5.6.2007   

MT

Il-Ġurnal Uffiċjali ta’ l-Unjoni Ewropea

304

(1)

Skond ir-Regolament (KE) Nru 178/2002, fejn huwa evidenti li ikel impurtat minn pajjiż terz x'aktarx huwa ta' riskju serju għas-saħħa tal-bniedem, għas-saħħa ta' l-annimali jew għall-ambjent hemm bżonn li jittieħdu l-miżuri neċessarji, u dan ir-riskju ma jistax jitrażżan b'mod sodisfaċenti permezz ta' miżuri meħuda mill-Istat Membru/Stati Membri kkonċernat/i.

(2)

Skond ir-Regolament (KE) Nru 853/2004 tal-Parlament Ewropew u tal-Kunsill tad-29 ta' April 2004, li jistipola regoli speċifiċi ta' iġjene dwar ikel li joriġina mill-annimali (2), operaturi kummerċjali ta' l-ikel iridu jiżguraw li ma jinqabżux il-limiti ta' istamina fil-prodotti tas-sajd. Dawn il-limiti, flimkien ma' metodi ta' tehid ta' kampjuni u metodi analitiċi, ġew stabbiliti bir-Regolament tal-Kummissjoni (KE) Nru 2073/2005 tal-15 ta' Novembru 2005 dwar il-kriterji mikrobijologiċi għall-oġġetti ta' l-ikel (3).

(3)

Spezzjoni riċenti li l-Komunità wettqet fil-Brażil żvelat nuqqasijiet serji ta' iġjene fit-tmexxija ta' prodotti tas-sajd. Minħabba dawn in-nuqqasijiet il-ħut mhux frisk daqs kemm għandu jkun u jmur malajr, u jista' jagħti l-każ li jkun hemm livelli għolja ta' istamina f'ċerti speċi ta' ħut (b'mod partikolari dawk li ġejjin mill-familji: Scombridae, Clupeidae, Engraulidae, Coryphenidae, Pomatomidae, Scombresosidae). L-ispezzjonijiet żvelaw ukoll li l-awtoritajiet Brażiljani għandhom kapaċità limitata biex iwettqu l-kontrolli neċessarji fuq il-ħut, b'mod partikolari biex jindunaw bil-preżenza ta' l-istamina f'dawn l-ispeċi.

(4)

Livelli eċċessivi ta' istamina fi prodotti tas-sajd jistgħu jkunu ta' riskju serju għas-saħħa tal-bniedem.

(5)

Huwa xieraq li jiġu adottati f'livell Komunitarju miżuri applikabbli għall-importazzjonijiet ta' prodotti tas-sajd li jistgħu jkunu kontaminati biex tiġi żgurata protezzjoni effettiva u uniformi fl-Istati Membri kollha.

(6)

L-importazzjonijiet fil-Komunità ta' prodotti tas-sajd li ġejjin minn speċi ta' ħut li huma assoċjati ma' ammont għoli ta' histidine għandhom jiġu awtorizzati biss jekk jista' jiġi ppruvat li dawn kienu soġġetti għal kontroll sistematiku fil-pajjiż minn fejn oriġinaw biex b'hekk jiġi vverifikat li l-livelli tagħhom ta' istamina ma jaqbżux il-livelli stabbiliti bir-Regolament (KE) Nru 2073/2005.

(7)

Madankollu, huwa xieraq li tiġi awtorizzata temporanjament l-importazzjoni ta' kunsinni li ma jkollhomx ir-riżultat tal-kontrolli magħmula fil-pajjiż ta' oriġini, dejjem jekk l-Istati Membri jiżguraw li jsiru l-kontrolli meħtieġa fuq dawn il-kunsinni hekk kif jaslu fuq il-fruntiera tal-Komunità biex b'hekk jiġi vverifikat li l-livelli tagħhom ta' istamina ma jaqbżux il-livelli stabbiliti fir-Regolament (KE) Nru 2073/2005. Din l-awtorizzazzjoni temporanja għandha tiġi limitata saż-żmien li fih l-awtoritajiet Brażiljani jkunu jistgħu jibnu l-kapaċità ta' kontroll tagħhom.

(8)

Ir-Regolament (KE) Nru 178/2002 jistabbilixxi s-sistema ta' twissija rapida għall-ikel u l-għalf li għandha tintuża biex jiġi implimentat r-rekwiżit meħtieġ ta' tagħrif reċiproku previst fl-Artikolu 22(2) tad-Direttiva 97/78/KE (4). B'żieda ma' dan l-Istati Membri għandhom iżommu lill-Kummissjoni infurmata permezz ta' rapporti perjodiċi dwar ir-riżultati analitiċi kollha tal-kontrolli uffiċjali li jkunu saru fuq kunsinni ta' prodotti tas-sajd mill-Brażil.

(9)

Din id-Deċiżjoni għandha tiġi riveduta fid-dawl tal-garanziji offruti mill-Brażil u fuq il-bażi tar-riżultati tat-testijiet imwettqa mill-Istati Membri.

(10)

Il-miżuri stabbiliti f'din id-Deċiżjoni huma konformi ma' l-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali.