(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutriment ta’ l-annimali u għall-bażi u l-proċeduri biex tingħata din l-awtorizzazzjoni.

(2)

B’konformità ma’ l-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni tal-preparazzjoni stipulata fl-Anness. Din l-applikazzjoni ġiet akkumpanjata mill-partikolaritajiet u d-dokumenti meħtieġa taħt l-Artikolu 7(3) ta’ dan ir-Regolament.

(3)

L-applikazzjoni tikkonċerna l-awtorizzazzjoni tal-preparazzjoni tad-diformat tal-potassju (Formi LHS) bħala addittiv fl-għalf għall-ħnienes (miftuma) u l-ħnieżer għas-simna, biex jiġi kklassifikat fil-kategorija ta’ l-addittivi “addittivi żootekniċi”.

(4)

Il-metodu ta’ analiżi inkluż fl-applikazzjoni għall-awtorizzazzjoni skond l-Artikolu 7(3)(c) tar-Regolament (KE) Nru 1831/2003 jikkonċerna d-determinazzjoni tas-sustanza attiva ta’ l-addittiv ta' l-għalf fl-għalf. Għalhekk il-metodu ta’ analiżi msemmi fl-Anness tar-Regolament ma għandux jinftiehem bħala l-metodu ta’ analiżi tal-Komunità fi ħdan it-tifsira ta’ l-Artikolu 11 tar-Regolament (KE) Nru 882/2004 tal-Parlament Ewropew u tal-Kunsill tad-29 ta’ April 2004 dwar il-kontrolli uffiċjali mwettqa biex jiżguraw il-verifika tal-konformità mal-liġi ta’ l-għalf u ta’ ikel, u mar-regoli tas-saħħa u l-benesseri ta’ l-annimali (2).

(5)

Fl-opinjoni tagħha ta' l-14 ta' Frar 2006, l-Awtorità Ewropea għas-Sigurtà ta' l-Ikel (“l-Awtorità”) tikkonkludi (3) li s-sikurezza ta’ dan l-addittiv għall-konsumatur, l-utent u l-ambjent diġà ġiet stabbilita u mhux se tinbidel bl-użu ġdid propost. Tikkonkludi ulterjorment, li l-użu tal-preparazzjoni ma għandux effett negattiv fuq din il-kategorija ta’ annimali u li l-użu ta’ din il-preparazzjoni tista’ ttejjeb il-parametri żootekniċi (żieda fil-konsum medju ta' kuljum, il-proporzjon ta' l-għalf maż-żieda) għall-ħnienes (miftuma) u l-ħnieżer għas-simna. Tqis li l-pjan ta' sorveljanza wara t-tqegħid fis-suq ipprovdut mill-applikant huwa xieraq. L-opinjoni ta’ l-Awtorità tirrakkomanda miżuri adattati għas-sigurtà ta’ l-utent. Din l-opinjoni tivverifika wkoll ir-rapport dwar il-metodu ta’ analiżi ta’ l-addittiv ta’ l-għalf fl-għalf, imressaq mil-Laboratorju ta’ Referenza tal-Komunità stabbilit mir-Regolament (KE) Nru 1831/2003.

(6)

Il-valutazzjoni ta’ din il-preparazzjoni turi li l-kundizzjonijiet għall-awtorizzazzjoni, stipulati fl-Artikolu 5 tar-Regolament (KE) Nru 1831/2003, ġew sodisfatti. Għaldaqstant, l-użu ta’ din il-preparazzjoni għandu jiġi awtorizzat, kif speċifikat fl-Anness ta' dan ir-Regolament.

(7)

L-Artikolu 1 tar-Regolament tal-Kummissjoni (KE) Nru 1810/2005 ta’ l-4 ta’ Novembru 2005 li jikkonċerna awtorizzazzjoni ġdida għal 10 snin ta' addittiv fl-għalf, l-awtorizzazzjoni permanenti ta' ċerti addittivi fl-għalf u l-awtorizzazzjoni provviżorja ta' użu ġdid ta' ċerti addittivi diġà awtorizzati fl-għalf (4) li kienet stipulat awtorizzazzjoni għal dak l-użu taħt id-dispożizzjonijiet trażitorji tar-Regolament (KE) Nru 1831/2003 għandhom għalhekk jitħassru.

(8)

Il-miżuri stipulati f’dan ir-Regolament huma konformi ma’ l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,