REGOLAMENT TAL-KUMMISSJONI (KE) Nru 2106/2005

tal-21 ta’ Diċembru 2005

li jemenda r-Regolament (KE) Nru 1725/2003 li jaddotta ċerti standards internazzjonali tal-kontabilità skond ir-Regolament (KE) Nru 1606/2002 tal-Parlament Ewropew u tal-Kunsill, skond l-Istandard Internazzjonali tal-Kontabilità (IAS) 39

(Test b’rilevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 1606/2002 tal-Parlament Ewropew u tal-Kunsill tad-19 ta' Lulju 2002 dwar l-applikazzjoni ta' standards internazzjonali tal-kontabilità (1), u b’mod partikolari l-Artikolu 3(1) tiegħu,

Billi:

(1)	Permezz tar-Regolament tal-Kummissjoni (KE) Nru 1725/2003 (2) ċerti standards u interpretazzjonijiet internazzjonali li kienu eżistenti fl-14 ta' Settembru 2002 ġew adottati.

(2)

Il-Kummissjoni adottat l-Istandard Internazzjonali tal-Kontabilità (IAS) 39 bl-esklużjoni ta' ċerti dispożizzjonijiet li għandhom x'jaqsmu ma' l-Opzjoni sħiħa ta' Valur Ġust u l-kontabilità ta' lqugħ, mir-Regolament tal-Kummissjoni (KE) 2086/2004 tad-19 ta' Novembru 2004 li jemenda r-Regolament (KE) Nru 1725/2003 dwar l-adozzjoni ta' ċerti standards internazzjonali tal-kontabilità skond ir-Regolament (KE) Nru 1606/2002 tal-Parlament Ewropew u tal-Kunsill skond iż-żieda ta' l-IAS 39 (3). Il-Kummissjoni adottat l-IAS 39 standard itjeb għal opzjoni ta' valur ġust limitat mir-Regolament tal-Kummissjoni (KE) Nru 1864/2005 (4)

(3)

Fl-14 ta' April 2005, il-Bord ta' l-Istandards Internazzjonali tal-Kontabilità (IASB) ippubblika Emenda għal IAS 39 li tippermetti b'mod partikolari, l-korpi jinnominaw f'ċerti ċirkostanzi previzjoni ta' tranżazzjoni bejn il-gruppi, denominata f'munita barranija bħala l-oġġett assigurat f'dikjarazzjonijiet finanzjarji konsolidati. Hija prattika komuni fit-tmexxija tar-riskju li wieħed jinnomina r-riskju fuq il-valuta barranija ta' previzjoni ta' transazzjoni bejn il-gruppi bħala l-oġġett assigurat u l-IAS 39 preżenti ma ppermettitx il-kontabilità ta' lqugħ għal dan. Taħt l-IAS 39 preżenti tranżazzjoni barra l-entità biss tista' tkun denominata bħala oġġett assigurat.

(4)	Il-konsultazzjoni ma' esperti tekniċi fil-qasam tikkonferma illi l-emendi għall-IAS 39 jilħqu l-kriterji tekniċi għall-adozzjoni mfassla fl-Artikolu 3 tar-Regolament (KE) Nru 1606/2002.

(5)	Għalhekk ir-Regolament (KE) Nru 1725/2003 għandu jiġi emendat skond dan.

(6)	Il-miżuri stipulati f’dan ir-Regolament huma skond l-opinjoni tal-Kumitat Regolatorju ta' Kontabilità,

ADOTTAT DAN IR-REGOLAMENT:

L-Artikolu 1

Fl-Anness għal Regolament (KE) Nru 1725/2003 l-Istandard Internazzjonali tal-Kontabilità (IAS) 39 hu emendat kif stipulat fl-Anness għal dan ir-Regolament.

L-Artikolu 2

Kull kumpanija għandha tapplika l-emendi għall-IAS 39 kif inhuma mfassla fl-Anness għal dan ir-Regolament sa mhux aktar tard mid-data ta' bidu tas-sena finanzjarja tagħha fl-2006.

L-Artikolu 3

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali ta’ l-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, nhar il-21 ta’ Diċembru 2005.

Għall-Kummissjoni

Charlie McCREEVY

Membru tal-Kummissjoni

(1) ĠU L 243, tal-11.9.2002, p. 1.

(2) ĠU L 261, 13.10.2003, p.1. Regolament kif ġie emendat l-aħħar mir-Regolament (KE) Nru 1910/2005 (ĠU L 305, 24.11.2005, p. 4).

(3) ĠU L 363, 9.12.2004, p. 1.

(4) ĠU L 299, 16.11.2005, p. 45.

