27.10.2007   

MT

Il-Ġurnal Uffiċjali ta’ l-Unjoni Ewropea

L 283/63

(1)

Id-Deċiżjoni kienet indirizzata lil Aalberts Industries NV, Aquatis France SAS, Simplex Armaturen + Fittings GmbH & Co. KG, VSH Italia S.r.l., Yorkshire Fittings Limited, Advanced Fluid Connections plc, IBP Limited, International Building Products France SA, International Building Products GmbH, Delta plc, Aldway Nine Limited, Delta Engineering Holdings Limited, Druryway Samba Limited, Flowflex Holdings Ltd, Flowflex Components Ltd, IMI plc, IMI Kynoch Ltd, Mueller Industries Inc, Mueller Europe Ltd, WTC Holding Company Inc, Pegler Ltd, Tomkins plc, FRA.BO S.p.A., Supergrif SL, SANHA Kaimer GmbH & Co. KG, Kaimer GmbH & Co. Holdings KG, Sanha Italia srl, Viega GmbH & Co. KG, Legris Industries SA u Comap SA.

(2)

Dawn it-30 entità legali (li jappartjenu għal 11-il intrapriża, fejn xi entitajiet legali inżammu responsabbli bħala kumpaniji parent) wettqu ksur ta’ l-Artikolu 81 tat-Trattat KE u l-Artikolu 53 tal-Ftehim taż-ŻEE billi pparteċipaw fi ksur uniku u kontinwu bejn il-31 ta’ Diċembru 1988 u l-1 ta’ April 2004 fl-industrija ta’ l-attrezzaturi fiż-ŻEE. Mhux l-intrapriżi kollha pparteċipaw fil-ksur għat-tul kollu tiegħu.

(3)

Il-karatteristiċi ewlenin tal-ksur inkludew: il-kompetituri ddiskutew il-prezzijiet, qablu dwar, implimentaw u mmonitorjaw il-ftehimiet dwar prezzijiet kif ukoll dwar skontijiet u roħs, qbil dwar il-mekkaniżmi ta’ l-implimentazzjoni, l-allokazzjoni tas-swieq u tal-klijenti, skambju ta’ informazzjoni kummerċjalment importanti u kunfidenzjali u/jew rilevanti għall-kumpanija, ipparteċipaw f’laqgħat regolari u kellhom kuntatti oħrajn biex jiftiehmu dwar ir-restrizzjonijiet ta’ hawn fuq u jissorveljaw l-implimentazzjoni fiż-ŻEE.

(4)

Il-prodott ikkonċernat huwa attrezzaturi tar-ram li jinkludu attrezzaturi tal-liga tar-ram (bħal gunmetal, ram isfar u ligi oħrajn ibbażati fir-ram). Fitting torbot it-tubi użati fit-trasport ta’ l-ilma, l-arja, il-gass, eċċ għall-plaming, għas-sħana, għas-sanitazzjoni u għal skopijiet oħrajn. Hemm bosta tipi ta’ attrezzaturi bħal dawk end-feed, taċ-ċirku ta’ l-istann, tal-kompressjoni, u press and push-fit. Dawn it-tipi kollha huma implikati f’din id-Deċiżjoni.

(5)

L-investigazzjoni wriet li l-kartell kopra ż-ŻEE kollha. Il-valur tas-suq taż-ŻEE għall-2003 għall-attrezzaturi tar-ram u attrezzaturi tal-liga tar-ram kien madwar € 525 miljun għal madwar 960 miljun biċċa.

(6)

F’Jannar 2001 il-kumpanija Mueller Industries Inc għarrfet lill-Kummisjoni dwar l-eżistenza ta’ kartell fl-industrija ta’ l-attrezzaturi (u f’industriji oħrajn relatati fis-suq tat-tubi tar-ram) u esprimiet ix-xewqa li tikkoopera mal-Kummissjoni taħt l-Avviż ta’ Klemenza 1996. Mueller ipprovdiet lill-Kummissjoni provi li ppermettew li jsiru l-ispezzjonijiet.

