(1)

L-Artikolu 2 tad-Direttiva 88/378/KEE jipprovdi li ġugarelli jistgħu jitqiegħdu fis-suq biss jekk ma jheddux is-sikurezza u/jew is-saħħa ta' min jużahom jew ta' partijiet terzi meta dawn jintużaw kif maħsub jew b'mod li jista' jiġi previst, filwaqt li titqies l-imġiba normali tat-tfal.

(2)

Skond l-Artikolu 5(1) tat-tieni sottoparagrafu tad-Direttiva 88/378/KEE, il-ġugarelli huma assumati li jikkonformaw mar-rekwiżiti ta' sikurezza meħtieġa msemmija fl-Artikolu 3 tad-Direttiva jekk ikunu konformi ma' l-istandards nazzjonali applikabbli għalihom li jittrasponu l-istandards armonizzati, li n-numri tar-referenza tagħhom ġew ippubblikati fil-Ġurnal Uffiċjali tal-Komunitajiet Ewropej.

(3)

Skond l-Artikolu 5(1) it-tieni sottoparagrafu tad-Direttiva 88/378/KEE, Stati Membri huma meħtieġa li jippubblikaw in-numri ta' referenza ta' l-istandards nazzjonali li jittrasponu l-istandards armonizzati, li n-numri ta' referenza tagħhom ġew ippubblikati fil-Ġurnal Uffiċjali tal-Komunitajiet Ewropej.

(4)

Il-Kumitat Ewropew għall-Istandarizzazzjoni (CEN), taħt mandat mill-Kummissjoni, fassal u adotta l-istandard armonizzat EN 71-1:1998 “Is-Sikurezza tal-ġugarelli – Parti 1: karatteristiċi mekkaniċi u fiżiċi” fil-15 ta' Lulju 1998, li n-numri ta' referenza tagħhom ġew ippubblikati għall-ewwel darba fil-Ġurnal Uffiċjali tal-Komunitajiet Ewropej tat-28 ta' Lulju 1999 (3).

(5)

Fis-16 ta' Settembru 2004, il-Kumitat Ewropew għall-Istandardizzazzjoni adotta emenda 10 għall-istandard armonizzat EN 71-1:1998 “Is-Sikurezza tal-ġugarelli – Parti 1: karatteristiċi mekkaniċi u fiżiċi”. In-numri ta' referenza ta' din l-emenda ġew ippubblikati għall-ewwel darba fil-Ġurnal Uffiċjali ta' l-Unjoni Ewropea tat-2 ta' Awwissu 2005 (4).

(6)

Fid-19 ta' Settembru 2005, il-Kumitat Ewropew għall-Istandardizzazzjoni adotta l-istandard EN 71-1:2005 “Is-Sikurezza tal-ġugarelli – Parti 1: karatteristiċi mekkaniċi u fiżiċi” li huwa verżjoni kkonsolidata ta' l-istandard armonizzat EN 71-1:1998 u l-ħdax-il emenda tiegħu. L-emenda 10 hija inkorporata fl-istandard EN 71-1:2005.

(7)

L-emenda 10 għandha l-għan li tindirizza r-riskji ta' tagħliq permezz ta' ġugarelli li għandhom l-għamla ta' kikkra, skutella jew nofs bajda b'fetħa kważi tonda, ovali jew ellittika li tfal żgħar jistgħu jpoġġu quddiem wiċċhom meta jkunu qed jilgħabu u b'hekk ma jħallux l-arja tgħaddi. L-emenda teskludi mill-ambitu tagħha ġugarelli maħsuba għax-xorb, bħal kikkri parti minn settijiet tat-te.

(8)

Skond l-Artikolu 6(1) tad-Direttiva 88/378/KEE, l-awtoritajiet Franċiżi qajjmu oġġezzjoni formali rigward ir-rekwiżiti dwar ġugarelli emisferiċi, b'mod partikolari, l-esklużjoni ta' ġugarelli maħsuba għax-xorb stipulati fl-istandard EN 71-1:2005.

