ANNESS

QAFAS

L-għanijiet tal-kriterji

Dawn il-kriterji jimmiraw b’mod partikolari li jippromwovu:

—	it-tnaqqis fit-tniġġis ta’ l-ilma billi jiġu limitati l-użu ta’ ingredjenti li jistgħu jagħmlu ħsara u l-kontenut tossiku totali fil-prodotti.

—	it-tnaqqis ta’ produzzjoni ta’ skart billi jitnaqqas l-ammont ta’ ppakkeġġar.

—	it-tnaqqis jew prevenzjoni ta’ riskji potenzjali għall-ambjent relatati ma’ l-użu ta’ sustanzi perikolużi.

Barra minn hekk, il-kriterji jtejbu l-għarfien ambjentali tal-konsumaturi. Il-kriterji huma ffissati f’livelli li jippromwovu t-tikkettar ta’ spapen u shampoos li jkollhom impatt ambjentali aktar baxx minn dak medju fis-suq.

Ir-rekwiżiti tal-valutazzjoni u verifika

Ir-rekwiżiti speċifiċi tal-valutazzjoni u verifika huma indikati għal kull wieħed mill-kriterji ekoloġiċi aktar ‘il quddiem f’dan l-Anness.

Fejn xieraq, il-metodi ta’ ttestjar differenti minn dawk indikati għal kull kriterju jistgħu jintużaw jekk il-Korp Kompetenti li jeżamina l-applikazzjoni jaċċetta l-ekwivalenza tagħhom.

Fejn possibbli, l-ittestjar għandu jitwettaq minn laboratorji li jikkonformaw mar-rekwiżiti ġenerali ta’ l-EN OSI 17025 jew ekwivalenti.

Meta t-testijiet ma jissemmewx, jew meta jissemma li t-testijiet se jintużaw għall-fini ta’ verifika jew monitoraġġ, il-Korpi Kompetenti għandhom joqogħdu, skond ma jkun il-każ, fuq id-dikjarazzjonijiet u dokumentazzjoni li jipprovdilhom l-applikant u/jew fuq verifiki indipendenti.

Fejn xieraq, il-Korpi Kompetenti jistgħu jeħtieġu dokumentazzjoni ta’ sostenn u jistgħu jwettqu verifiki indipendenti, fosthom zjarat fuq il-post fejn issir il-produzzjoni.

Meta l-applikant ikun obbligat li jipprovdi dikjarazzjonijiet, dokumentazzjoni, rapporti tat-testijiet, jew xi evidenza oħra biex juri l-konformità mal-kriterji, huwa miftiehem li dawn jistgħu joriġinaw mill-applikant u/jew il-fornitur(i) tiegħu u/jew il-fornitur(i) tagħhom, eċċetra, kif xieraq.

Fejn ikun hemm referenza għall-ingredjenti, din tinkludi sustanzi u preparazzjonijiet.

It-test jirreferi għad-Database ta’ Ingredjenti ta’ Deterġenti (lista DID), li tinkludi ħafna mill-ingredjenti li jintużaw l-aktar fil-formulazzjonijiet tas-spapen u shampoos. Il-Parti A tal-lista DID għandha tintuża biex tinkiseb id-data għall-kalkoli ta’ CDV u għall-istima tal-bijodegradibbiltà tas-surfactants. L-applikanti jistgħu biss jippreżentaw id-data tagħhom meta l-lista ma turi ebda valur, għajr fil-każ ta’ fwejjaħ (inkluż addittivi bijoloġiċi) u żebgħa.

Fir-rigward ta’ l-ingredjenti li mhumiex inklużi fil-Parti A tal-lista DID, l-applikant għandu, fir-responsabbiltà tiegħu, japplika l-proċedura deskritta fil-Parti B tal-lista DID.

Għandha tintuża l-lista DID li tkun l-aktar aġġornata f’dak iż-żmien, u li tkun disponibbli mingħand il-Korp Kompetenti li jkun qed jipproċessa l-applikazzjoni. Il-lista tista’ tinkiseb ukoll minn fuq din il-websajt: http://ec.europa.eu/environment/ecolabel/product/pg_did_list_en.htm.

