5.12.2007 |
MT |
Il-Ġurnal Uffiċjali ta’ l-Unjoni Ewropea |
L 317/76 |
DEĊIŻJONI TAL-KUMMISSJONI
tat-13 ta’ Settembru 2007
relatata ma’ proċedura skond l-Artikolu 81 tat-Trattat KE
(Każ COMP/E-2/39.140 – DaimlerChrysler)
(notifikata taħt id-dokument numru C(2007) 4275)
(It-Test bl-Ingliż biss huwa awtentiku)
(2007/788/KE)
(1) |
Din id-Deċiżjoni, li ġiet adottata skond l-Artikolu 9(1) tar-Regolament tal-Kunsill (KE) Nru 1/2003, (1) hija indirizzata lil DaimlerChrysler AG (minn issa ‘l quddiem: “DaimlerChrysler”) u tikkonċerna l-provvista ta’ informazzjoni teknika għat-tiswija tal-vetturi tal-marki Mercedes-Benz u Smart. |
(2) |
L-informazzjoni teknika tikkonsisti f’data, fi proċessi u f’istruzzjonijiet li huma meħtieġa sabiex jiġu kkontrollati, imsewwija u sostitwiti partijiet difettużi/miksura/użati ta’ vettura bil-mutur jew sabiex jissewew ħsarat fi kwalunkwe waħda mis-sistemi tal-vettura. L-informazzjoni teknika tinkludi seba’ kategoriji prinċipali:
|
(3) |
F’Diċembru 2006, il-Kummissjoni bdiet proċeduri, u indirizzat valutazzjoni preliminari lil DaimlerChrysler, li kienet tinkludi l-fehma preliminari li l-ftehimiet ta’ DaimlerChrysler ma’ l-imsieħba fis-servizz ta’ wara l-bejgħ tagħha qajmu tħassib dwar il-kompatibbiltà tagħhom ma’ l-Artikolu 81(1) tat-Trattat KE. |
(4) |
Fil-valutazzjoni preliminari tal-Kummissjoni, donnu li DaimlerChrysler naqset milli tirrilaxxa ċerti kategoriji ta’ informazzjoni teknika dwar it-tiswijiet ferm wara tmiem il-perjodu transitorju pprovdut fir-Regolament tal-Kummissjoni (KE) Nru 1400/2002 (2). Barra minn hekk, fiż-żmien meta tnediet l-investigazzjoni tal-Kummissjoni, DaimlerChrysler kienet għadha ma stabbilitx sistema effettiva sabiex is-sewwejja indipendenti jkunu jistgħu jkollhom aċċess għal informazzjoni teknika dwar it-tiswijiet b’mod li jkun separat (unbundled). Għalkemm matul l-investigazzjoni tal-Kummissjoni, DaimlerChrysler tejbet l-aċċessibilità ta’ l-informazzjoni teknika tagħha, prinċipalment billi f’Ġunju 2005 stabbiliet sit web (“is-sit web TI”) maħluq apposta għal dan l-iskop, l-informazzjoni li tqiegħdet għad-dispożizzjoni tas-sewwejja indipendenti donnha ma kinitx kompluta. |
(5) |
Dik il-valutazzjoni preliminari sabet li s-swieq preliminari affetwati mill-prattika in kwistjoni kienu s-suq għall-provvista tas-servizzi ta’ tiswija u ta’ manutenzjoni għall-karozzi tal-passiġġieri, u s-suq għall-provvista ta’ informazzjoni teknika lis-sewwejja. In-netwerks awtorizzati tal-Mercedes-Benz u ta’ Smart kellhom numru ferm kbir ta’ ishma mis-suq fl-ewwel wieħed minn dawn is-swieq, filwaqt li fit-tieni, DaimlerChrysler kienet l-unika fornitriċi li setgħet toffri l-informazzjoni teknika kollha meħtieġa mis-sewwejja għall-vetturi tagħha. |
(6) |
