1.3.2007   

MT

Il-Ġurnal Uffiċjali ta’ l-Unjoni Ewropea

17

(1)

Fil-każ ta' ċereali u prodotti li joriġinaw mill-pjanti inklużi frott u ħxejjex, il-livelli ta' residwi jirriflettu l-użu ta' kwantitajiet minimi ta' pestiċidi meħtieġa sabiex jinkiseb ħarsien effettiv ta' pjanti, applikati b'tali mod li l-ammont ta' residwi jkun baxx kemm jista' jkun skond kif inhu aċċettabbli b'mod prattiku u tossikoloġiku, b'qies, b'mod partikolari, tal-ħarsien ta' l-ambjent u l-istima tal-konsum djetetiku tal-konsumaturi. Il-livelli massimi ta' residwi tal-Komunità jirrappreżentaw l-ogħla limitu ta' l-ammont ta' tali residwi li wieħed jista' jistenna li jsib fl-oġġetti meta jkunu ġew rispettati prattiki agrikoli tajbin.

(2)

Il-livelli massimi ta' residwi għall-pestiċidi jinżammu għar-reviżjoni u jinbidlu sabiex titqies l-informazzjoni u d-data ġdida. Il-livelli massimi ta' residwi huma ffissati fl-iktar limitu baxx ta' determinazzjoni analitika fejn użu awtorizzat ta' prodotti ta' ħarsien tal-pjanti ma jirriżultax f'livelli indentifikabbli ta' residwu ta' pestiċidi fi jew fuq il-prodott ta' l-ikel, jew fejn ma hemmx użu awtorizzat, jew fejn użu li ġie awtorizzat minn Stati Membri ma ġewx sostnuti bid-data meħtieġa, jew fejn użu f'pajjiżi terzi jirriżulta f'residwi fi jew fuq prodotti ta' l-ikel li jistgħu jidħlu f'ċirkulazzjoni fis-suq tal-Komunità ma ġewx sostnuti bid-data meħtieġa.

(3)

Stat Membru informa lill-Kummissjoni dwar ix-xewqa tiegħu li jirrevedi l-livelli massimi ta' residwi nazzjonali skond l-Artikolu 8 tad-Direttiva 90/642/KEE fid-dawl ta' tħassib dwar il-konsum mill-konsumatur. Proposti għar-reviżjoni tal-livelli massimi ta' residwi tal-Komunità tressqu quddiem il-Kummissjoni.

(4)

L-esponiment tal-konsumaturi matul ħajjithom kif ukoll għal perjodu qasir għall-pestiċidi msemmija f'din id-Direttiva, permezz tal-prodotti ta' l-ikel, ġew studjati mill- ġdid u vvalutati skond il-proċeduri u l-prattiki Komunitarji, filwaqt li tqiesu l-linji ta' gwida ppubblikati mill-Organizzazzjoni Dinjija tas-Saħħa (2). Fuq din il-bażi, huwa xieraq li jiġu ffissati livelli massimi ġodda ta' residwi, li jiżguraw li ma jkun hemm l-ebda esponiment inaċċettabbli tal-konsumatur.

(5)

Fejn huwa rilevanti, l-esponiment qawwi tal-konsumaturi għal dawk il-pestiċidi permezz ta' kull wieħed mill-prodotti ta' l-ikel li jista' jkun fihom residwi ġie studjat u vvalutat skond il-proċeduri u l-prattiki tal-Komunità, filwaqt li tqiesu l-linji ta' gwida ppubblikati mill-Organizzazzjoni Dinjija tas-Saħħa. Il-konklużjoni hija li l-preżenza ta' residwi ta' pestiċidi fil-livelli massimi ġodda ta' residwi jew taħthom mhijiex se tikkawża effetti tossiċi qawwija.

(6)

Permezz ta' l-Organizzazzjoni Dinjija tal-Kummerċ, l-imsieħba kummerċjali tal-Komunità ġew ikkonsultati dwar l-livelli massimi ġodda ta' residwi u tqiesu l-kummenti tagħhom dwar dawn il-livelli.

(7)

Fuq talba tal-Kummissjoni, l-Awtorità Ewropea għas-Sicurezza Alimentari (AESA) (3) tat opinjoni dwar ir-riskju ta' livelli massimi ta' residwi ta' l-aldicarb f'din id-Direttiva.

(8)

L-Annessi għad-Direttiva 90/642/KEE għalhekk għandhom jiġu emendati skond dan.

(9)

Il-miżuri previsti f'din id-Direttiva huma skond l-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali,