1.8.2007   

MT

Il-Ġurnal Uffiċjali ta’ l-Unjoni Ewropea

146

(1)

Wara reviżjoni ta' skadenza, taħt ir-Regolament (KE) Nru 769/2002 (2) (“ir-Regolament oriġinali”), il-Kunsill impona dazju definittiv anti-dumping ta' EUR 3 479 għal kull tunnellata metrika fuq importazzjonijiet ta' kumarina, li jaqgħu taħt il-kodiċi NM ex 2932 21 00, li joriġinaw mir-Repubblika Popolari taċ-Ċina (“RPĊ”).

(2)

F'Diċembru tal-2004, wara li nstabet prattika ta' evażjoni via l-Indja u t-Tajlandja, il-miżuri ġew estiżi bir-Regolament (EC) Nru 2272/2004 (3) għal importazzjonijiet tal-kumarina kkunsinnati mill-Indja jew mit-Tajlandja, kemm jekk dikjarati li joriġinaw mill-Indja jew mit-Tajlandja kif ukoll jekk le.

(3)

Fl-13 ta' Frar 2006, il-Kummissjoni rċeviet talba skond l-Artikolu 13(3) tar-Regolament bażiku sabiex tinvestiga l-allegata evażjoni tal-miżuri anti-dumping imposti fuq importazzjonijiet ta' kumarina mill-RPĊ (“it-talba”). It-talba ġiet ippreżentata mill-Kunsill Ewropew ta' l-Industrija Kimika (CEFIC) (l-applikant) f'isem l-uniku produttur fil-Komunità.

(4)

It-talba kien fiha prova suffiċjenti, prima facie, li kienet saret bidla fl-andament tal-kummerċ wara l-impożizzjoni tal-miżuri kontra l-evażjoni fuq importazzjonijiet ta' kumarina li joriġinaw mill-RPĊ, kif muri minn żieda sinifikanti fl-importazzjonijiet ta' l-istess prodott mill-Indoneżja jew mill-Malażja.

(5)

Din il-bidla fl-andament tal-kummerċ ġiet allegata li tnisslet minn trasbord ta' kumarina li oriġinat mill-RPĊ via l-Indoneżja u l-Malażja. Kien allegat ukoll li ma kienx hemm kawża adegwata suffiċjenti jew ġustifikazzjoni ekonomika għal dawn il-prattiki ħlief l-eżistenza tal-miżuri anti-dumping fuq kumarina li toriġina mill-RPĊ.

(6)

Fl-aħħar, l-appikant ippreżenta prova li l-effetti eżistenti tal-miżuri anti-dumping fuq il-kumarina li toriġina mill-RPĊ kienu qegħdin jiġu mminati kemm f'termini ta' kwantità kif ukoll f'termini ta' prezz. Volumi sinifikanti ta' importazzjonijiet ta' kumarina mill-Indoneżja u mill-Malażja dehru li ħadu post importazzjonijiet mill-RPĊ. Barra minn dan, kien hemm prova suffiċjenti li ż-żieda fl-importazzjonijiet kienet issir bi prezzijiet ferm taħt il-prezz mhux dannuż stabbilit fl-investigazzjoni li wasslet għall-miżuri eżistenti, u d-dumping kien qiegħed isir f'relazzjoni mal-valuri normali preċedentement stabbiliti għall-kumarina li toriġina mill-RPĊ.

(7)

Permezz tar-Regolament (KE) Nru 499/2006 (4) (“ir-Regolament tal-ftuħ”), il-Kummissjoni bdiet investigazzjoni ta' l-allegata evażjoni tal-miżuri anti-dumping imposti fuq l-importazzjonijiet ta' kumarina li joriġinaw mill-RPĊ mill-importazzjonijiet ta' kumarina kkunsinnati mill-Indoneżja jew mill-Malażja, kemm jekk dikjarati li oriġinaw mill-Indoneżja jew mill-Malażja kif ukoll jekk le u, skond l-Artikoli 13(3) u 14(5) tar-Regolament bażiku, ordnat lill-awtoritajiet doganali sabiex jirreġistraw importazzjonijiet ta' kumarina kkunsinnati mill-Indoneżja jew mill-Malażja, kemm jekk dikjarati li oriġinaw mill-Indoneżja jew mill-Malażja kif ukoll jekk le, li jaqgħu taħt il-kodiċi NM ex 2932 21 00 (Kodiċi TARIC 2932210016).