ANNESS

L-Istandard Internazzjonali tal-Kontabilità (IAS) 39 hu emendat kif ġej:

STANDARDS INTERNAZZJONALI TAL-KONTABILITÀ

Nru ta' IAS	Titolu
IAS 39	Strumenti Finanzjarji: Ir-Rikonoxximent u l-Kejl

“Ir-riproduzzjoni hija permessa fiż-Żona Ekonomika Ewropea. Id-drittijiet kollha eżistenti riservati barra ż-ŻEE, bl-eċċezzjoni tad-dritt ta' riproduzzjoni bl-għan ta' użu personali jew xi negozju ieħor ġust. Aktar informazzjoni tista' tinkiseb mill-IASB fuq www.iasb.org”.

(1)

Il-paragrafu 80 jinbidel b’dan li ġej:

“80.

Għal għan ta' kontabilità ta' lqugħ, l-assi, il-passiv, l-impenji sodi jew it-tranżazzjonijiet previsti li huma probabbli biss u li jinvolvu parti esterna għall-entità jistgħu jkunu denominati bħala oġġetti assigurati. B'hekk, il-kontabilità ta' lqugħ tista' tiġi applikata biss għal tranżazzjonijiet bejn l-entitajiet jew is-segmenti fl-istess grupp biss fid-dikjarazzjonijiet finanzjarji individwali jew separati ta' dawk l-entitajiet jew is-segmenti u mhux fid-dikjarazzjonijiet finanzjarji konsolidati tal-grupp. Bħala eċċezzjoni, ir-riskju fuq il-valuta barranija ta' oġġett monetarju bejn il-gruppi (per eżempju, oġġett pagabbli/riċevibbli bejn żewġ sussidjarji) jista' jikkwalifika bħala oġġett assigurat fid-dikjarazzjonijiet finanzjarji konsolidati jekk jirriżulta f'espożizzjoni għal qligħ jew telf fuq rati tal-kambju li mhumiex eliminati kompletament fuq konsolidazzjoni skond IAS 21 L-Effetti ta' Tibdil fir-Rati tal-Kambju. Skond l-IAS 21, il-qligħ u t-telf mir-rati tal-kambju u fuq partijiet monetarji ta’ bejn il-gruppi m'humiex eliminati kompletament fiż-żmien tal-konsolidazzjoni meta l-oġġett monetarju bejn il-gruppi huwa nnegozjat bejn żewġ entitajiet tal-gruppi li għandhom muniti funzjonali differenti. Barra minn hekk, ir-riskju fuq il-valuta barranija ta' tranżazzjoni prevista bejn il-gruppi li hija probabbli ħafna tista' tikkwalifika bħala oġġett assigurat f'dikjarazzjonijiet finanzjarji konsolidati sakemm it-tranżazzjoni tkun denominata f'munita barra dik tal-munita funzjonali ta' l-entità li tidħol f'dik it-tranżazzjoni u r-riskju fuq il-valuta barranija se taffettwa l-qligħ jew it-telf konsolidat.”;

(2)

Il-paragrafi 108A u 108B li ġejjin huma miżjuda:

“108A.

Entità għandha tapplika l-aħħar sentenza tal-paragrafu 80, u l-paragrafi AG99A u AG99B, għal perjodi annwali li jibdew fl-1 ta' Jannar 2006 jew aktar tard. Applikazzjoni minn kmieni hija mħeġġa. Jekk entità nnominat bħala l-oġġett assigurat tranżazzjoni esterna mħabbra li

(a)	hija denominata fil-munita funzjonali ta' l-entità li tidħol fit-tranżazzjoni,

(b)	toħloq espożizzjoni li jkollha effett fuq qligħ jew telf konsolidat (jiġifieri, hija denominata f'munita barra dik tal-preżentazzjoni tal-munita tal-grupp), u

(c)	kienet tikkwalifika għall-kontabilità ta' lqugħ kieku ma kenitx denominata fil-munita funzjonali ta' l-entità li tidħol fiha,

tista' tapplika l-kontabilità ta' lqugħ fid-dikjarazzjonijiet finanzjarji konsolidati fil-perjodu/i qabel id-data ta' applikazzjoni ta' l-aħħar sentenza tal-paragrafu 80, u l-paragrafi AG99A u AG99B.

108B.

Entità m'għandiex għalfejn tapplika l-paragrafu AG99B għat-tagħrif komparattiv li għandu x'jaqsam ma' perjodi qabel id-data ta' l-applikazzjoni ta' l-aħħar sentenza tal-paragrafu 80 u l-paragrafu AG99A.”