(9)

L-awtoritajiet Franċiżi jisħqu li l-għan tar-rekwiżiti tekniċi stipulati fl-istandard armonizzat dwar ġugarelli emisferiċi huwa li jindirizzaw ir-riskji ta' tagħliq li jistgħu jinħolqu minn ċerti għamliet ta' ġugarelli li jistgħu jitpoġġew quddiem l-imnieħer u l-ħalq ta' tifel/tifla u ma jħallux l-arja tgħaddi. Fost dwan il-prodotti hemm ġugarelli maħsuba għax-xorb. Dawn huma ġugarelli li wisq probabbli t-tfal se jpoġġu ma' ħalqhom meta jkunu qed jilgħabu sabiex jagħmulha ta' bir-ruħhom li qed jixorbu. Minħabba dan, l-awtoritajiet Franċiżi jisħqu li ġugarelli maħsuba għax-xorb għandhom jiġu koperti mir-rekwiżiti dwar ġugarelli emisferiċi ta' l-istandard armonizzat EN 71-1:2005.

(10)

Skond l-Organizzazzjoni Ewropea għall-Istandardizzazzjoni (CEN) l-istandardizzazzjoni dwar ġugarelli emisferiċi hija ġustifikata bl-inċidenti li kellhom tfal li kienu qed jilgħabu bit-tali ġugarelli f'ristoranti self-service. Ix-xogħol kien imsejjes fuq investigazzjoni komprensiva mwettqa sabiex jinstab id-daqs kritiku u l-għamliet ta' oġġetti li għandhom jiġu indirizzati bl-istandardizzazzjoni li għandha x'taqsam mat-tfal sabiex dawn jiġu mħarsa. Fir-rigward ta' oġġetti maħsuba għax-xorb, pereżempju kikkri tas-sett tat-te, CEN ikkonkludiet li ma ġew irreġistrati l-ebda inċidenti b'dawn il-ġugarelli jew b'kikkri tax-xorb ta' vera. Fuq il-bażi ta' dawn l-investigazzjonijiet, is-CEN iddeċidiet li ma hemm l-ebda bażi sabiex jiġi estiż ix-xogħol ta' standardizzazzjoni għal dan it-tip partikolari ta' ġugarelli.

(11)

Fuq talba tal-Kummissjoni, l-esperti ta' l-Istati Membri dwar is-sikurezza tal-ġugarelli infurmaw lill-Kummissjoni b'inċidenti kkawżati minn ġugarelli simili. L-inċidenti ssemmew f'rapport ippubblikat fil-magazin “Pediatrics”, vol. 111, nru 1, Jannar 2003. Skond dan ir-rapport ġew identifikati 17-il inċident. Fil-każijiet kollha investigati, it-tfal instabu bl-oġġett pjuttost sod imwaħħal strett ma' wiċċhom. Mis-17-il inċident involuti, 13 kellhom x'jaqsmu ma' ġugarelli. F'dawn l-inċidenti kienu involuti tfal ta' bejn l-4 u is-36 xahar.

(12)

B'żieda ma' dan, il-Kummissjoni ġiet infurmata wkoll b'inċident mhux fatali fl-Istati Uniti ta' l-Amerika, irreġistrat fil-Kummissjoni ta' l-Istati Uniti dwar is-Sikurezza ta' Prodotti għall-Konsumatur fis-27 ta' Ottubru 2000. Tifla/Tifel ta' sentejn u nofs instab b'kikkra tal-logħol magħmula minn plastik iebes imwaħħla ma' ħalqu/ħalqha u mnieħru/mnieħerha. Dan il-ġugarell kien parti minn sett tat-te tal-logħob.

(13)

Fuq il-bażi tat-tagħrif mogħti mill-awtoritajiet Franċiżi, mill-awtoritajiet nazzjonali oħrajn u mill-Kumitat dwar l-istandards u r-regolamenti tekniċi, jeżistu provi biżżejjed li ġugarelli maħsuba għax-xorb jistgħu jkunu ta' riskju ta' tagħliq. Filwaqt li jqisu li dawn il-ġugarelli huma esklużi mill-ambitu ta l-istandard msemmi hawn fuq, skond l-Artikolu 5(2) tad-Direttiva 88/378/KEE, l-Istati Membri għandhom jassumu li l-ġugarelli msemmija hawn fuq jissodisfaw ir-rekwiżiti ta' sikurezza meħtieġa biss jekk dawn għandhom ċertifikat ta' eżaminazzjoni tat-tip KE maħruġ minn korp notifikat.