(8)

Il-Kummissjoni uffiċjalment avżat lill-awtoritajiet ta' l-RPĊ, ta' l-Indoneżja u ta' l-Malażja, il-produtturi/esportaturi, l-importaturi fil-Komunità magħrufin li huma konċernati u l-applikant għall-ftuħ ta' l-investigazzjoni. Kienu ntbagħtu kwestjonarji lill-produtturi/esportaturi fl-RPĊ kif ukoll lill-importaturi fil-Komunità msemmija fit-talba. Ma kienx hemm produtturi magħrufa fl-Indoneżja u l-Malażja. Il-partijiet interessati ngħataw l-opportunità li jressqu l-opinjonijiet tagħhom bil-miktub u li jitolbu smigħ fiż-żmien stipulat fir-Regolament tal-ftuħ. Il-partijiet kollha ġew infurmati li nuqqas ta' koperazzjoni tista' twassal għall-applikazzjoni ta' l-Artikolu 18 tar-Regolament bażiku u s-sejbiet isiru fuq il-bażi tal-fatti disponibbli.

(9)

L-ebda produttur jew esportatur fl-RPĊ, fl-Indoneżja jew il-Malażja ma ppreżenta tweġiba għall-kwestjonarju. L-awtoritajiet Indoneżjani rrispondew li ma kien magħruf l-ebda produttur tal-kumarina fl-Indoneżja.

(10)

Il-perjodu ta' investigazzjoni kopra l-perjodu mill-1 ta' Marzu 2005 sat-28 ta' Frar 2006 (“il-PI”). Inġabret data mill-2002 sa l-aħħar tal-PI sabiex tiġi investigata l-bidla allegata fl-andament tal-kummerċ.

(11)

L-ebda produtturi jew esportaturi tal-kumarina fl-Indoneżja u l-Malażja ma għamlu lilhom infushom magħrufa jew ikkoperaw fl-investigazzjoni. Għalhekk, is-sejbiet fir-rispett ta' esportazzjonijiet ta' kumarina kkunsinnati mill-Indoneżja u l-Malażja lejn il-Komunità kellhom isiru fuq il-bażi tal-fatti disponibbli konformement ma' l-Artikolu 18 tar-Regolament bażiku. Mill-bidu nett ta' l-investigazzjoni, l-awtoritajiet Indoneżjani u l-Malażjani kienu infurmati bil-konsegwenzi tan-nuqqas ta' koperazzjoni, kif stipulat fl-Artikolu 18(6) tar-Regolament bażiku.

(12)

L-ebda produtturi jew esportaturi Ċiniżi ma kkoperaw fl-investigazzjoni.

(13)

Ġie spjegat b'mod ċar lill-kumpanniji magħrufa li n-nuqqas ta' koperazzjoni jista' jwassal għall-applikazzjoni ta' l-Artikolu 18 tar-Regolament bażiku.

(14)

Il-prodott konċernat bl-allegata evażjoni huwa, kif definit fir-Regolament oriġinali, il-kumarina bħalissa klassifikata fil-kodiċi NM ex 2932 21 00. Il-kumarina hija trab kristallin abjad bir-riħa karatteristika ta' qamħ m'ilux maħsud. L-użi prinċipali tagħha huma l-użu bħala aroma kimika u bħala sustanza fissativa fil-preparazzjoni ta' komposti tal-fwieħa, b'dawn il-komposti jintużaw fil-produzzjoni ta' deterġenti, kosmetiċi u fwejjaħ fini.

(15)

Il-kumarina tista' tiġi manifatturata b'żewġ proċessi ta' produzzjoni differenti: il-Phenol route li tinvolvi r-reazzjoni Perkin u l-o-Cresol route li tinvolvi r-reazzjoni Rasching. Madankollu, il-kumarina prodotta b'dawn iż-żewġ proċessi għandha l-istess karatteristiċi bażiċi fiżiċi u kimiċi u l-istess użi.

