, kien meqjus xieraq, skond l-Artikolu 27 tar-Regolament bażiku, li jiġi eżaminat jekk għandux jintuża teħid ta' kampjuni. Sabiex jippermettu lill-Kummissjoni tiddeċiedi jekk kienx meħtieġ teħid ta' kampjuni u, jekk kien il-każ, li tagħżel kampjun, il-partijiet hawn fuq imsemmija ġew mitluba, skond l-Artikolu 27 tar-Regolament bażiku, li jagħmlu lilhom infushom magħrufa fi żmien 15-il jum mill-bidu tar-reviżjonijiet u biex jipprovdu lill-Kummissjoni l-informazzjoni mitluba fl-avviż ta' bidu.

(14)

Wara eżami ta' l-informazzjoni sottomessa, minħabba n-numru żgħir ta' produtturi esportaturi fl-Indja li indikaw ir-rieda tagħhom li jikkooperaw, ġie deċiż li ma kienx meħtieġ teħid ta' kampjuni fir-rigward tal-produtturi esportaturi fl-Indja.

(15)

Wara li ġiet eżaminata l-informazzjoni sottomessa mill-produtturi u l-importaturi Komunitarji, u minħabba n-numru relattivament żgħir ta' tweġibiet, ġie meqjus li ma kienx meħtieġ teħid ta' kampjuni għall-ebda waħda minn dawn il-kategoriji.

(16)

Għalhekk intbagħtu kwestjonarji lill-produtturi esportaturi kollha magħrufa fil-pajjiż konċernat, importaturi, fornituri, produtturi Komunitarji u utenti.

(17)

Kienu riċevuti tweġibiet għall-kwestjonarji mingħand tliet produtturi Indjani, mingħand tnax-il produttur Komunitarju, mingħand importatur wieħed, fornitur wieħed u mingħand għaxar konvertituri/utenti.

(18)

Il-Kummissjoni fittxet u vverifikat l-informazzjoni kollha li qieset meħtieġa għall-analiżi tagħha u wettqet żjarat ta' verifika fil-bini tal-kumpanniji li ġejjin:

(19)

Il-prodott konċernat huwa l-istess bħal fl-investigazzjoni oriġinali, jiġifieri PET b'numru ta' viskożità ta' 78 ml/gramma jew ogħla, skond l-Istandard ISO 1628-5, li joriġina fil-pajjiż konċernat. Attwalment dan huwa klassifikabbli taħt il-Kodiċi CN 3907 60 20.

(20)

L-istess bħal fl-investigazzjoni oriġinali, instab li l-prodott konċernat, PET prodott u mibjugħ fis-swieq domestiċi fil-pajjiż konċernat u PET prodott u mibjugħ mill-produtturi tal-Komunità għandhom l-istess karatteristiċi fiżiċi u kimiċi bażiċi u użi. Għalhekk ġie konkluż li t-tipi kollha ta' PET b'viskożità ta' 78 ml/gramma jew ogħla huma l-istess fit-tifsira ta' l-Artikolu 1(5) tar-Regolament bażiku.

(21)

Fuq il-bażi ta' l-informazzjoni kontenuta fit-talba għal reviżjoni u t-tweġibiet għall-kwestjonarju tal-Kummissjoni, ġew investigati l-iskemi li ġejjin, li allegatament jinvolvu l-għoti ta' sussidji.

(a)

Skema ta' Passbook għall-Ħlas Lura tad-Dazju — Duty Entitlement Passbook Scheme (DEPBS)

(b)

Skema ta' Eżenzjoni mit-Taxxa fuq id-Dħul — Income Tax Exemption Scheme (ITES)

(ċ)

Skema ta' Prodotti Kapitali għall-Promozzjoni ta' l-Esportazzjoni — Export Promotion Capital Goods Scheme (EPCGS)

(d)

Żoni ta' Proċessar ta' l-Esportazzjoni — Export Processing Zones (EPZ)/Żoni Ekonomiċi Speċjali — Special Economic Zones (SEZ)/Unitajiet Orjentati lejn l-Esportazzjoni — Export Oriented Units (EOU)

(e)

Advance Licence Scheme (ALS)

(f)

Skema ta' Kreditu għall-Esportazzjoni — Export Credit Scheme (qabel il-kunsinna u wara l-kunsinna) (ECS)

(g)

Skema ta' Inċentivi għat-Taxxa fuq il-Bejgħ ta' Gujarat — Gujarat Sales Tax Incentive Scheme (GSTIS)

(h)

Skema ta' Eżenzjoni mid-Dazju fuq l-Elettriku ta' Gujarat — Gujarat Electricity Duty Exemption Scheme (GEDES)

(i)

Skemi ta' Inċentivi ta' Bengal tal-Punent — West Bengal Incentive Schemes (WBIS)

(j)

Skema Pakkett ta' Inċentivi — Package Scheme of Incentives (PSI) tal-Gvern ta' Maharashtra

(22)

L-iskemi (a) u (ċ) sa (e) speċifikati hawn fuq huma bbażati fuq l-Att dwar il-Kummerċ Barrani (Żvilupp u Regolamentazzjoni) ta' l-1992 (Nru 22 ta' l-1992) li daħal fis-seħħ fis-7 ta' Awwissu 1999 (“Att dwar il-Kummerċ Barrani”). L-Att dwar il-Kummerċ Barrani jawtorizza lill-GOI biex joħroġ notifiki dwar il-politika ta' l-esportazzjoni u l-importazzjoni. Dawn huma miġbura fil-qosor fid-Dokumenti “Politika dwar l-Esportazzjoni u l-Importazzjoni”, mill-1 ta' Settembru 2004 imsejħa “Politika dwar il-Kummerċ Barrani”, u huma maħruġa mill-Ministeru tal-Kummerċ kull ħames snin u jiġu aġġornati regolarment. Dokument wieħed tal-Politika dwar l-Esportazzjoni u l-Importazzjoni huwa rilevanti għar-RIP ta' dan il-każ; jiġifieri l-pjan ta' ħames snin marbut mal-perijodu mill-1 ta' Settembru 2004 sal-31 ta' Marzu 2009 (“politika EXIM 2004-2009”). Barra minn hekk, il-GOI jistabbilixxi wkoll il-proċeduri li jirregolaw il-politika EXIM 2004-2009 f' “Manwal ta' Proċeduri — 1 ta' Settembru 2004 sal-31 ta' Marzu 2009, Volum I” (“HOP I 2004-2009”). Il-Manwal ta' Proċeduri (HOP) jiġi wkoll aġġornat fuq bażi regolari.

(23)

Skema (b) hija bbażata fuq l-Att dwar it-Taxxa fuq id-Dħul ta' l-1961, li jiġi emendat kull sena bl-Att dwar il-Finanzi.

(24)

Skema (f) hija bbażata fuq l-artikoli 21 u 35A ta' l-Att dwar ir-Regolamentazzjoni Bankarja ta' l-1949, li jippermetti lill-Bank tar-Riservi ta' l-Indja (“RBI”) li jiggwida lill-banek kummerċjali fil-kamp tal-krediti għall-esportazzjoni.

(25)

Skema (g) hija amministrata mill-Gvern ta' Gujarat u hija bbażata fuq il-politika tiegħu dwar l-inċentivi industrijali; skema (h) hija bbażata fuq l-Att dwar id-Dazju fuq l-Elettriku ta' Bombay ta' l-1958.

(26)

Skema (j) hija amministrata mill-istat ta' Maharashtra u hija bbażata fuq riżoluzzjonijiet tad-Dipartiment ta' l-Industriji, Enerġija u Xogħol tal-Gvern ta' Maharashtra.

(27)

Skema (i) hija stabbilita mill-Gvern ta' Bengal tal-Punent permezz tan-notifika Nru 588-CI/H tad-Dipartiment tal-Kummerċ u l-Industriji tat-22 ta' Ġunju 1999 (WBIS 1999) li kienet sostitwita l-aħħar bin-notifika Nru 134-CI/O/Incentive/17/03/I ta' l-24 ta' Marzu 2004 (WBIS 2004).

(28)

Wara l-iżvelar tas-sejbiet dwar l-allegat sussidju, il-GOI reġa' sostna numru ta' tħassib dwar il-kumpens ta' l-iskemi u l-kalkolu ta' l-ammonti tas-sussidju. Huwa jerġa' jsostni wkoll argumenti li ma kien hemm ebda kontinwazzjoni probabbli ta' sussidju fil-każ preżenti. Għal dan il-għan, għandu jiġi nnutat li din is-sottomissjoni ma fiha ebda argumenti ġodda li jistgħu jibdlu l-konklużjonijiet stabbiliti f'dan ir-Regolament.

(29)

Id-deskrizzjoni dettaljata tad-DEPBS tinsab fit-taqsima 4.3 tal-politika EXIM 2004-2009 u fit-taqsima 4.3-4.4 tal-HOP I 2004-2009.

(30)

Instab li ebda wieħed mill-produtturi esportaturi li kkooperaw ma kiseb xi benefiċċji kumpensatorji taħt id-(DEPBS). Għalhekk instab li ma kienx meħtieġ li din l-iskema tiġi analizzata aktar fl-ambitu ta' din l-investigazzjoni.

(31)

Instab li ebda wieħed mill-produtturi esportaturi li kkooperaw ma kiseb xi benefiċċji kumpensatorji taħt l-ITES. Għalhekk instab li ma kienx meħtieġ li din l-iskema tiġi analizzata aktar fl-ambitu ta' din l-investigazzjoni.

(32)

Id-deskrizzjoni dettaljata ta' l-EPCGS hija kontenuta fil-kapitolu 5 tal-politika EXIM 2004-2009 u fil-kapitolu 5 tal-HOP I 2004-2009.

(33)

Manifatturi-esportaturi, negozjanti-esportaturi “marbuta” ma' manifatturi ta' sostenn u fornituri tas-servizz huma eliġibbli għal din l-iskema.

(34)

Taħt il-kundizzjoni ta' obbligu ta' esportazzjoni, kumpannija hija permessa li timporta prodotti kapitali (ġodda u — minn April 2003 — prodotti kapitali użati li jista' jkollhom sa 10 snin) b'rata ta' dazju mnaqqsa jew żero. Għal dan il-għan, wara applikazzjoni u ħlas ta' tariffa, il-GOI joħroġ liċenza għal EPCG. Sabiex jiġi sodisfatt l-obbligu ta' l-esportazzjoni, il-prodotti kapitali impurtati jridu jintużaw sabiex jiġi manifatturat ċertu ammont ta' prodotti għall-esportazzjoni f'ċertu żmien.

(35)

Id-detentur ta' liċenza EPCGS jista' jġib ukoll il-prodotti kapitali lokalment. F'dan il-każ, il-manifattur lokali ta' prodotti kapitali jista' juża l-benefiċċju għall-importazzjoni bla dazju ta' komponenti meħtieġa għall-manifattura ta' prodotti kapitali simili. B'mod alternattiv, il-manifattur lokali jista' jitlob il-benefiċċju ta' esportazzjoni deemed fir-rigward tal-provvista ta' prodotti kapitali għal detentur ta' liċenza EPCGS.

(36)

L-EPCGS tipprovdi sussidji fit-tifsira ta' l-Artikoli 2(1)(a)(ii) u 2(2) tar-Regolament bażiku. It-tnaqqis tad-dazju jikkostitwixxi kontribut finanzjarju mill-GOI, billi din il-konċessjoni tnaqqas id-dħul mid-dazju tal-GOI li kieku jrid jitħallas. Barra minn hekk, it-tnaqqis fid-dazju jagħti vantaġġ lill-esportatur, minħabba li d-dazji ffrankati ma' l-importazzjoni jtejbu l-likwidità tiegħu.

(37)

Barra dan, l-EPCGS hija kontinġenti fil-liġi fuq il-prestazzjoni ta' l-esportazzjoni, billi tali liċenzi ma jistgħux jinkisbu mingħajr impenn għall-esportazzjoni. Għalhekk hija meqjusa bħala speċifika u kumpensatorja taħt l-Artikolu 3(4)(a) tar-Regolament bażiku.

(38)

Konsegwentement, din l-iskema ma tistax titqies bħala sistema permissibbli ta' rifużjoni tad-dazju jew sistema alternattiva ta' rifużjoni fit-tifsira ta' l-Artikolu 2(1)(a)(ii) tar-Regolament bażiku. Il-prodotti kapitali mhumiex koperti mill-kamp ta' applikazzjoni ta' tali sistemi permissibbli, kif stabbilit fl-Anness I, punt (i), tar-Regolament bażiku, minħabba li ma jiġux ikkunsmati fil-produzzjoni tal-prodotti esportati.

