IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/414/KEE tal-15 ta’ Lulju 1991 li tikkonċerna t-tqegħid fis-suq ta’ prodotti li jħarsu l-pjanti (1), u b’mod partikolari t-tieni inċiż tat-tieni subparagrafu ta’ l-Artikolu 6(1) tagħha,

Billi:

(1)

Wara reviżjoni li fiha l-Olanda operat bħala Stat Membru Rapporteur, id-Direttiva tal-Kummissjoni 2005/53/KE (2) żiedet is-sustanza attiva chlorothaloni ma’ l-Anness tad-Direttiva 91/414/KEE. Id-Direttiva 2005/53/KE tipprovdi għal-livelli massimi għal ċerti impuritajiet. Wara l-prassi normali tal-Kummissjoni, dawn il-livelli ġew ibbażati fuq speċifikazzjonijiet mfassla mill-Organizzazzjoni ta’ l-Ikel u l-Agrikoltura (FAO) tan-Nazzjonijiet Uniti fir-rigward tal-purità u l-livelli ta’ impuritajiet li jinsabu f’sustanzi attivi, u b’mod partikolari fuq pubblikazzjoni ta’ Frar 2005. Dawn l-ispeċifikazzjonijiet jistipulaw livell massimu għall-hexachlorobenzene ta’ 0,01 g/kg ta’ sustanza attiva. Madankollu, il-FAO ħarġet sett ulterjuri ta’ speċifikazzjonijiet għall-chlorothalonil (3), li sar disponibbli f’Diċembru 2005, wara l-adozzjoni tad-Direttiva 2005/53/KE. Dawn l-ispeċifikazzjonijiet iffinalizzaw u rrevokaw formalment l-ispeċifikazzjonijiet ta’ Frar 2005 li ttieħdu f’konsiderazzjoni meta din id-Direttiva ġiet adottata. L-ispeċifikazzjonijiet il-ġodda jistipulaw livell massimu għall-hexachlorobenzene ta’ 0,04 g/kg ta’ sustanza attiva.

(2)	Għalkemm il-Komunità hija intitolata li tistipula l-livell tagħha ta’ ħarsien pubbliku, ħarsien ta’ l-annimali u ta’ l-ambjent, ġie eżaminat jekk il-livelli ta’ prijorità stipulati mid-Direttiva 2005/53/KE jistgħux jiġu aġġustati biex jirriflettu l-ispeċifikazzjonijiet ġodda tal-FAO.

(3)

Wara li wettqet valutazzjoni tossikoloġika u ekotossikoloġika ad hoc, l-Olanda wasslet għall-konklużjoni li tali modifikazzjoni ma toħloqx riskji oħra ma’ dawk li diġà tqiesu meta l-chlotothalonil żdied ma’ l-Anness I għad-Direttiva 91/414/KEE. Din il-konklużjoni ġiet ikkomunikata lill-Istati Membri l-oħra, li qablu. Fid-dawl ta’ din il-konklużjoni, u taċ-ċirkostanzi speċjali ta’ dan il-każ, il-Kummissjoni tikkonsidra li huwa ġġustifikat li l-ispeċifikazzjoni għall-chlorothalonil tiġi mmodifikata.

(4)

Ladarba d-Direttiva 2005/53/KE teħtieġ li mill-1 ta’ Settembru 2006 l-Istati Membri japplikaw l-Artikolu 2 tagħha, l-ispeċifikazzjoni emendata għall-chlorothalonil għandha tapplika wkoll minn din id-data, mingħajr ħsara għall-iskadenzi l-oħra stipulati mill-Artikolu 3 tad-Direttiva 2005/53/KE. Ġħaldaqstant, din id-Direttiva għandha tidħol fis-seħħ kemm jista’ jkun malajr.

(5)	Huwa għalhekk xieraq li tkun emendata d-Direttiva 91/414/KE.

(6)	Il-miżuri stipulati f’din id-Direttiva huma konformi ma’ l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,

ADOTTAT DIN ID-DIRETTIVA:

Artikolu 1

L-Anness I tad-Direttiva 91/414/KEE huwa emendat kif stipulat fl-Anness ta’ din id-Direttiva.

Artikolu 2

L-Istati Membri għandhom jadottaw u jippubblikaw, sa mhux iktar tard mill-31 ta’ Awissu ta’ l-2006, il-liġijiet, ir-regolamenti, u d-dispożizzjonijiet amministrattivi meħtieġa biex jiġu f’konformità ma’ din id-Direttiva. Huma għandhom jikkomunikaw minnufih lill-Kummissjoni it-test ta’ dawn id-dispożizzjonijiet u t-tabella ta’ korrelazzjoni bejn dawn id-dispożizzjonijiet u din id-Direttiva.

Huma għandhom japplikaw tali dispożizzjonijiet mill-1 ta’ Settembru 2006.

Meta l-Istati Membri jadottaw dawn id-dispożizzjonijiet, dawn għandhom ikun fihom referenza għal din id-Direttiva jew ikunu akkumpanjati minn tali referenza fl-okkażjoni tal-pubblikazzjoni uffiċjali tagħhom. L-Istati Membri għandhom jistabbilixxu kif għandha issir tali referenza.

Artikolu 3

Din id-Direttiva għandha tidħol fis-seħħ fil-jum tal-pubblikazzjoni tagħha fil-Ġurnal Uffiċjali ta’ l-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmula fi Brussell, 22 ta' Settembru 2006.

Għall-Kummissjoni

Markos KYPRIANOU

Membru tal-Kummissjoni

(3) Speċifikazzjonijiet u evalwazzjonijiet għall-Pestiċidi Agrikoli tal-FAO — Chlorothalonil (Tetrachloroisophtalonitrile) (Diċembru 2005).