(16)

Fin-nuqqas ta' koperazzjoni bejn il-partijiet fl-Indoneżja u l-Malażja, għandu jkun dedott fuq il-bażi ta' l-informazzjoni disponibbli u fin-nuqqas ta' kull prova kuntrarja, li l-kumarina esportata lill-Komunità mill-RPĊ u l-kumarina kkunsinnata mill-Indoneżja u l-Malażja għandhom l-istess karatteristiċi bażiċi fiżiċi u kimiċi u l-istess użi. Għalhekk għandhom jitqiesu bħala prodotti simili fis-sens tad-definizzjoni ta' l-Artikolu 1(4) tar-Regolament bażiku.

(17)

Kif intqal aktar 'il fuq, il-bidla fl-andament tal-kummerċ ġiet allegata li tnisslet minn trasbord ta' kumarina mill-Indoneżja u mill-Malażja.

(18)

La l-ebda kumpannija Indoneżjana ma kkoperat fl-investigazzjoni, l-esportazzjoni mill-Indoneżja lejn il-Komunità kellha tiġi stabbilita fuq il-bażi tal-fatti disponibbli skond l-Artikolu 18 tar-Regolament bażiku. Ġiet għalhekk użata data ta' l-Eurostat, li kienet tikkostitwixxi l-aktar informazzjoni adatta disponibbli, sabiex jiġi stabbiliti l-prezzijiet ta' esportazzjoni u l-kwantitajiet ta' importazzjonijiet mill-Indoneżja.

(19)

Bdew isiru importazzjonijiet sinifikanti mill-Indoneżja lejn il-Komunità immedjatament wara l-ftuħ ta' l-investigazzjoni preċedenti ta' l-evażjoni kontra l-Indja u t-Tajlandja, fil-livell ta' 12,5 tunnellata metrika fl-2004, 15-il tunnellata metrika fl-2005 u 10 tunnellati metriċi fil-perjodu ta' l-investigazzjoni (jirrappreżenta 1,7 % tal-konsum ta' l-UE). B'mod parallel, l-esportazzjonijiet Ċiniżi fl-Indoneżja żviluppaw minn 57 tunnellata metrika fl-2003 għal 83,8 tunnellata metrika fil-perjodu ta' investigazzjoni.

(20)

Fin-nuqqas ta' koperazzjoni u ta' kull prova kuntrarja, huwa konkluż li kien hemm bidla fl-andament tal-kummerċ bejn l-RPĊ, l-Indoneżja u l-Komunità fl-2004 sa l-aħħar tal-perjodu ta' investigazzjoni, li tnissel minn trasbord ta' kumarina li toriġina mill-RPĊ vija l-Indoneżja

(21)

La l-ebda kumpannija Malażjana ma kkoperat fl-investigazzjoni, l-esportazzjoni mill-Malażja lejn il-Komunità kellha tiġi stabbilita fuq il-bażi tal-fatti disponibbli skond l-Artikolu 18 tar-Regolament bażiku. Ġiet għalhekk użata data ta' l-Eurostat, li kienet tikkostitwixxi l-aktar informazzjoni adatta disponibbli, sabiex jiġi stabbiliti l-prezzijiet ta' esportazzjoni u l-kwantitajiet ta' importazzjonijiet mill-Malażja.

(22)

Bdew isiru importazzjonijiet mill-Malażja lejn il-Komunità fl-2005, u laħqu livell ta' 13-il tunnellata metrika fl-2005 u 23 tunnellata metrika fil-perjodu ta' investigazzjoni (jirrappreżenta 3,9 % tal-konsum ta' l-UE). Fl-istess żmien, l-esportazzjonijiet Ċiniżi fil-Malażja kibru minn 23,6 tunnellata metrika fl-2004 sa 43,76 tunnellata metrika fil-perjodu ta' investigazzjoni.

(23)

Fin-nuqqas ta' koperazzjoni u ta' kull prova kuntrarja, huwa konkluż li kien hemm bidla fl-andament tal-kummerċ bejn l-RPĊ, il-Malażja u l-Komunità fl-2005 sa l-aħħar tal-perjodu ta' investigazzjoni, li tnissel minn trasbord ta' kumarina li toriġina mill-RPĊ via l-Malażja.

