(1)

Id-Deċiżjoni 90/424/KEE tistipula l-proċeduri li jirregolaw il-kontribuzzjonijiet finanzjarji tal-Komunità għal miżuri veterinarji speċifiċi, inklużi miżuri tekniċi u xjentifiċi. B’mod partikolari, il-Komunità għandha twettaq jew tgħin lill-Istati Membri jew organizzazzjonijiet internazzjonali biex iwettqu l-miżuri tekniċi u xjentifiċi meħtieġa għall-iżvilupp tal-leġiżlazzjoni veterinarja Komunitarja u għall-iżvilupp ta’ l-edukazzjoni jew it-taħriġ veterinarju.

(2)

Billi l-Office International des Epizooties (OIE) ħa l-inizjattiva li jorganizza konferenza fuq skala kbira bit-tema Lejn l-eliminazzjoni ta’ l-idrofobija fl-Ewroasja, li għandha ssir f’Mejju 2007 f’Pariġi (“il-konferenza ta’ l-OIE”). Minħabba li l-għan tal-Konferenza ta’ l-OIE huwa biex ikunu elaborati aktar ir-rakkomandazzjonijiet tal-konferenza li saret mill-OIE fi Kjev fl-2005, l-OIE għandu fil-fatt monopolju kif hemm imniżżel fl-Artikolu 168(c) tar-Regolament tal-Kummissjoni (KE, Euratom) Nru 2342/2002 tat-23 ta’ Diċembru 2002 li jistabbilixxi regoli dettaljati għall-implimentazzjoni tar-Regolament tal-Kunsill (KE, Euratom) 1605/2002 dwar ir-regolament finanzjarju applikabbli għall-baġit ġenerali tal-komunitajiet Ewropej (2), u allura mhix meħtieġa sejħa għal proposti.

(3)

L-idrofobija kienet ilha għal bosta snin fl-annimali selvaġġi f’diversi Stati Membri sservi ta’ riserva għal infezzjonijiet f’annimali oħra u għalhekk tirrappreżenta riskju serju għas-saħħa tal-bniedem. Dawk l-Istati Membri implimentaw programmi ta’ eradikazzjoni u tilqim orali fost l-annimali selvaġġi. Bħala riżultat ta’ dawk il-miżuri, il-marda ġiet eradikata f’ċerti Stati Membri imma għadha teżisti f’oħrajn fejn il-programmi ta’ eradikazzjoni nbdew dan l-aħħar.

(4)

Dawk il-programmi jeħtieġ li jibqgħu sakemm ikun hemm eradikazzjoni kompluta ta’ l-idrofobija. Barra minn hekk, il-programmi jeħtieġ li jibqgħu f’dawk l-Istati Membri li għandhom fruntiera ma’ pajjiżi terzi fejn l-idrofobija għadha teżisti fost l-annimali selvaġġi.

(5)

Fl-interess ta’ saħħet l-annimali, għandha tkun inkoraġġita kull azzjoni li tista’ tiffaċilita deċiżjonijiet politiċi favur il-kontroll ta’ l-idrofobija u l-eradikazzjoni f’pajjiżi fl-Ewropa tal-Lvant u l-Asja Ċentrali.

(6)

Il-konferenza ta’ l-OIE taf twassal għal titjib fil-leġiżlazzjoni veternarja li hi fis-seħħ u għal żvilupp fl-edukazzjoni u t-taħriġ fil-mediċina veterinarja tal-pajjiżi parteċipanti.

(7)

Jixraq għalhekk li ssir kontribuzzjoni finanzjarja tal-Komunità għall-konferenza ta’ l-OIE. Għandhom ikunu speċifikati l-ammont massimu u r-rata ta’ kontribuzzjoni bħal din. Il-kontribuzzjoni finanzjarja tal-Komunità għandha tittieħed mil-linja tal-baġit 17 04 02 01.

(8)

Il-miżuri previsti f’din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,