(1)

Id-Deċiżjoni tal-Kummissjoni 2004/292/KE tat-30 ta' Marzu 2004 (2) dwar l-introduzzjoni tas-sistema TRACES tagħmel obbligatorju li l-Istati Membri jipparteċipaw fis-sistema mill-31 ta' Diċembru 2004. Għandu jsir provvediment għall-ispejjeż neċessarji għall-aġġornament tas-sistema imposta mill-iżvilupp tal-leġiżlazzjoni veterinarja rilevanti u l-iżvilupp ta' TRACES, notevolment fil-qasam ta' l-assessjar tar-riskju. Minħabba d-domandi tekniċi marbuta mad-disponibilità u l-istabilità ta' l-ambjent ta' produzzjoni ta' TRACES kif ukoll minħabba l-eżiġenzi ta' sigurtà, huma wkoll neċessarji l-akkwist ta' tagħmir ta' kompjuters u t-twaqqif ta' grupp ta' sorveljanza u ta' manutenzjoni ddedikati esklussivament għal din is-sistema. L-użu ta' kuljum tas-sistema jeżiġi wkoll id-disponibilità ta' sostenn loġistiku rinforzat, wara li tiġi kkunsidrata l-esperjenza akkwistata. Il-parteċipazzjoni finanzjarja tal-Kommunità hi bbażata fuq l-Artikoli 37 u 37a tad-Deċiżjoni tal-Kunsill 90/424/KEE.

(2)

Is-sistema ta' notifika mwaqqfa abbażi tad-Direttiva 82/894/KEE dwar in-notifika ta' mard ta' l-annimali fil-Komunità (3), permezz tad-Deċiżjoni tal-Kummissjoni 2005/176/KE ta' l-1 ta' Marzu 2005 li tistabbilixxi l-forma kkodifikata u l-kodiċijiet relatati man-notifika tal-mard ta' l-annimali skond id-Direttiva tal-Kunsill 82/894/KEE (4) għandha tinżamm aġġornata b'mod tekniku. Il-parteċipazzjoni finanzjarja tal-Kommunità hi bbażata fuq l-Artikoli 37 tad-Deċiżjoni tal-Kunsill 90/424/KEE.

(3)

Inbeda biss l-istudju ta' l-ispeċifikazzjonijiet ta' sistema ta' navigazzjoni prevista mid-Deċiżjoni 2005/607/KE dwar il-finanzjament għall-2005 ta' l-ispejjeż li jikkonċernaw is-sostenni informatiċi u l-azzjonijiet tal-komunikazzjonijiet fil-qasam tas-saħħa u tal-benesseri ta' l-annimali (5). Għalhekk hu neċessarju li jiġi pprogrammat mill-ġdid l-istudju dwar l-użu tat-teknoloġija tan-navigazzjoni bis-satellita għall-miljorament tal-ħarsien ta' l-animali, b'konformità mar-Regolament tal-Kunsill (KE) Nru 1/2005 dwar il-ħarsien ta' l-annimali waqt it-trasport (6). Il-parteċipazzjoni finanzjarja tal-Kommunità hi bbażata fuq l-Artikoli 17 tad-Deċiżjoni tal-Kunsill 90/424/KEE.

(4)

Il-politika ta' informazzjoni dwar il-ħarsien ta' l-annimali teżiġi wkoll kommunikazzjoni dwar l-iżviluppi tekniċi u xjentifiċi fil-qasam, kif ukoll għarfien ta' l-imsieħba f'partenarjati kummerċjali ta' l-Unjoni Ewropea fir-rigward tal-benesseri tal-bhejjem tat-trobbija. Il-parteċipazzjoni finanzjarja tal-Kommunità hi bbażata fuq l-Artikoli 17 tad-Deċiżjoni tal-Kunsill 90/424/KEE.

(5)

Il-miżuri previsti f'din id-Deċiżjoni huma skond l-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali.

—

500 000 € għall-akkwist tat-tagħmir u tas-sostenn tekniku ddedikati u indispensabbli għall-eżiġenzi tad-disponibilità u s-sigurtà tas-sistema;

—

450 000 € għall-akkwist tas-sostenn loġistiku neċessarju fil-qafas ta' l-assistenza lill-utenti tas-sistema;

—

200 000 € għall-akkwist tas-sostenn tal-manutenzjoni neċessarja sabiex tiġi adattata s-sistema għall-iżviluppi legali u tekniċi.

—

300 000 € għall-iżviluppi informatiċi neċessarji għat-twettiq ta' modulu għall-immaniġġjar tar-riskju.