Għall-ingredjenti li m’humiex elenkati fil-lista DID, l-applikant jista’ juża l-proċedura biex jipprovdi d-dokumentazzjoni meħtieġa ta’ bijodegradibbiltà anerobika deskritta fl-Appendiċi II.

Għall-fini ta’ dawn il-kriterji, “ surfactant ” tfisser kwalunkwe sustanza organika u/jew preparazzjoni li tintuża fid-deterġenti, li għandha proprjetajiet attivi fil-wiċċ (i.e. f’kuntatt ma’ wiċċ l-ilma) (surface-active) u li tikkonsisti minn grupp(i) idrofobiku/ċi ta’ tali natura u daqs li jippermettu t-tnaqqis tat-tensjoni tal-wiċċ ta’ l-ilma (surface tension), il-formazzjoni ta’ monostrati fil-wiċċ komuni bejn l-ilma u l-arja li kapaċi jifirxu jew jassorbu, il-formazzjoni ta’ emulsjonijiet u/jew mikroemulsjonijiet u/jew micelles (grupp ta’ molekuli), u l-assorbiment fil-wiċċ komuni bejn l-ilma u solidi.

Il-Korpi Kompetenti, huma rrakkomandati li jieħdu in konsiderazzjoni l-implimentazzjoni ta’ l-iskemi ta’ ġestjoni ambjentali rikonoxxuti, bħall-EMAS jew ISO 14001, waqt li jeżaminaw l-applikazzjonijiet u jimmonitorjaw il-konformità mal-kriterji ta’ dan l-Anness.

(Nota: Sabiex wieħed japplika għall-ekotikketta jew biex jikkonforma mal-kriterji ta’ l-ekotikketta, mhix meħtieġa l-implimentazzjoni ta’ skemi ta’ ġestjoni tali.)

UNITÀ FUNZJONALI

L-unità Funzjonali hija 1 gramm ta’ “Kontenut Attiv (AC – Active Content)”. AC huwa definit bħala l-piż ta’ l-ingredjenti organiċi fil-prodott. Dan għandu jiġi kkalkolat abbażi tal-formulazzjoni kompleta tal-prodott. F’dan il-kalkolu, ma jitqiesux l-aġenti ta’ l-għarik/brix preżenti fil-prodotti għall-ħasil ta’ l-idejn.

Il-valutazzjoni u verifika:

Għandha tiġi pprovduta din l-informazzjoni:

—	Deskrizzjoni teknika tal-kontenut tal-prodott (formulazzjoni kompleta), inkluż il-kontaminanti identifikati. Fid-deskrizzjoni għandhom ikunu speċifikati l-kwantitajiet, in-numru CAS u d-denominazzjonijiet INCI.

—	Deskrizzjoni tal-funzjoni ta’ kull ingredjent tal-prodott u ta’ l-għan li għalih ġie miżjud dak il-komponent.

—	Skeda/i tad-data dwar is-sikurezza/Prodott bl-ismijiet tal-fornituri ta’ l-ingredjenti kollha.

KRITERJI EKOLOĠIĊI

1.   Tossiċità għall-organiżmi akkwatiċi

Il-volum kritiku ta’ dilution tossika (CDV – Critical Dilution Volume toxity) huwa kkalkolat għal kull ingredjent (i) u għall-prodott sħiħ permezz ta’ din l-ekwazzjoni:

CDV(ingredjent i)= piż (i) × DF(i) × 1 000/TF kroniku (i)

CDV = Σ CDV(ingredjent i)

fejn il-piż (i) huwa l-piż ta’ l-ingredjent (fi grammi) għal kull unità funzjonali. DF (i) huwa l-fattur ta’ degradazzjoni u TF kroniku (i) huwa l-fattur ta’ tossiċità ta’ l-ingredjent (f’milligrammi/litru).