(7)

Fit-22 u t-23 ta’ Marzu 2001, il-Kummissjoni wettqet l-ewwel ispezzjonijiet għall-għarrieda dwar kemm it-tubi kif ukoll l-attrezzaturi tar-ram. Wara dan, f’April 2001, ġie deċiż li l-każijiet jiġu mqassma f’tubi tal-Plaming tar-Ram (38.069), tubi Industrijali (38.240) u Attrezzaturi (38.121). Imbagħad, fl-24 u fil-25 ta’ April 2001, il-Kummissjoni wettqet aktar ispezzjonijiet għall-għarrieda fuq il-post għand il-grupp Delta. Dawn l-ispezzjonijiet ta’ l-aħħar koprew biss l-attrezzaturi. Fis-settur tat-tubi tar-ram il-Kummissjoni adottat żewġ deċiżjonijiet fejn imponiet multi fil-każ tat-tubi Industrijali (fl-2003) u fil-każ dwar it-tubi tal-Plaming tar-Ram (fl-2004).

(8)

F’Settembru 2003, wara l-ispezzjonijiet u wara li ntbagħtu l-ittri fejn intalbet l-informazzjoni, il-grupp IMI applika għall-klemenza. Wara din l-applikazzjoni għall-klemenza kien hemm dawk tal-grupp Delta (Marzu 2004) u Frabo (Lulju 2004). L-aħħar applikazzjoni għall-klemenza ġiet sottomessa minn Oystertec/Advanced Fluid Connections plc, f’Mejju 2005.

(9)

Id-Dikjarazzjoni ta’ l-Oġġezzjonijiet ġiet indirizzata lit-30 intrapriża li kienu jappartjenu għal 11-il intrapriża u lil assoċjazzjoni waħda ta’ intrapriżi. Il-partijiet kollha ħlief Flowflex, Comap u Supergrif eżerċitaw id-dritt tagħhom li jinstemgħu u ħadu sehem fis-smigħ bil-fomm li sar fil-25 u s-26 ta’ Jannar 2006.

(10)

Filwaqt li hemm indikazzjonijiet li l-ewwel kuntatti anti-kompetittivi bejn il-produtturi ta’ l-attrezzaturi tar-Renju Unit saru qabel l-1988, l-evidenza li għandha l-Kummissjoni turi fuq bażi solida u għal żmien twil li Diċembru 1988 kienet id-data tal-bidu tal-ksur. Fuq din il-bażi l-Kummissjoni qieset li l-arranġamenti ta’ kollużjoni bdew fir-Renju Unit fost il-manifatturi tar-Renju Unit fil-31 ta’ Diċembru 1988. Dwar l-imġieba tal-manifatturi ta’ l-attrezzaturi fuq livell pan-Ewropew, minħabba l-forma laxka u esploratorja tal-kuntatti qabel Jannar 1991, il-Kummissjoni llimitat l-evalwazzjoni tagħha taħt ir-regoli tal-kompetizzjoni għall-perjodu mill-31 ta’ Jannar 1991, id-data ta’ l-ewwel laqgħa “Super-EFMA”, meta l-kompetituri qablu dwar il-prezzijiet u meta l-arranġamenti pan-Ewropej ġew ippruvati bħal skema organizzata u strutturata.

(11)

Aktar evidenza fil-fajl tal-Kummissjoni turi li dan il-ksur kompla wkoll wara l-ispezzjonijiet tal-Kummissjoni f’Marzu u f’April 2001, sa fejn kienu kkonċernati Comap, IBP/Oystertec (Advanced Fluid Connections) u Frabo sa April 2004 u xi ftit inqas sa fejn hija kkonċernata Delta. Fir-rigward ta’ Aalberts, hija pparteċipat fil-ksur wara l-ispezzjonijiet bejn Ġunju 2003 u April 2004. Dan huwa l-ewwel każ dwar il-kartelli li għal xi kumpaniji li pparteċipaw kompla għal 3 snin wara l-ispezzjonijiet.