(24)

Fin-nuqqas ta' koperazzjoni u ta' kull prova kuntrarja, huwa konkluż li, billi l-importazzjonijiet sinifikanti bdew immedjatament wara l-ftuħ ta' l-investigazzjoni preċedenti ta' l-evażjoni kontra l-Indja u t-Tajlandja, b'mod parallel ma' żieda fl-esportazzjonijiet Ċiniżi tal-kumarina lejn l-Indoneżja, il-bidla fl-andament tal-kummerċ tnisslet mill-eżistenza ta' miżuri anti-dumping milli minn xi kawza dovuta jew ġustifikazzjoni ekonomika suffiċjenti fis-sens ta' l-Artikolu 13(1) tar-Regolament bażiku. F'dan ir-rigward, huwa wkoll innutat li m'hemmx prova ta' produzzjoni ġenwina tal-kumarina fl-Indoneżja.

(25)

Fin-nuqqas ta' koperazzjoni u ta' kull prova kuntrarja, huwa konkluż li, billi l-importazzjonijiet bdew fl-2005, wara l-estensjoni tal-miżuri fuq l-importazzjonijiet tal-kumarina kkunsinnati mill-Indja jew mit-Tajlandja u li, b'mod parallel, l-esportazzjonijiet Ċiniżi lejn il-Malażja żdiedu minn 23,6 tunnellata metrika fl-2004 għal 43,76 tunnellata metrika fl-2005, il-bidla fl-andament tal-kummerċ tnisslet mill-eżistenza ta' miżuri anti-dumping milli minn xi kawża dovuta jew ġustifikazzjoni ekonomika suffiċjenti fis-sens ta' l-Artikolu 13(1) tar-Regolament bażiku. F'dan ir-rigward, huwa wkoll innutat li m'hemmx prova ta' produzzjoni ġenwina tal-kumarina fil-Malażja.

(26)

Skond l-analiżi ta' l-andament kummerċjali magħmula hawn fuq, instab li bidla fl-andament ta' l-importazzjonijiet tal-Komunità hija marbuta mal-fatt li kien hemm fis-seħħ miżuri ta' l-anti-dumping u kontra l-evażjoni. Filwaqt li l-importazzjonijiet dikjarati bħala li joriġinaw mill-Indoneżja kienu nieqsa mis-suq Komunitarju sa l-2003, huma ammontaw għal 4 tunnellati metriċi fl-2003, għal 12,5 tunnellati metriċi fl-2004, għal 15-il tunnellata metrika fl-2005 u għal għaxar tunnellati metriċi fil-perjodu ta' investigazzjoni, li jirrappreżenta 1,7 % tal-konsum Komunitarju.

(27)

L-investigazzjoni wriet li l-importazzjonijiet mill-Indoneżja saru f'livelli ta' prezzijiet aktar baxxi mill-prezz ta' esportazzjoni fl-investigazzjoni oriġinali u ferm aktar baxxi mill-valur oriġinali normali.

(28)

Fuq il-bażi tal-fatturi msemmija hawn fuq, huwa konkluż li l-bidla fl-andament tal-kummerċ, flimkien mal-prezzijiet baxxi b'mod mhux normali ta' l-esportazzjonijiet mill-Indoneżja mminaw l-effetti rimedjali tal-miżuri anti-dumping kemm f'termini ta' kwantitajiet kif ukoll f'termini ta' prezzijiet tal-prodotti simili.

(29)

Abbażi ta' l-analiżi ta' l-andament kummerċjali magħmula hawn fuq, instab li bidla fl-andament tal-kummerċ hija marbuta mal-fatt li kien hemm fis-seħħ miżuri antidumping u kontra l-evażjoni. Għalkemm ma kienx hemm importazzjonijiet ta' kumarina fil-Komunità qabel 2005, dawn ammontaw għal 13-il tunnellata metrika fl-2005 u 23 tunnellata metrika fil-perjodu ta' investigazzjoni.