Il-valuri tad-DF u tat-TF kroniku għandhom ikunu bħal dawk elenkati fil-Parti A tal-lista tad-Database ta’ Ingredjenti ta’ Deterġenti (lista DID – Parti A). Jekk l-ingredjent ikkonċernat mhux inkluż fil-parti A tal-lista DID, l-applikant għandu jikkalkula dawn il-valuri billi jsegwi l-proċedura deskritta fil-Parti B tal-lista DID. Iċ-CDV tal-prodott hija s-somma totali taċ-CDV(tox) ta’ kull ingredjent.

Iċ-CDV totali tal-prodott ma għandhiex tkun ogħla minn dawn il-valuri:

Shampoo, prodotti li jintużaw fil-ħasil taħt id-doċċa u spapen likwidi: 20 000 l/g AC

Sapun solidu: 3 500 l/g AC

Conditioner: 30 000 l/g AC

Il-valutazzjoni u verifika:

Għandha tingħata l-formulazzjoni eżatta tal-prodott. U barra minn hekk, id-deskrizzjoni kimika eżatta ta’ l-ingredjenti (pereżempju, identifikazzjoni skond in-nomenklatura IUPAC, numru tas-SAC (Cas-no), nomenklatura INCI, purità, tip u perċentwali ta’ impuritajiet, addittivi; għal taħlitiet, pereżempju surfactants: In-numru DID, il-kompożizzjoni u l-ispektrum tad-distribuzzjoni ta’ homologues, isomeri u ismijiet kummerċjali).

Għandhom jingħataw kopji ta’ l-iskeda tad-Data dwar is-Sikurezza tal-Materjal għall-ingredjenti kollha.

Il-kalkolu tas-CDV u r-riżultat tiegħu għandhom jingħataw fid-dettall. Għandu jingħata n-numru xieraq ta’ l-ingredjenti kollha li jidhru fil-lista DID. Fil-każ ta’ l-ingredjenti li ma humiex inklużi fil-lista DID, għandhom jiġu ppreżentati l-metodi ta’ ttestjar għall-ekotossiċità (effetti fit-tul (data NOEC) fuq il-ħut, Daphnia magna, u algi), bijodigradazzjoni u bijoakkumulazzjoni flimkien mar-riżultati tagħhom. Ir-referenzi għat-testijiet rilevanti għandhom ikunu l-Annessi xierqa tad-Direttiva tal-Kunsill 67/548/KEE (1).

2.   Prodotti li jagħmlu ħsara lill-ambjent

Il-prodott ma għandux jissodisfa r-rekwiżiti ta’ klassifikazzjoni għal kwalunkwe waħda minn dawn il-frażijiet ta’ riskju tad-Direttiva 67/548/KEE:

N, R50/53: (WR50/53/25 %) ≥ 1

N, R51/53: ((WR50/53/2.5 %)+(WR51/53/25 %)) ≥ 1

R52/53: ((WR50/53/0.25 %)+(WR51/53/2.5 %)+(WR52/53/25 %)) ≥ 1

WR50/53 = Il-perċentwali skond il-piż ta’ l-ingredjenti li jistgħu jiġu kklassifikati bħala R50/53.

WR51/53 = Il-perċentwali skond il-piż ta’ l-ingredjenti li jistgħu jiġu kklassifikati bħala R51/53.

WR52/53 = Il-perċentwali skond il-piż ta’ l-ingredjenti li jistgħu jiġu kklassifikati bħala R52/53.

Ma jitqiesux l-aġenti ta’ l-għarik/brix preżenti fil-prodotti għall-ħasil ta’ l-idejn.

Il-valutazzjoni u verifika:

Għandhom jingħataw ir-riżultati tat-testijiet għat-tossiċità ta’ l-ilma u l-bijodigradazzjoni ta’ l-ingredjenti kkonċernati, liema testijiet ikunu saru skond il-metodi deskritti fil-Parti 2, metodi ta’ ttestjar, tad-Direttiva 67/548/KEE. Ir-riżultati ta’ tossiċità mill-lista DID ma jistgħux jintużaw għaliex huma valuri medji u mhumiex konformi mad-Direttiva 67/548/KEE.