(39)

Ebda wieħed mill-esportaturi li kkooperaw ma kien xtara xi prodotti kapitali fl-IP. Madankollu kumpannija waħda kompliet tibbenefika minn eżenzjonijiet mid-dazju għal prodotti kapitali mixtrija qabel l-IP fl-ammont stabbilit fl-investigazzjoni oriġinali. L-ammont ta' sussidju miksub matul ir-RIP ġie kkalkulat, skond l-Artikolu 7(3) tar-Regolament bażiku, fuq il-bażi tad-dazju doganali mhux imħallas fuq prodotti kapitali impurtati mifruxa fuq perijodu li jirrifletti l-perijodu ta' deprezzament attwali ta' tali prodotti kapitali tal-produttur esportatur. Skond il-prassi stabbilita, l-ammont ikkalkulat li huwa attribwibbli għar-RIP ġie aġġustat billi żdied l-imgħax matul dan il-perijodu sabiex ikun rifless il-valur sħiħ tal-benefiċċju maż-żmien. Il-ħlasijiet neċessarjament magħmula sabiex jinkiseb is-sussidju ġew imnaqqsa skond l-Artikolu 7(1)(a) tar-Regolament bażiku minn din is-somma sabiex inkiseb l-ammont tas-sussidju bħala numeratur. Skond l-Artikolu 7(2) u 7(3) tar-Regolament bażiku dan l-ammont ta' sussidju ġie allokat fuq il-fatturat ta' l-esportazzjoni matul ir-RIP bħala denominatur xieraq, minħabba li s-sussidju huwa dipendenti fuq il-prestazzjoni ta' l-esportazzjoni u ma jingħatax b'referenza għall-kwantitajiet manifatturati, prodotti, esportati jew trasportati. Is-sussidju miksub għall-kumpannija li kompliet tibbenefika mill-iskema kien ta' 0,38 %.

(40)

Id-dettalji ta' l-iskema huma stabbiliti fil-Master Circular IECD Nru 5/04.02.01/2002-03 (Kreditu għall-Esportazzjoni f'Munita Barranija) u Master Circular IECD Nru 10/04.02.01/2003-04 (Kreditu għall-Esportazzjoni f'Rupee) tal-Bank tar-Riservi ta' l-Indja (“RBI”), li hija indirizzata lill-banek kummerċjali kollha fl-Indja.

(41)

Esportaturi produtturi u esportaturi negozjanti huma eliġibbli għal din l-iskema. Instab li waħda mill-kumpanniji li kienu qegħdin jikkooperaw fil-proċediment ħadet vantaġġ mill-benefiċċji taħt l-ECS.

(42)

Taħt din l-iskema, ir-RBI jistabbilixxi rati ta' imgħax massimi obbligatorji applikabbli għall-krediti fuq l-esportazzjoni, kemm f'rupees Indjani jew f'munita barranija, li l-banek kummerċjali jistgħu jimponu fuq l-esportatur “bil-għan li jagħmlu l-kreditu disponibbli għall-esportaturi b'rati internazzjonalment kompetittivi”. L-ECS tikkonsisti minn żewġ sottoskemi, l-Iskema ta' Kreditu għall-Esportazzjoni Qabel il-Kunsinna (“kreditu għall-ippakkjar — packing credit”), li tkopri l-krediti pprovduti lil esportatur sabiex jiffinanzja x-xiri, l-ipproċessar, il-manifattura, l-ippakkjar u/jew il-kunsinna tal-prodotti qabel l-esportazzjoni, u l-Iskema ta' Kreditu għall-Esportazzjoni ta' Wara l-Kunsinna, li tipprovdi għal self kapitali operattiv bil-għan li jiġu finanzjati r-receivables ta' l-esportazzjoni. Ir-RBI jordna wkoll lill-banek sabiex jipprovdu ċertu ammont tal-kreditu bankarju nett tagħhom għall-iffinanzjar ta' l-esportazzjoni.

(43)

B'riżultat ta' dawn il-Master Circulars tar-RBI, l-esportaturi jistgħu jiksbu krediti b'rati ta' imgħax preferenzjali meta mqabbla mar-rati ta' l-imgħax għal krediti kummerċjali ordinarji (“krediti kontanti”), li huma purament stabbiliti taħt kundizzjonijiet tas-suq.

(44)

L-ewwelnett, ir-rati ta' imgħax preferenzjali ta' kreditu ECS stabbiliti mill-Master Circulars tar-RBI jistgħu jnaqqsu l-ispejjeż ta' l-imgħaxijiet ta' esportatur meta mqabbel ma' spejjeż tal-kreditu stabbiliti minn kundizzjonijiet tas-suq u f'dan il-każ jagħtu vantaġġ fis-sens ta' l-Artikolu 2(2) tar-Regolament bażiku lil tali esportatur. Kien biss fil-każ ta' dawk l-esportaturi kollaboraturi, fejn instab li jeżistu tali differenzi fir-rati ta' l-imgħax, li ġie konkluż li ngħata vantaġġ. Id-differenzi fir-rati bejn il-krediti mogħtija b'referenza għall-Master Circulars tar-RBI u r-rati tal-“kreditu kontanti” kummerċjali ma jistgħux jiġu spjegati bl-imġiba pura fis-suq tal-bank kummerċjali.

(45)

It-tieninett, u minkejja l-fatt li l-krediti preferenzjali taħt l-ECS jingħataw minn banek kummerċjali, dan il-benefiċċju huwa kontribut finanzjarju minn gvern fit-tifsira ta' l-Artikolu 2(1)(iv) tar-Regolament bażiku. Ir-RBI huwa organu pubbliku u għalhekk jaqa' taħt id-definizzjoni ta' “gvern” kif stabbilita fl-Artikolu 1(3) tar-Regolament bażiku. Huwa proprjetà 100 % tal-gvern, isegwi miri ta' politika pubblika, p.e. il-politika monetarja, u t-tmexxija tiegħu hija maħtura mill-GOI. Ir-RBI jiggwida korpi privati, billi l-banek kummerċjali huma marbuta bil-kundizzjonijiet, inter alia l-limiti massimi għar-rati ta' l-imgħax fuq krediti għall-esportazzjoni ordnati fil-Master Circulars tar-RBI u fid-dispożizzjonijiet tar-RBI li l-banek kummerċjali jridu jipprovdu ċertu ammont tal-kreditu bankarju nett tagħhom għall-finanzi ta' l-esportazzjoni. Din l-istruzzjoni tobbliga lill-banek kummerċjali sabiex iwettqu l-funzjonijiet imsemmija fl-Artikolu 2(1)(a)(i) tar-Regolament bażiku, f'dan il-każ self fil-forma ta' finanzjament preferenzjali għall-esportazzjoni. Tali trasferiment dirett ta' fondi fil-forma ta' self taħt ċerti kundizzjonijiet normalment ikun vestit fil-gvern, u l-prassi, f'ebda sens reali, tvarja mill-metodi normalment segwiti mill-gvernijiet, Artikolu 2(1)(a)(iv) tar-Regolament bażiku. Dan is-sussidju huwa meqjus bħala speċifiku u kumpensatorju billi r-rati ta' imgħax preferenzjali huma disponibbli biss f'relazzjoni mal-finanzjament ta' operazzjonijiet ta' l-esportazzjoni u għalhekk huma dipendenti fuq il-prestazzjoni ta' l-esportazzjoni, skond l-Artikolu 3(4)(a) tar-Regolament bażiku.

(46)

L-ammont ta' sussidju ġie kkalkulat fuq il-bażi tad-differenza bejn l-imgħax imħallas għall-krediti fuq l-esportazzjoni użati matul ir-RIP u l-ammont li ried jitħallas kieku l-istess rati ta' imgħax kienu applikabbli għall-krediti kummerċjali ordinarji użati mill-kumpannija partikolari. Dan l-ammont ta' sussidju (numeratur) ġie allokat fuq il-fatturat totali ta' l-esportazzjoni matul ir-RIP bħala denominatur xieraq skond l-Artikolu 7(2) tar-Regolament bażiku, minħabba li s-sussidju huwa dipendenti fuq il-prestazzjoni ta' l-esportazzjoni u ma ngħatax b'referenza għall-kwantitajiet manifatturati, prodotti, esportati jew trasportati. Il-kumpannija li ħadet vantaġġ mill-benefiċċji taħt l-ECS kisbet sussidju ta' 0,1 %.

(47)

Instab li ebda wieħed mill-produtturi esportaturi li kkooperaw ma kiseb benefiċċji kumpensatorji taħt SEZS. Madankollu, żewġ kumpanniji Indjani kellhom l-istatus ta' EOU u rċevew sussidji kumpensatorji fir-RIP. Għalhekk id-deskrizzjoni u l-evalwazzjoni ta' hawn isfel hija limitata għall-EOUS.

(48)

Id-dettalji ta' l-iskema EOU huma kontenuti fil-kapitolu 6 tal-politika EXIM 2004-2009 u l-HOP I 2004-2009.

(49)

Bl-eċċezzjoni ta' kumpanniji purament kummerċjali, l-intrapriżi kollha li, fil-prinċipju, iwiegħdu li jesportaw il-produzzjoni sħiħa tagħhom ta' prodotti u servizzi jistgħu jiġu stabbiliti taħt l-EOUS. Il-garanziji fis-setturi industrijali jridu jissodisfaw limitu ta' investiment minimu f'assi fissi (10 miljun rupee Indjan) biex ikunu eliġibbli għall-EOUS

(50)

Kif instab fl-investigazzjoni oriġinali, l-EOUs jistgħu jkunu sitwati u stabbiliti kullimkien fl-Indja.

(51)

Applikazzjoni għal status ta' EOU trid tinkludi dettalji għal perijodu tal-ħames snin suċċessivi dwar, fost l-oħrajn, il-kwantitajiet ippjanati ta' produzzjoni, il-valur proġettat ta' l-esportazzjonijiet, ir-rekwiżiti ta' l-importazzjoni u r-rekwiżiti lokali. Malli l-applikazzjoni tal-kumpannija tiġi aċċettata mill-awtoritajiet, it-termini u l-kundizzjonijiet marbuta ma' din l-aċċettazzjoni jiġu komunikati lill-kumpannija. Il-ftehim għal rikonoxximent bħala kumpannija taħt EOU huwa validu għal perijodu ta' ħames snin. Il-ftehim jista' jiġġedded għal perjodi addizzjonali.

(52)

Obbligu kruċjali ta' EOU kif stabbilit fil-politika EXIM 2004-2009 huwa li jinkiseb qligħ nett ta' kambju barrani (NFE — net foreign exchange), jiġifieri f'perijodu ta' referenza (5 snin), il-valur totali ta' l-esportazzjonijiet irid ikun ogħla mill-valur totali tal-prodotti importati.

(53)

L-unitajiet EOU huma intitolati għall-konċessjonijiet li ġejjin:

(54)

L-unitajiet li joperaw taħt dawn l-iskemi huma marbutin taħt is-sorveljanza ta' l-uffiċjali tad-dwana skond it-Taqsima 65 ta' l-Att dwar id-Dwana.

(55)

Dawn huma legalment obbligati li jżomm rendikont xieraq ta' l-importazzjonijiet kollha, tal-konsum u l-użu tal-materjali kollha importati u ta' l-esportazzjonijiet magħmula skond 6.11.1 HOP 2004-2009. Dawn id-dokumenti għandhom jiġu sottomessi perijodikament, lill-awtoritajiet kompetenti permezz ta' rapporti tal-progress kull tliet xhur u kull sena.

(56)

Madankollu, “fl-ebda ħin ma għandha [EOU] tkun meħtieġa li tikkorrelata kull kunsinna ta' importazzjoni ma' l-esportazzjonijiet tagħha, it-trasferiment lejn unitajiet oħra, il-bejgħ f'DTA jew ħażniet”, kif issostni t-taqsima 6.11.2 tal-HOP I 2004-2009.

(57)

Il-bejgħ domestiku huwa mibgħut u rrekordjat fuq bażi ta' awto-ċertifikazzjoni. Il-proċess ta’ dispaċċ ta' kunsinni għall-esportazzjoni ta' EOU huwa sorveljat minn uffiċjal tad-dwana/sisa, li jkun stazzjonat b'mod permanenti fl-EOU.

(58)

Fil-każ preżenti, l-EOUS intużat minn tnejn mill-kumpanniji li kkooperaw. Dawn l-esportaturi li kkollaboraw użaw l-iskema biex jimportaw materja prima u prodotti kapitali mingħajr dazju ta' l-importazzjoni, biex jakkwistaw prodotti lokalment mingħajr dazju tas-sisa u biex jiksbu rimborż tat-taxxa fuq il-bejgħ u biex ibigħu parti mill-produzzjoni tagħhom fis-suq domestiku. Waħda mill-kumpanniji esportaturi użat ukoll l-iskema biex tikseb rimborż parzjali tad-dazju mħallas fuq karburanti miksuba mingħand kumpanniji taż-żejt domestiċi. Dawn għalhekk ħadu vantaġġ mill-benefiċċji kollha deskritti fil-premessa taħt (i) sa (v). L-investigazzjoni wriet li l-esportaturi konċernati ma ħadux vantaġġ mill-benefiċċji taħt id-dispożizzjonijiet dwar l-eżenzjoni mit-taxxa fuq it-dħul ta' l-EOUS.

(59)

L-eżenzjonijiet ta' EOU minn żewġ tipi ta' dazji ta' l-importazzjoni (“dazju doganali bażiku” u “dazju doganali speċjali addizzjonali”) u r-rimborż tat-taxxa fuq il-bejgħ huma kontribuzzjonijiet finanzjarji tal-GOI fis-sens ta' l-Artikolu 2(1)(a)(ii) tar-Regolament bażiku. Id-dħul tal-gvern li jkun dovut fin-nuqqas ta' din l-iskema huwa previst, għalhekk, ukoll, jagħti vantaġġ lill-EOU fis-sens ta' l-Artikolu 2(2) tar-Regolament bażiku, minħabba li ffrankat il-likwidità billi ma kellhiex tħallas id-dazji normalment dovuti u billi kisbet rimborż tat-taxxa fuq il-bejgħ.

