ANNESS

PRINĊIPJI ĠENERALI U KRITERJI GĦALL-GĦAŻLA U L-IFFINANZJAR TA' AZZJONIJIET LI JAQGĦU TAĦT IL-PROGRAMM TA' “IS-SAĦĦA PUBBLIKA”

Dan id-dokument jissostitwixxi fl-effetti tiegħu kollha d-dokument preċedenti –“Prinċipji ġenerali u l-kriterji għall-għażla u l-iffinanzjar ta' l-azzjonijiet taħt il-Programm tas-saħħa pubblika”miżjud mad-Deċiżjoni tal-Kummissjoni C(2005) 29. Huwa japplika biss għal ko-finanzjament ta' azzjonijiet individwali taħt il-programm tas-saħħa pubblika permezz ta' għotjiet wara sejħiet għall-proposti. Taħt l-ebda ċirkostanza ma jista' jiftiehem li qed jissostitwixxi r-regoli legali applikabbli.

1.   PRINĊIPJI ĠENERALI

1.

Ir-Regolament Finanzjarju u r-Regoli ta' Implimentazzjoni tiegħu huma d-dokumenti ta' referenza għall-implimentazzjoni tal-Programm tas-saħħa pubblika

2.

L-għotjiet għandhom ikunu konformi mal-prinċipji li ġejjin: — Ir-regola ta' kofinanzjar: kofinanzjar estern minn xi sors li mhux il-fondi tal-Komunità huwa meħtieġ, jew permezz tar-riżorsi tal-benefiċjarju nnifsu jew ir-riżorsi finanzjarji ta' partijiet terzi. Il-kontribuzzjonijiet mhux fi flus minn partijiet terzi jistgħu jitqiesu bħala kofinanzjar jekk meqjusa neċessarji jew adegwati (l-Artikolu 113 tar-Regolament Finanzjarju u l-Artikolu 172 tar-Regoli ta' Implimentazzjoni). — Ir-regola ta' non-profitt: l-għotja ma jistax ikollha l-għan jew l-effett li tipproduċi profitt għall-benefiċjarju (l-Artikolu 109(2) tar-Regolament Finanzjarju u l-Artikolu 165 tar-Regoli ta' Implimentazzjoni). — Ir-Regola ta' non-retroattività: in-nefqa eliġibbli għall-iffinanzjar għandha ssir wara li jiġi ffirmat il-ftehim. F'każijiet eċċezzjonali, jista' jiġi aċċettat li titqies in-nefqa magħmula mid-data ta' preżentazzjoni ta' l-applikazzjoni għall-għotja, iżda mhux qabel din id-data (L-Artikolu 112 tar-Regolament Finanzjarju). — Ir-regola ta' non-akkumulazzjoni: għotja waħda biss tista' tingħata għal xi azzjoni speċifika mwettqa minn xi benefiċjarju partikolari għal kull sena finanzjarja (l-Artikolu 111 tar-Regolament Finanzjarju) (1)

3.

Il-proposti għal azzjonijiet (proġetti) se jkunu evalwati fuq il-bażi ta' tliet kategoriji ta' kriterji: — kriterji ta' esklużjoni, biex tiġi eżaminata l-eliġibilità ta' l-applikant – l-Artikolu 114 tar-Regolament Finanzjarju; — kriterji ta' għażla, biex tiġi eżaminata l-kapaċità finanzjarja u operazzjonali ta' l-applikant li jwassal fi tmiem il-proġett propost – l-Artikolu 176 tar-Regoli ta' Implimentazzjoni; — kriterji ta' għotja, biex tiġi eżaminata l-kwalità tal-proġett filwaqt li jitqiesu l-ispejjeż. Dawn it-tliet kategoriji ta' kriterji għandhom jitqiesu b'mod konsekuttiv matul il-proċedura ta' evalwazzjoni. Proġett li ma jissodisfax il-rekwiżiti ta' waħda minn dawn it-tliet kategoriji ma jitqiesx fl-istadju ta' evalwazzjoni ta' wara u jitwarrab.

4.

Fir-rigward tal-Programm tas-saħħa pubblika, il-Kummissjoni għandha tagħti prijorità lill-proġetti li: — għandhom karattru innovattiv fir-rigward tal-qagħda preżenti u li mhumiex ta' natura rikorrenti;. — jipprovdu valur miżjud fuq livell Ewropew fil-qasam tas-saħħa pubblika: il-proġetti għandhom jipproduċu ekonomiji ta' skala rilevanti, jinvolvu kemm jista' jkun pajjiżi eliġibbli fir-rigward ta' l-ambitu tal-proġett u jistgħu jiġu applikati bnadi oħra; — jikkontribwixxu u jappoġġjaw l-żvilupp ta' strateġija politika fuq livell Komunitarju fil-qasam tas-saħħa pubblika; — jagħtu attenzjoni xierqa għal struttura effiċjenti ta' tmexxija, proċess ta' evalwazzjoni ċar u deskrizzjoni preċiża tar-riżultati mistennija; — jinkludu pjan ta' l-użu u t-tixrid tar-riżultati fuq livell Ewropew għal pubbliku destinatarju xieraq.