(30)

L-investigazzjoni wriet li l-importazzjonijiet mill-Malażja saru f'livelli ta' prezzijiet aktar baxxi mill-prezz ta' esportazzjoni fl-investigazzjoni oriġinali u ferm aktar baxxi mill-valur oriġinali normali.

(31)

Fuq il-bażi tal-fatturi msemmija hawn fuq, huwa konkluż li l-bidla fl-andament tal-kummerċ, flimkien mal-prezzijiet baxxi b'mod mhux normali ta' l-esportazzjonijiet mill-Indoneżja mminaw l-effetti rimedjali tal-miżuri anti-dumping kemm f'termini ta' kwantitajiet kif ukoll f'termini ta' prezzijiet tal-prodotti simili.

(32)

Sabiex jiġi stabbilit jekk jistgħux jinstabu provi ta' dumping fir-rigward ta' esportazzjonijiet tal-kumarina mill-Indoneżja lejn il-Komunità matul il-PI, intużat data ta' l-Eurostat skond l-Artikolu 18 tar-Regolament bażiku

(33)

L-Artikolu 13(1) tar-Regolament bażiku jeħtieġ prova ta' dumping b'relazzjoni mal-valuri normali preċedentement stabbiliti għall-prodotti simili jew li jixxiebhu.

(34)

Għall-finijiet ta' paragun ġust bejn il-valur normali u l-prezz ta' esportazzjoni, ittieħed kont debitu, fil-forma ta' aġġustamenti, tad-differenzi li jinċidu fuq il-prezzijiet u fuq il-paragun tal-prezzijiet. Dawn l-aġġustamenti saru skond l-Artikolu 2(10) tar-Regolament bażiku fir-rigward tat-trasport u ta' l-assigurazzjoni, fuq bażi tal-fatti disponibbli, jiġifieri kif jingħad fir-rikjesta, skond l-Artikolu 18 tar-Regolament bażiku.

(35)

Skond l-Artikoli 2(11) u 2(12) tar-Regolament bażiku, il-paragun tal-medja ppeżata tal-valur normali kif stabbilita fl-investigazzjoni preċedenti u l-medja ppeżata ta' prezzijiet ta' l-esportazzjoni matul l-investigazzjoni PI, espress bħala persentaġġ tal-prezz CIF fil-fruntiera tal-Komunità, dazju mhux imħallas, wera dumping għall-importazzjonijiet tal-kumarina lejn il-Komunità mill-Indoneżja. Il-marġini tad-dumping li nstab, espress bħala persentaġġ tal-prezz CIF fil-fruntiera tal-Komunità, dazju mhux imħallas, kien ta' iktar minn 100 %.

(36)

Sabiex jiġi stabbilit jekk jistgħux jinstabu provi ta' dumping fir-rigward ta' esportazzjonijiet tal-kumarina mill-Malażja lejn il-Komunità matul il-PI, intużat data ta' l-Eurostat skond l-Artikolu 18 tar-Regolament bażiku

(37)

Għall-finijiet ta' paragun ġust bejn il-valur normali u l-prezz ta' esportazzjoni, ittieħed kont debitu, fil-forma ta' aġġustamenti, tad-differenzi li jinċidu fuq il-prezzijiet u fuq il-paragun tal-prezzijiet. Dawn l-aġġustamenti saru skond l-Artikolu 2(10) tar-Regolament bażiku fir-rigward tat-trasport u ta' l-assigurazzjoni, fuq bażi tal-fatti disponibbli, jiġifieri kif jingħad fir-rikjesta, skond l-Artikolu 18 tar-Regolament bażiku.

(38)

Skond l-Artikoli 2(11) u 2(12) tar-Regolament bażiku, il-paragun tal-medja ppeżata tal-valur normali kif stabbilita fl-investigazzjoni preċedenti u l-medja ppeżata ta' prezzijiet ta' l-esportazzjoni matul l-investigazzjoni PI, espress bħala persentaġġ ta' CIF prezzijiet fil-fruntier tal-Komunità, dazju mhux imħallas, wera dumping għall-importazzjonijiet tal-kumarina lejn il-Komunità mill-Malażja. Il-marġini tad-dumping li nstab, espress bħala persentaġġ tal-prezz CIF fil-fruntiera tal-Komunità, dazju mhux imħallas, kien ta' iktar minn 100 %.

