DEĊIŻJONI TAL-KUMMISSJONI

tas-7 ta' Marzu 2007

li temenda d-Deċiżjoni 2005/51/KE fir-rigward tal-perijodu li fih il-ħamrija li hija kkontaminata mill-pestiċidi jew minn aġenti tat-tniġġis organiċi persistenti jistgħu jiġu introdotti fil-Komunità għal raġunijiet ta' dekontaminazzjoni

(notifikat bid-dokument numru C(2006) 663)

(2007/156/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 2000/29/KE tat-8 ta' Mejju 2000 dwar miżuri protettivi kontra l-introduzzjoni u t-tixrid ta' organiżmi li huma ta' ħsara għall-pjanti jew għall-prodotti tal-pjanti fil-Komunità (1), b'mod partikolari l-Artikolu 15(1) tagħha,

Billi:

(1)

Permezz tad-deroga mid-Direttiva 2000/29/KE, id-Deċiżjoni tal-Kummissjoi 2005/51/KE tal-21 ta' Jannar 2005 tawtorizza lill-Istati Membri biex jipprovdu temporanjament għad-derogi minn ċerti dispożizzjonijiet tad-Direttiva 2000/29/KE fir-rigward ta' l-importazzjoni (2) ta' ħamrija li hija kkontaminata b'pestiċidi jew b'aġenti ta' tniġġis organiċi persistenti għal-raġunijiet ta' dekontaminazzjoni tawtorizza, għal perjodu limitat, lill-Istati Membri li jipparteċipaw fil-programm ta' l-Organizzazzjoni ta' l-Ikel u l-Agrikoltura tan-Nazzjonijiet Uniti (FAO) dwar prevenzjoni u rimi ta' pestiċidi li ma jintużawx u li mhumiex iktar bżonjużi sabiex tkun permessa l-introduzzjoni ta' ħamrija li hija kkontaminata minn tali pestiċidi fil-Komunità għal trattament f'impjanti ta' inċenerazzjoni apposta għall-iskart perikoluż.

(2)	Minħabba li l-implimentazzjoni ta' dak il-programm ittardjat, il-perjodu li fih tali ħamrija kkontaminata jista' jiġi introdott skond l-awtorizzazzjoni mogħtija mid-Deċiżjoni 2005/51/KE għandu jiġi estiż.

(3)	Id-Deċiżjoni 2005/51/KE għandha għalhekk tiġi emendata skond dan.

(4)	Il-miżuri stipulati f'din id-Deċiżjoni huma konformi ma' l-opinjoni tal-Kumitat Permanenti dwar is-Saħħa tal-Pjanti,

ADOTTAT DIN ID-DEĊIŻJONI: