16.3.2007 |
MT |
Il-Ġurnal Uffiċjali ta’ l-Unjoni Ewropea |
70 |
DEĊIŻJONI TAL-KUMITAT POLITIKU U TA' SIGURTÀ MONUC SPT/2/2006
tat-30 ta’ Mejju 2006
dwar l-istabbiliment tal-Kumitat ta' Kontributuri għall-operazzjoni militari ta' l-Unjoni Ewropea b'appoġġ għall-Missjoni ta' l-Organizzazzjoni tan-Nazzjonijiet Uniti fir-Repubblika Demokratika tal-Kongo (MONUC) matul il-proċess ta' l-elezzjoni
(2006/492/PESK)
IL-KUMITAT POLITIKU U TA' SIGURTÀ,
Wara li kkunsidra t-Trattat dwar l-Unjoni Ewropea u, b'mod partikolari t-tielet subparagrafu ta' l-Artikolu 25 tiegħu,
Wara li kkunsidra l-Azzjoni Konġunta tal-Kunsill 2006/319/PESK tas-27 ta' April 2006 dwar l-operazzjoni militari ta' l-Unjoni Ewropea li tappoġġa l-Missjoni ta' l-Organizzazzjoni tan-Nazzjonijiet Uniti fir-Repubblika Demokratika tal-Kongo (MONUC) matul il-proċess ta' l-elezzjoni (1) (l-Operazzjoni EUFOR RD Congo), u b'mod partikolari l-Artikolu 10(5) tagħha,
Billi:
(1) |
Taħt l-Artikolu 10(5) ta' l-Azzjoni Konġunta 2006/319/PESK, il-Kunsill awtorizza lill-Kumitat Politiku u ta' Sigurtà (KPS) sabiex jieħu d-deċiżjonijiet relevanti għall-istabbiliment ta' Kumitat ta' Kontributuri għall-operazzjoni militari fir-RDK (Repubblika Demokratika tal-Kongo) b'appoġġ għall-MONUC matul il-proċess ta' l-elezzjoni. |
(2) |
Il-Konklużjonijiet tal-Kunsill Ewropew ta' Nizza tas-7, 8 u 9 ta' Diċembru 2000 u ta' Brussel ta' l-24 u l-25 ta' Ottubru 2002 stabbilixxew l-arranġamenti għall-parteċipazzjoni ta' Stati terzi f'operazzjonijiet ta' l-immaniġġar ta' kriżijiet u fl-istabbiliment ta' Kumitat ta' Kontributuri. |
(3) |
Il-Kumitat ta' Kontributuri ser ikollu rwol ċentrali fil-ġestjoni ta' kuljum ta' l-operazzjoni. Huwa ser ikun il-forum prinċipali fejn l-Istati kontribwenti kollettivament jindirizzaw kwistjonijiet relatati ma' l-impjieg tal-forzi tagħhom fl-operazzjoni. Il-KPS, li jeżerċita l-kontroll politiku u d-direzzjoni strateġika ta' l-operazzjoni, ser jieħu kont ta' l-opinjonijiet espressi mill-Kumitat ta' Kontributuri. |
(4) |
Skond l-Artikolu 6 tal-Protokoll dwar il-pożizzjoni tad-Danimarka anness għat-Trattat dwar l-Unjoni Ewropea u għat-Trattat li jistabbilixxi l-Komunità Ewropea, id-Danimarka ma tipparteċipax fl-elaborazzjoni u l-implementazzjoni ta' deċiżjonijiet u azzjonijiet ta' l-Unjoni Ewropea li jkollhom implikazzjonijiet ta' difiża, |
IDDEĊIEDA KIF ĠEJ:
Artikolu 1
Stabbiliment u termini ta' referenza
Huwa b'dan stabbilit Kumitat ta' Kontributuri għall-Operazzjoni Militari ta' l-Unjoni Ewropea fl-RDK b'appoġġ għall-MONUK matul il-proċess ta' l-elezzjoni (minn hawn 'il quddiem imsejjaħ “il-KK”). It-termini ta' referenza tiegħu huma stabbiliti fil-Konklużjonijiet tal-Kunsill Ewropew ta' Nizza u ta' Brussel.