Essenzjalment, il-ftehimiet ta’ servizz u ta’ distribuzzjoni tal-parts ta’ DaimlerChrysler jeħtieġu li l-membri tan-netwerks awtorizzati tagħha jwettqu firxa sħiħa ta’ servizzi ta’ tiswija speċifiċi għall-marka, u jagħmluha ta’ bejjiegħa bl-ingrossa ta’ partijiet tal-bdil. Il-Kummissjoni hija mħassba li effetti negattivi possibbli li ġejjin minn tali ftehimiet jistgħu jissaħħu min-nuqqas ta’ DaimlerChrysler li tipprovdi lil sewwejja indipendenti b’aċċess xieraq għall-informazzjoni teknika biex b’hekk teskludi d-ditti li jkunu lesti u disponibbli joffru servizzi ta’ tiswija permezz ta’ mudell kummerċjali differenti. |
(7) |
Il-konklużjoni preliminari tal-Kummissjoni kienet li l-arranġamenti ta’ DaimlerChrysler sabiex tipprovdi l-informazzjoni teknika tagħha lis-sewwejja indipendenti ma kinux jikkorrispondu għall-ħtiġiet ta’ dawn ta’ l-aħħar la rigward l-ambitu ta’ l-informazzjoni disponibbli u lanqas rigward l-aċċessibbiltà għaliha, u li tali prattika, flimkien ma’ prattiki simili minn manifatturi oħra tal-karozzi, setgħu jikkontribwixxu għal tnaqqis fil-pożizzjoni tas-suq tas-sewwejja indipendenti. Imbagħad, dan seta’ jikkawża dannu konsiderevoli għall-konsumaturi f’termini ta’ tnaqqis sinifikanti fl-għażla ta’ partijiet tal-bdil, prezzijiet ogħla għal servizzi ta’ tiswija, tnaqqis fl-għażla ta’ fejn titwettaq din it-tiswija, kwistjonijiet ta’ sikurezza potenzjali, u nuqqas ta’ aċċess għal ħwienet tat-tiswija innovattivi. |
(8) |
Barra minn hekk, in-nuqqas apparenti min-naħa ta’ DaimlerChrysler li tipprovdi lil sewwejja indipendenti b’aċċess xieraq għall-informazzjoni teknika jista’ jipprevjeni li l-ftehimiet ma’ l-imsieħba fis-servizz ta’ wara l-bejgħ tagħha jibbenefikaw mill-eżenzjoni mogħtija mir-Regolament (KE) Nru 1400/2002, peress li skond l-Artikolu 4(2) tar-Regolament, l-eżenzjoni mogħtija hemmhekk ma tapplikax fejn il-fornitur tal-vetturi bil-mutur jirrifjuta li jagħti aċċess lil operaturi indipendenti għal kwalunkwe informazzjoni teknika, tagħmir dijanjostiku u ta’ xort’oħra, għodod, inkluż kwalunkwe softwer rilevanti, jew taħriġ meħtieġ għat-tiswija u għall-manutenzjoni ta’ dawn il-vetturi bil-mutur. Kif ġie ċċarat fil-premessa 26 tar-Regolament, il-kundizzjonijiet ta’ aċċess ma jridux jiddiskriminaw bejn operaturi awtorizzati u dawk indipendenti. |
(9) |
Fl-aħħarnett, il-Kummissjoni waslet għall-fehma preliminari li fil-kuntest ta’ nuqqas ta’ aċċess għal informazzjoni teknika dwar it-tiswijiet, ma kienx probabbli li l-ftehimiet bejn DaimlerChrysler u s-sewwejja awtorizzati tagħha se jibbenefikaw mid-dispożizzjoni ta’ l-Artikolu 81(3). |
(10) |
Fl-14 ta’ Frar 2007, DaimlerChrysler offriet impenji lill-Kummissjoni sabiex tissodisfa t-tħassib rigward il-kompetizzjoni li kien indirizzat fil-valutazzjoni preliminari. |
(11) |
