(1)

B’ittra tat-22 ta’ Settembru 2006, li l-Kummissjoni rċeviet fit-2 ta’ Ottubru 2006, il-Finlandja nnotifikat lill-Kummissjoni dwar miżuri li għandhom jittieħdu skond l-Artikolu 3a(1) tad-Direttiva 89/552/KEE.

(2)

Il-Kummissjoni vverifikat, fi żmien tliet xhur minn din in-notifika, li dawn il-miżuri huma kompatibbli mal-liġi tal-Komunità, b’mod partikulari dwar il-proporzjonalità tal-miżuri u t-trasparenza tal-proċedura ta’ konsultazzjoni nazzjonali.

(3)

Fl-eżami tagħha, il-Kummissjoni ħadet qieset id-dejta disponibbli fil-media Finlandiża.

(4)

Il-lista ta’ avvenimenti ewlenin ta’ importanza għas-soċjetà inklużi fil-miżuri Finlandiżi, tħejjiet b’mod ċar u trasparenti u tnediet konsultazzjoni wiesgħa fil-Finlandja.

(5)

Il-Kummissjoni kienet sodisfatta li l-attivitajiet elenkati fil-miżuri Finlandiżi laħqu minn ta’ l-anqas tnejn mill-kriterji li ġejjin, kunsidrati bħala indikaturi ta’ min joqgħod fuqhom ta’ l-importanza ta’ l-avvenimenti għas-soċjetà. (i) reżonanza ġenerali u speċjali fi ħdan l-Istat Membru, u mhux sempliċement sinifikat għal dawk li normalment isegwu l-isport jew attività konċernata; (ii) importanza kulturali distinta u ġeneralment rikonoxxuta għall-popolazzjoni fl-Istat Membru, b’mod partikulari bħala katalista għall-identità kulturali; (iii) l-involviment tat-tim nazzjonali fl-avveniment ikkonċernat fil-kuntest ta’ kompetizzjoni jew turnew ta’ importanza internazzjonali; u (iv) il-fatt li dak l-avveniment kien tradizzjonalment imxandar bla ħlas fuq it-televiżjoni u kienu jarawh udjenzi televiżivi kbar.

(6)

Numru ta’ avvenimenti elenkati fil-miżuri Finlandiżi, fosthom l-Olimpjadi tas-sajf u tax-xitwa, il-logħba tal-ftuħ, il-kwarti tal-finali, is-semifinali u l-finali tat-Tazza tad-Dinja tal-futbol, u l-logħob tat-tim Finlandiż f’dan it-turnew jaqgħu taħt din il-kategorija ta’ avvenimenti tradizzjonalment ikkunsidrati ta’ importanza kbira għas-soċjetà, kif jissemmew b’mod espliċitu fi premessa 18 tad-Direttiva 97/36/KE. Dawn l-avvenimenti għandhom reżonanza ġenerali u speċjali fil-Finlandja għax huma partikolarment popolari mal-pubbliku ġenerali, mhux biss ma’ dawk li normalment isegwu avvenimenti sportivi.

(7)

Il-Kampjonati tad-Dinja tal-Hockey fuq is-Silġ, ta’ l-irġiel organizzati mill-Federazzjoni Intenazzjonali tal-Hockey fuq is-Silġ, għandhom qbil ġenerali u speċjali, peress li l-Hockey fuq is-Silġ jintlagħab mill-poplu Finlandiż, u huwa ġeneralment rikonoxxut bħala ta’ importanza distinta kulturali għall-popolazzjoni Finlandiża minħabba s-suċċess kbir tat-tim Finlandiż f’dan it-turnew. Minħabba l-organizzazzjoni speċifika tagħhom, il-Kampjonati tad-Dinja tal-Hockey fuq is-Silġ għandhom jitqiesu bħala avveniment wieħed fejn logħbiet bejn pajjiżi oħrajn jaffettwaw ukoll il-pożizzjoni tat-timijiet li tkun jew tista’ tilgħab kontrihom il-Finlandja u r-riżultat finali.

(8)

Il-Kampjonati Nordiċi Dinjija ta’ l-iskijar (skijing cross-country, qbiż u Nordiku kkombinati) organizzati mill-Federazzjoni Internazzjonali ta’ l-Iskì (FIS) għandhom reżonanza ġenerali u speċjali u għandhom importanza kulturali distinta u ġeneralment rikonoxxuta għall-popolazzjoni Finlandiża, bħala katalista għall-identità kulturali nazzjonali, peress li l-iskijing Nordiku jgawdi l-istatus ta’ sport nazzjonali fil-Finlandja.

(9)

L-avvenimenti atletiċi elenkati, l-aktar il-Kampjonati Dinjija ta’ l-Atletika, organizzati mill-Federazzjoni ta’ Assoċjazzjonijiet Internazzjonali ta’ l-Atletika (IAAF) u l-Kampjonati Ewropej ta’ l-Atletika, organizzati mill-Assoċjazzjoni Ewropea ta’ l-Atletika (EAA) għandhom importanza kulturali distinta u ġeneralment rikonoxxuta għall-popolazzjoni Finlandiża, bħala katalista għall-identità kulturali nazzjonali, peress li l-aqwa atleti Finlandiżi li jirrappreżentaw lill-Finlandja internazzjonalment f’medda wiesgħa ta’ dixxiplini individwali huma fost l-elit tad-dinja fl-ispeċjalità tagħhom.

(10)

L-avvenimenti elenkati kienu tradizzjonalmnent imxandra fuq it-televiżjoni bla ħlas u kienu jarawhom udjenzi televiżivi kbar.

(11)

Il-miżuri Finlandiżi jidhru li huma proporzjonati sabiex jiġġustifikaw deroga mill-libertà fundamentali tat-Trattat tal-KE biex servizzi jiġu provduti abbażi ta’ raġuni predominanti ta’ interess għall-pubbliku, li għandha tiżgura aċċess wiesgħa għall-pubbliku għal xandiriet ta’ avvenimenti ta’ importanza kbira għas-soċjetà.

(12)

Il-miżuri Finlandiżi huma kompatibbli mar-regoli tal-kompetizzjoni tal-KE għall-fatt li d-definizzjoni ta’ xandara kwalifikati li jxandru avvenimenti elenkati hija bbażata fuq kriterji oġġettivi li jippermettu kompetizzjoni attwali u potenzjali għall-kisba tad-drittijiet tax-xandir ta’ dawn l-avvenimenti. Barra minn hekk, in-numru ta’ avvenimenti elenkati mhux sproporzjonat tant li jgħawweġ il-kompetizzjoni għas-swieq tat-televiżjoni bla u bi ħlas.

(13)

Il-proporzjonalità tal-miżuri Finlandiżi hija msaħħa mill-fatt li ma għandhom l-ebda effett retroattiv u għalhekk l-ebda impatt fuq l-eżerċizzju ta’ drittijiet ta’ xandir ta’ l-avvenimenti elenkati miksuba qabel id-data tad-dħul fis-seħħ tagħhom.

(14)

Il-Kummissjoni għarrfet lill-Istati Membri l-oħra dwar il-miżuri notifikati mill-Finlandja u ppreżentat ir-riżultati ta’ din il-verifika fil-laqgħa tal-Kumitat imwaqqaf skond l-Artikolu 23a tad-Direttiva tal-Kunsill 89/552/KEE, fil-15 ta’ Novembru 2006. Il-Kumitat adotta opinjoni favorevoli f’din il-laqgħa.

(15)

Il-miżuri Finlandiżi ġew adottati fit-22 ta’ Frar 2007 u daħlu fis-seħħ fl-1 ta’ Marzu 2007.