Artikolu 2
Kompożizzjoni
1. Il-membri tal-KK għandhom ikunu kif ġej:
— |
rappreżentanti ta' l-Istati Membri kollha; |
— |
rappreżentanti ta' l-Istati terzi parteċipanti fl-operazzjoni u li jipprovdu kontributi militari sinifikattivi, kif imsemmija fl-Anness. |
2. Id-Direttur Ġenerali tal-Persunal Militari ta' l-Unjoni Ewropea u l-Kmandant ta' l-Operazzjoni ta' l-UE għandhom ikollhom ukoll id-dritt li jattendu għall-laqgħat tal-KK, jew li jkunu rappreżentati fihom.
Artikolu 3
Presidenza
Skond il-konkużjonijiet tal-Kunsill Ewropew ta' Nizza u mingħajr preġudizzju għall-prerogattivi tal-Presidenza tal-Kunsill Ewropew, għal din l-operazzjoni l-KK ser ikun presedut mis-Segretarju Ġenerali/Rappreżentant Għoli jew mir-rappreżentant tiegħu b'konsultazzjoni mill-qrib mal-Presidenza tal-Kunsill Ewropew, assistit mill-Presidenza tal-Kumitat Militari ta' l-Unjoni Ewropea (KMUE) jew mir-rappreżentant tiegħu.
Artikolu 4
Laqgħat
1. Il-KK għandu jitlaqqa' mill-President tiegħu fuq bażi regolari. Fejn iċ-ċirkostanzi jitolbu hekk, jistgħu jissejħu laqgħat ta' emerġenza fuq l-inizjattiva tal-President, jew fuq it-talba ta' membru.
2. Il-President tal-KK għandu jiċċirkola minn qabel aġenda provviżorja u dokumenti relatati mal-laqgħa. Għandu jiġi ċċirkulat wara kull laqgħa sommarju tal-proċedimenti tal-laqgħat.
3. Jistgħu jiġu mistiedna r-rappreżentanti tal-Kummissjoni u persuni oħrajn għal partijiet relevanti tad-diskussjoni, skond il-każ.
Artikolu 5
Proċedura
1. Ħlief kif previst fil-paragrafu 3 u mingħajr preġudizzju għall-kompetenzi u r-responsabbiltajiet tal-Kmandant ta' l-Operazzjoni ta' l-UE,
— |
għandha tapplika l-unanimità tar-rappreżentanti ta' Stati li jikkontribwixxu għall-operazzjoni meta l-KK jieħu deċiżjonijiet dwar il-ġestjoni ta' kuljum ta' l-operazzjoni; |
— |
għandha tapplika l-unanimità tal-membri tal-KK meta l-KK jagħmel rakkomandazzjonijiet dwar aġġustamenti possibbli għall-ippjanar operattiv, inklużi aġġustamenti possibbli għall-objettivi. |
L-astensjoni ta' membru m'għandhiex tipprekludi l-unanimità.
2. Il-President tal-KK għandu jistabbilixxi li l-maġġoranza tar-rappreżentanti ta' l-Istati intitolati li jieħdu sehem fil-deliberazzjonijiet ikunu preżenti.
3. Il-kwistjonijiet kollha ta' proċedura għandhom jiġu riżolti b'maġġoranza sempliċi tal-membri preżenti fil-laqgħa.
4. Id-Danimarka m'għandha tieħu sehem f'ebda deċiżjoni tal-Kumitat.
Artikolu 6
Kunfidenzjalità
1. Ir-Regolamenti tal-Kunsill dwar is-Sigurtà għandhom japplikaw għal-laqgħat u l-proċedimenti tal-KK. B'mod partikolari, ir-rappreżentanti fil-KK għandhom ikunu fil-pussess ta' awtorizzazzjonijiet adegwati ta' sigurtà.
2. Id-deliberazzjonijiet tal-KK għandhom ikunu koperti mill-obbligu ta' segretezza professjonali, ħlief meta l-KK b'mod unanimu jiddeċiedi mod ieħor.
Artikolu 7
Dħul fis-seħħ
Din id-Deċiżjoni għandha tidħol fis-seħħ fil-jum ta' l-adozzjoni tagħha.
Magħmul fi Brussel, 30 ta’ Mejju 2006.
Għall-Kumitat Politiku u ta' Sigurtà
Il-President
J. KUGLITSCH
(1) ĠU L 116, 29.4.2006, p. 98.
ANNESS
Lista ta' Stat(i) terzi msemmija fl-Artikolu 2(1)
— |
Turkija |