(1)

Id-Deċiżjoni 90/424/KE tistipula l-proċeduri li jirregolaw il-kontribuzzjoni finanzjarja Komunitarja fil-qasam veterinarju. Il-laboratorji ta’ referenza Komunitarji jistgħu jingħataw kontribuzzjoni finanzjarja skond dik id-Deċiżjoni.

(2)

Id-Direttiva tal-Kunsill 2003/85/KE tad-29 ta’ Settembru 2003 dwar il-miżuri Komunitarji għall-kontroll tal-marda ta’ l-ilsien u d-dwiefer li tirrevoka d-Direttiva 85/511/KEE u d-Deċiżjoni 89/531/KEE u 91/665/KEE u temenda d-Direttiva 92/46/KEE (3) tistipula l-ħatra ta’ laboratorju ta’ referenza Komunitarju għall-marda ta’ l-ilsien u d-dwiefer.

(3)

Ir-Regolament tal-Kummissjoni (KE) Nru 156/2004 tad-29 ta’ Jannar 2004 dwar il-kontribuzzjoni finanzjarja Komunitarja lil laboratorji ta' referenza Komunitarji skond l-Artikolu 28 tad-Deċiżjoni 90/424/KEE (4) jistipula li l-kontribuzzjoni finanzjarja mill-Komunità għat-tħaddim ta’ laboratorji għandha tingħata jekk il-programmi ta' ħidma approvati jitwettqu b’mod effiċjenti u jekk il-benefiċjarji jfornu l-informazzjoni kollha meħtieġa f’ċerti limiti ta’ żmien.

(4)

F’Lulju 2005 il-Kummissjoni nediet sejħa għall-għażla u l-ħatra ta’ laboratorji ta’ referenza Komunitarji ġodda. Il-valutazzjoni ta’ l-applikazzjoni ntemmet f’Diċembru 2005 u r-riżultati ntgħarfu lill-awtoritajiet kompetenti ta’ l-Istati Membri kkonċernati. Wara l-valutazzjoni, il-kandidati li għaddew intgħażlu biex jinħatru bħala laboratorji ta’ referenza Komunitarji, li jinkludu l-laboratorji ta’ referenza Komunitarji għall-bruċellosi u l-marda ta’ l-ilsien u d-dwiefer.

(5)

L-Anness VII tar-Regolament (KE) Nru 882/2004 fih lista ta’ laboratorji ta’ referenza Komunitarji għas-saħħa ta’ l-annimali u l-annimali ħajjin. Dak ir-Regolament, kif emendat mir-Regolament tal-Kummissjoni (KE) Nru 776/2006, iniżżel l-AFSSA – Laboratoire d’études et de recherches en pathologie animale et zoonoses fi Franza bħala l-laboratorju ta’ referenza Komunitarju għall-bruċellosi għat-tħaddim u l-impenji msemmija fl-Artikolu 32(2) tar-Regolament (KE) 882/2004.

(6)

Id-Deċiżjoni tal-Kummissoni 2006/393 tal-31 ta’ Mejju 2006 rigward il-ħatra ta’ laboratorju ta’ referenza Komunitarju għall-marda ta’ l-ilsien u d-dwiefer (5) ħatret l-Istitut għas-Saħħa ta’ l-Annimali, il-Laboratorju ta’ Pirbright tal-Kunsill tar-Riċerka tax-Xjenzi Bijoteknoloġiċi u Bioloġiċi (BBSRC) fir-Renju Unit bħala l-laboratorju ta’ referenza Komunitarju għall-marda ta’ l-ilsien u d-dwiefer għall-funzjonijiet u d-dmirijiet imsemmija fl-Anness XVI tad-Direttiva tal-Kunsill 2003/85/KE.

(7)

Il-Kummissjoni vvalutat il-programmi ta’ ħidma u l-istimi ta’ baġit korrispondenti, ippreżentati mil-laboratorji ta’ referenza Komunitarji kkonċernati għas-sena 2006. Dment li l-programmi ta’ ħidma jitwettqu b’mod effettiv, il-kofinanzjament Komunitarju għal ċerti spejjeż eliġibbli ta’ dawn il-laboratorji ta’ referenza Komunitarji hu meħtieġ għall-implimentazzjoni ta’ l-azzjonijiet fi ħdan il-programmi ta’ ħidma.

(8)

Skond dan, il-kontribuzzjoni finanzjarja Komunitarja għandha tingħata lil-laboratorji ta’ referenza Komunitarji għall-bruċellosi u l-marda ta’ l-ilsien u d-dwiefer.

(9)

Il-miżuri stipulati f’din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,