(39)

Minħabba s-sejbiet ta' evażjoni fis-sens ta' l-Artikolu 13(1) tar-Regolament bażiku, il-miżuri eżistenti kontra d-dumping imposti fuq importazzjonijiet tal-prodott konċernat li joriġinaw mill-RPĊ għandhom jiġu estiżi għall-prodott simili kkunsinnat mill-Indoneżja jew il-Malażja, kemm jekk dikjarati li joriġinaw mill-Indoneżja jew mill-Malażja kif ukoll jekk le.

(40)

Id-dazju estiż għandu jkun dak stabbilit fl-Artikolu 1(2) tar-Regolament oriġinali.

(41)

Skond l-Artikolu 13(3) u 14(5) tar-Regolament bażiku, li jipprevedi li kull miżura estiża għandha tiġi applikata kontra importazzjonijiet reġistrati mid-data tar-reġistrazzjoni, id-dazju anti-dumping għandu jinġabar fuq importazzjonijiet ta' kumarina kkunsinnati mill-Indoneżja jew mill-Malażja, li daħlu fil-Komunità taħt ir-reġistrazzjoni imposti mir-Regolament tal-ftuħ.

(42)

Għalkemm matul din l-investigazzjoni ebda produttur ġenwin tal-kumarina ma nstab li jeżisti fl-Indoneżja jew fil-Malażja jew wera lilu nnifsu lill-Kummissjoni, il-produtturi ġodda li jikkunsidraw li jressqu rikjesta għal eżenzjoni mill-miżura anti-dumping estiża skond l-Artikolu 13(4) tar-Regolament bażiku huma informati li jkunu meħtieġa jimlew kwestjonarju sabiex jippermettu lill-Kummissjoni tiddetermina jekk tistax tingħata eżenzjoni. Eżenzjoni ta' din ix-xorta tista' tingħata wara li ssir valutazzjoni, per eżempju, tas-sitwazzjoni tas-suq tal-prodott konċernat, tal-kapaċità ta' produzzjoni u ta' l-utilizzazzjoni tal-kapaċità, ta' akkwisti u ta' bejgħ u tal-probabbiltà li jkun hemm kontinwazzjoni ta' prattika li għaliha jkun hemm insuffiċjenza ta' kawża dovuta jew ta' ġustifikazzjoni ekonomika u ta' prova ta' dumping. Normalment il-Kummissjoni tagħmel ukoll ispezzjoni ta' verifika fuq il-post. It-talba tkun trid tiġi indirizzata lill-Kummissjoni minnufih, bl-informazzjoni relevanti kollha, partikolarment kull modifika fl-attivitajiet tal-kumpannija relatata mal-produzzjoni u l-bejgħ.

(43)

L-importaturi jistgħu jibbenefikaw xorta waħda mill-miżuri sa fejn l-importazzjonijiet tagħhom ikunu mingħand produtturi esportaturi, li jingħataw eżenzjoni ta' din ix-xorta, u konformement ma' l-Artikolu 13(4) tar-Regolament bażiku.

(44)

Meta eżenzjoni tkun ġustifikata, il-Kunsill jemenda dan ir-Regolament kif meħtieġ. Sussegwentement, kull eżenzjoni mogħtija ser tiġi kontrollata mill-Kummissjoni sabiex tiġi assigurata konformità mal-kondizzjonijiet stipulati fiha.

(45)

Il-partijiet interessati ġew infurmati dwar il-fatti essenzjali u l-konsiderazzjonijiet li fuq il-bażi tagħhom il-Kunsill kellu l-ħsieb li jestendi l-miżuri definittivi kontra d-dumping fis-seħħ u ngħataw l-opportunità li jikkummentaw u li jinstemgħu. Ma ġew riċevuti l-ebda kummenti li kienu ta' natura li jbiddlu l-konklużjonijiet imsemmija hawn fuq.

Il-Kummissjoni Ewropea

Direttorat Ġenerali għall-Kummerċ

Direttorat B

Uffiċċju: J-79 05/17

B-1049 Brussell

Fax (32 2) 295 65 05