(3)

Fl-Appendiċi A, il-Linjagwida ta' Applikazzjoni, il-paragrafi AG99A u l-AG99B huma nnumerati mill-ġdid AG99C u AG99D u l-paragrafi li ġejjin AG99A, AG99B u AG133 huma inklużi:

“AG99A.

Il-Paragrafu 80 jistqarr illi fid-dikjarazzjonijiet finanzjarji konsolidati, ir-riskju fuq il-valuta barranija ta' tranżazzjoni prevista li tkun probabbli ħafna bejn il-gruppi jista' jikkwalifika bħala oġġett assigurat f'likwidità assigurata, sakemm it-tranżazzjoni tkun denominata f'munita barra dik tal-munita funzjonali ta' l-entità li tidħol f'dik it-tranżazzjoni u r-riskju fuq il-valuta barranija se jaffettwa l-qligħ jew it-telf konsolidat. Għalhekk, entità tista' tkun waħda prinċipali, sussidjarja, assoċjata, impriża konġunta jew fergħa. Jekk ir-riskju fuq il-valuta barranija ta' tranżazzjoni prevista bejn il-grupp ma taffettwax il-qligħ jew it-telf ikkonsolidat, it-tranżazzjoni bejn il-grupp ma tistax tikkwalifika bħala oġġett assigurat. Normalment, dan ikun il-każ għal pagamenti tad-drittijiet ta' l-awtur, pagamenti ta' interessi jew spejjeż amministrattivi bejn membri ta' l-istess grupp sakemm ikun hemm tranżazzjoni esterna relatata. Madankollu, meta r-riskju fuq il-valuta barranija ta' tranżazzjoni prevista bejn il-grupp se jaffettwa l-qligħ jew it-telf ikkonsolidat, it-tranżazzjoni bejn il-grupp tista' tikkwalifika bħala oġġett assigurat. Eżempju ta' dan huwa l-bejgħ jew ix-xiri previst ta' inventarji bejn il-membri ta' l-istess grupp jekk ikun hemm bejgħ ieħor ta' l-inventarju għal partit barra mill-grupp. Bl-istess mod, bejgħ previst bejn il-gruppi ta' pjanta u tagħmir mill-entità tal-grupp li mmanifatturatu għal entità tal-grupp li se tagħmel użu mill-pjanta u t-tagħmir fl-operazzjonijiet tiegħu jista' jaffettwa l-qligħ jew it-telf ikkonsolidat. Dan jista' jsir, per eżempju, minħabba l-fatt illi l-pjanta u t-tagħmir se jkunu deprezzati mill-entità li qed tixtri u l-ammont li inizjalment kien magħruf għal pjanta u t-tagħmir jista' jinbidel jekk it-tranżazzjoni prevista bejn il-grupp tkun denominata f'munita barra dik tal-munita funzjonali ta' l-entità li qed tixtri.

AG99B.

Jekk ilqugħ ta' tranżazzjoni prevista bejn il-gruppi jikkwalifika għal kontabilità ta' lqugħ, kwalunkwe qligħ jew telf li jkun magħruf direttament f'interess skond il-paragrafu 95(a) se jkun klassifikat mill-ġdid fi qligħ jew telf fl-istess perjodu jew perjodi li matulhom ir-riskju fuq il-valuta barranija tat-tranżazzjoni assigurata taffettwa l-qligħ jew it-telf konsolidat.

AG133.

Entità tista' jkollha denominata transazzjoni prevista bejn il-gruppi bħala oġġett assigurat fil-bidu ta' perjodu annwali li jibda fl-1 ta' Jannar 2005 jew wara (jew, bl-għan illi tistqarr mill-ġdid tagħrif komparattiv, il-bidu ta' perjodu komparattiv preċedenti) fi lqugħ li jikkwalifika għal kontabilità ta' lqugħ skond dan l-Istandard (kif ġie emendat mill-aħħar sentenza tal-paragrafu 80). Entità bħal din tista' tagħmel użu minn dik in-nomina biex tapplika l-kontabilità ta' lqugħ fid-dikjarazzjonijiet finanzjarji konsolidata mill-bidu tal-perjodu annwali li jibda fl-1 ta' Jannar 2005 jew wara (jew il-bidu tal-perjodu komparattiv preċedenti). Entità bħal din għandha tapplika wkoll il-paragrafi AG99A u AG99B mill-bidu tal-perjodu annwali li jibda fl-1 ta' Jannar 2005 jew wara. Madankollu, skond il-paragrafu 108B, m'hemmx għalfejn tapplika l-paragrafu AG99B għat-tagħrif komparattiv għall-perjodi preċedenti.”