(60)

L-eżenzjoni mid-dazju tas-sisa u l-ekwivalenti tiegħu ta' dazju fuq l-importazzjoni (“dazju doganali addizzjonali”), madankollu, ma jwasslux għal dħul previst li kieku jkun dovut. Id-dazju tas-sisa u d-dazju doganali addizzjonali, jekk jitħallsu, jistgħu jintużaw bħala kreditu għad-djun doganali futuri tagħha stess (l-hekk imsejjaħ “mekkaniżmu CENVAT”). Għalhekk, dawn id-dazji mhumiex definittivi. Permezz tal-kreditu “CENVAT”, valur miżjud biss iġorr dazju definittiv, mhux il-materjali ta' l-input.

(61)

Għaldaqstant, huma biss l-eżenzjoni mid-dazju doganali bażiku, id-dazju doganali speċjali addizzjonali, ir-rimborż parzjali tad-dazju mħallas fuq karburanti miksuba mingħand kumpanniji taż-żejt domestiċi u r-rimborż tat-taxxa fuq il-bejgħ li jikkostitwixxu sussidji fis-sens ta' l-Artikolu 2 tar-Regolament bażiku. Dawn huma kontinġenti fil-liġi fuq il-prestazzjoni ta' l-esportazzjoni, u għalhekk meqjusa bħala speċifiċi u kumpensatorji skond l-Artikolu 3(4)(a) tar-Regolament bażiku. L-objettiv ta' l-esportazzjoni ta' EOU kif stabbilit fil-paragrafu 6.1 tal-politika EXIM 02-07 huwa kundizzjoni indispensabbli sabiex jinkisbu l-inċentivi.

(62)

Wieħed mill-esportaturi li kkollaboraw sostna li l-Kummissjoni kienet telqet mir-raġunament użat fl-investigazzjoni oriġinali f'termini ta' l-evalwazzjoni ta' l-eżenzjoni mid-dazju tal-materji primi u li remissjoni eċċessiva biss, jekk ikun hemm, għandha tiġi kkumpensata. Madankollu, bi tweġiba għal dan, ta' min jinnota li fiż-żmien ta' l-investigazzjoni oriġinali, fl-evalwazzjoni ta' l-ammont li jista' jiġi kkumpensat, il-kwistjoni dwar jekk l-EOU kinitx sistema permissibbli ta' rifużjoni tad-dazju jew le saret “mingħajr preġudizzju għall-kwistjoni ta' jekk l-iskema tikkostitwixxix sistema ta' rifużjoni tad-dazju konformi mad-dispożizzjonijiet tar-Regolament bażiku” (9). Fil-qafas ta' din ir-reviżjoni, l-iskema kollha kemm hi, flimkien mas-sistema ta' monitoraġġ, ġew investigati bir-reqqa.

(63)

L-investigazzjoni żvelat li dawn is-sussidji ma jistgħux jitqiesu bħala sistemi permissibbli ta' rifużjoni tad-dazju jew sistemi sostituti ta' rifużjoni fis-sens ta' l-Artikolu 2(1)(a)(ii) tar-Regolament bażiku. Huma ma jikkonformawx mar-regoli stretti stabbiliti fl-Anness I (punti (h) u (i)), fl-Anness II (definizzjoni u regoli għar-rifużjoni) u fl-Anness III (definizzjoni u regoli għar-rifużjoni ta' sostituzzjoni) għar-Regolament bażiku. Fiċ-ċirkustanza li d-dispożizzjonijiet dwar ir-rimborż tat-taxxa fuq il-bejgħ u l-eżenzjoni mid-dazju fuq l-importazzjoni jintużaw għax-xiri ta' prodotti kapitali, dawn diġà mhumiex konformi mar-regoli għal sistemi permessi ta' rifużjoni peress li l-prodotti kapitali ma jiġux ikkunsmati fil-proċess tal-produzzjoni, kif meħtieġ mill-Anness I punt (h) (rimborż ta' taxxa fuq il-bejgħ) u (i) (remissjoni ta' dazji fuq l-importazzjoni).

(64)

Barra minn hekk, ma ġiex stabbilit li l-GOI għandu fis-seħħ sistema ta' verifika jew proċedura effettiva sabiex tikkonferma jekk u f'liema ammonti l-inputs akkwistati mingħajr dazju u/jew taxxa fuq il-bejgħ ġew ikkunsmati fil-produzzjoni tal-prodott esportat (Anness II(II)(4) għar-Regolament bażiku u, fil-każ ta' skemi ta' rifużjoni ta' sostituzzjoni, L-Anness III(II)(2) għar-Regolament bażiku). Is-sistema ta' verifika fis-seħħ timmira li tissorvelja l-obbligu tan-Net foreign exchange earning u mhux il-konsum ta' l-importazzjonijiet f'relazzjoni mal-produzzjoni tal-prodotti esportati.

(65)

EOU hija permessa li tbigħ ammont sinifikanti mill-produzzjoni tagħha, sa 50 % tal-fatturat annwali tagħha, fis-suq domestiku. Għalhekk, ma jeżisti l-ebda obbligu legali biex jiġi esportat l-ammont totali tal-prodotti manifatturati li jirriżultaw. Barra minn hekk, dawn l-operazzjonijiet domestiċi jsiru mingħajr is-superviżjoni u l-kontroll ta' uffiċjal tal-gvern u huma soġġetti biss għal proċedura ta' awto-ċertifikazzjoni. Konsegwentement, il-bonded premises ta' EOU huma mill-anqas parzjalment mhux soġġetti għal kontroll fiżiku mill-awtoritajiet Indjani. Dawn iċ-ċirkustanzi jżidu l-importanza ta' aktar elementi ta' verifika, b'mod partikolari l-kontroll tar-rabta bejn l-inputs mingħajr dazju u l-prodotti riżultanti għall-esportazzjoni sabiex jikkwalifikaw bħala sistema ta' verifika tar-rifużjoni tad-dazju.

(66)

Rigward l-introduzzjoni ta' aktar miżuri ta' verifika ta' min ifakkar li, EOU hija diġà de jure u fl-ebda ħin meħtieġa li tikkorrelata kull kunsinna impurtata mal-prodott korrispondenti li jirriżulta. Huwa biss jekk ikunu fis-seħħ tali kontrolli li l-awtoritajiet Indjani jkunu kapaċi jiksbu informazzjoni suffiċjenti dwar id-destinazzjoni finali ta' l-inputs sabiex jippermettu kontroll effiċjenti li l-eżenzjonijiet mid-dazju/taxxa fuq il-bejgħ ma jaqbżux l-inputs għall-produzzjoni ta' l-esportazzjoni. Id-dikjarazzjonijiet tat-taxxa ta' kull xahar għall-bejgħ domestiku fuq bażi ta' self-assessment, li jiġu evalwati perijodikament mill-awtoritajiet Indjani, mhumiex biżżejjed. Barra minn hekk, l-iskop tad-dikjarazzjonijiet tat-taxxa ta' kull xahar huwa li jitwettaq monitoraġġ fuq id-dazji tas-sisa u mhux biex tiġi kkontrollata d-destinazzjoni ta' l-inputs. Is-sistemi interni ta' kumpannija, li jinżammu mingħajr obbligu legali, bħala tali mhumiex biżżejjed minħabba li sistema ta' verifika tar-rifużjoni tad-dazju jeħtieġ li tkun imfassla u infurzata minn gvern u m'għandhiex titħalla fid-diskrezzjoni ta' l-amministrazzjoni ta' kull kumpannija individwali konċernata. Konsegwentement, l-investigazzjoni stabbiliet li l-EOU hija espliċitament mhix meħtieġa mill-politika EXIM Indjana tirrekordja r-rabta bejn l-materjali ta' l-input u l-prodott lest u ma ġie stabbilit l-ebda mekkaniżmu ta' kontroll effettiv mill-GOI sabiex jiddetermina liema inputs ġew ikkunsmati fil-produzzjoni għall-esportazzjoni u f'liema ammonti.

(67)

Ukoll, il-GOI ma wettaqx ukoll eżami ieħor ibbażat fuq l-inputs attwali involuti, għalkemm dan normalment ikun meħtieġ fin-nuqqas ta' sistema effettiva ta' verifika (Anness II(II)(5) u l-Anness III(II)(3) għar-Regolament bażiku). Barra minn hekk, ma kienet ipprovduta l-ebda evidenza mill-GOI li turi li ma saret l-ebda remissjoni żejda.

(68)

Fid-dawl ta' dan ta' hawn fuq, l-argument tal-kumpannija li l-Kummissjoni kienet telqet mir-raġunament użat fl-investigazzjoni oriġinali f'termini ta' l-evalwazzjoni ta' l-eżenzjoni ta' materja prima mid-dazju u li remissjoni żejda biss, jekk hemm, għandha tiġi kkumpensata għandu jiġi mwarrab.

(69)

Għalhekk, fin-nuqqas ta' sistema permessa ta' rifużjoni tad-dazju jew sistema ta' rifużjoni ta' sostituzzjoni, il-benefiċċju ta' kumpens huwa r-remissjoni tad-dazji totali ta' l-importazzjoni (dazju doganali bażiku u dazju doganali speċjali addizzjonali) normalment dovuti ma' l-importazzjoni kif ukoll ir-rimborż tad-dazju mħallas fuq karburanti akkwistati mingħand kumpanniji taż-żejt domestiċi u r-rimborż tat-taxxa fuq il-bejgħ, matul ir-RIP.

(70)

L-ammont ta' sussidju għall-esportaturi li huma EOUS ġie kkalkulat fuq il-bażi tad-dazji ta' l-importazzjoni previsti (dazju doganali bażiku u dazju doganali speċjali addizzjonali) fuq il-materjali importati għall-EOU kollha kemm hi, it-taxxa tal-bejgħ rimborżata, u r-rimborż ta' dazji mħallsa fuq karburanti mixtrija lokalment matul ir-RIP kollu. Il-ħlasijiet neċessarjament magħmula sabiex jinkiseb is-sussidju ġew imnaqqsa skond l-Artikolu 7(1)(a) tar-Regolament bażiku minn din is-somma sabiex inkiseb l-ammont tas-sussidju bħala numeratur. Skond l-Artikolu 7(2) u 7(3) tar-Regolament bażiku dan l-ammont ta' sussidju ġie allokat fuq il-fatturat ta' l-esportazzjoni matul ir-RIP bħala denominatur xieraq, minħabba li s-sussidju huwa dipendenti fuq il-prestazzjoni ta' l-esportazzjoni u ma jingħatax b'referenza għall-kwantitajiet manifatturati, prodotti, esportati jew trasportati. Il-marġni ta' sussidju miksuba b'dan il-mod kienu 0,9 % u 5,8 % rispettivament għaż-żewġ kumpanniji.

(71)

Il-prodotti kapitali mhumiex fiżikament inkorporati fil-prodotti lesti. Skond l-Artikolu 7(3) tar-Regolament bażiku, il-benefiċċju għall-kumpanniji investigati ġie kkalkulat fuq il-bażi ta' l-ammont ta' dazju doganali mhux imħallas fuq prodotti kapitali importati mifruxa matul perijodu li jirrifletti l-perijodu ta' deprezzament normali ta' tali prodotti kapitali fil-kumpanniji investigati. Sabiex jiġi stabbilit tali perijodu ta' deprezzament normali, il-perjodi attwali ta' deprezzament użati miż-żewġ esportaturi li kkollaboraw intużaw bħala referenza, jiġifieri 18-il sena. L-ammont ikkalkulat b'dan il-mod huwa għalhekk attribwibbli għar-RIP u ġie aġġustat billi żdied l-imgħax matul dan il-perijodu sabiex jirrifletti l-valur tal-benefiċċju maż-żmien u b'hekk jiġi stabbilit il-benefiċċju sħiħ ta' din l-iskema għar-riċevitur. Skond l-Artikolu 7(2) u 7(3) tar-Regolament bażiku dan l-ammont ta' sussidju ġie allokat fuq il-fatturat ta' l-esportazzjoni matul ir-RIP bħala denominatur xieraq, minħabba li s-sussidju huwa dipendenti fuq il-prestazzjoni ta' l-esportazzjoni u ma jingħatax b'referenza għall-kwantitajiet manifatturati, prodotti, esportati jew trasportati. Il-marġni ta' sussidju miksuba b'dan il-mod għaż-żewġ kumpanniji kienu 1,8 % u 0,4 % rispettivament.

(72)

Għalhekk, il-marġni totali ta' sussidju taħt l-EOUS għall-kumpanniji konċernati jammonta għal 2,7 % u 6,2 % rispettivament.

(73)

Id-deskrizzjoni dettaljata ta' l-iskema tinsab fit-taqsima 4.1 sa 4.1.14 tal-politika EXIM 2004-2009 u fil-kapitoli 4.1 sa 4.30 tal-HOP I 2004-2009.

(74)

L-ALS tikkonsisti minn sitt sottoskemi, kif deskritt f'aktar dettall hawn taħt. Dawk is-sottoskemi fost l-oħrajn ivarjaw fl-iskop ta' l-eliġibbiltà. Il-produtturi-esportaturi u n-negozjanti-esportaturi “marbuta” ma' produtturi ta' sostenn huma eliġibbli għall-esportazzjonijiet fiżiċi ta' l-ALS u għar-rekwiżit annwali ta' l-ALS. Il-produtturi-esportaturi li jfornu lill-esportatur finali huma eliġibbli għall-ALS għall-provvisti intermedji. Kuntratturi prinċipali li jfornu lill-kategoriji ta' esportazzjoni preżunta msemmija fil-paragrafu 8.2 tal-politika EXIM 2004-2009, bħall-fornituri ta' unità orjentata lejn l-esportazzjoni (“EOU”), huma eliġibbli għal esportazzjoni preżunta ta' l-ALS. Eventwalment, il-fornituri intermedji li jfornu lill-manifatturi esportaturi huma eliġibbli għal benefiċċji “esportazzjoni preżunta” taħt is-sottoskemi ta' l-Advance Release Order (“ARO”) u tal-back to back inland letter of credit.