(12)

L-istruttura totali ta’ l-arranġamenti anti-kompetittivi għall-prodotti ta’ l-attrezzaturi turi li jistgħu jitqiesu bħala ksur wieħed filwaqt li l-kompetituri ddiskutew il-prezzijiet, qablu dwar, implimentaw u mmonitorjaw il-ftehimiet dwar prezzijiet kif ukoll dwar skontijiet u roħs, qablu dwar mekkaniżmi ta’ implimentazzjoni, allokaw is-swieq u l-klijenti u skambjaw informazzjoni ta’ importanza kummerċjali u kunfidenzjali dwar is-suq.

(13)

Dwar il-gravità tal-ksur, l-impatt fis-suq u l-ambitu ġeografiku, il-ksur għandu jiġi kkwalifikat bħala gravi ħafna.

(14)

Minħabba li kien hemm disparità konsiderevoli bejn il-piż ta’ kull intrapriża f’termini ta’ bejgħ fl-industrija kartellizzata, il-Kummissjoni applikat trattament differenzjali (gruppi) biex tqis il-piż ta’ kull intrapriża: din l-istrateġija tipprova tiddifferenzja kif il-piż ta’ kull intrapriża għamlet ħsara lill-kompetizzjoni.

(15)

L-intrapriżi ġew maqsuma f’sitt kategoriji skond l-importanza relattivo. Bħala bażi biex tiġi ddeterminata l-importanza relattivo ta’ l-intrapriżi f’dan il-ksur, il-Kummissjoni qieset l-ishma rispettivi ta’ kull intrapriża mal-prodott ikkonċernat. Il-piż individwali tal-parteċipanti fil-ksur ġie mqabbel fuq il-bażi ta’ l-ishma tagħhom tas-suq tal-prodott fiż-ŻEE għall-intrapriżi kollha, fis-sena 2000, ħlief għal Aalberts u Advanced Fluid Connections, li għalihom ittieħdet l-2003 bħala l-bażi tad-differenzjament. Il-Kummissjoni għażlet l-2000 għaliex kienet is-sena l-aktar riċenti tal-ksur fejn l-intrapriżi kollha li lilhom kienet indirizzata din id-Deċiżjoni kienu attivi fil-kartell, ħlief iż-żewġ intrapriżi msemmija.

(16)

Għalhekk Viegener u Aalberts tqiegħdu fl-ewwel kategorija. IMI u Delta tqiegħdu fit-tieni kategorija, Advanced Fluid Connections fit-tielet, Legris Industries fir-raba’, Sanha Kaimer, Flowflex, Frabo u Mueller fil-ħames u Pegler fis-sitt kategorija.

(17)

Sabiex jiġi stabbilit l-ammont tal-multa f’livell li jiżgura li għandha effett deterrenti suffiċjenti, il-Kummissjoni qieset li huwa xieraq li tapplika fattur ta’ multiplikazzjoni għall-multa imposta fuq Tomkins/Pegler. Fl-2005, is-sena finanzjarja l-aktar rilevanti qabel id-Deċiżjoni, id-dħul totali ta’ Tomkins, il-kumpanija parent ta’ Pegler, kien ta’ 4,65 biljun EUR.

(18)

Għalhekk, u skond deċiżjonijiet ta’ qabel, il-Kummissjoni qieset li huwa xieraq li timmultiplika l-multa ta’ Tomkins.

(19)

Il-fatturi individwali tal-multiplikazzjoni ġew ukoll applikati skond kemm dam il-ksur minn kull entità legali.