Skond dawn l-impenji, il-prinċipju li jiddetermina l-ambitu ta’ l-informazzjoni li għandha tiġi pprovduta huwa dak tan-nuqqas ta’ diskriminazzjoni bejn is-sewwejja indipendenti u dawk awtorizzati. F’dan id-dawl, DaimlerChrysler se tiżgura li l-informazzjoni teknika, l-għodod, it-tagħmir, is-softwer u t-taħriġ kollu meħtieġ għat-tiswija u għall-manutenzjoni tal-vetturi tagħha li jiġu pprovduti lis-sewwejja awtorizzati u/jew lill-importaturi indipendenti tal-marki tal-Mercedes-Benz u ta’ Smart fi kwalunkwe Stat Membru ta’ l-UE minn jew f’isem DaimlerChrysler jitqiegħdu wkoll għad-dispożizzjoni tas-sewwejja indipendenti. |
(12) |
L-impenji jispeċifikaw li “l-informazzjoni teknika”, fit-tifsira ta’ l-Artikolu 4(2) tar-Regolament (KE) Nru 1400/2002, tinkludi l-informazzjoni kollha pprovduta lis-sewwejja awtorizzati għat-tiswija jew għall-manutenzjoni tal-vetturi bil-mutur Mercedes-Benz u Smart. Eżempji partikolari jinkludu softwer, kodiċijiet ta’ ħsarat u parametri kollha, flimkien ma’ aġġornamenti, li huma meħtieġa sabiex issir ħidma fuq l-unitajiet ta’ kontroll elettroniċi (ECUs) ħalli jiġu introdotti jew jerġgħu jiġu stabbiliti s-settings rakkomandati minn DaimlerChrysler, metodi ta’ identifikazzjoni tal-vetturi, katalogi tal-parts, soluzzjonijiet ta’ ħidma li jirriżultaw minn esperjenza prattika u li jkunu relatati ma’ problemi li tipikament jaffetwaw mudell jew lott partikolari, u avviżi ta’ tfakkira kif ukoll avviżi oħra li jidentifikaw tiswijiet li jistgħu jitwettqu mingħajr ħlas fin-netwerk tat-tiswija awtorizzata. |
(13) |
L-aċċess għal għodod jinkludi aċċess għal għodod dijanjostiċi elettroniċi u għodod oħra ta’ tiswija, flimkien ma’ softwer relatat, inklużi l-aġġornamenti perjodiċi tiegħu, u servizzi ta’ wara l-bejgħ għal tali għodod. |
(14) |
L-impenji għandhom jorbtu lil DaimlerChrysler u lill-intrapriżi konnessi magħha imma m’għandhomx ikunu direttament vinkolanti fuq l-importaturi indipendenti tal-marki tal-vetturi Mercedes-Benz u Smart. DaimlerChrysler għalhekk qablet li f’dawk l-Istati Membri fejn DaimlerChrysler tqassam il-vetturi Mercedes-Benz u/jew Smart permezz ta’ importaturi indipendenti, se tagħmel mill-aħjar biex tobbliga kuntrattwalment lil dawn l-intrapriżi biex iqiegħdu għad-dispożizzjoni tas-sewwejja indipendenti bla ħlas u b’mod mhux diskriminatorju permezz tas-siti web kummerċjali nazzjonali tagħhom kwalunkwe biċċa informazzjoni teknika jew verżjoni lingwistika ta’ tali informazzjoni li l-importatur in kwistjoni jkun ipprovda lil sewwejja awtorizzati fl-Istat Membru li għalih inħatar u li ma tkunx disponibbli għas-sewwejja indipendenti fuq is-sit web TI. |
(15) |
