(1)

L-Artikoli 3(2)(i)(d) u 4(2)(i)(d) tar-Regolament (KE) Nru. 2037/2000 jipprojbixxu l-produzzjoni, l-importazzjoni u t-tqegħid fis-suq tal-bromid tal-metil għall-użi kollha wara l-31 ta’ Diċembru ta’ l-2004 ħlief, fost l-oħrajn (2), għall-użi kritiċi skond l-Artikolu 3(2)(ii) u l-kriterji stipolati fid-Deċiżjoni IX/6 tal-Partijiet tal-Protokoll ta' Montreal, flimkien ma' kriterji oħra relevanti maqbula bejn il-Partijiet. Eżenzjonijiet għall-użi kritiċi huma intenzjonati li jkunu derogi limitati sabiex jippermettu perjodu ta' żmien qasir għall-adozzjoni ta' l-alternattivi.

(2)

Id-Deċiżjoni IX/6 tistipola li l-bromid tal-metil għandu jikkwalifika bħala “kritiku” biss jekk l-applikant jiddetermina li n-nuqqas tad-disponibbiltà tal-bromid tal-metil għal dak l-użu speċifiku jista' jirriżulta fi tfixkil sinifikanti tas-suq; u li ma hemm ebda alternattivi jew sostituti fiżiċi teknikament u ekonomikament vijabbli disponibbli għall-utent li huma aċċettabbli mill-aspett ambjentali u tas-saħħa u li huma xierqa għall-uċuħ u għaċ-ċirkostanzi tan-nominazzjoni. Aktar minn hekk, il-produzzjoni u l-konsum, jekk applikabbli, tal-bromid tal-metil għall-użi kritiċi għandhom jiġu permessi biss jekk il-passi tekniċi u ekonomiċi xierqa kollha ttieħdu għall-minimizzazzjoni ta' l-użu kritiku u kull emissjoni assoċjata tal-bromid tal-metil. Applikant għandu wkoll juri li qiegħed isir sforz xieraq għall-evalwazzjoni, il-kummerċjalizzazzjoni u l-aċċertament ta' l-approvazzjoni ta' regolazzjoni nazzjonali ta' l-alternattivi u tas-sostituti; u li l-programmi tar-riċerka jitwaqqfu sabiex ikun hemm lok għall-iżvilupp u l-użu ta' l-alternattivi u s-sostituti.

(3)

Il-Kummissjoni rċeviet 79 proposta għall-użi kritiċi tal-bromid tal-metil minn disa' Stati Membri inkluż il-Belġju (44 070 kg), Franza (259 097 kg), il-Ġermanja (19 450 kg), l-Irlanda (1 250 kg), l-Italja (1 333 225 kg), il-Polonja (45 900 kg), il-Portugall (50 000 kg), Spanja (986 000 kg), l-Olanda (120 kg) u r-Renju Unit (139 285 kg). Intalab total ta' 2 878 397 kg, li jinkludi 2 690 275 kg (94 %) għal użi ta' qabel il-ħsad u 188 140 kg (6 %) għal użi ta' wara l-ħsad għall-bromid tal-metil. Sussegwentament, il-Ġermanja għarrfet lill-Kummissjoni li kienet irtirat il-proposti kollha tagħha għaliexx issa l-alternattivi huma disponibbli.

(4)

Il-Kummissjoni applikat il-kriterji li jinsabu fid-Deċiżjoni IX/6 u fl-Artikolu 3(2)(ii) tar-Regolament (KE) Nru. 2037/2000 sabiex jiġi determinat l-ammont tal-bromid tal-metil li huwa eliġibbli li jkun liċenzjat għall-użu kritiku fl-2006. Il-Kummissjoni sabet li l-alternattivi xierqa kienu disponibbli fil-Komunità u li kienu saru aktar prevalenti f' ħafna Partijiet tal-Protokoll ta' Montreal fil-perjodu minn meta l-proposti ta' użu kritiku tlestew mill-Istati Membri. Bħala riżultat ta' dan, il-Kummissjoni ddeterminat li 1 607 587 kg ta' bromid tal-metil jistgħu jintużaw fl-2006 sabiex jissodisfaw l-użi kritiċi f' kull wieħed mil l-Istati Membri li kienu talbu l-użu tal-bromid tal-metil. Dan l-ammont huwa ugwali għal 8,4 % tal-konsum ta' l-1991 tal-bromid tal-metil fil-Komunità Ewropea u jindika li iktar minn 91,6 % tal-bromid tal-metil ġie ssostitwit minn alternattivi. Il-kategoriji ta' użi kritiċi huma simili għal dawk li huma definiti fl-Taqsima IIB fid-Deċiżjoni XVI/2 (3) u f'Tabella tad-Deċiżjoni XVI/I/9 tas-Sbatax -il Laqgħa tal-Partijiet tal-Protokoll ta' Montreal (4).

