(1)

Seħħew tifqigħat tad-deni klassiku tal-ħnieżer fil-Ġermanja fl-2002. Il-feġġ ta' din il-marda ppreżenta riskju serju għall-popolazzjoni tal-bhejjem tal-Komunità.

(2)

Biex jiġi evitat it-tixrid tal-marda u tinqered kemm jista' jkun malajr, il-Komunità għandha tikkontribwixxi finanzjarjament għan-nefqa eliġibbli mġarrba mill-Istat Membru fil-kuntest tal-miżuri ta' emerġenza meħuda biex tkun ikkumbattuta l-marda, kif previst fid-Deċiżjoni 90/424/KEE.

(3)

Id-Deċiżjoni tal-Kummissjoni 2003/745/KE tat-28 ta' Marzu 2006 li tikkonċerna ċerti miżuri ta' protezzjoni fir-rigward tad-deni klassiku tal-ħnieżer fil-Ġermanja fl-2002 (2) tat kontribuzzjoni finanzjarja mill-Komunità lill-Ġermanja għan-nefqa mġarrba fil-kuntest tal-miżuri ta' emerġenza implimentati fl-2002 għall-ġlieda kontra d-deni klassiku tal-ħnieżer.

(4)

Skond dik id-Deċiżjoni, ingħata l-ewwel pagament ta' € 460 000.

(5)

Skond dik id-Deċiżjoni, il-bilanċ tal-kontribuzzjoni Komunitarja għandu jkun bbażat fuq l-applikazzjoni mressqa mill-Ġermanja fid-19 ta' Novembru 2003, dokumenti li jistipulaw iċ-ċifri kkwotati fl-applikazzjoni, u r-riżultati tal-verifiki fuq il-post imwettqa mill-Kummissjoni. L-ammont stipulat fl-applikazzjoni mressqa mill-Ġermanja għall-ispejjeż ta' l-2002 kien ta' EUR 1 933 695,76, li għalihom il-kontribuzzjoni finanzjarja Komunitarja ma tistax tkun ogħla minn 50 % tan-nefqa eliġibbli.

(6)

Fid-dawl tal-kunsiderazzjonijiet imsemmija fuq, l-ammont totali tal-kontribuzzjoni finanzjarja Komunitarja għan-nefqa mġarrba fil-kuntest tal-qerda tad-deni klassiku tal-ħnieżer fil-Ġermanja fl-2002 issa għandha tiġi ffissata.

(7)

Ir-riżultati tal-verifiki mwettqa mill-Kummissjon f'konformità mar-regoli veterinarji tal-Komunità u l-kundizzjonijiet għall-għoti ta' l-appoġġ finanzjarju Komunitarju jfissru li l-ammont kollu tan-nefqa mressqa ma jistax jiġi rikonoxxut bħala eliġibbli.

(8)

L-osservazzjonijiet tal-Kummissjoni u l-metodu għall-kalkolu tan-nefqa eliġibbli ġew ikkomunikati lill-Ġermanja permezz ta' ittra.

(9)

Il-miżuri previsti f'dan ir-Regolament huma fi qbil ma' l-opinjoni tal-Kumitat Permanenti dwar il-Katina Alimentari u s-Saħħa ta' l-Annimali,