2.   KRITERJI TA' ESKLUŻJONI

1.

L-applikanti jiġu esklużi milli jieħdu sehem fil-programm tas-“Saħħa pubblika” jekk: (a) ikunu falluti jew qed jingħalqu, għandhom in-negozju tagħhom amministrat mill-qrati, daħlu fi ftehim mal-kredituri, issospendew l-attivitajiet ta' negozju tagħhom, huma s-suġġett ta' proċedimenti li jikkonċernaw dawn il-kwistjonijiet jew jinsabu f'xi sitwazzjoni analoga li ġejja minn xi proċedura simili prevista fil-leġislazzjoni jew fir-regolamenti nazzjonali; (b) instabu ħatja ta' xi offiża li tirrigwarda l-kondotta professjonali tagħhom minn sentenza li għandha l-forza ta' res judicata; (ċ) instabu ħatja ta' mġieba xejn professjonali b'mod gravi ppruvata bi kwalunkwe mezz li l-awtorità kontraenti tista' tiġġustifika; (d) ma ssodisfawx l-obbligazzjonijiet marbuta mal-ħlas tal-kontribuzzjonijiet tas-sigurtà soċjali jew il-ħlas ta' taxxa b'konformità mad-dispożizzjonijiet legali tal-pajjiż li fih ikunu stabbiliti jew ma' dawk tal-pajjiż ta' l-Uffiċjal Awtorizzanti jew dawk tal-pajjiż fejn ser isir il-kuntratt; (e) kienu suġġetti għal sentenza b'forza ta' res judikata minħabba frodi, korruzzjoni, implikazzjoni f'xi organizzazzjoni kriminali jew xi attività oħra illegali ta' ħsara għall-interessi finanzjarji tal-Komunitajiet; (f) ġew dikjarati li kisru b'mod gravi l-kuntratt minħabba nuqqas ta' konformità ma' l-obbligazzjonijiet kontrattwali tagħhom, wara proċedura oħra ta' akkwist jew għotja li tkun ingħatatilhom mill-finanzi tal-baġit tal-Komunità. Xhieda: Il-kandidati għandhom jipprovdu dikjarazzjoni fuq l-unur, iffirmata u ddatata kif imiss, li tistqarr li huma ma jinstabux f'waħda mis-sitwazzjonijiet hawn fuq.

2.

Kull proposta li tasal wara li jiskadi ż-żmien li fih jintlaqgħu l-proposti kif speċifikat fis-sejħa għall-proposti jew li ma tissodisfax ir-rekwiżiti formali stabbiliti fis-sejħa għall-proposti ma titħalliex tieħu sehem fil-programm “is-Saħħa pubblika”. Kull applikazzjoni għandha tkun kompluta u jkun fiha ta' l-inqas dawn id-dokumenti: — Tagħrif amministrattiv dwar is-soċju prinċipali u s-soċji msieħba; — Deskrizzjoni teknika tal-proġett; — Baġit globali tal-proġett u l-livell mitlub ta' kofinanzjar tal-Komunità. — Xhieda: Baġit globali tal-proġett u l-livell mitlub ta' kofinanzjar tal-Komunità. — Xhieda: Kontenut ta' l-applikazzjoni.

3.

Azzjonijiet li jkunu bdew sad-data li fiha saret ir-reġistrazzjoni ta' l-applikazzjoni għal għotja ma jitħallewx jieħdu sehem fil-programm “is-Saħħa pubblika”. Xhieda: Id-data tal-bidu u t-tul skedati ta' l-azzjoni għandhom jiġu speċifikati fl-applikazzjoni ta' l-għotja.

3.   KRITERJI GĦALL-GĦAŻLA

Dawk il-proposti biss li jkunu ssodisfaw ir-rekwiżiti tal-kriterji ta' eskluzjoni għandhom ikunu eliġibbli għall-evalwazzjoni. Il-kriterji kollha ta' għażla li ġejjin għandhom ikunu sodisfatti.

1.   Stat legali

L-applikant għandu jipprovdi xhieda ta' l-istat legali ta' l-organizzazzjoni tiegħu/tagħha.

Xhieda: L-applikant għandu jipprovdi l-artikoli ta' sħubija ta' l-organizzazzjoni u ċ-ċertifikat uffiċjali ta' reġistrazzjoni.