Jekk il-valur l-aktar baxx tat-tossiċità jkun ≤ 10 mg/l, allura jkollhom jingħataw ir-riżultati tat-testijiet għall–bijoakkumulazzjoni potenzjali (fattur tal-Bijokonċentrazzjoni (BCF) jew logKow). Jekk ma jkunx hemm riżultati disponibbli, l-ingredjent jitqies bħala R 50/53. Japplikaw l-eċċezzjonijiet li ġejjin:

Fwejjaħ u żebgħat: R 51/53.

Addittivi bijoloġiċi, i.e. estratti veġetali u ingredjenti oħra estratti minn pjanti jew annimali u bi ftit jew mingħajr alterazzjoni kimika: R 51/53.

Għandu jitqies kwalunkwe ingredjent (sustanzi jew preparazzjonijiet) li l-konċentrazzjoni tiegħu tkun ogħla minn 0.010 % skond il-piż tal-prodott finali, indipendentament minn jekk intużax fil-formalazzjoni bħala sustanza individwali jew bħala element konstitwenti tal-preparazzjoni. Dan japplika wkoll għal kull ingredjent ta’ kwalunkwe preparazzjoni użat fil-formulazzjoni li jeċċedi 0.010 % skond il-piż tal-prodott finali.

3.   Bijodegradibbiltà Aerobika

a)   Bijodegradibbiltà aerobika tas-surfactants

Kull surfactant użat fil-prodott għandu jkun faċilment bijodigradabbli.

Il-valutazzjoni u verifika:

Il-Korp Kompetenti għandu jingħata l-formulazzjoni eżatta tal-prodott, kif ukoll deskrizzjoni tal-funzjoni ta’ kull ingredjent.

Il-Parti A tal-lista DID tindika jekk xi surfactant speċifiku jkunx aerobikament bijodigradabbli jew le (is-surfactants li huma kklassifikati “R” fil-kolonna dwar il-bijodegradibbiltà aerobika huma faċilment bijodigradabbli). Għal surfactants li m’humiex inklużi fil-Parti A tal-lista DID, għandha tingħata l-informazzjoni rilevanti minn dokumentazzjoni xjentifika jew sorsi oħra, jew ir-riżultati ta’ testijiet xierqa, li juru li dawk is-surfactants huma aerobikament bijodigradabbli. It-testijiet għall-bijodegradibbiltà faċli għandhom ikunu dawk indikati fir-Regolament (KE) Nru 648/2004 tal-Parlament Ewropew u tal-Kunsill (2).

Is-surfactants għandhom jitqiesu bħala faċilment bijodigradabbli jekk il-livell ta’ bijodegradibbiltà (mineralizzazzjoni) mkejjel skond wieħed minn dawn il-ħames testijiet ta’ hawn taħt ikun ta’ l-anqas 60 % fi żmien 28 jum: CO2 headspace test (OECD 310), Carbon dioxide (CO2) Evolution Modified Sturm test (OECD 301B; Direttiva tal-Kunsill 67/548/KEE Anness V.C.4-C), Closed Bottle test (OECD 301D; Direttiva tal-Kunsill 67/548/KEE Anness V.C.4-E), Manometric Respirometry (OECD 301F; Direttiva tal-Kunsill 67/548/KEE Anness V.C.4-D), jew MITI (I) test (OECD 301C; Direttiva tal-Kunsill 67/548/KEE Anness V.C.4-D), jew testijiet ISO li jkunu ekwivalenti għalihom. Skond ma jkunu l-karatteristiċi fiżiċi tas-surfactant, jista’ jintuża xi wieħed minn dawn it-testijiet sabiex jikkonferma l-bijodegradibbiltà faċli, jekk il-livell ta’ bijodegradibbiltà jkun ta’ l-anqas 70 % fi żmien 28 jum: Dissolved Organic Carbon DOC Die-Away (OECD 301A; Direttiva tal-Kunsill 67/548/KEE Anness V.C.4-A) jew Modified OECD Screening DOC Die-Away (OECD 301E, Direttiva tal-Kunsill 67/548/KEE Anness V.C.4-B), jew testijiet ISO li jkunu ekwivalenti għalihom. L-applikabbiltà tal-metodi ta’ ttestjar imsejsa fuq il-kejl ta’ karbonju organiku maħlul (dissolved organic carbon) għandha tkun ġustifikata kif xieraq kif stipulat fir-Regolament (KE) Nru 648/2004.

