24.8.2007   

MT

Il-Ġurnal Uffiċjali ta’ l-Unjoni Ewropea

258

(1)

Id-Direttiva 96/23/KE tistabbilixxi miżuri għall-monitoraġġ ta' sustanzi u gruppi ta' residwi mniżżla fl-Anness I. Skond id-Direttiva 96/23/KE, l-inklużjoni u ż-żamma fuq il-lista tal-pajjiżi terzi previsti fil-leġiżlazzjoni Komunitarja li minnhom l-Istati Membri huma awtorizzati jimpurtaw annimali u prodotti ta' l-annimali koperti minn dik id-Direttiva għandhom ikunu soġġetti għal sottomissjoni mill-pajjiżi terzi kkonċernati ta' pjan li jistabbilixxi l-garanziji li joffru fejn jidħol il-monitoraġġ tal-gruppi ta' residwi u sustanzi msemmija f'dik id-Direttiva.

(2)

Id-Deċiżjoni tal-Kummissjoni 2004/432/KE tad-29 ta' April 2004 dwar l-approvazzjoni tal-pjanijiet tal-monitoraġġ tar-residwi sottomessi minn pajjiżi terzi skond id-Direttiva tal-Kunsill 96/23/KE (2) telenka dawk il-pajjiżi terzi li ssottomettew pjanijiet tal-monitoraġġ tar-residwi skond ir-rekwiżiti ta' dik id-Direttiva.

(3)

Ċerti pajjiżi terzi lill-Kummissjoni ppreżentawlha pjanijiet tal-monitoraġġ tar-residwi għal annimali u prodotti li joriġinaw mill-annimali li bħalissa mhumiex elenkati fid-Deċiżjoni 2004/432/KE. L-evalwazzjoni ta' dawk il-pjanijiet u l-informazzjoni addizzjonali mitluba mill-Kummissjoni jipprovdu biżżejjed garanziji fuq il-monitoraġġ tar-residwi f'dawk il-pajjiżi terzi għall-annimali u l-prodotti kkonċernati. L-annimali u l-prodotti li joriġinaw mill-annimali rilevanti għandhom għalhekk jiġu inklużi fil-lista għal dawk il-pajjiżi terzi f'dik id-Deċiżjoni.

(4)

Ċerti pajjiżi terzi talbu volontarjament biex ma jkunux inklużi fil-lista fid-Deċiżjoni 2004/432/KE għal xi kategoriji ta' annimali u prodotti li joriġinaw mill-annimali. L-annotazzjonijiet li jikkonċernaw dawk l-annimali u l-prodotti li joriġinaw mill-annimali rilevanti b'hekk għandhom jitneħħew mil-lista għal dawk il-pajjiżi terzi.

(5)

Ċerti pajjiżi terzi li bħalissa huma elenkati għal ċerti annimali u prodotti li joriġinaw mill-annimali skond id-Deċiżjoni 2004/432/KE ma ssottomettewx lill-Kummissjoni l-garanziji mitluba għal xi wħud minn dawn l-annimali u l-prodotti li joriġinaw mill-annimali. Fin-nuqqas ta' tali garanziji, l-annotazzjonijiet għall-annimali u l-prodotti li joriġinaw mill-annimali għandhom b'hekk jitneħħew mil-lista għal dawk il-pajjiżi terzi. Il-pajjiżi terzi konċernati kienu infurmati dwar dan.

(6)

Barra dan, ċerti pajjiżi terzi huma msemmija fl-Anness mad-Deċiżjoni 2004/432/KE għall-bovini, ovini/kaprini, majjali u ekwini bil-limitu “għall-ġlud biss”. Dak il-limitu kien imdaħħal f'dak l-Anness bħala informazzjoni dwar pajjiżi terzi li minnhom għandhom jitħallew jiġu importati l-ġlud. Madankollu, dawk il-pajjiżi terzi ma jridux jissottomettu għall-approvazzjoni pjan tar-residwi speċifiku għall-ġlud, ladarba mhux meqjus li hemm bżonn ta' pjan tal-monitoraġġ tar-residwi għal dawn il-prodotti. Għaldaqstant, fl-interess taċ-ċarezza tal-leġiżlazzjoni Komunitarja, l-annotazzjonijiet bil-limitu “għall-ġlud biss” għandhom jitneħħew mil-lista fl-Anness mad-Deċiżjoni 2004/432/KE, mingħajr l-ebda preġudizzju għall-importazzjonijiet ta' tali prodotti.

(7)

Ir-responsabbiltà biex ikunu evalwati l-pjanijiet dwar il-kontrolli tar-residwi għall-kategoriji kollha ta' l-annimali u prodotti li joriġinaw min-Norveġja hija ta' l-Awtorità ta' Sorveljanza ta' l-EFTA. Għalhekk, l-annotazjonijiet għal dak il-pajjiż għandhom jitneħħew mil-lista fl-Anness għad-Deċiżjoni 2004/432/KE.

(8)

L-Unjoni Statali tas-Serbja u Montenegro ġiet xolta. Għalhekk in-nota ta' qiegħ il-paġna li tirreferi għad-denominazzjoni ta' qabel għandha titneħħa mil-lista f'dak l-Anness.

(9)

Id-Deċiżjoni 2004/432/KE għandha għalhekk tkun emendata.

(10)

Il-miżuri previsti f'din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta' l-Annimali,