(75)

Liċenzi bil-quddiem jistgħu jinħarġu għal:

(76)

Ġie stabbilit li matul ir-RIP, esportatur wieħed li kkollabora kiseb biss konċessjonijiet taħt tliet sottoskemi marbuta mal-prodott konċernat, jiġifieri (i) esportazzjonijiet fiżiċi ALS, (v) esportazzjoni preżunta ARO u (iv) ALS. Għalhekk mhux meħtieġ li tiġi stabbilita l-kumpensabilità ta' (ii) ir-rekwiżit annwali, (iii) il-provvisti intermedji, u (vi) l-iskema tal-back to back inland letter of credit.

(77)

Għal skopijiet ta' verifika mill-awtoritajiet Indjani, detentur ta' liċenza huwa obbligat legalment li jżomm “rendikont veru u xieraq tal-konsum u l-użu ta' oġġetti importati b'referenza għal-liċenza” fil-format speċifikat (kapitolu 4.30 u l-appendiċi 23 HOP I 2004-2009), jiġifieri reġistru tal-konsum attwali (“reġistru skond l-appendiċi 23”). Minn Mejju 2005 l-appendiċi 23 mhux biss irid jinżamm mill-kumpannija iżda jrid jiġi kontrofirmat minn accountant kwalifikat u mibgħut lill-awtoritajiet Indjani. L-obbligu li jiġi sottomess l-Artikolu 23 japplika għal-liċenzi maħruġa wara d-dħul fis-seħħ tar-regoli l-ġodda f'Mejju 2005. L-implimentazzjoni prattika ta' din is-sistema ġdida għalhekk ma setgħetx tiġi verifikata billi ma kien skedat l-ebda rapport relatat ma' dawn il-liċenzi fiż-żmien ta' l-investigazzjoni.

(78)

Fir-rigward tas-sottoskemi (i), (iv) u (v) imsemmija hawn fuq, kemm il-konċessjoni għall-importazzjoni kif ukoll l-obbligu ta' l-esportazzjoni (inkluż l-esportazzjoni preżunta) huma ffissati fil-volum u l-valur mill-GOI u dokumentati fuq il-liċenza. Barra dan, fil-waqt ta' l-importazzjoni u ta' l-esportazzjoni, l-operazzjonijiet korrispondenti għandhom jiġu dokumentati mill-uffiċjali tal-Gvern fuq il-liċenza. Il-volum ta' l-importazzjonijiet permess taħt din l-iskema jiġi stabbilit mill-GOI fuq il-bażi ta' normi standard ta' dħul u ħruġ (“SIONs — standard input-output norms”). Jeżistu SIONs għall-biċċa l-kbira tal-prodotti fosthom il-prodott konċernat u huma ppubblikati fil-HOP II 2004-2009.

(79)

Il-materjali impurtati għall-produzzjoni mhumiex trasferibbli u jridu jintużaw biex isir il-prodott li jirriżulta għall-esportazzjoni. L-obbligu ta' l-esportazzjoni jrid jiġi sodisfatt fi żmien stabbilit wara l-ħruġ tal-liċenza (18-il xahar b'żewġ estensjonijiet possibbli ta' 6 xhur-il wieħed).

(80)

Id-detentur ta' liċenza bil-quddiem li jkollu l-intenzjoni jġib l-inputs minn sorsi domestiċi, minflok importazzjonijiet diretti għandu l-għażla li jġibhom kontra Ordnijiet ta' Rilaxx bil-Quddiem (ARO — Advance Release Orders). F'każijiet bħal dawn il-liċenzi bil-quddiem jiġu validati bħala ARO's u jiġu ffirmati lill-fornitur mal-kunsinna ta' l-oġġetti speċifikati fihom.

(81)

Matul l-investigazzjoni ta' reviżjoni, ġie stabbilit li l-materjali importati għall-produzzjoni skond il-konċessjoni ta' l-importazzjoni SIONs bla dazju taħt id-diversi sottoskemi mill-esportatur li kkollabora, kienu aktar mill-materjal meħtieġ biex tiġi manifatturata l-kwantità ta' referenza tal-prodott li jirriżulta għall-esportazzjoni. Għalhekk, is-SIONs għall-prodott konċernat ma kinux preċiżi.

(82)

L-eżenzjoni mid-dazji ta' l-importazzjoni hija sussidju fis-sens ta' l-Artikolu 2(1)(a)(ii) u l-Artikolu 2(2) tar-Regolament bażiku, jiġifieri kontribuzzjoni finanzjarja tal-GOI li tagħti benefiċċju lill-esportaturi investigati.

(83)

Barra minn hekk, l-“esportazzjonijiet fiżiċi” ALS huma kontinġenti b'mod ċar fil-liġi fuq il-prestazzjoni ta' l-esportazzjoni, u għalhekk meqjusa bħala speċifiċi u kumpensabbli skond l-Artikolu 3(4)(a) tar-Regolament bażiku. Mingħajr impenn li tesporta, kumpannija ma tistax tikseb benefiċċji taħt dawn l-iskemi.

(84)

L-esportazzjoni preżunta ta' l-ALS hija de facto kontinġenti fuq il-prestazzjoni ta' l-esportazzjoni. Hija ntużat biss minn kumpannija waħda daqsxejn u meta forniet biss EOUs jew unitajiet f'SEZ, iż-żewġ kategoriji msemmija fil-paragrafu 8.2(b) tal-politika EXIM 02-07. Din il-kumpannija qalet li l-klijenti tagħha eventwalment esportaw il-prodott konċernat. L-għan ta' EOU/SEZ huwa esportazzjoni kif stabbilit fil-paragrafu 6.1 tal-politika EXIM 02-07. Għalhekk, fornitur domestiku jikseb benefiċċji taħt l-esportazzjoni preżunta ta' l-ALS, għax il-GOI jantiċipa l-qligħ mill-esportazzjoni suċċessivament riċevut minn esportatur li jkun qiegħed f'EOU/SEZ. Skond l-Artikolu 3(4)(a) tar-Regolament bażiku, sussidju għandu jitqies bħala kontinġenti fuq l-esportazzjoni meta l-fatti juru li l-għoti ta' sussidju, għalkemm mhux kontinġenti legalment fuq il-prestazzjoni ta' l-esportazzjoni, ikun fil-fatt marbut mal-qligħ attwali jew mistenni mill-esportazzjoni.

(85)

F'dan il-każ il-kumpannija li kkollaborat ma użatx liċenza bil-quddiem għall-iskop ta' importazzjoni bla dazju. Minflok, il-kumpannija kisbet vantaġġ billi akkwistat materji primi mingħand fornituri domestiċi permezz tal-qlib tal-liċenzi f'ARO. Taħt din l-iskema, id-dritt ta' l-eżenzjoni mit-taxxi u d-dazji jaqa' fuq il-fornitur milli fuq l-esportatur finali, fil-forma ta' rifużjoni/ħlas lura tad-dazji. L-eżenzjoni mit-taxxi/dazji hija disponibbli kemm għal inputs lokali kif ukoll għal inputs importati. L-investigazzjoni żvelat li kien hemm differenza sinifikanti fil-prezz bejn il-materja prima akkwistata permezz tal-fornitur indipendenti lokali bl-użu ta' l-iskema ARO meta mqabbel mal-materja prima akkwistata permezz ta' fornitur lokali fejn ma ntużat ebda liċenza. Il-benefiċċju ta' l-eżenzjoni mid-dazji u t-taxxi ġie mgħoddi permezz ta' prezzijiet aktar baxxi mill-fornitur lill-kumpannija li użat il-materja prima u li hija kkonċernata b'dan il-proċediment. Il-kumpannija setgħet tagħmel distinzjoni ċara bejn il-prezzijiet tax-xiri ta' materja prima bl-użu tal-liċenza u l-prezz imħallas għall-istess materja prima meta ma ntużat ebda liċenza. Il-kumpannija ddefiniet il-benefiċċju miksub b'dan il-mod bħala d-differenza fil-prezz bejn il-provvisti miksuba taħt l-ARO u l-prezz tal-provvisti akkwistati mingħajr tali liċenza.

(86)

L-ebda waħda mit-tliet sottoskemi użati fil-każ preżenti ma tista' titqies bħala sistema permissibbli ta' rifużjoni tad-dazju jew sistema ta' rifużjoni ta' sostituzzjoni fis-sens ta' l-Artikolu 2(1)(a)(ii) tar-Regolament bażiku. Huma ma jikkonformawx mar-regoli stretti stabbiliti fl-Anness I punt (i), fl-Anness II (definizzjoni u regoli għal rifużjoni) u fl-Anness III (definizzjoni u regoli għal rifużjoni ta' sostituzzjoni) għar-Regolament bażiku. Għalkemm il-GOI semma li s-sistema kienet tbiddlet minn Mejju 2005, għandu jkun ċar li dawn il-bidliet ma kellhom ebda impatt fuq l-iskema matul ir-RIP, billi s-sistema ġdida ta' verifika kienet għadha mhix implimentata kompletament. Minkejja l-bidla possibbli tas-sistema ta' verifika mill-GOI, l-investigazzjoni żvelat li matul ir-RIP, il-GOI ma applikax is-sistema ta' verifika tiegħu b'mod effettiv. Lanqas ma applika proċeduri biex jikkonferma jekk u f'liema ammonti l-inputs ġew ikkunsmati fil-produzzjoni tal-prodott esportat (Anness II(II)(4) għar-Regolament bażiku u, fil-każ ta' l-iskemi ta' rifużjoni ta' sostituzzjoni, l-Anness III(II)(2) tiegħu). Is-SIONs għall-prodott konċernat ma kinux preċiżi biżżejjed u kkalkulaw b'mod eċċessiv il-konsum tal-materja prima. L-investigazzjoni żvelat li s-SIONs qegħdin jiġu emendati sabiex jirriflettu aħjar il-konsum ta' l-inputs iżda dawn is-SIONs ġodda ma kinux fis-seħħ matul ir-RIP. Għalhekk, huwa kkonfermat li s-SIONs infushom ma jistgħux jitqiesu bħala sistema ta' verifika tal-konsum attwali, billi dawn in-normi ta' standards ġenerużi ma jippermettux lill-GOI li jivverifika bi preċiżjoni suffiċjenti x'ammont ta' inputs fil-fatt ġew ikkunsmati fil-produzzjoni għall-esportazzjoni. Barra minn hekk, ma sarx kontroll effettiv mill-GOI bbażat fuq reġistru tal-konsum attwali miżmum sewwa (reġistru skond l-appendiċi 23, qabel appendiċi 18), għal-liċenzi użati fir-RIP. Barra dan, il-GOI ma wettaqx investigazzjoni oħra bbażata fuq l-inputs attwali involuti, għalkemm din normalment tkun trid issir fin-nuqqas ta' sistema ta' verifika applikata b'mod effettiv (Anness II(II)(5) u l-Anness III(II)(3) għar-Regolament bażiku), u lanqas ma pprova li ma seħħet l-ebda remissjoni eċċessiva.

(87)

Dawn it-tliet sottoskemi għalhekk huma kumpensatorji.

(88)

Fin-nuqqas ta' sistemi permessi ta' rifużjoni tad-dazju jew sistemi ta' rifużjoni ta' sostituzzjoni, l-ammont tas-sussidju ġie stabbilit, kif muri mill-kumpannija, fuq il-bażi tad-differenza fil-prezz bejn l-istess materja prima mixtrija bil-liċenza jew mingħajrha.

(89)

Skond l-Artikolu 7(2) tar-Regolament bażiku, l-ammont tas-sussidju ġie allokat fuq il-fatturat totali ġġenerat ta' l-esportazzjoni bħala denominatur xieraq, minħabba li s-sussidju huwa kontinġenti fuq il-prestazzjoni ta' l-esportazzjoni u ma ngħatax b'referenza għall-kwantitajiet manifatturati, prodotti, esportati jew trasportati.

(90)

Kumpannija waħda bbenefikat minn din l-iskema matul ir-RIP u kisbet sussidji ta' 20,9 %.

(91)

Instab li ebda wieħed mill-produtturi esportaturi li kkooperaw ma kiseb benefiċċji ta' kumpens taħt l-Iskema ta' Inċentivi dwar it-Taxxa fuq il-Bejgħ ta' Gujarat (GSTIS) jew l-Iskema ta' l-Eżenzjoni mid-Dazju fuq l-Elettriku ta' Gujarat (GEDES). Għalhekk instab li ma kienx meħtieġ li din l-iskema tiġi analizzata aktar fl-ambitu ta' din l-investigazzjoni.

(92)

Id-deskrizzjoni dettaljata tal-WBIS hija stabbilita fin-notifika Nru 588-CI/H tad-Dipartiment tal-Kummerċ u l-Industriji tal-Gvern ta' Bengal tal-Punent (GOWB) tat-22 ta' Ġunju 1999 (WBIS 1999) li kienet sostitwita l-aħħar bin-notifika Nru 134-CI/O/Incentive/17/03/I ta' l-24 ta' Marzu 2004 (WBIS 2004). L-iskema tat numru ta' benefiċċji lir-riċevitur bħal ngħidu aħna ħlas deferit tat-taxxa fuq il-bejgħ, sussidju għall-istallazzjoni ta' prodotti kapitali, u sussidji għall-iżvilupp. L-investigazzjoni stabbiliet li kumpannija waħda kienet ibbenefikat minn dawn l-iskemi fil-passat. Madankollu, l-impatt ta' dawn il-benefiċċji matul ir-RIP kien negliġibbli. Għal din ir-raġuni nstab li ma kienx meħtieġ li jiġu analizzati aktar dawn l-iskemi fl-ambitu ta' din l-investigazzjoni.

(93)

Sabiex jinkoraġġixxi t-tixrid ta' l-industriji fil-Maharashtra lejn iż-żoni anqas żviluppati ta' l-Istat, il-GOI ilu jagħti inċentivi lil unitajiet ta' espansjoni ġdida stabbiliti f'reġjuni li qegħdin jiżviluppaw ta' l-Istat, mill-1964. L-iskema ġiet emendata bosta drabi mill-introduzzjoni tagħha u l-“iSkema ta' l-2001” kienet operattiva mill-1 ta' April 2001 sal-31 ta' Marzu 2006 u wara ġiet estiża għal sena sal-31 ta' Marzu 2007. Il-PSI tal-GOM huwa kompost minn diversi sottoskemi li l-ewlenin fosthom huma: (i) il-ħlas lura tax-taxxa octroi/taxxa tad-dħul, (ii) l-eżenzjoni mid-dazju fuq l-elettriku u (iii) l-eżenzjoni minn taxxi lokali fuq il-bejgħ li skadew fl-24.10.2004. L-investigazzjoni żvelat li l-unika sottoskema użata minn wieħed mill-produtturi esportaturi li kkollaboraw kienet l-eżenzjoni mit-taxxi lokali fuq il-bejgħ.

(94)

Sabiex ikunu eliġibbli, il-kumpanniji jridu bħala regola jinvestu f'żoni anqas żviluppati, jew billi jwaqqfu stabbiliment industrijali ġdid jew billi jagħmlu investiment kapitali ta' skala kbira fl-espansjoni jew fid-diversifikazzjoni ta' stabbiliment industrijali eżistenti. Dawn iż-żoni huma klassifikati f'kategoriji differenti skond l-iżvilupp ekonomiku tagħhom (eż. żoni anqas żviluppati, żoni ħafna anqas żviluppati u żoni l-anqas żviluppati). Il-kriterju prinċipali biex jiġi stabbilit l-ammont ta' l-inċentivi huwa ż-żona li fiha qiegħda jew se tkun qiegħda l-intrapriża u d-daqs ta' l-investiment.

(95)

Taħt l-iskema ta' l-eżenzjoni mit-taxxi fuq il-bejgħ lokali li skadiet f'Ottubru 2004, l-unitajiet magħżula ma kinux meħtieġa li jiġbru taxxi tal-bejgħ fuq l-operazzjonijiet tal-bejgħ tagħhom. Bl-istess mod, l-unitajiet magħżula kienu eżentati mill-ħlas tat-taxxa tal-bejgħ lokali fuq ix-xiri tagħhom ta' prodotti mingħand fornitur li huwa stess ikun eliġibbli għall-iskema. Filwaqt li l-eżenzjoni fir-rigward ta' operazzjonijiet tal-bejgħ ma tagħti ebda benefiċċju lill-unità tal-bejgħ magħżula, l-eżenzjoni fir-rigward ta' operazzjonijiet tax-xiri, madankollu, tagħti benefiċċju lill-unità tax-xiri magħżula. L-investigazzjoni stabbiliet li l-kumpannija konċernata gawdiet minn eżenzjoni mit-taxxa tal-bejgħ sa l-24 ta' Ottubru 2006.

(96)

Il-PSI tal-GOM tipprovdi sussidji fit-tifsira ta' l-Artikolu 2(1)(a)(ii) u l-Artikolu 2(2) tar-Regolament bażiku. Is-sottoskema eżaminata tikkostitwixxi kontribut finanzjarju mill-GOM, billi din il-konċessjoni tnaqqas id-dħul tal-GOM li kieku ried jitħallas. Barra minn hekk, din l-eżenzjoni/rimborż tagħti benefiċċju lill-kumpannija billi ttejjeb il-likwidità tal-kumpannija.

(97)

Is-sottoskema hija disponibbli biss għal kumpanniji li jkunu investew f'ċerti żoni ġeografiċi magħżula fi ħdan il-ġurisdizzjoni ta' l-Istat ta' Maharashtra. Hija mhix disponibbli għal kumpanniji li jinsabu barra minn dawn iż-żoni. Il-livell ta' benefiċċju huwa differenti skond iż-żona konċernata. L-iskema hija speċifika skond l-Artikolu 3(2)(a) u l-Artikolu 3(3) tar-Regolament bażiku u għalhekk hija kumpensatorja.

(98)

Fir-rigward ta' l-eżenzjoni mit-taxxa tal-bejgħ, l-ammont tas-sussidju ġie kkalkulat fuq il-bażi ta' l-ammont tat-taxxa fuq il-bejgħ normalment dovuta matul ir-RIP iżda li baqgħet mhux imħallsa taħt l-iskema. Billi l-iskema ta' l-eżenzjoni mit-taxxa tal-bejgħ skadiet fl-24.10.2004, ġie kkunsidrat biss il-bejgħ mhux imħallas matul il-perijodu 1.10.2004-24.10.2004 billi dan il-perijodu biss kien jaqa' fir-RIP. Skond l-Artikolu 7(2) tar-Regolament bażiku, l-ammont tas-sussidju (numeratur) imbagħad ġie allokat fuq il-fatturat totali tal-kumpannija matul ir-RIP bħala d-denominatur xieraq, minħabba li s-sussidju mhux kontinġenti fuq l-esportazzjoni u ma ngħatax b'referenza għall-kwantitajiet manifatturati, prodotti, esportati jew trasportati. Matul ir-RIP kumpannija waħda bbenefikat mis-sottoskema; madankollu l-ammont tas-sussidju miksub kien anqas minn 9,1 %, jiġifieri negliġibbli.

(99)

L-ammont tas-sussidji kumpensatorji skond id-dispożizzjonijiet tar-Regolament bażiku, espress ad valorem, għall-produtturi esportaturi investigati jvarja bejn 2,7 % u 20,9 %.

(100)

Għalkemm kien hemm livell għoli ta' kooperazzjoni f'termini tal-proporzjon ta' esportazzjonijiet lejn il-Komunità, ta' min jinnota li diversi produtturi esportaturi ma kkooperawx fil-proċediment, fosthom il-produttur esportatur bl-ogħla marġni ta' sussidju fl-investigazzjoni oriġinali. Il-kapaċità u l-produzzjoni tal-produtturi li ma kkollaborawx fl-Indja hija sinifikanti u huwa wkoll probabbli li dawn il-produtturi esportaturi se jkomplu jieħdu vantaġġ mill-benefiċċji taħt l-iskemi ta' sussidju investigati mill-anqas bl-istess rata bħal dik stabbilita fl-investigazzjoni oriġinali.

(101)

Skond l-Artikolu 18(2) tar-Regolament bażiku, ġie eżaminat jekk it-tmiem tal-miżuri fis-seħħ ikunx probabbli li jwassal għal kontinwazzjoni jew ripetizzjoni tas-sussidju.

(102)

Kif stabbilit taħt il-premessi (21) sa (100) hawn fuq, ġie stabbilit li matul ir-RIP, l-esportaturi Indjani tal-prodott konċernat komplew jibbenefikaw minn sussidju kumpensatorju mill-awtoritajiet Indjani. Fil-fatt, il-marġni ta' sussidju misjuba matul ir-reviżjoni kienu ogħla minn dawk stabbiliti matul l-investigazzjoni oriġinali, ħlief għal produttur esportatur wieħed. L-iskemi ta' sussidju kkonċernati jagħtu vantaġġi rikorrenti u ma hemm ebda indikazzjoni li dawn il-programmi se jispiċċaw fil-futur prevedibbli. Fin-nuqqas ta' informazzjoni dwar kif l-emenda għas-sistema ta' verifika ta' l-ALS se tiġi implimentata fil-prattika, ma jistgħu jinġibdu ebda konklużjonijiet dwar l-effett possibbli ta' dawn il-bidliet. Taħt dawn il-kundizzjonijiet, l-esportaturi tal-prodott in kwistjoni se jkomplu jirċievu sussidji kumpensatorji. Kull esportatur huwa eliġibbli għal bosta mill-programmi ta' sussidju. F'dawn iċ-ċirkustanzi, kien ikkunsidrat raġonevoli wieħed jikkonkludi li s-sussidju huwa probabbli li jkompli fil-ġejjieni.

(103)

Peress li ġie muri li s-sussidju ssokta fiż-żmien tar-reviżjoni u huwa probabbli li jkompli fil-ġejjieni, il-kwistjoni tal-probabbiltà ta' ripetizzjoni tas-sussidju hija irrilevanti.

(104)

Il-PET huwa prodott fil-Komunità mill-kumpanniji li ġejjin:

(105)

Il-PET magħmul minn dawn il-kumpanniji kollha jikkostitwixxi l-produzzjoni Komunitarja totali fit-tifsira ta' l-Artikolu 9(1) tar-Regolament bażiku.

(106)

Il-Kummissjoni eżaminat jekk il-produtturi kollaboraturi Komunitarji li talbu jew appoġġjaw it-talba għar-reviżjonijiet ta' skadenza kinux jirrappreżentaw proporzjon prinċipali tal-produzzjoni Komunitarja totali ta' PET. Dawk il-produtturi Komunitarji kienu jammontaw għal 88 % tal-produzzjoni Komunitarja totali ta' PET. Dawk il-produtturi Komunitarji li ma kkollaborawx b'mod sħiħ kienu esklużi mid-definizzjoni ta' l-industrija tal-Komunità. Il-Kummissjoni għalhekk ikkunsidrat li t-tnax-il produttur Komunitarju li kkooperaw b'mod sħiħ jirrappreżentaw l-industrija tal-Komunità fis-sens ta' l-Artikoli 9(1) u 10(8) tar-Regolament bażiku. Fl-investigazzjonijiet oriġinali, l-industrija tal-Komunità rrappreżentat aktar minn 85 % tal-produzzjoni totali ta' PET fil-Komunità f'dak iż-żmien.

(107)

It-tnax-il produttur Komunitarju li ġejjin jikkostitwixxu l-industrija tal-Komunità.

(108)

Il-konsum tal-Komunità ġie stabbilit fuq il-bażi tal-volumi tal-bejgħ ta' l-industrija tal-Komunità, ta' l-istimi tal-bejgħ tal-produtturi Komunitarji l-oħra fis-suq tal-Komunità bbażati fuq l-informazzjoni pprovduta fl-istadju ta' l-ilment, u data tal-Eurostat dwar l-importazzjonijiet kollha fil-Komunità minn pajjiżi terzi.

(109)

Bejn l-2002 u r-RIP, il-konsum Komunitarju tal-prodott konċernat fil-Komunità żdied kontinwament biex laħaq total ta' 2 400 000 tunnellata fir-RIP. Iż-żieda globali matul dan il-perijodu kienet ta' 18 %. Din iż-żieda kienet parzjalment dovuta għal applikazzjonijiet ġodda (fliexken tal-birra u ta' l-inbid, fost l-oħrajn) u parzjalment minħabba ż-żieda fil-konsum fil-pajjiżi tas-sħubija.

Tabella 1

(110)

Bejn l-2002 u r-RIP, l-importazzjonijiet totali mill-Indja żdiedu bi 13 %. Filwaqt li l-importazzjonijiet naqsu bi 17 % mill-2002 sa l-2003, huma żdiedu b'100 punt perċentwali fl-2004 u reġgħu naqsu matul ir-RIP għal madwar 6 800 tunnellata, jiġifieri b'madwar 70 punt perċentwali. Il-prezzijiet ta' l-importazzjoni żdiedu b'5 punti perċentwali fl-2003 u bi 3 u 7 punti perċentwali oħra rispettivament fl-2004 u matul ir-RIP. Din ix-xejra tal-prezzijiet tirrifletti biss parzjalment iż-żieda qawwija fil-prezzijiet tal-materja prima. Is-sehem tas-suq ta' l-importazzjonijiet Indjani baqa' relattivament żgħir matul il-perijodu kollu kkunsidrat, jiġifieri 0,3 % fl-2002, 0,2 % fl-2003, 0,5 % fl-2004 u 0,3 % fir-RIP.

Tabella 2

(111)

Il-volum ta' l-importazzjonijiet minn pajjiżi terzi oħra żdied b'25 punt perċentwali matul il-perijodu kkunsidrat. L-akbar żieda kienet osservata fl-2003, meta l-importazzjonijiet żdiedu b'41 punt perċentwali. Wara l-impożizzjoni ta' miżuri anti-dumping fuq esportazzjonijiet Ċiniżi fl-2004, l-importazzjonijiet naqsu b'14-il punt perċentwali fl-2004 u b'żewġ punti perċentwali oħra fir-RIP. L-ishma tas-suq segwew xejra simili biex għaddew minn 15,9 % fl-2004 għal 20,6 % fl-2003, għal 18,5 % fl-2004 u għal 16,9 % matul ir-RIP. Iż-żieda fis-sehem tas-suq ta' l-importazzjonijiet kienet aktar baxxa miż-żieda ta' l-importazzjonijiet f'termini assoluti, minħabba l-konsum aktar qawwi. Bħala medja, il-prezzijiet ta' l-importazzjoni kienu kostantement aktar baxxi mill-prezzijiet ta' l-UE bejn l-2002 u l-2004. Kien biss matul ir-RIP li dawn kienu daqsxejn 'il fuq mill-prezzijiet ta' l-industrija tal-Komunità.