Skond il-premessa 26 tar-Regolament (KE) Nru 1400/2002, DaimlerChrysler mhix obbligata li tipprovdi lis-sewwejja indipendenti b’informazzjoni teknika li permezz tagħha parti terza tkun tista’ tevita jew iżżarma apparati kontra s-serq abbord il-vettura u/jew tirrikalibra (3) apparati elettroniċi, jew tbagħbas apparati li jillimitaw ir-rendiment ta’ vettura. L-impenji jinnotaw li hekk kif jiġri għal kwalunkwe eċċezzjoni fil-liġi ta’ l-UE, il-premessa 26 għandha tiġi interpretata b’mod dejjaq, u jekk DaimlerChrysler kellha tinvoka din l-eċċezzjoni bħala raġuni sabiex tirrifjuta li tagħti kwalunkwe informazzjoni teknika lis-sewwejja indipendenti, tkun impenjat ruħha li tiżgura li l-informazzjoni li ġiet irrifjutata tkun limitata għal dak li huwa meħtieġ sabiex tkun pprovduta l-protezzjoni deskritta fil-premessa 26, u li n-nuqqas ta’ l-informazzjoni in kwistjoni ma jipprevjenix lis-sewwejja indipendenti milli jwettqu operazzjonijiet għajr dawk elenkati fil-premessa 26, inkluża ħidma fuq apparati bħall-ECUs tal-ġestjoni tal-magna, l-airbags, il-pre-tensioners (it-tagħmir ta’ qabel ma tiġi miżjuda t-tensjoni) taċ-ċinturin tas-sit, jew elementi ta’ sokor ċentrali. |
(16) |
L-Artikolu 4(2) tar-Regolament (KE) Nru 1400/2002 jipprovdi li l-informazzjoni teknika trid tkun disponibbli b’mod li jkun proporzjonat għall-ħtiġiet tas-sewwejja indipendenti. Dan jimplika kemm li l-informazzjoni trid tkun isseparata (unbundled) kif ukoll ipprezzar li jqis sakemm is-sewwejja indipendenti jużaw l-informazzjoni. |
(17) |
Skond dan il-prinċipju, l-impenji jispeċifikaw li DaimlerChrysler se tinkludi fuq is-sit web TI l-informazzjoni teknika kollha relatata ma’ mudelli li ġew imnedija wara l-1996, u se tiżgura li l-informazzjoni teknika aġġornata kollha tkun fuq is-sit web TI jew fuq kwalunkwe sit suċċessur il-ħin kollu. Madankollu, jekk ċerti elementi ta’ informazzjoni teknika relatata ma’ mudelli li ġew imnedija wara l-1996 jew verżjonijiet lingwistiċi tagħhom li DaimlerChrysler jew l-intrapriżi konnessi magħha tipprovdi lis-sewwejja awtorizzati fi Stat Membru partikolari ma jkunux disponibbli fuq is-sit web TI, għandu jitqies li DaimlerChrysler tkun ikkonformat ma’ l-impenji f’dan ir-rigward jekk tkun qiegħdet l-elementi in kwistjoni għad-dispożizzjoni tas-sewwejja indipendenti fuq is-sit web kummerċjali tagħha fl-Istat Membru in kwistjoni mingħajr dewmien mhux xieraq u bla ħlas. |
(18) |
DaimlerChrysler se tiżgura li s-sit web TI jista’ jinstab faċilment il-ħin kollu u li dan jipprovdi livell ekwivalenti ta’ rendiment għall-metodi li jintużaw biex tkun pprovduta informazzjoni teknika lill-membri tan-netwerks awtorizzati tagħha. Meta DaimlerChrysler jew intrapriża oħra li qed taġixxi f’isem DaimlerChrysler tagħmel biċċa informazzjoni teknika disponibbli lis-sewwejja awtorizzati f’lingwa partikolari ta’ l-UE, DaimlerChrysler se tiżgura li din il-verżjoni lingwistika ta’ l-informazzjoni titqiegħed mingħajr dewmien fuq is-sit web TI. |
(19) |