(20)

Id-Deċiżjoni stabbiliet li Oystertec/Advanced Fluid Connections, Comap, Frabo u sa grad inqas Delta ma temmewx il-ksur minnufih wara l-ispezzjonijiet. Dawn l-intrapriżi ħadu sehem fil-ksur wara li kienu saru l-ispezzjonijiet. Sa fejn hija kkonċernata Aalberts, huwa stabbilit li hija pparteċipat fil-ksur wara li kienu saru l-ispezzjonijiet bejn Ġunju 2003 u April 2004. Din l-imġieba hija ksur lampanti tar-regoli tal-kompetizzjoni. Meta l-Kummissjoni twettaq ispezzjoni f’każ tal-kartelli, hija uffiċjalment tavża bil-quddiem lill-intrapriżi kkonċernati li r-regoli tal-kompetizzjoni setgħu ġew miksura. Fil-maġġoranza kbira ta’ ħafna mill-każijiet, l-esperjenza wriet li l-ispezzjonijiet iħeġġu lill-intrapriżi jtemmu l-ksur minnufih, u b’hekk jipprovdu serħan tal-moħħ minnufih lill-konsumaturi, waqt li jkunu qed jistennew id-deċiżjoni tal-Kummissjoni fil-każ. F’dan is-sens, l-ispezzjonijiet għandhom il-funzjoni li jrażżnu lill-intrapriżi involuti milli jkomplu l-ksur. Għalhekk, għall-perjodu wara l-ispezzjonijiet, l-intrapriżi għandhom minnufih iwaqqfu kull imġieba ta’ ksur. Madankollu, dawn l-intrapriżi ma tawx każ l-ispezzjonijiet u xi wħud minnhom komplew sa 3 snin wara.

(21)

Dan iġġustifika żjieda fl-ammont bażiku tal-multa li għandha tiġi imposta fuq Aalberts, Advanced Fluid Connections, Comap, Frabo u Delta.

(22)

Iżda, sa fejn hija kkonċernata Frabo, id-Deċiżjoni tagħraf li l-kontribuzzjoni tagħha f’dan ir-rigward kien partikolarment deċiżiv. Frabo kienet l-ewwel kumpanija li żvelat l-imġieba anti-kompetittiva wara l-ispezzjonijiet u pprovdiet il-konnessjoni għas-snin ta’ qabel u wara l-ispezzjonijiet. Għalhekk il-Kummissjoni setgħet tistabbilixxi kontinwità bejn iż-żewġ perjodi li mingħajr il-kontribuzzjoni ta’ Frabo, ma setgħetx tiġi ppruvata. Filwaqt li qieset din iċ-ċirkostanza u skond il-prinċipju ta’ l-ekwità, Frabo ma ġietx penalizzata talli żvelat dan l-arranġament ta’ wara l-ispezzjonijiet. Għalhekk Frabo ġiet eżentata minn dan il-fattur aggravanti.

(23)

Barra minn dan, fir-risposta tagħha għad-Dikjarazzjoni ta’ l-Oġġezzjonijiet, Advanced Fluid Connections ipprovdiet lill-Kummissjoni informazzjoni li tiżgwida. F’dikjarazzjoni mehmuża mar-risposta għad-Dikjarazzjoni ta’ l-Oġġezzjonijiet, impjegat ta’ Advanced Fluid Connections iddikjara li ma kellu ebda kuntatti bit-telefon ma Frabo fiż-żmien bejn l-2001 u l-2005. Bosta kontijiet tat-telefon provduti minn Frabo juru, kontra din id-dikjarazzjoni, li bejn April 2002 u Lulju 2003, Frabo kkuntattjat lil Advanced Fluid Connections permezz tat-telefon ċellulari għall-inqas 28 darba.

(24)

Din iċ-ċirkostanza li taggrava ġġustifikat żjieda fl-ammont bażiku tal-multa li għandha tiġi imposta fuq Advanced Fluid Connections.

(25)

Bosta intrapriżi ppretendew uħud minn dawn iċ-ċirkostanzi attenwanti li ġejjin, jew kollha: terminazzjoni kmieni tal-ksur, rwol minuri / passiv, in-nuqqas ta’ implimentazzjoni effettiva tal-prattika, l-implimentazzjoni ta’ programmi ta’ konformità, in-nuqqas ta’ benefiċċju, diffikultajiet fl-industrija ta’ l-attrezzaturi. Dawn il-pretensjonijiet huma kollha miċħuda bħala infondati ħlief għar-rwol minuri / passiv pretiż minn Flowflex. Għalhekk l-ammont bażiku għal Flowflex ġie mnaqqas b’10 %.