(5)

L-Artikolu 3(2)(ii) jeħtieġ lill-Kummissjoni tiddetermina wkoll liema utenti jistgħu jieħdu vantaġġ mill-eżenzjoni ta' l-użi kritiċi. Billi l-Artikolu 17(2) jitlob lill-Istati Membri sabiex jiddefinixxu l-kondizzjonijiet ta' kwalifiki minimi għall-personal involut l-applikar tal-bromid tal-metil, u billi l-fumigazzjoni huwa l-uniku użu, il-Kummissjoni ddeterminat li l-fumigaturi tal-bromid tal-metil huma l-uniċi utenti proposti mill-Istati Membri u awtorizzati mill-Kummissjoni li japplikaw il-bromid tal-metil f' użi kritiċi. Il-fumigaturi huma kkwalifikati li japplikawh mingħajr periklu, minflok, per eżempju, il-bdiewa jew il-proprjetarji ta' l-imtieħen li huma ġeneralment mhux ikkwalifikati li japplikaw il-bromid tal-metil iżda li huma s-sidien ta' proprjetajiet li fihom dan jiġi applikat. Aktar minn hekk, l-Istati Membri ġabu fis-seħħ proċeduri biex jidentifikaw l-aġenti ta' fumigazzjoni fi ħdan it-territorju tagħhom li huma permessi li jużaw il-bromid tal-metil għall-użi kritiċi.

(6)

Id-Deċiżjoni IX/6 tistipola li l-produzzjoni u l-konsum tal-bromid tal-metil għall-użi kritiċi għandhom jiġu permessi biss jekk il-bromid tal-metil mhux disponibbli minn ħażniet eżistenti minn bromid tal-metil ibbankjat jew riċiklat. L-Artikoli 3(2)(ii) jistipolaw li l-produzzjoni u l-importazzjoni tal-bromid tal-metil għandha tiġi permessa biss jekk ebda bromid tal-metil riċiklat jew miġjub lura ma jkun disponibbli minn ebda Parti. Skond id-Deċiżjoni IX/6 u l-Artikolu 3(2)(ii), il-Kummissjoni ddeterminat li 50047 kg ta' ħażniet huma disponibbli għall-użi kritiċi.

(7)

L-Artikolu 4(2)(ii) jiddikjara li, soġġett għall-paragrafu 4, it-tqegħid fuq is-suq u l-użu ta' bromid tal-metil minn intrapriżi apparti minn produtturi jew importaturi għandu jkun projbit wara l-31 ta' Diċembru 2005. L-Artikolu 4(4) jiddikjara li l-Artikolu 4(2) m'għandux japplika japplikaw għat-tqegħid fuq is-suq u l-użu ta' sostanzi kontrollati jekk dawn ikunu wżati biex iwettqu t-talbiet liċenzjati għall-użu essenzjali ta' dawk l-utenti identifikati kif stabbilit fl-Artikolu 3(2).

Għalhekk, minbarra l-produtturi u l-importaturi, il-fumigaturi li huma rreġistrati mill-Kummissjoni fl-2006 se jkollhom il-permess iqiegħdu fis-suq il-bromid tal-metil, u jużaw għall-użi essenzjali, wara l-31 ta’ Diċembru 2005. Tipikament, fumigatur jitlob importatur sew għall-importazzjoni u l-provvista tal-bromid tal-metil. Il-fumigaturi rreġistrati għall-użi essenzjali mill-Kummissjoni fl-2005 se jkollhom il-permess iressqu'l quddiem għall-2006 il-bromid tal-metil li jkun fadlilhom u li ma kienx ġie użat fl-2005 (stokks/ħażniet). Il-Kummissjoni Ewropea stabbiliet proċeduri ta' liċenzjar sabiex tillokalizza ħażniet bħal dawn ta' bromid tal-metil qabel ma' xi bromid tal-metil addizzjonali jiġi importat jew prodtt sabiex iwettaq it-talbiet liċenzjati għall-użi essenzjali fl-2006.

(8)

Tliet użi tal-bromid tal-metil huma kkategorizzati f'din id-Deċiżjoni bħala “bioċidi”, u għalihom japplikaw restrizzjonijiet addizzjonali. Ir-Regolament (KE) Nru 2032/2003 (5) iniżżel il-bromid tal-metil bħala sustanza bioċidi li ma tistax titqiegħed fis-suq wara l-1 ta’ Settembru 2006. Il-Kummissjoni tista' tawtorizza Stat Membru li juża l-bromid tal-metil wara din id-data sakemm l-Istat Membru juri li jikkonforma mal-kriterji għall-“użu essenzjali” skond l-Artikolu 4a tar-regolament 2032/2003. Il-kwantitajiet tal-bromid tal-metil għall-użi bioċidi li għalih hija meħtieġa awtorizzazzjoni skond ir-Regolament (KE) Nru 2032/2003 għal kull użu wara l-1 ta’ Settembru 2006 huma murija fl-Annessi 1, 4 u 8 tad-Deċiżjoni.

(9)

Billi l-użi kritiċi tal-bromid tal-metil japplikaw mill-1 ta’ Jannar 2006, u għall-finijiet ta' aċċertament li l-kumpaniji interessati u l-operaturi jkunu jistgħu jibbenefikaw mis-sistema ta' liċenzjar, huwa xieraq li din id-deċiżjoni preżenti għandha tapplika minn dik id-data.

(10)

Il-miżuri previsti f' din id-Deċiżjoni huma skond l-opinjoni tal-Kumitat stabbilit skond l-Artikolu 18 tar-Regolament (KE) Nru 2037/2000/KE.