Tabella 3

(112)

Fil-bidu ta' l-evalwazzjoni, kien previst teħid ta' kampjuni tal-produtturi Komunitarji iżda minħabba li n-numru tagħhom ma kienx eċċessiv, kien deċiż li jiġu inklużi kollha kemm huma u l-fatturi tad-dannu ġew evalwati fuq il-bażi ta' l-informazzjoni miġbura fil-livell ta' l-industrija Komunitarja kollha kemm hi.

(113)

Skond l-Artikolu 8(5) tar-Regolament bażiku, il-Kummissjoni eżaminat il-fatturi u l-indiċijiet ekonomiċi rilevanti kollha li kellhom influwenza fuq il-qagħda ta' l-industrija tal-Komunità.

(114)

Il-produzzjoni ta' l-industrija tal-Komunità żdiedet b'20 % bejn l-2002 u r-RIP, jiġifieri minn livell ta' 1 465 000 tunnellata fl-2002 għal 1 760 000 tunnellata fir-RIP. Iż-żieda annwali kienet ta' 4,8 % fl-2003 u 4,6 % fl-2004. Żieda oħra seħħet fir-RIP, meta l-produzzjoni żdiedet b'150 000 tunnellata, jiġifieri b'10,8 B. Dan kien dovut għall-proċess ta' ristrutturazzjoni mwettaq mill-industrija bil-għan li tikkontrolla aħjar l-ispejjeż tal-produzzjoni u b'hekk tieħu vantaġġ mill-konsum dejjem akbar fis-suq tal-Komunità li, kif ingħad fuq, żdied bi 19 % bejn l-2002 u r-RIP (minn 2 miljun tunnellata fl-2002 għal 2,4 miljun tunnellata fir-RIP).

Tabella 4

(115)

Il-kapaċità tal-produzzjoni żdiedet bi 22 % bejn l-2002 u r-RIP, jiġifieri minn livell ta' 1 760 000 tunnellata fl-2002 għal 2 156 000 tunnellata fir-RIP. Din iż-żieda seħħet prinċipalment fir-RIP, meta l-kapaċità tal-produzzjoni, imqabbla mas-sena 2004, żdiedet bi 300 000 tunnellata, jiġifieri 16,7 %. Din iż-żieda sinifikanti fil-kapaċità tal-produzzjoni kienet parallela maż-żieda fil-produzzjoni fuq l-istess perijodu (ara l-premessa 114)). Iż-żieda fil-kapaċità tal-produzzjoni rriżultat minn investimenti addizzjonali f'linji tal-produzzjoni mfassla biex jieħdu vantaġġ mis-suq li qiegħed jikber. L-użu tal-kapaċità żdied b'4 punti perċentwali fl-2003, baqa' f'dan il-livell fl-2004 u mbagħad naqas fir-RIP b'5 punti perċentwali għal-livell ta' 82 %. It-tnaqqis bejn l-2004 u r-RIP irriżulta mit-tnaqqis sinifikanti fil-kapaċità tal-produzzjoni f'dak il-perijodu. Konsegwentement, volum ogħla ta' produzzjoni fir-RIP, meta mqabbel ma' l-2004, ħabat ma' rata aktar baxxa ta' użu tal-kapaċità.

Tabella 5

(116)

Il-volum mibjugħ mill-industrija tal-Komunità fis-suq tal-Komunità żdied b'21 % bejn l-2002 u r-RIP. Tkabbir ta' 2 % fl-2003 kien segwit minn żieda kemm fl-2004 kif ukoll fir-RIP, ta' 8 u 11-il punt perċentwali rispettivament. Minkejja ż-żieda fil-bejgħ minħabba l-konsum akbar, is-sehem tas-suq ta' l-industrija Komunitarja naqas b'4 punti perċentwali fl-2003 u mbagħad tela' gradwalment b'5 punti perċentwali fl-2004 u 1 punt perċentwali fir-RIP.

Tabella 6

(117)

B'mod ġenerali, għandu jiġi nnutat li s-sehem tas-suq ta' l-industrija tal-Komunità żdied b'2 % fil-perijodu kkunsidrat, li juri li t-tkabbir tagħha baqa' lura meta mqabbel mat-tkabbir fil-konsum tas-suq globali.

(118)

Il-livell ta' impjieg ta' l-industrija tal-Komunità żdied bi 18 % fil-perijodu kkunsidrat. Iż-żieda prinċipali seħħet fl-2003 (11-il punt perċentwali) u fl-2004 (6 punti perċentwali oħra). Għalkemm din ix-xejra 'l fuq kompliet fir-RIP, iż-żieda ammontat biss għal 2 punti perċentwali. Din iż-żieda ta' 18 % matul il-perijodu sħiħ hija marbuta mal-livell tal-produzzjoni li żdied b'20 %.

Tabella 7

(119)

Il-produttività ta' l-industrija Komunitarja, imkejla bħala l-produzzjoni f'tunnellati għal kull persuna impjegata fis-sena, rat żieda globali matul il-perijodu kkunsidrat. Wara li fil-bidu naqset b'6 % fl-2003 meta mqabbla mas-sena 2002 u baqgħet f'dan il-livell fl-2004, meta l-produttività fir-RIP żdiedet b'mod sinifikanti għal aktar minn 8 % meta mqabbla ma' l-2004, perijodu meta l-produzzjoni żdiedet b'mod sinifikanti.

Tabella 8

(120)

Għandu jiġi nnutat li l-produzzjoni taċ-ċippijiet tal-PET hija industrija li tuża kapital kbir u li għalhekk l-ispejjeż tax-xogħol għandhom impatt limitat fuq il-prezz globali tal-prodott. Matul il-perijodu, il-pagi żdiedu bi 12 %, meta mqabbel ma' żieda ta' 20 % fil-prezz globali tal-produzzjoni. Indikatur ieħor sinifikanti huwa l-prezz tal-pagi għal kull tunnellata prodotta. Matul il-perijodu, dan il-prezz naqas b'6 %.

Tabella 9

(121)

Il-prezzijiet tal-bejgħ għal kull biċċa żdiedu minn 924 EUR/tunnellata fl-2002 għal 1 058 EUR/tunnellata fir-RIP. B'mod ġenerali, din it-tendenza kienet tiela’ (bi 15 % fil-perijodu sħiħ). Din iż-żieda hija f'parti kbira konsegwenza taż-żieda fil-prezz tal-materji primi, li hija dovuta għaż-żieda fil-prezz taż-żejt. Għalkemm l-industrija Komunitarja kellha prezzijiet ogħla hija ma kinetx f'pożizzjoni li tgħaddi ż-żieda lis-setturi downstream u tirrifletti b'mod sħiħ iż-żieda fil-prezzijiet tal-materji primi fil-prezzijiet tal-bejgħ tagħha. Dan kien dovut prinċipalment għall-fatt li ż-żieda fil-prezz tal-materji primi kienet ogħla miż-żieda fil-prezzijiet tal-PET. Bil-għan li żżomm is-sehem tagħha tas-suq, l-industrija Komunitarja setgħet iżżid biss moderatament il-prezzijiet tagħha u għalhekk esperjenzat trażżin tal-prezzijiet.

Tabella 10

(122)

Meta wieħed jiftakar li huma meħtieġa madwar 850 kg ta' aċidu tereftaliku ppurifikat (PTA) u 350 kg ta' mono ethylene glycol (MEG) (il-materji primi prinċipali) biex tiġi prodotta tunnellata ta' PET, il-prezzijiet tal-materji primi (PTA u MEG) żdiedu b'mod sinifikanti b'67 % u b'31 % rispettivament bejn l-2002 u r-RIP biex laħqu livell ta' 770 EUR/tunnellata (PTA) u 721 EUR/tunnellata (MEG) (medja tar-RIP). Għalkemm ġie nnotat tnaqqis żgħir fil-prezzijiet tal-PTA fit-tielet kwart ta' l-2005 meta l-prezzijiet niżlu għal-livell ta' 700 EUR/tunnellata, u kien osservat prezz sostanzjalment stabbli għall-MEG, irid jiġi nnotat li l-materji primi jiġu mixtrija bil-quddiem fuq il-bażi ta' kuntratti fit-tul. Konsegwentement, għall-perijodu kkunsidrat, minkejja t-tnaqqis żgħir fil-prezzijiet tal-PTA fit-tmiem tar-RIP, l-industrija tal-Komunità xorta ġġorr il-konsegwenzi tal-prezzijiet miżjuda b'mod sostanzjali. Barra minn hekk, minħabba s-sitwazzjoni fis-suq dinji taż-żejt, il-prezzijiet tal-materji primi għall-produzzjoni tal-PET huma suxxettibbli għal bidliet mhux prevedibbli iżda huma probabbli li jibqgħu f'livell għoli. Dawn il-fatturi kollha jikkontribwixxu għal livell miżjud ta' vulnerabilità tal-produtturi Komunitarji ta' PET. Ta' min jinnota, madankollu, li l-materja prima prinċipali huma prodotti kummerċjati fuq livell globali, u għalhekk għandhom ukoll jaffettwaw lill-produtturi esportaturi Indjani bl-istess mod.

Tabella 11

(123)

B'paragun, il-prezz medju ta' kull biċċa għal kull tunnellata ta' ċippijiet ta' PET prodotta mill-industrija tal-Komunità kien dan li ġej:

Tabella 12

(124)

Matul il-perijodu kkunsidrat, kif indikat fit-tabelli 11 u 12, il-materji primi prinċipali żdiedu b'mod kontinwu (PTA b'67 %, MEG b'31 %), filwaqt li l-prezz globali tal-produzzjoni żdied biss b'21 %. Madankollu, kif muri fit-tabella 10, il-prezzijiet żdiedu biss bi 15 % minħabba l-fatt li l-industrija tal-Komunità ma kinitx f'pożizzjoni li tgħaddi ż-żieda lis-settur downstream u tirrifletti b'mod sħiħ iż-żieda fil-prezz tal-materji primi fil-prezzijiet tal-bejgħ tagħha.

(125)

L-evoluzzjoni tal-ħażniet fuq il-perijodu kollu kkunsidrat, jiġifieri bejn l-2002 u r-RIP hija 'l isfel b'10 %. Madankollu, l-istess bħal fl-investigazzjonijiet oriġinali, il-ħażniet m'għandhomx jitqiesu bħala indikatur siewi fir-rigward tal-PET prodott mill-industrija tal-Komunità, minħabba n-natura staġjonali tas-suq tal-PET matul is-sena. Meta mqabbla mal-produzzjoni, il-ħażniet jirrappreżentaw madwar 5/6 % ta' l-output.

Tabella 13

(126)

Il-qligħ fuq il-bejgħ jirrappreżenta l-profitt iġġenerat mill-bejgħ tal-prodott konċernat fil-Komunità. Ir-redditu fuq l-assi totali u l-likwidità setgħu jitkejlu biss fil-livell ta' l-aktar grupp dejjaq ta' prodotti li kien jinkludi l-prodott simili, skond l-Artikolu 8(8) tar-Regolament bażiku. Barra minn hekk, ir-redditu fuq l-investimenti ġie kkalkulat fuq il-bażi tar-redditu fuq l-assi totali, billi r-redditu fuq l-assi totali huwa meqjus aktar rilevanti għall-analiżi tat-tendenza.

Tabella 14

(127)

B'referenza għat-trażżin tal-prezzijiet li beda fl-2002 u ħabat ma' żieda qawwija fl-importazzjonijiet li huma oġġett ta' dumping mill-PRĊ, mit-Tajwan, mill-Malasja, mill-Korea u mill-Awstralja (sa l-2004), u fl-importazzjonijiet sussidjati mill-Indja, is-sitwazzjoni finanzjarja ta' l-industrija tal-Komunità ddeterjorat u nbidlet f'telf fl-2003. Wara rkupru żgħir fl-2004 minħabba l-miżuri anti-dumping imposti fuq il-PRĊ u l-Awstralja, it-telf żdied għal –3,2 % fir-RIP. Għalhekk huwa nnotat li hemm xejra ċara 'l isfel.

(128)

Ix-xejriet għar-redditu fuq l-assi totali u għal-likwidità żviluppaw b'mod simili, jiġifieri wrew qagħda relattivament tajba fl-2002, deterjorament qawwi fl-2003, irkupru żgħir fl-2004 u deterjorament ieħor fir-RIP.

(129)

L-investimenti kienu biċċa ddedikati għal żieda tal-kapaċità u biċċa għat-titjib tal-proċess tal-produzzjoni. Il-parti l-kbira tan-nefqa saret fl-2004 u matul ir-RIP, li ħabat maż-żieda tal-kapaċità u mal-mira li jinżamm is-sehem tas-suq fid-dawl tal-konsum akbar. Madankollu, is-sitwazzjoni attwali ta' l-industrija Komunitarja u l-evoluzzjoni tas-swieq tal-Komunità u dinjija għall-PET ikkaratterizzati minn nuqqas ta' qligħ ma kinux inċentiv biex wieħed jagħmel investimenti eċċessivi. Għalkemm f'xi ċirkustanzi l-produtturi Komunitarji kienu kapaċi jkabbru l-kapital (b'mod partikolari minn kumpanniji relatati), in-nuqqas ta' qligħ tal-PET ma inkoraġġiex l-investiment u f'xi każijiet id-deċiżjoni kienet posposta.