Għandhom jitqiesu l-ingredjenti kollha (sustanzi u preparazzjonijiet) li jkollhom aktar minn 0.010 % skond il-piż tal-prodott finali. Dan jinkludi wkoll kull ingredjent ta’ kwalunkwe preparazzjoni użat fil-formulazzjoni li jeċċedi 0.010 % skond il-piż tal-prodott finali.

b)   Bijodegradibbiltà aerobika ta’ non-surfactants (aNBDOnon-surf)

Il-kontenut ta’ ingredjenti li mhumiex faċilment bijodigradabbli (jew li ma ġewx ittestjati għall-bijodegradibbiltà aerobika) ma għandux ikun ogħla minn dawn il-livelli:

Shampoo, prodotti li jintużaw fil-ħasil taħt id-doċċa u spapen likwidi: 30 mg/g AC

Sapun solidu: 15 mg/g AC

Conditioner: 50 mg/g AC

Ma jitqiesux l-aġenti ta’ l-għarik/brix preżenti fil-prodotti għall-ħasil ta’ l-idejn.

Għandhom jitqiesu l-ingredjenti kollha (sustanzi u preparazzjonijiet) li jkollhom aktar minn 0.010 % skond il-piż tal-prodott finali. Dan jinkludi wkoll kull ingredjent ta’ kwalunkwe preparazzjoni użat fil-formulazzjoni li jeċċedi 0.010 % skond il-piż tal-prodott finali.

Il-valutazzjoni u verifika:

L-istess bħal fil-każ tar-rekwiżit 3 a).

4.   Bijodegradibbiltà Anerobika (anNBDOtox)

Il-kontenut ta’ ingredjenti li mhumiex degradabbli anerobikament (jew li ma ġewx ittestjati għall-bijodegradibbiltà anerobika) u li l-valur l-aktar baxx ta’ tossiċità akuta LC50 jew EC50 tagħhom huwa anqas minn 100 mg/l (l-istess bħal-limitu ta’ klassifika għall-R52 fid-Direttiva 67/548/KEE) ma għandux ikun ogħla minn dawn il-livelli:

Shampoo, prodotti li jintużaw fil-ħasil taħt id-doċċa u spapen likwidi: 25 mg/g AC

Sapun solidu: 15 mg/g AC

Conditioner: 50 mg/g AC

Ma jitqiesux l-aġenti ta’ l-għarik/brix preżenti fil-prodotti għall-ħasil ta’ l-idejn.

Il-valutazzjoni u verifika:

Il-Parti A tal-lista DID tindika jekk xi ingredjent speċifiku jkunx anerobikament bijodigradabbli jew le (is-surfactants li huma kklassifikati “Y” fil-kolonna dwar il-bijodegradibbiltà anerobika huma bijodigradabbli f’kundizzjonijiet anerobiċi). Għal ingredjenti li m’humiex inklużi fil-Parti A tal-lista DID jew li huma inklużi u kklassifikati “O”, għandha tingħata l-informazzjoni rilevanti minn dokumentazzjoni xjentifika jew sorsi oħra, jew ir-riżultati ta’ testijiet xierqa, li juru li dawk l-ingredjenti huma anerobikament bijodigradabbli. It-test ta’ referenza għal-bijodegradibbiltà anerobika għandu jkun OECD 311, ISO 11734, ECETOC Nru 28 (Ġunju 1988) jew metodu ta’ ttestjar ekwivalenti, bil-ħtieġa ta’ minimu ta’ 60 % bijodegradibbiltà aħħarija taħt kondizzjonijiet anerobiċi. Metodi ta’ ttestjar li jissimulaw il-kondizzjonijiet f’ambjent anerobiku rilevanti jistgħu jintużaw ukoll biex jiddokumentaw li tkun inkisbet 60 % bijodegradibbiltà aħħarija taħt kondizzjonijiet anerobiċi (ara Appendiċi II).