2.   Kapaċità finanzjarja

L-applikant għandu jkollu riżorsi ta' fondi stabbli u suffiċjenti biex imexxi l-attività tiegħu/tagħha matul il-perjodu li fih tkun qed isseħħ l-attività u jieħu sehem fl-ikkofinanzjar tagħha.

Xhieda: L-applikant għandu jipprovdi l-kont tal-qligħ u t-telf u l-karta bilanċjali ta' l-aħħar sentejn sħaħ finanzjarji.

Il-verifika tal-kapaċità finanzjarja m'għandiex tapplika għall-istituzzjonijiet pubbliċi, lanqas għall-organizzazzjonijiet pubbliċi internazzjonali maħluqa bi ftehim inter-governamentali jew għall-aġenziji speċjalizzati maħluqa mill-istess tip ta' ftehim.

3.   Kapaċità operazzjonali

L-applikant għandu jkollu l-kompetenzi professjonali u l-kwalifiki meħtieġa biex itemm l-azzjoni proposta.

Xhieda: L-applikant għandu jipprovdi l-aktar rapport annwali reċenti ta' l-attività ta' l-organizzazzjoni, inkluż id-dettalji operattivi, finanzjarji u tekniċi u l-curricula vitae ta' l-istaff professjonali rilevanti kollu fl-organizzazzjonijiet kollha involuti fil-proġett.

4.   Dokumenti addizzjonali pprovduti fuq talba tal-Kummissjoni

Fuq talba bħal din mill-Kummissjoni, l-applikant għandu jipprovdi rapport estern ta' verifika ta' kontijiet magħmul minn awditur approvat, li jiċċertifika l-kontijiet għall-aħħar sena finanzjarja disponibbli u li jagħti stima tal-vijabilità finanzjarja ta' l-applikant.

4.   KRITERJI TA' GĦOTJA

Dawk il-proposti biss li jkunu ssodisfaw ir-rekwiżiti tal-kriterji ta' esklużjoni u l-kriterji ta' għażla għandhom ikunu eliġibbli għal iżjed evalwazzjoni fuq il-bażi tal-kriterji ta' għotja li ġejjin. Is-sejħa għall-proposti se tistabbilixxi kif il-blokki tal-kriterji ta' għotja msemmija hawn taħt se jiġu applikati.

1.   Relevanza politika u kuntestwali tal-proġett

(a)

Il-kontribuzzjoni tal-proġett lill-programm “is-Saħħa pubblika” u l-pjan ta' ħidma annwali f'termini ta' l-ilħiq ta' l-għanijiet u l-prioritajiet;

(b)

Relevanza strateġika fit-termini tal-kontribuzzjonijiet mistennija għat-tagħrif eżistenti u l-implikazzjonijiet għas-saħħa;

(ċ)

Valur miżjud fuq livell Ewropew fil-qasam tas-saħħa pubblika: — l-impatt fuq il-gruppi mmirati, l-effett għaż-żmien fit-tul u effetti multiplikaturi potenzjali bħalma huma attivitajiet replikati, trasferibbli u sostenibbli; — kontribuzzjoni lil, kumplimentarjetà, sinerġija u kompatibilità mal-politiki relevanti ta' l-UE

(d)

Pertinenza tal-kopertura ġeografika L-applikanti għandhom jiżguraw li kopertura ġeografika tal-proġett tkun biżżejjed fir-rigward ta' l-għanijiet, li jispjegaw ir-rwol tal-pajjiżi eliġibbli bħala soċji u r-relevanza tar-riżorsi tal-proġett jew tal-popolazzjonijiet fil-mira li jirrappreżentaw. Proposti li jinvolvu dimensjoni nazzjonali jew subnazzjonali (i.e. li jinvolvu biss pajjiż wieħed eliġibbli jew reġjun f'xi pajjiż speċifiku) ma jiġux aċċettati.

(e)

L-adegwatezza tal-proġett mal-kuntest soċjali, kulturali u politiku L-applikanti jridu jirrelataw il-proġett mas-sitwazzjoni tal-pajjiż jew iż-żoni speċifiżi involuti, u jiżguraw il-kompatibilità ta' l-azzjonijiet maħsuba mal-kultura u l-opinjonijiet tal-gruppi fil-mira.