(26)

Id-Deċiżjoni qieset li l-kooperazzjoni ta’ Frabo kienet tikkwalifika għal fattur attenwanti f’dan ir-rigward. Frabo kienet l-ewwel li żvelat it-terminu tal-kartell wara l-ispezzjonijiet u, b’mod partikolari, kienet l-ewwel li pprovdiet provi u spjegazzjonijiet biex tipprova l-kontinwità tal-ksur wara l-ispezzjonijiet u sa April 2004. Qabel l-applikazzjoni ta’ Frabo għall-klemenza, il-Kummissjoni ma setgħetx tistabbilixxi t-terminu u l-kontinwità tal-ksur minn Marzu 2001 sa April 2004.

(27)

Frabo m’għandhiex tkun ippenalizzata għall-kooperazzjoni tagħha billi tiġi imposta fuqha multa aktar għolja minn dik li kien ikollha tħallas mingħajr il-kooperazzjoni tagħha. Għalhekk l-ammont bażiku tal-multa ta’ Frabo ġie mnaqqas bl-ammont ipotetiku tal-multa li kienet tkun imposta fuq Frabo għal ksur ta’ tliet snin.

(28)

Fejn xieraq, il-limitu ta’ fatturat dinji ta’ 10 % ta’ l-Artikolu 23 (2) tar-Regolament Nru 1/2003 (1) ġie applikat għall-multi kkalkolati.

(29)

Mueller, IMI, Delta, Frabo u Advanced Fluid Connections ikkooperaw mal-Kummissjoni fi stadji differenti ta’ l-investigazzjoni bl-għan li jirċievu t-trattament favorevoli stabbilit fl-Avviż tal-Klemenza 1996, li jgħodd għal dan il-każ.

(30)

Mueller kienet l-ewwel intrapriża li għarrfet lill-Kummissjoni dwar l-eżistenza ta’ kartell fis-settur ta’ l-attrezzaturi li affettwa s-suq taż-ŻEE fis-snin 1990. L-evidenza li pprovdiet Mueller ippermettiet lill-Kummissjoni tistabbilixxi l-eżistenza, il-kontenut u l-parteċipanti ta’ għadd ta’ laqgħat ta’ kartelli u kuntatti oħrajn li saru b’mod partikolari bejn l-1991 u l-2000 kif ukoll biex isiru l-ispezzjonijiet fit-22 ta’ Marzu 2001 u wara. Għalhekk, Mueller ikkwalifikat għal eżenzjoni totali minn kull multa.

(31)

Fit-18 ta’ Settembru 2003 IMI resqet lejn il-Kummissjoni bl-għan li tissottometti applikazzjoni għall-klemenza. IMI għamlet kontribuzzjoni materjali biex tiġi stabbilita l-eżistenza tal-ksur, u wara li rċeviet id-Dikjarazzjoni ta’ l-Oġġezzjonijiet, IMI għarrfet lill-Kummissjoni li kkonfermat il-fatti ppreżentati fis-sottomissjonijiet tagħha dwar il-klemenza. Il-kooperazzjoni ta’ IMI ġiet ippremjata bi tnaqqis ta’ 50 % mill-multa.

(32)

Fl-10 ta’ Marzu 2004, Delta ssottomettiet applikazzjoni għall-klemenza. Wara l-applikazzjoni ta’ Delta kien hemm sottomissjonijiet oħrajn bil-miktub, laqgħa u l-preżentata ta’ dikjarazzjonijiet bil-fomm. Sa estent kbir, Delta kkorroborat il-fatti li ppreżentat IMI fis-sottomissjonijiet tagħha għall-klemenza. Il-kooperazzjoni ta’ Delta ġiet ippremjata bi tnaqqis ta’ 20 % mill-multa.