Jekk ikunu disponibbli diversi riżutati tat-tossiċità, għandu jintuża l-aktar valur baxx li jkun ġie kkonfermat. Il-valuri ta’ tossiċità tal-lista DID huma valuri medji li ma jistgħux jintużaw għal dan l-iskop.

Għandhom jitqiesu l-ingredjenti kollha (sustanzi u preparazzjonijiet) li jkollhom aktar minn 0.010 % skond il-piż tal-prodott finali. Dan jinkludi wkoll kull ingredjent ta’ kwalunkwe preparazzjoni użat fil-formulazzjoni li jeċċedi 0.010 % skond il-piż tal-prodott finali.

5.   Fwejjaħ

Kwalunkwe ingredjent miżjud mal-prodott bħala fwieħa għandu jkun ġie manifatturat, itrattat u applikat b’konformità mal-kodiċi ta’ prattika ta’ l-Assoċjazzjoni Internazzjonali tal-Fwieħa..

Il-valutazzjoni u verifika:

Il-manifattur tal-fwieħa għandhu jippreżenta dikjarazzjoni ta’ konformità ma’ dan il-kriterju lill-Korp Kompetenti.

6.   Zebgħa jew kuluranti

La ż-żebgħa organika u l-anqas il-kuluranti ma għandhom ikunu potenzjalment bijoakkumulanti. Fil-każ tal-kuluranti li huma approvati sabiex jintużaw fl-ikel, mhux meħtieġ li tiġi ppreżentata dokumentazzjoni dwar il-potenzjal ta’ bijoakkumulazzjoni. F’dan il-kuntest, il-kulurant jew żebgħa jitqies li huwa potenzjalment bijoakkumulanti jekk il-BCF li jkun ġie imkejjel permezz ta’ esperiment jinstab li huwa ogħla minn 100. Jekk ir-riżultat tat-test għall-BCF (Fattur ta’ Bijokonċentrazzjoni) ma jkunx disponibbli, il-bijoakkumulazzjoni tista’ titkejjel permezz tal-logPow (koeffiċjent ta’ separazzjoni fl-octanol/ilma - log.octanol/water partition coefficient). Jekk il-logPow ikun inqas minn 3.0, il-kulurant jitqies bħala potenzjalment bijoakkumulanti.

Il-valutazzjoni u verifika:

Il-manifattur għandu jippreżenta rapport tat-test jew ir-riżultat ippubblikat flimkien ma’ referenza għall-pubblikazzjoni. Jekk iż-żebgħa jew il-kulurant ikunu ġew approvati sabiex jintużaw fl-ikel, il-manifattur għandu jippreżenta dikjarazzjoni li ssemmi dan il-fatt.

7.   Bijoċidi

a)   Il-prodott jista’ biss jinkludi bijoċidi biex il-prodott ikun ippreservat, u fid-dożaġġ xieraq għal dan il-għan biss. Dan ma japplikax għas-surfactants, li wkoll jista’ jkollhom proprjetajiet bijoċidali.

Il-valutazzjoni u verifika:

Il-manifattur għandu jippreżenta kopji ta’ l-Iskeda tad-Data dwar is-sikurezza tal-materjal għal kwalunkwe preservattiv miżjud, flimkien ma’ tagħrif dwar il-konċentrazzjoni eżatta tiegħu fil-prodott. Il-manifattur jew fornitur tal-preservattivi għandi jipprovdi tagħrif dwar id-dożaġġ meħtieġ għall-preservazzjoni tal-prodott.

b)   Il-bijoċidi, kemm bħala parti mill-formulazzjoni kif ukoll bħala parti minn kwalunkwe preparazzjoni inkluża fil-formulazzjoni, li jintużaw biex jippreservaw il-prodott u li jissodisfaw il-kriterji għall-klassifikazzjoni mal-frażi ta’ riskju R50-53 jew R51-53, b’konformità mad-Direttiva 67/548/KEE jew mad-Direttiva 1999/45/KE tal-Parlament Ewropew u tal-Kunsill (3), huma permessi biss jekk ma jkunux potenzjalment bijoakkumulanti. F’dan il-kuntest, bijoċida titqies bħala potenzjalment bijoakkumulanti jekk il-fattur ta’ bijokonċentrazzjoni (BCF) ikun ogħla minn 100 jew, jekk ma jkunx hemm valuri ta’ BCF disponibbli, jekk il-logPow (koeffiċjent ta’ separazzjoni fl-octanol/ilma) ikun ogħla minn 3.0.

Il-valutazzjoni u verifika:

Għandhom jiġu ppreżentati r-riżultati tat-testijiet għat-tossiċità ta’ l-ilma. Jekk l-aktar tossiċità baxxa tkun ≤ 10 mg/l, għandu jiġi ppreżentat ir-riżultat ta’ test għall-bijodegradibbiltà faċli. Jekk il-bijoċida ma jkunx faċilment bijodigradabbli, għandhom jiġu ppreżentati r-riżultati ta’ testijiet għall-potenzjal ta’ bijoakkumulazzjoni. Il-proċeduri tat-test huma speċifikati fid-Direttiva 67/548/KEE.

c)   Il-preservattivi ma għandhomx jirrilaxxaw sustanzi li huma klassifikati skond il-kriterju 8a.

Il-valutazzjoni u verifika:

Dikjarazzjoni kompluta u ffirmata mil-manifattur tal-bijoċida.

8.   ingredjenti li huma ta’ periklu għall-ambjent

Ir-rekwiżiti jikkonċernaw l-ingredjenti kollha (sustanzi u preparazzjonijiet) li jkollhom aktar minn 0.010 % skond il-piż tal-prodott finali. Dan jinkludi wkoll kull ingredjent ta’ kwalunkwe preparazzjoni użat fil-formulazzjoni li jeċċedi 0.010 % skond il-piż tal-prodott finali.

a)   Ingredjenti kklassifikati

Ebda sustanza kostitwenti ma għandha tiġi kklassifikata bħala karċinoġenika (Carc), Mutaġenika (Mut) jew li hi tossika għar-riproduzzjoni (Rep), b’kunsiderazzjoni għar-regoli għall-awtoklassifikazzjoni fil-kategorija III.

Il-valutazzjoni u verifika:

kopji ta’ l-iskedi tad-Data dwar is-Sikurezza tal-Materjal għandhom jiġu pprovduti għall-ingredjenti kolla (sew sustanzi jew preparazzjonijiet). L-applikant għandu jippreżenta dikjarazzjoni ffirmata li tkun ġiet ippreparata mill-manifattur ta’ l-ingredjenti u li turi li huma konformi ma’ dan il-kriterju.

b)   Ingredjenti speċifikament esklużi

L-ingredjenti li ġejjin m’għandhomx ikunu inklużi fil-prodott, sew bħala parti mill-formulazzjoni jew bħala parti ta’ xi preparazzjoni inkluża fil-formulazzjoni:

—	Alkyl phenol ethoxylates (APEOs) u derivattivi oħra ta’ l-alkyl phenol

—	NTA (nitrilo-tri-acetate)

—	Aċidu boriku, borates u perborates

—	Nitromusks u polycyclic musks

Il-valutazzjoni u verifika:

Għandha tiġi ppreżentata dikjarazzjoni kompluta u ffirmata mil-manifattur tal-bijoċida.

c)   Ingredjenti speċifikament esklużi

Ethylenediaminetetraacetate (EDTA) u l-imluħ tiegħu u phosphonates li mhumiex faċilment bijodigradabbli jistgħu jiżdiedu biss mas-sapun solidu u sa kontenut massimu ta’ 0.6 mg/g AC biss.

Il-valutazzjoni u verifika:

Għandha tiġi ppreżentata dikjarazzjoni kompluta u ffirmata mill-manifattur tal-bijoċida.

