ANNESS

Brussell,

L-Unjoni Ewropea tagħti l-akbar importanza lid-dispożizzjonijiet ta' l-Artikolu 9 tal-Ftehim ta' Sħubija ACP-KE. Ir-rispett tad-drittijiet tal-bniedem, ta' l-istituzzjonijiet demokratiċi u ta' l-istat ta' dritt, li jikkostitwixxu elementi essenzjali tal-Ftehim ta' Sħubija, huma l-bażi tar-relazzjonijiet tagħna.

B'ittra li ġġib id-data tad-19 ta' Frar 2002, l-Unjoni Ewropea informatek bid-deċiżjoni tagħha li tikkonkludi l-konsultazzjonijiet li saru taħt l-Artikolu 96 tal-Ftehim ta' Sħubija ACP-KE u li tieħu “miżuri adatti” skond l-Artikolu 96(2)(c) ta' dan il-Ftehim.

Bl-ittri tad-19 ta' Frar 2003, tad-19 ta' Frar 2004 u tat-18 ta' Frar 2005, l-Unjoni Ewropea informatek bid-deċiżjoni tagħha li ma tirrevokax l-applikazzjoni tal-“miżuri adatti” u li testendi l-perjodu ta' żmien ta' l-applikazzjoni tagħhom sa l-20 ta' Frar 2004, l-20 ta' Frar 2005 u l-20 ta' Frar 2006 rispettivament.

Wara tnax-il xahar, il-Gvern ta' pajjiżek, fil-fehma l-Unjoni Ewropea, ma għamel ebda progress sinifikattiv fil-ħames oqsma msemmija fid-Deċiżjoni tal-Kunsill tat-18 ta' Frar 2002.

Fid-dawl ta' dak espost hawn fuq, l-Unjoni Ewropea ma tikkunsidrax li l-miżuri adatti jistgħu jiġu revokati, u ddeċidiet li testendi l-perjodu ta' l-applikazzjoni tagħhom sa l-20 ta' Frar 2007. L-Unjoni Ewropea sejra ssegwi mill-viċin l-iżvilupp tas-sitwazzjoni fiż-Żimbabwe u tixtieq mill-ġdid temfasizza li hija mhijiex qiegħda tippenalizza l-poplu taż-Żimbabwe u li sejra tkompli tagħti l-kontribuzzjoni tagħha għall-operazzjonijiet ta' natura umanitarja u għall-proġetti li jsostnu b'mod dirett il-popolazzjoni lokali, partikolarment proġetti fis-setturi soċjali, ta' demokratizzazzjoni, għar-rispett tad-drittijiet tal-bniedem u ta' l-istat ta' dritt, li mhumiex milquta minn dawn il-miżuri.

L-Unjoni Ewropea tixtieq tfakkar li l-applikazzjoni tal-miżuri adatti fis-sens ta' l-Artikolu 96 tal-Ftehim ta' Sħubija ACP-KE ma tostakolax id-djalogu politiku kif definit fid-dispożizzjonijiet ta' l-Artikolu 8 ta' dak l-istess Ftehim. B'kont meħud ta' dan, l-Unjoni Ewropea tixtieq temfasizza l-importanza li hija tagħti lill-koperazzjoni futura bejn il-KE u ż-Żimbabwe u tixtieq tesprimi d-disponibbiltà tagħha li tibda, meta l-kondizzjonijiet jiġu sodisfatti, l-programmazzjoni ta' wara d-9 EDF u tikkunsidra li din tkun opportunità ta' djalogu bejn iż-żewġ imseħbin.

Għal dan l-iskop, l-Unjoni Ewropea tixtieq li int u l-Gvern tiegħek tagħmlu dak kollu li tistgħu sabiex jiġi stabbilit mill-ġdid ir-rispett tal-prinċipji fundamentali proklamati fil-Ftehim ta' Sħubija, u b'hekk tippermettu r-ristabbiliment tal-koperazzjoni meta l-kondizzjonijiet jippermettu.

Dejjem tiegħek,