(33)

Fid-19 ta’ Lulju 2004, Frabo ssottomettiet applikazzjoni għall-klemenza. Fil-parti l-kbira, Frabo kkorroborat il-fatti li ppreżentaw IMI u Delta fis-sottomissjonijiet tagħhom għall-klemenza. Frabo kienet l-ewwel li żvelat li l-ksur kompla għall-perjodu wara l-investigazzjonijiet u sa April 2004. Barra minn dan, l-informazzjoni ta’ Frabo ntużat ukoll biex jiġu abbozzati t-talbiet għall-informazzjoni li kkontribwiet biex iġġiegħel is-sottomissjoni ta’ Advanced Fluid Connections għall-klemenza, fejn tressqet prova dwar il-parteċipazzjoni fil-ksur wara l-ispezzjoni. Fuq bażi ta’ dan, il-kooperazzjoni ta’ Frabo ġiet ippremjata bi tnaqqis ta’ 20 % mill-multa.

(34)

Fl-24 ta’ Mejju 2005, Advanced Fluid Connections (Oystertec) issottomettiet applikazzjoni għall-klemenza. Fil-parti l-kbira Advanced Fluid Connections ikkorroborat il-fatti li ppreżentat Frabo fis-sottomissjonijiet tagħha għall-klemenza. Madankollu, fir-risposta tagħha għad-Dikjarazzjoni ta’ l-Oġġezzjonijiet, u matul is-Smigħ Orali, Advanced Fluid Connections kkountestat bil-qawwa li l-Kummissjoni kienet stabbiliet il-kontinwità bejn il-perjodi qabel u wara l-ispezzjonijiet sa April 2004. Fl-aħħar, kif indikat hawn fuq, Advanced Fluid Connections żgwidat lill-Kummissjoni u ppruvat iddgħajjef l-abilità tagħha li tipprova l-ksur. Għalhekk, wara konsiderazzjoni xierqa ta’ dawn iċ-ċirkostanzi kollha, il-Kummissjoni ma tatx lil Advanced Fluid Connections tnaqqis tal-multa.

(35)

Minħabba l-elementi kollha mressqa mill-intrapriżi u l-assoċjazzjoni ta’ intrapriżi fir-risposti tagħhom għad-Dikjarazzjoni ta’ l-Oġġezzjonijiet u fis-Smigħ Orali, il-Kummissjoni kellha provi li implikaw lill-Fédération Française des Négociants en Appareils Sanitaires, Chauffage-Climatisation et Canalisations (FNAS) indirettament fi ftehim milħuq fis-16 ta’ Frar 2004 biex iżidu l-prezzijiet.

(36)

Iżda ma kienx hemm biżżejjed provi li jindikaw li FNAS aċċettat attivament il-funzjoni fdata lilha mill-manifatturi u li tassew iffaċilitat l-implimentazzjoni tal-ftehim.

(37)

Għalhekk il-Kummissjoni kkonkludiet li FNAS ma kinitx parti mill-ftehim jew ta’ xi arranġament ieħor anti-kompetittiv. Għaldaqstant il-proċeduri kontra l-Fédération Française des Négociants en Appareils Sanitaires, Chauffage-Climatisation et Canalisations (FNAS) ingħalqu.

(38)

Dawk indirizzati mid-Deċiżjoni u t-terminu ta’ l-involviment tagħhom kienu dawn:

(39)

Wara dawn il-preamboli ta’ hawn fuq, ġew imposti dawn il-multi li ġejjin :

(40)

L-intrapriżi elenkati fil-preambolu (38) ġew ordnati jtemmu minnufih il-ksur immsemmi fil-preambolu (3), sa fejn ma kinux diġà għamlu dan u jżommu lura milli jirrepetu kull att jew imġieba deskritta fil-preambolu (3), u minn kull att jew imġieba li għandu għan jew effett identiku jew simili.