9.   Pakkeġġar

a)   Ir-Relazzjoni ta’ Piż/Kontenut (WCR – Weight/Content Relationship) għandha tkun inqas minn 0.30 g ta’ ppakkeġġar għal kull gramma tal-prodott, u tinħadem hekk:

Fejn;

Wi	=	il-piż (fi grammi) tal-komponent ta’ ppakkeġġar i (dan japplika għall-ippakkeġġar primarju u dak sekondarju wkoll), inkluż kwalunkwe tikketti.
Ni	=	il-piż (fi grammi) tal-komponent ta’ ppakkeġġar li jiġi mill-materja prima u mhux minn sorsi riċiklati (dan japplika għall-ippakkeġġar primarju u dak sekondarju wkoll). Jekk il-komponent ta’ ppakkeġġar ma jkunx fih materja riċiklata, allura Ni = Wi.
Di	=	il-piż (fi grammi) tal-prodott kontenut fil-komponent ta’ ppakkeġġar.
r	=	in-numru ta’ Ritorn, i.e. l-għadd ta’ drabi li l-komponent ta’ ppakkeġġar i jintuża għall-istess skop permezz ta’ sistema ta’ ritorn u mili mill-ġdid (jekk ma jkunx speċifikat mod ieħor, r = 1 jekk ma jsirx użu mill-ġdid).

Jekk l-ippakkeġġar jerġa’ jintuża, r tiġi stabbilita bħala 20 għall-materjali plastiċi u bħala 10 għall-kartun korrugat, sakemm l-applikant ma jkunx jista’ juri numru akbar.

Il-valutazzjoni u verifika:

Preżentazzjoni tal-kalkolu tal-WCR.

b)   Tikkettar ta’ l-ippakkeġġar

Sabiex ikunu jistgħu jiġu identifikati l-partijiet differenti ta’ l-ippakkeġġar għar-riċiklaġġ, il-partijiet ta’ materjal plastiku ta’ l-ippakkeġġar primarju għandhom jiġu mmarkati skond il-Parti 2 tad-DIN 6120 jew l-ekwivalenti. Dan ir-rekwiżit mhuwiex meħtieġ għall-għeluq u pompi tal-kontenituri.

Il-valutazzjoni u verifika:

Dikjarazzjoni kompluta u ffirmata.

Kampjun ta’ ppakkeġġar primarju.

c)   Dożaġġ

L-ippakkeġġar għandu jkun iddiżinjat b’mod li d-dożaġġ korrett ikun faċli li jsir, pereżempju billi jiżgura li l-ftuħ fil-wiċċ ma jkunx wiesa’ ż-żejjed.

Il-valutazzjoni u verifika:

Deskrizzjoni tal-mezz ta’ dożaġġ.

d)   L-ippakkeġġar ma għandux ikollu addittivi abbażi tal-Kadmju jew Merkurju jew taħlitiet li jinkludu dawn l-elementi, u lanqas addittivi li ma jissodisfawx il-kriterju 8.

Il-valutazzjoni u verifika:

Dikjarazzjoni mill-produttur ta’ l-ippakkeġġar.

10.   Dispożizzjoni għal użu

Id-dispożizzjoni għall-użu tal-prodott għandha tintwera jew permezz ta’ test(ijiet) li jsiru fil-laboratorji jew permezz ta’ test tal-konsumaturi.

It-test għandu jsir b’konformità mal-linji ta’ gwida mniżżla fl-Appendiċi I dwar l-ittestjar għall-effiċjenza tal-prodott.

Il-valutazzjoni u verifika:

Rapport minn test li sar f’laboratorju jew minn test tal-konsumaturi li jixhed effiċjenza sodisfaċenti.

11.   Informazzjoni li tidher fuq l-ekotikketta

B’konformità ma’ l-Anness III tar-Regolament (KE) Nru 1980/2000, Kaxxa 2 ta’ l-ekotikketta għandha tinkludi t-test li ġej:

“*	Impatt minimu fuq ekosistemi akwatiċi

*	jissodisfa rekwiżiti stretti ta’ bijodegradibbiltà

*	jillimita l-ħela ta’ ppakkeġġar”

Il-valutazzjoni u verifika:

L-applikant għandu jipprovdi kampjun ta’ l-ippakkeġġar tal-prodott li juri t-tikketta, flimkien ma’ dikjarazzjoni ta’ konformità ma’ dan il-kriterju.

---

(1)   ĠU 196, 16.8.1967, p. 1-98.

(2)   ĠU L 104, 8.4.2004, p. 1-35.

(3)   ĠU L 200, 30.07.1999, p. 1.