2.   Kwalità teknika tal-proġett

(a)   Bażi ta' evidenza

L-applikanti jridu jinkludu l-analiżi tal-problema u jiddiskrivu b'mod ċar il-fatturi, l-impatt, l-effettività u l-applikabilità tal-miżuri proposti;

(b)   Speċifikazzjoni tal-kontenut

L-applikanti jridu jiddiskrivu b'mod ċar l-għanijiet u l-miri, il-gruppi fil-mira, inkluż fatturi relevanti ġeografiċi, metodi, effetti antiċipati u r-riżultati mistennija;

(ċ)   In-natura innovattiva, il-komplementarjetà teknika u l-evitar ta' duplikazzjoni ta' azzjonijiet eżistenti fil-livell ta' l-UE

L-applikanti għandhom jidentifikaw b'mod ċar il-progress li l-proġett beħsiebu jikseb fil-qasam tiegħu, f'paragun mas-sitwazzjoni kurrenti u jiżgura li ma jkunx hemm la duplikazzjoni mhux adegwata u lanqas koinċidenza, kemm parzjali jew totali, bejn il-proġetti u l-attivitajiet li diġa saru fil-livell Ewropew u dak internazzjonali.

(d)   Strateġija ta' evalwazzjoni

L-applikanti għandhom jispjegaw b'mod ċar it-tip u l-adegwatezza tal-metodi proposti u l-indikaturi magħżula.

(e)   Strateġija ta' tixrid

L-applikanti jridu juru b'mod ċar l-adegwatezza ta' l-istrateġija ppjanata u l-metodoloġija proposta sabiex jiżguraw it-trasferiment tar-riżultati u sostennibbiltà tat-tixrid.

3.   Kwalità tat-tmexxija tal-proġett u l-baġit

(a)   L-ippjanar u l-organizzazzjoni tal-proġett

L-applikanti jridu jiddiskrivu l-attivitajiet li għandhom jitwettqu, l-iskeda u l-miri, ir-riżultati, in-natura u d-distribuzzjoni tax-xogħol, l-analiżi tar-riskju.

(b)   Kapaċità ta' organizzazzjoni

L-applikanti jridu jiddiskrivu l-istruttura ta' tmexxija, il-kompetenza ta' l-istaff, ir-reponsabbiltajiet, il-komunikazzjoni interna, it-teħid tad-deċiżjonijiet, il-monitoraġġ u s-superviżjoni;

(ċ)   Kwalità tas-sħubija

L-applikanti jridu jiddiskrivu l-isħubiji maħsuba f'termini ta' l-estensività, ir-rwoli u r-reponsabbiltajiet, ir-relazzjonijiet bejn is-soċji differenti, is-sinerġija u l-kumplimentarjetà tas-soċji diversi fil-proġetti u l-istruttura tan-netwerk.

(d)   Strateġija tal-komunikazzjoni

L-applikanti jridu jiddiskrivu l-istrateġija tal-komunikazzjoni f'termini ta' ppjanar, il-gruppi fil-mira, l-adegwatezza tal-mezzi użati, il-viżibilità tal-kofinanzjament ta' l-UE.

(e)   Il-bagit globali u ddetaljat

L-applikanti jridu jiżguraw li l-baġit ikun relevanti, adegwat, ibbilanċjat u konsistenti miegħu nnifsu, bejn is-soċji u ma' l-għanijiet speċifiċi tal-proġett. Il-baġit għandu jkun mqassam bejn is-soċji fil-livell minimu raġonevoli ta' responsabbilità, li jevitata frammentazzjoni eċċessiva.

(f)   Amministrazzjoni finanzjarja

L-applikanti jridu jiddiskrivu ċ-ċirkwiti finanzjarji, ir-reponsabbiltajiet, il-proċeduri ta' rapurtaġġ u l-kontrolli.

Il-piż ta' kull element ta' kriterji bħala total huma li ġejjin. Il-piż speċifiku għal kriterju individwali ta' kull element se jkun stipulat fis-sejħa għall-proposta

1. Relevanza politika u kuntestwali tal-proġett	/30
2. Kwalità teknika tal-proġett	/40
3. Il-kwalità tat-tmexxija tal-proġett u tal-baġit	/30

Punteġġ totali massimu/100

l-limiti se jkunu wkoll stipulati għal kull blokka ta' kriterji, sabiex kull proġett li ma jilħaqx il-punteġġi limiti jkun irrifjutat.

Wara l-evalwazzjoni, il-proposti rrakkomandati għall-fondi huma mniżżla f'lista, ikklassifikati skond it-total ta' marki mogħtija. Skond id-disponibilità tal-baġit, il-proposti li jkunu l-ogħla fil-klassifika jirċievu l-għotja għal kofinanzjament. Il-proposti rakkomandati għall-kofinanzjament li jibqgħu barra jitqiegħdu fuq lista tar-riżervi.

---

(1)  Dan ifisser li xi azzjoni speċifika, ippreżentata minn applikant wieħed għal xi għotja, tista' tkun approvata għall-kofinanzjar mill-Kummissjoni darba fis–sena biss, tkun kemm tkun twila din l-azzjoni.