(130)

Rigward l-impatt tad-daqs tal-marġni attwali tas-sussidju ta' l-importazzjonijiet Indjani fuq l-industrija tal-Komunità, fid-dawl tas-sensittività għall-prezzijiet tas-suq għal dan il-prodott, dan l-impatt ma jistax jitqies li kien negliġibbli. Ta' min jinnota li dan l-indikatur huwa aktar rilevanti fil-kuntest tal-probabbiltà ta' ripetizzjoni ta' analiżi tad-dannu. Jekk il-miżuri jispiċċaw, huwa probabbli li l-importazzjonijiet sussidjati jirritornaw f'tali volumi u prezzijiet li l-impatt tad-daqs tal-marġni ta' sussidju jkun wieħed sinifikanti.

(131)

Filwaqt li l-indikaturi eżaminati hawn fuq juru ċertu titjib f'xi indikaturi ta' l-industrija tal-Komunità, b'referenza għall-impożizzjoni ta' miżuri kumpensatorji definittivi fl-2001, huma jipprovdu wkoll evidenza li l-industrija tal-Komunità għadha fraġli u vulnerabbli.

(132)

Iż-żieda kostanti fil-konsum parzjalment minħabba applikazzjonijiet ġodda (fost l-oħrajn fliexken tal-birra u ta' l-inbid) u parzjalment minħabba ż-żieda fil-konsum fil-pajjiżi ta’ l-adeżjoni, obbligat lill-industrija tal-Komunità li żżid il-kapaċità u l-produzzjoni biex ma titlifx is-sehem tas-suq. Biex isir dan, fl-2004 u matul ir-RIP sar proċess importanti ta' ristrutturazzjoni akkumpanjat minn bidla frekwenti fl-appartenenza tal-produtturi differenti. B'mod parallel, l-għadd ta' linji tal-produzzjoni ġeneralment żdied sabiex isegwi ż-żieda fil-konsum u biex fl-istess ħin jinkisbu ekonomiji ta' skala. Għalhekk, xi indikaturi ekonomiċi, jiġifieri l-konsum, il-produzzjoni tal-kapaċità, il-produzzjoni, il-bejgħ fl-UE u l-impjiegi fil-fatt kellhom xejra pożittiva. Barra dan, il-prezz tal-bejgħ ukoll żdied matul il-perijodu kkunsidrat. Madankollu, dawk l-isforzi kollha ta' ristrutturazzjoni deskritti hawn fuq ma setgħux jikkontrobilanċjaw l-impatt taż-żieda kostanti u massiva fil-prezzijiet tal-materja prima fil-perijodu kkunsidrat. Il-prezzijiet ogħla tal-materja prima ma setgħux jiġu mgħoddija lis-settur downstream fil-livell li kien ikun meħtieġ sabiex jinżamm ċertu livell ta' qligħ. Dan ikkawża deterjorament serju tal-qligħ li naqas minn +2,7 % fl-2002 għal –3,2 % matul ir-RIP. Xejriet negattivi simili kienu osservati għar-redditu fuq l-investimenti u għal-likwidità.

(133)

Dan ħabat mal-livell baxx tal-prezz ta' l-importazzjonijiet mill-pajjiż konċernat li kkontribwixxa b'mod ċar għall-pressjoni 'l isfel fuq il-prezz ta' l-industrija tal-Komunità. Madankollu, minħabba l-volumi żgħar ta' l-importazzjonijiet sussidjati fil-qafas ta' din ir-reviżjoni ta' skadenza, l-enfasi hija fuq il-probabbiltà ta' ripetizzjoni ta' l-analiżi tad-dannu. Għalhekk, minkejja l-iżviluppi apparentement pożittivi fir-rigward tal-produzzjoni, tal-bejgħ u tal-prezz tal-bejgħ, is-sitwazzjoni finanzjarja ġenerali tal-Komunità iddeterjorat u dan huwa rifless fl-iżviluppi negattivi tal-qligħ (minn 2,7 % fl-2002 għal 3,2 % telf fir-RIP), tal-bejgħ esportat, tal-prezz tal-produzzjoni, tar-redditu fuq l-investimenti u tal-likwidità.

(134)

Jekk wieħed iqabbel ix-xejriet ta' hawn fuq ma' dawk deskritti fir-Regolamenti li jimponu miżuri kumpensatorji proviżorji u definittivi, l-evalwazzjoni hija għal darba oħra mħallta. Fir-rigward tas-sehem tas-suq, l-industrija tal-Komunità tilfet punt perċentwali wieħed bejn l-2002 u r-RIP, filwaqt li kienet żiedet ħames punti perċentwali fl-erba' snin qabel ma ġew adottati l-miżuri kumpensatorji definittivi. Mill-banda l-oħra, il-qligħ ta' l-industrija tal-Komunità matul ir-RIP huwa anqas negattiva milli qabel l-impożizzjoni tal-miżuri kumpensatorji definittivi. Konsegwentement, minkejja xi xejriet apparentement pożittivi murija mill-indikaturi tad-dannu, is-sitwazzjoni ta' l-industrija Komunitarja għadha 'l bogħod mil-livelli li wieħed jista' jistenna kieku din irkuprat kompletament mid-dannu misjub fl-investigazzjonijiet oriġinali.

(135)

Għalhekk huwa konkluż li s-sitwazzjoni ta' l-industrija tal-Komunità tjiebet daqsxejn, meta mqabbla mal-perijodu ta' qabel l-impożizzjoni tal-miżuri, iżda għadha fraġli u vulnerabbli ħafna. Barra dan, il-pressjoni tal-prezzijiet mill-importazzjonijiet tal-pajjiż konċernat ma ppermettietx lill-industrija tal-Komunità li tirrifletti b'mod sħiħ iż-żieda fil-prezz tal-materja prima fil-prezzijiet tal-bejgħ tagħha.

(136)

Instab li l-prezz medju ta' l-esportazzjoni ta' bejgħ Indjan għal pajjiżi li mhumiex fl-UE kien konsiderevolment aktar baxx mill-prezz medju ta' l-esportazzjoni għall-Komunità u wkoll taħt il-prezzijiet fis-suq domestiku. Il-bejgħ ta' l-esportatur Indjan lejn pajjiżi mhux ta' l-UE sar fi kwantitajiet sinifikanti, u ammonta għal iżjed minn 95 % tal-bejgħ totali għall-esportazzjoni. Għalhekk, kien ikkunsidrat li, jekk il-miżuri jispiċċaw, l-esportaturi Indjani jkollhom inċentiv biex jittrasferixxu kwantitajiet sinifikanti ta' esportazzjonijiet minn pajjiżi terzi oħra għas-suq aktar attraenti tal-Komunità, f'livelli ta' prezzijiet, li, anki jekk jiżdiedu, probabbli xorta jkunu taħt il-livelli attwali tal-prezzijiet ta' l-esportazzjoni lejn il-Komunità.

(137)

Kif indikat aktar fid-dettall taħt il-premessa (140), il-produtturi esportaturi fl-Indja għandhom il-potenzjal li jżidu l-volumi ta' l-esportazzjoni tagħhom lejn is-suq tal-Komunità. L-Indja kellha tkabbir sinifikanti fil-kapaċità tal-produzzjoni tagħha mil-livell ta' 330 000 tunnellata fl-2003 għal 600 000 tunnellata fl-2005. Skond previżjonijiet tas-suq, hija mistennija li tiżdied b'220 000 tunnellata oħra fl-2008. Fl-2005, il-bejgħ domestiku ammonta għal 220 000 tunnellata u l-esportazzjonijiet għal 290 000 tunnellata (fosthom 6 831 tunnellata lejn l-UE). Fuq il-bażi ta' l-informazzjoni disponibbli, bħala medja, il-kapaċità żejda kurrenti għandha tammonta għal madwar 90 000 tunnellata u għandha tkun ikkunsidrata bħala sinifikanti billi tirrappreżenta madwar 4 % tal-konsum attwali tal-Komunità. Din l-istima hija kkonfermata mir-riżultati tal-produtturi Indjani li kkollaboraw, li kellhom kapaċitajiet żejda sinifikanti.

(138)

Rigward il-livell tal-ħażniet, l-investigazzjoni wriet li l-livell tal-ħażniet miżmuma mill-produtturi Indjani li kkollaboraw ma kienx sinifikanti. Madankollu, għandu jiġi nnutat li l-livell tal-ħażniet mhuwiex fattur importanti billi s-suq għall-PET huwa ċikliku.

(139)

Biex wieħed jikkonkludi, għalkemm l-importazzjonijiet lejn l-UE kienu baxxi, jeżisti riskju li ammont sinifikanti ta' esportazzjonijiet jiġu devjati lejn l-UE.

(140)

Il-produtturi fil-pajjiż konċernat għalhekk għandhom il-potenzjal li jkabbru u/jew jindirizzaw mill-ġdid il-volumi ta' l-esportazzjoni tagħhom lejn is-suq tal-Komunità. L-investigazzjoni wriet li l-produtturi esportaturi li kkollaboraw biegħu l-prodott konċernat bi prezz aktar baxx mill-industrija tal-Komunità. Dawn il-prezzijiet baxxi probabbli jkomplu jiġu imposti jew saħansitra jonqsu fil-livell tal-prezzijiet aktar baxxi imposti fuq il-bqija tad-dinja, kif imsemmi fil-premessa (137), ukoll sabiex jerġa' jinkiseb il-livell ta' ishma tas-suq li kien hemm fil-perijodu qabel ma ġew imposti l-miżuri. Tali mġiba fil-prezzijiet, imsieħba mal-kapaċità ta' l-esportaturi fil-pajjiż konċernat li jwasslu kwantitajiet sinifikanti tal-prodott konċernat lejn is-suq tal-Komunità, b'kull probabbiltà jkollha l-effett li ssaħħaħ ix-xejra tat-tnaqqis tal-prezzijiet fis-suq, b'impatt negattiv mistenni fuq is-sitwazzjoni ekonomika ta' l-industrija tal-Komunità.

(141)

Kif muri fuq, is-sitwazzjoni ta' l-industrija tal-Komunità għadha vulnerabbli u fraġli. Huwa probabbli li jekk l-industrija tal-Komunità tkun esposta għal volumi akbar ta' importazzjonijiet mill-pajjiż konċernat bi prezzijiet sussidjati, dan jirriżulta f'deterjorament tal-bejgħ, ta' l-ishma tas-suq u tal-prezzijiet tal-bejgħ tagħha kif ukoll fid-deterjorament konsegwenti tas-sitwazzjoni finanzjarja, għal-livelli misjuba fl-investigazzjoni oriġinali. Fuq din il-bażi, għalhekk huwa konkluż li t-tneħħija tal-miżuri probabbli tirriżulta f'deterjorament tas-sitwazzjoni diġà fraġli u rikorrenza ta' stat saħansitra aktar dannuż ta' l-industrija tal-Komunità.

(142)

Fuq il-bażi ta' dak li ngħad hawn fuq, huwa konkluż li l-prezzijiet ta' l-importazzjoni wisq probabbli jkunu aktar baxxi fis-suq tal-Komunità fin-nuqqas ta' miżuri kontra s-sussidji, billi l-produtturi fl-Indja jistgħu possibbilment jippruvaw iżidu l-ishma tagħhom tas-suq. Tali mġiba ta' prezzijiet, imsieħba mal-kapaċità tal-produtturi esportaturi fl-Indja li jbigħu kwantitajiet sinifikanti ta' PET fis-suq tal-Komunità, b'kull probabbiltà jkollha effett ta' rafforzar tal-pressjoni fuq il-prezzijiet, b'impatt negattiv mistenni fuq is-sitwazzjoni ta' l-industrija tal-Komunità.

(143)

Skond l-Artikolu 31 tar-Regolament bażiku, ġie eżaminat jekk iż-żamma tal-miżuri kontra s-sussidji eżistenti tkunx kontra l-interess tal-Komunità kollha kemm hi. L-istabbiliment ta' l-interess tal-Komunità kien ibbażat fuq apprezzament ta' l-interessi kollha involuti. L-investigazzjoni preżenti tanalizza sitwazzjoni li fiha kienu diġà fis-seħħ miżuri kontra s-sussidji u taħseb għall-evalwazzjoni ta' kwalunkwe impatt negattiv mhux dovut fuq il-partijiet konċernati minħabba l-miżuri kontra s-sussidji attwali.

(144)

Fuq din il-bażi, ġie eżaminat jekk, minkejja l-konklużjonijiet dwar il-probabbiltà ta' kontinwazzjoni jew rikorrenza ta' sussidju dannuż, kinux jeżistu raġunijiet konvinċenti li jwasslu għall-konklużjoni li mhuwiex fl-interess tal-Komunità li jinżammu l-miżuri f'dan il-każ partikolari.

(145)

Kif spjegat fuq, hemm probabbiltà ċara ta' rikorrenza ta' sussidju dannuż kieku kellhom jitneħħew il-miżuri. Il-produtturi Komunitarji kollha għajr tnejn ikkollaboraw b'mod sħiħ u indikaw l-appoġġ tagħhom għall-miżuri li kienu għaddejjin.