DaimlerChrysler iffissat il-ħlasijiet ta’ aċċess annwali għas-sit web TI għal EUR 1 254 (EUR 1 239 għal aċċess għat-taqsima ewlenija magħrufa bħala n-net tal-WIS; in-net tal-katalogu tal-parts elettroniċi huwa bla ħlas ħlief għal kontribuzzjoni annwali għall-ispejjeż amministrattivi ta’ EUR 15). Madankollu, sabiex ikun irrispettat ir-rekwiżit ta’ proporzjonalità stabbilit fir-Regolament, DaimlerChrysler taqbel li tipprovdi diviżjoni pro rata għal aċċess għan-net tal-WIS f’perjodi ta’ żmien ta’ kull xahar, kull ġimgħa, kuljum u kull siegħa għal prezz ta’ EUR 180, EUR 70, EUR 20, u EUR 4, rispettivament. DaimlerChrysler taqbel li, kemm idumu validi l-impenji, iżżomm din l-istruttura tal-ħlasijiet ta’ aċċess, u mhux se żżid il-livelli tal-ħlasijiet ‘il fuq mir-rata medja ta’ l-inflazzjoni fl-UE. |
(20) |
L-impenji ta’ DaimlerChrysler huma mingħajr preġudizzju għal kwalunkwe rekwiżit kurrenti jew futur stabbilit mill-Komunità jew mid-dritt nazzjonali li jista’ jestendi l-ambitu ta’ l-informazzjoni teknika li DaimlerChrysler għandha tipprovdi lill-operaturi indipendenti u/jew jista’ jistabbilixxi modi aktar favorevoli biex tali informazzjoni tkun ipprovduta. |
(21) |
Jekk sewwej indipendenti jew assoċjazzjoni ta’ tali sewwejja jitlob dan, DaimlerChrysler impenjat ruħha li taċċetta arbitraġġ sabiex jintlaħaq ftehim rigward tilwim relatat mal-provvista ta’ informazzjoni teknika. Dan l-arbitraġġ għandu jkun irregolat mir-regoli nazzjonli ta’ arbitraġġ u mil-liġi sostantiva li DaimlerChrysler qablet dwarhom kuntrattwalment mas-sewwejja awtorizzati tagħha fl-Istati Membri fejn tinsab il-parti li qed tagħmel it-talba. DaimlerChrysler timpenja ruħha li tipprovdi informazzjoni dwar dawn ir-regoli meta tintalab tagħmel dan. It-tribunal ta’ arbitraġġ għandu jikkonsisti minn tliet arbitri maħtura skond dawn ir-regoli. L-arbitraġġ mhu se jippreġudika l-ebda dritt li tkun ippreżentata applikazzjoni quddiem il-qorti nazzjonali kompetenti. |
(22) |
Id-deċiżjoni ssib li, minħabba l-impenji, m’għadx hemm aktar raġunijiet biex tittieħed azzjoni min-naħa tal-Kummissjoni. L-impenji se jkunu vinkolanti sal-31 ta’ Mejju 2010. |
(23) |
Il-Kumitat Konsultattiv dwar il-Prattiki Restrittivi u l-Pożizzjonijiet Dominanti ħareġ opinjoni favorevoli fid-9 ta’ Lulju 2007. |
(1) Ir-Regolament tal-Kunsill (KE) Nru 1/2003 tas-16 ta’ Diċembru 2002 dwar l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat, (ĠU L 1, 4.1.2003, p. 1). Ir-Regolament kif emendat l-aħħar bir-Regolament (KE) Nru 1419/2006, (ĠU L 269, 28.9.2006, p. 1).
(2) Ir-Regolament tal-Kummissjoni (KE) Nru 1400/2002 tal-31 ta’ Lulju 2002 dwar l-applikazzjoni ta’ l-Artikolu 81(3) tat-Trattat fuq kategoriji ta’ ftehim vertikali u prattiċi miftiehma fis-settur tal-vetturi bil-mutur (ĠU L 203, 1.8.2002, p. 30). Ir-Regolament kif emendat bl-Att ta' l-Adeżjoni ta' l-2003.
(3) Jiġifieri timmodifika s-settings oriġinali ta’ ECU b’mod mhux irrakkomandat minn DaimlerChrysler.