IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/496/KEE tal-15 ta' Lulju 1991 li tistabbilixxi l-prinċipji li jirregolaw l-organizzazzjoni ta' kontrolli veterinarji fuq annimali li jidħlu fil-Komunità minn pajjiżi terzi u li temenda d-Direttivi 89/662/KEE, 90/425/KEE u 90/675/KEE (1), u b'mod partikolari l-Artikolu 18(7) tagħha,

Wara li kkunsidrat id-Direttiva tal-Kunsill 97/78/KE tat-18 ta' Diċembru 1997 li tistabbilixxi l-prinċipji li jirregolaw l-organizzazzjoni tal-verifiki veterinarji fuq prodotti li jidħlu fil-Komunità minn pajjiżi terzi (2), u b'mod partikolari l-Artikolu 22 (6) ta' din id-Direttiva,

Billi:

(1)

Wara t-tifqigħa ta' l-influwenza tat-tjur, ikkawżata minn razza tal-vajrus H5N1 b'patoġeniċità għolja, fix-Xlokk ta' l-Ażja li bdiet f'Diċembru 2003, il-Kummissjoni adottat bosta miżuri ta' ħarsien marbuta ma' l-influwenza tat-tjur. Dawn il-miżuri jinkludu b'mod partikolari d-Deċiżjoni tal-Kummissjoni 2005/692/KE tas-6 ta' Ottubru 2005 li tikkonċerna ċerti miżuri ta' ħarsien relatati ma' l-influwenza tat-tjur f'bosta pajjiżi terzi (3).

(2)	Fil-25 ta' Novembru 2006, il-Korea ta' Isfel ikkonfermat tifqigħa ta' influwenza tat-tjur b'patoġeniċità għolja kkawżata mir-razza H5N1 fi stabbiliment tat-trobbija tat-tjur fin-naħa ta' isfel tal-pajjiż.

(3)

Taħt il-leġiżlazzjoni attwali tal-Komunità, il-Korea ta' Isfel hija awtorizzata biss biex tesporta lejn il-Komunità ikel mhux imsajjar għall-annimali domestiċi u materjal mhux ipproċessat għall-għalf li fih kwalunkwe parti tat-tjur, bajd għall-konsum mill-bniedem u trofej tal-kaċċa mhux ittrattati minn kwalunkwe għasfur.

(4)	Fid-dawl tar-riskju għas-saħħa ta' l-annimali bid-dħul ta' l-influwenza tat-tjur b'patoġeniċità għolja fil-Komunità, huwa xieraq li bħala miżura immedjata jiġu sospiżi l-importazzjonijiet ta' dawn il-prodotti mill-Korea ta' Isfel.

(5)	Id-Deċiżjoni 2005/692/KE għandha għalhekk tiġi emendata skond dan.

(6)	Il-miżuri previsti f'din id-Deċiżjoni huma skond l-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali,

ADOTTAT DIN ID-DEĊIŻJONI:

Artikolu 1

L-Artikolu 3 tad-Deċiżjoni Nru 2005/692/KE hu mibdul b'dan li ġej:

“Artikolu 3

L-Istati Membri għandhom jissospendu l-importazzjoni mill-Malażja u mill-Korea ta' Isfel ta':

(a)	ikel mhux imsajjar għall-annimali domestiċi u materjal ta' l-għalf mhux ipproċessat li jkun fih kwalunkwe parti tat-tjur;

(b)	bajd maħsub għall-konsum mill-bniedem; kif ukoll

(c)	trofej tal-kaċċa mhux ittrattati minn kwalunkwe għasfur.”

Artikolu 2

L-Istati Membri għandhom minnufih jieħdu l-miżuri meħtieġa biex jikkonformaw ma' din id-Deċiżjoni u jippubblikaw dawn il-miżuri. Huma għandhom jinformaw immedjatament lill-Kummissjoni dwar dan.

Artikolu 3

Din id-Deċiżjoni hija indirizzata lill-Istati Membri.