|
29.8.2007 |
MT |
Il-Ġurnal Uffiċjali ta’ l-Unjoni Ewropea |
L 224/5 |
DEĊIŻJONI TAL-KUMMISSJONI
ta' l-24 ta’ Awwissu 2007
li temenda d-Deċiżjoni 2006/656/KE dwar il-lista ta' territorji li minnhom hija awtorizzata importazzjoni ta' ħut ornamentali tropikali
(notifikata taħt id-dokument numru C(2007) 3960)
(Test b’relevanza għaż-ŻEE)
(2007/592/KE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat id-Direttiva tal-Kunsill 91/67/KEE tat-28 ta’ Jannar 1991 li tikkonċerna l-kondizzjonijiet tas-saħħa ta’ l-annimali li jirregolaw it-tqegħid fuq is-suq ta’ annimali u prodotti ta’ l-akwakultura (1), u b’mod partikolari l-Artikolu 19(1) tiegħu,
Billi:
|
(1) |
Il-Parti II ta' l-Anness I mad-Deċiżjoni tal-Kummissjoni 2006/656/KE ta' l-20 ta' Settembru 2006 li tistabbilixxi kondizzjonijiet għas-saħħa ta' l-annimali u rekwiżiti għaċ-ċertifikazzjoni għal importazzjoni ta' ħut għal fini ornamentali (2) telenka lista ta' territorji li minnhom hija awtorizzata l-importazzjoni ta' ħut ornamentali tropikali fil-Komunità. Dik il-lista tinkludi l-pajjiżi membri kollha ta' l-Organizzazzjoni Dinjija għas-Saħħa ta' l-Annimali (OIE). |
|
(2) |
Il-ħut ornamentali tropikali mhuwiex suxxettibbli għal mard elenkat fl-Anness A tad-Direttiva 91/67/KEE u huma ta' riskju relattivament baxx għall-qagħda tas-saħħa ta' l-annimali fil-Komunità. Is-sħubija fl-OIE kienet meqjusa bħala li tissodisfa l-kriterji, kif hemm referenza fl-Artikolu 18(2) tad-Direttiva 91/67/KEE, li magħhom pajjiżi terzi għandhom jikkonformaw biex ikunu jistgħu jesportaw ħut ornamentali tropikali lejn il-Komunità, billi hija tassigura notifika ta' kull eventwalità dwar saħħa ta' annimali ta' l-ilma lil membri oħra ta' l-OIE. |
|
(3) |
Il-Maldivi kienet esportatur importanti ta' ħut ornamentali tropikali lejn xi Stati Membri imma għadha mhijiex membru ta' l-OIE. Iżda, b'ittra bid-data 9 ta' Mejju 2007, il-Maldivi ikkommettiet ruħha li tissieħeb fl-OIE u li tissodisfa l-obbligi ta' sħubija bħal din fil-perjodu temporanju qabel ma ssir uffiċjalment membru ta' l-OIE. |
|
(4) |
Il-Maldivi għandha tkun inkluża fil-Parti II ta' l-Anness I mad-Deċiżjoni 2006/656/KE qabel ma tissieħeb uffiċjalment fl-OIE. Iżda, jekk il-Maldivi ma tisseħibx fl-OIE sal-31 ta' Diċembru 2007 l-aktar tard, importazzjoni ta' ħut ornamentali tropikali minn dak il-pajjiż fil-Komunità ma għandhiex tibqa' tkun awtorizzata wara dik id-data. |
|
(5) |
Id-Deċiżjoni 2006/656/KE għandha għalhekk tiġi emendata skond dan. |
|
(6) |
Il-miżuri previsti f’din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali, |
ADOTTAT DIN ID-DEĊIŻJONI:
Artikolu 1
L-Anness I għad-Deċiżjoni 2006/656/KE hu emendat skond l-Anness għal din id-Deċiżjoni.
Artikolu 2
Din id-Deċiżjoni hija indirizzata lill-Istati Membri.
Magħmul fi Brussell, 24 ta’ Awwissu 2007.
Għall-Kummissjoni
Markos KYPRIANOU
Membru tal-Kummissjoni
(1) ĠU L 46, 19.2.1991, p. 1. Id-Direttiva kif emendata bir-Regolament (KE) Nru 806/2003 (ĠU L 122, 16.5.2003, p. 1).
(2) ĠU L 271, 30.9.2006, p. 71.
ANNESS
Fil-Parti II ta' l-Anness I għad-Deċiżjoni 2006/656/KE, għandu jiġi miżjud it-test li ġej:
“Il-Maldivi, sakemm tissieħeb fl-OIE. F'każ li l-Maldivi ma tkunx saret pajjiż membru ta' l-OIE sal-31 ta' Diċembru 2007, importazzjoni ta' ħut ornamentali tropikali minn dak il-pajjiż ma għandhiex tibqa' awtorizzata wara dik id-data.”