8.1.2008   

MT

Il-Ġurnal Uffiċjali ta’ l-Unjoni Ewropea

178

(1)

Il-kontijiet tal-Bank Ċentrali Ewropew (BĊE) u tal-banek ċentrali nazzjonali ta' l-Eurosistema għandhom jiġu verifikati minn awdituri esterni indipendenti rakkomandati mill-Kunsill Regolatorju tal-BĊE u approvati mill-Kunsill ta' l-Unjoni Ewropea.

(2)

Skond l-Artikolu 37(1) ta’ l-Att Federali dwar l-Oesterreichische Nationalbank, il-Laqgħa Ġenerali ta’ l-Oesterreichische Nationalbank (OeNB) għandha taħtar żewġ awdituri u żewġ awdituri supplenti kull sena. L-awdituri supplenti jingħataw mandat biss fil-każ li l-awdituri ma jkunux jistgħu jwettqu l-verifika.

(3)

Fl-14 ta’ Marzu 2006 l-Kunsill ta’ l-Unjoni Ewropea, wara li kkunsidra r-Rakkomandazzjoni tal-Bank Ċentrali Ewropew BĊE/2006/1 ta’ l-1 ta’ Frar 2006 lill-Kunsill ta’ l-Unjoni Ewropea dwar l-awdituri esterni ta’ l-Oesterreichische Nationalbank (2), approva lil KPMG Alpen-Treuhand GmbH u TPA Horwath Wirtschaftsprüfung GmbH bħala awdituri esterni konġunti, u lil Moore Stephens Austria Wirtschaftsprüfungsgesellschaft mbH u BDO Auxilia Treuhand GmbH bħala awdituri supplenti konġunti għas-sena finanzjarja 2006 (3).

(4)

Fit-8 ta’ Settembru 2006 l-OeNB informa lill-BĊE li fil-Laqgħa Ġenerali tiegħu ta' Mejju 2006, KPMG Alpen-Treuhand GmbH ma kienx kiseb il-maġġoranza tal-voti meħtieġa biex jintgħażel u, li bħala konsegwenza ta’ dan, it-tieni awditur fil-mertu, TPA Horwath Wirtschaftsprüfung GmbH, inħatar bħala l-ewwel awditur. L-ewwel awditur supplenti fil-mertu, Moore Stephens Austria Wirtschaftsprüfungsgesellschaft mbH, inħatar bħala t-tieni awditur u t-tieni awditur supplenti fil-mertu, BDO Auxilia Treuhand GmbH, inħatar bħala l-uniku awditur supplenti. Biex jinħatar it-tieni awditur supplenti, l-OeNB mexxiet proċedura għal akkwist pubbliku ristretta, għażlet lil Ernst & Young Wirtschaftsprüfungs GmbH u stiednet lill-BĊE biex jirrakkomanda dan lill-Kunsill ta’ l-Unjoni Ewropea għall-approvazzjoni.

(5)

L-approvazzjoni tal-Kunsill ta’ l-Unjoni Ewropea hija meħtieġa biex jinħatar Moore Stephens Austria Wirtschaftsprüfungsgesellschaft mbH bħala t-tieni awditur estern u Ernst & Young Wirtschaftsprüfungs GmbH bħala t-tieni awditur supplenti estern ta’ l-OeNB.

(6)

Il-Kunsill Regolatorju tal-BĊE irrakkomanda li l-mandat ta' l-awdituri esterni għandu jiġġedded fuq bażi annwali, li ma jaqbiżx mandat totali ta' ħames snin.

(7)

Huwa xieraq li tiġi segwita r-rakkomandazzjoni tal-Kunsill Regolatorju tal-BĊE u li tiġi emendata d-Deċiżjoni 1999/70/KE (4) kif meħtieġ,