(146)

It-tkomplija tal-miżuri kontra s-sussidji fuq importazzjonijiet mill-Indja għandha tkabbar il-possibilità għall-industrija tal-Komunità li tilħaq livell raġonevoli ta' qligħ billi huwa probabbli li fil-perijodu medju qasir, hija tkun kapaċi żżid il-kwantitajiet tal-bejgħ u b'hekk tibbenefika minn ekonomiji ta' skala u fl-istess ħin huwa probabbli li tkun kapaċi żżid moderatament il-prezz tal-bejgħ tagħha u b'hekk tikseb livell sodisfaċenti ta' profitt. Anki kieku l-importazzjonijiet sussidjati fir-RIP li oriġinaw fl-Indja kienu baxxi u, għalhekk, ma setgħux ikkawżaw dannu serju, huma probabbli li jaffettwaw b'mod negattiv is-sitwazzjoni ta' l-industrija tal-Komunità kieku kellhom jitneħħew il-miżuri kontra s-sussidju. Għalhekk dawn il-miżuri huma essenzjali biex jiggarantixxu l-vijabilità tal-kummerċ taċ-ċippijiet tal-PET ta' l-industrija tal-Komunità, li ilu jiffaċċja kompetizzjoni minn importazzjonijiet sussidjati mill-Indja għal diversi snin.

(147)

Ftit inkisbet kooperazzjoni mill-importaturi/negozjanti, u fost dawk l-importaturi li kkollaboraw, l-ebda wieħed ma kien jixtri mill-Indja. Madankollu, l-importaturi/negozjanti li kkollaboraw setgħu jitqiesu bħala rappreżentattivi billi l-volum tal-bejgħ tagħhom kien jirrappreżenta madwar 5 % tal-konsum ta' l-UE. Huma jippreferu suq bla dazji wkoll jekk ikunu qegħdin igawdu kontinwament riżultati finanzjarji tajba.

(148)

L-investigazzjoni wriet li għad hemm disponibbli sorsi alternattivi ta' provvista b'ebda miżura kontra s-sussidji jew miżura anti-dumping, jiġifieri mill-Messiku, il-Brażil, l-USA, it-Turkija, il-Pakistan, l-Iran u l-Għarabja Sawdita. L-importaturi/negozjanti għalhekk ikunu kapaċi jistrieħu fuq (jew jaqilbu għal) sorsi alternattivi konsiderevoli ta' provvista.

(149)

Meta wieħed jikkunsidra li l-miżuri fis-seħħ ma affettwawx konsiderevolment lill-importaturi, ġie konkluż li ż-żamma tal-miżuri kumpensatorji eżistenti kontra importazzjonijiet li joriġinaw fl-Indja tkompli ma jkollhiex effett negattiv sinifikanti fuq is-sitwazzjoni ta' l-importaturi fil-Komunità.

(150)

Il-Kummissjoni bagħtet kwestjonarji lil 47 konvertitur/utent magħrufa. Kienu biss għaxar konvertituri/utenti b'rappreżentattività globali baxxa li wieġbu għall-kwestjonarju. Skond l-informazzjoni dwar ix-xiri mogħtija fir-risposti tagħhom għall-kwestjonarju, il-konvertituri/utenti kollaboraturi matul ir-IP jirrappreżentaw madwar 20 % tal-konsum Komunitarju totali ta' PET. Matul il-PI huma xtraw 95 % tal-PET tagħhom mingħand produtturi Komunitarji u l-bqija minn importazzjonijiet li joriġinaw f'pajjiżi oħra għajr dak soġġett għal din ir-reviżjoni. Kienu ppreżentati numru ta' argumenti kontra l-impożizzjoni ta' dazji.

(151)

Ħames konvertituri (li jibdlu ċippijiet tal-PET fi preforms u bottle grade u jirrappreżentaw 10 % tal-konsum) wieġbu għall-kwestjonarju. Il-prezz taċ-ċippijiet tal-PET jammonta għal 55 % tal-prodott finali tagħhom (l-aktar preforms). Ġie stabbilit li huma jimportaw kwantitajiet negliġibbli mill-Indja u pajjiżi terzi oħra. Madankollu huma jopponu t-tkomplija tad-dazji fejn qalu li l-miżuri jista' jkollhom l-effett li jgħollu b'mod artifiċjali l-prezzijiet fl-Ewropa.

(152)

Ħames utenti li jirrappreżentaw madwar 10 % tal-konsum ipprovdew informazzjoni pjuttost inkompleta. Il-livell baxx ta' kooperazzjoni mill-utenti l-kbar huwa probabbilment dovut għall-fatt li l-aħħar investigazzjoni dwar l-importazzjonijiet ta' PET mill-PRĊ, mill-Awstralja u mill-Pakistan saret biss sentejn ilu. L-ispejjeż tal-PET jammontaw għal madwar 6/7 % tal-prezz globali u għalhekk huma pjuttost limitati. Għalkemm ma ddikjaraw l-ebda importazzjonijiet mill-Indja, l-istess bħall-konvertituri, huma jopponu l-impożizzjoni ta' dazji billi jsostnu li l-miżuri jista' jkollhom l-effett li jgħollu b'mod artifiċjali l-prezzijiet fl-Ewropa.

(153)

Fid-dawl tas-sitwazzjoni finanzjarja pjuttost tajba ta' l-industrija downstream, kuntrarju għal dik ta' l-industrija Komunitarja, l-ebda konvertitur/utent ma ressaq l-argument li ż-żamma tad-dazji attwali tista' twassal għat-telf ta' impjiegi jew għat-trasferiment tal-faċilitajiet tal-manifattura barra l-pajjiż.

(154)

Barra dan, f'termini ta' output, l-industrija Komunitarja adattat id-daqs tagħha biex jaqbel mal-konsum miżjud u għalhekk huwa probabbli ħafna li l-kapaċità mhix użata tista' tkopri kompletament l-ammont ta' l-importazzjonijiet.

(155)

Meta wieħed iqis li għad hemm sorsi alternattivi ta' provvista bla miżuri kontra s-sussidju jew miżuri anti-dumping, jiġifieri l-Messiku, il-Brażil, l-USA, it-Turkija, il-Pakistan, l-Iran, l-Għarabja Sawdita, l-utenti Komunitarji se jkunu fuq kollox kapaċi jistrieħu fuq (jew jaqilbu għal) fornituri diversifikati tal-prodott konċernat.

(156)

Rigward il-prestazzjoni ta' l-industrija ta' l-utent, l-investigazzjoni wriet li matul il-perijodu kkunsidrat, l-utenti li kkollaboraw żiedu l-fatturat tagħhom, żammu l-impjieg stabbli u pjuttost tejbu l-qligħ globali tagħhom. Għalhekk instab li ma ġewx affettwati b'mod negattiv bil-miżuri kontra s-sussidju.

(157)

Fuq il-bażi ta' dan ta' hawn fuq, huwa konkluż li ż-żamma tal-miżuri eżistenti kontra s-sussidji kontra importazzjonijiet li joriġinaw fl-Indja m'għandhiex ikollha impatt negattiv sinifikanti fuq is-sitwazzjoni ta' l-utenti fil-Komunità.

(158)

Il-fornituri tal-materja prima (mono ethylene glycol (MEG) u aċidu tereftaliku ppurifikat (PTA), DMT u IPA, kollha prodotti petrokimiċi derivattivi tan-nafta, indikaw b'mod ċar l-appoġġ tagħhom għall-miżuri u pprovdew kooperazzjoni tajba. Huma għandhom jibbenefikaw jekk il-miżuri jinżammu billi l-industrija tal-Komunità probabbli tkun kapaċi tirkupra u hekk tippermettilhom li jtejbu l-prestazzjoni tagħhom.

(159)

Wara li kienu kkunsidrati l-fatturi kollha msemmija hawn fuq, ġie konkluż li m'hemmx raġunijiet konvinċenti kontra ż-żamma tal-miżuri preżenti kontra s-sussidji kontra l-Indja.

(160)

Il-partijiet kollha interessati ġew infurmati bil-fatti u l-konsiderazzjonijiet essenzjali li fuq il-bażi tagħhom kien intenzjonat li tiġi rrakkomandata ż-żamma tal-miżuri eżistenti. Huma ngħataw ukoll perijodu biex jagħmlu sottomissjonijiet suċċessivi għal dan il-kxif. Il-Gvern ta' l-Indja għamel kummenti dwar aspetti tad-dannu fejn allega li ma ntweriex li l-industrija tal-Komunità kienet sofriet dannu kontinwu u li l-pressjoni ta' l-importazzjonijiet mill-Indja ma kinetx ir-raġuni għaliex il-produtturi Ewropej ma rriflettewx iż-żieda fil-prezz tal-materji primi fil-prezz tal-bejgħ tagħhom. Ta' min jiftakar li, kif indikat fl-analiżi tas-sitwazzjoni ta' l-industrija tal-Komunità, is-sitwazzjoni finanzjarja tagħha ddeterjorat u, kif spjegat fil-premessa (127), il-livell baxx ta' prezzijiet ta' l-importazzjonijiet mill-pajjiż konċernat ikkontribwixxa b'mod ċar għall-pressjoni 'l isfel fuq il-prezz ta' l-industrija tal-Komunità. Madankollu, minħabba l-volumi żgħar ta' importazzjonijiet sussidjati fil-qafas ta' din ir-reviżjoni ta' skadenza, il-probabbiltà ta' ripetizzjoni tad-dannu kellha tiġi eżaminata. F'dan ir-rigward, kif intqal fil-premessa (127), ġie konkluż li fin-nuqqas ta' miżuri, volum akbar ta' importazzjonijiet mill-Indja bi prezzijiet baxxi jkollu effett negattiv fuq is-sitwazzjoni ta' l-industrija tal-Komunità. Barra dan, esportatur Indjan wieħed allega li fin-nuqqas ta' miżuri, mhux probabbli li l-Indja se tindirizza mill-ġdid il-bejgħ lejn il-Komunità. Dan l-esportatur sostna li s-swieq emerġenti huma aktar attraenti mill-Komunità, li d-domanda Indjana qiegħda tikber malajr u li, għalhekk, ma hija disponibbli ebda kapaċità żejda. Madankollu għandu jitqies li, minkejja żieda tad-domanda fis-suq Indjan, l-investigazzjoni fil-livell tal-kumpanniji indikat kapaċitajiet żejda, kif ikkonfermat ukoll mill-intelliġenza tas-suq. Għalhekk huwa konkluż li ebda wieħed mill-kummenti riċevuti ma kien tali li jbiddel il-konklużjonijiet kontenuti f'dan ir-regolament.

(161)

Minn dan ta' hawn fuq isegwi li, kif ipprovdut bl-Artikolu 21(2) tar-Regolament bażiku, il-miżuri kumpensatorji applikabbli għal importazzjonijiet ta' ċippijiet tal-PET li joriġinaw fl-Indja, għandhom jinżammu. Huwa mfakkar li dawn il-miżuri jikkonsistu minn dazji speċifiċi.

(162)

Ir-rati ta' dazju kumpensatorju tal-kumpanniji individwali speċifikati f'dan ir-Regolament jirriflettu s-sitwazzjoni misjuba matul ir-reviżjoni fir-rigward ta' l-esportaturi li kkollaboraw. Għalhekk, huma applikabbli biss għal importazzjonijiet tal-prodott konċernat manifatturati minn dawn il-kumpanniji u għaldaqstant mill-entitajiet legali speċifiċi msemmija. Importazzjonijiet tal-prodott konċernat manifatturati minn kwalunkwe kumpannija oħra mhux speċifikament imsemmija fil-parti operattiva ta' dan ir-Regolament b'isimha u l-indirizz tagħha, fosthom entitajiet relatati ma' dawk imsemmija b'mod speċifiku, ma jistgħux jibbenefikaw minn dawn ir-rati u għandhom ikunu soġġetti għar-rata ta' dazju applikabbli għall-“kumpanniji l-oħrajn” kollha.

(163)

Kwalunkwe rivendikazzjoni li titlob l-applikazzjoni ta' dawn ir-rati individwali ta' dazju kumpensatorju (eż. wara bidla fl-isem ta' l-entità jew wara t-twaqqif ta' entitajiet ġodda tal-produzzjoni jew bejgħ) għandha tiġi indirizzata lill-Kummissjoni (10) flimkien mat-tagħrif kollu rilevanti, b'mod partikolari kwalunkwe bidla fl-attività tal-kumpannija marbuta mal-produzzjoni, bejgħ domestiku u għall-esportazzjoni assoċjati ma', per eżempju, dik il-bidla fl-isem jew dik il-bidla fl-entitajiet tal-produzzjoni jew tal-bejgħ. Jekk ikun xieraq, u wara konsultazzjoni mal-Kumitat Konsultattiv, ir-Regolament jiġi emendat kif meħtieġ billi tiġi aġġornata l-lista tal-kumpanniji li jibbenefikaw minn rati ta' dazju individwali.

(164)

Sabiex jiġi żgurat infurzar korrett tad-dazju kumpensatorju, il-livell ta' dazju residwu m'għandux japplika biss għall-esportaturi li ma kkollaborawx iżda għandu japplika wkoll għal dawk il-kumpanniji li ma kellhomx esportazzjonijiet matul ir-RIP. Madankollu, dawn il-kumpanniji ta' l-aħħar huma mistiedna, meta jissodisfaw ir-rekwiżiti ta' l-Artikolu 20 tar-Regolament bażiku, sabiex jippreżentaw talba għal reviżjoni skond dak l-Artikolu sabiex ikollhom is-sitwazzjoni tagħhom eżaminata b'mod individwali.