IL-KUMMISSJONI TAL-KOMUNITAJIET EWROPEJ

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 58/2003 li jistabbilixxi l-istatut ta' aġenziji eżekuttivi li jkunu fdati b'ċerti ħidmiet fit-tmexxija ta' programmi tal-Komunità (1) u b'mod partikolari l-Artikolu 15 tiegħu,

Wara li kkunsidrat l-opinjoni tal-Parlament Ewropew,

Wara li kkunsidrat l-opinjoni tal-Kunsill,

Wara li kkunsidrat l-opinjoni tal-Qorti ta' l-Awdituri,

Billi:

(1)

L-Artikolu 30 tar-Regolament tal-Kummissjoni (KE) Nru 1653/2004 dwar regolament finanzjarju standard għall-aġenziji eżekuttivi skond ir-Regolament tal-Kunsill (KE) Nru 58/2003 li jistabbilixxi l-istatut għal aġenziji eżekuttivi li jkunu fdati b'ċerti ħidmiet fit-tmexxija ta' programmi tal-Komunità (2) jipprovdi li l-bord tat-tmexxija ta' aġenzija eżekuttiva għandu jaħtar uffiċjal għall-kontabilità ta' l-aġenzija eżekuttiva, li jkun uffiċjal li jaqa' taħt ir-Regolamenti tal-Persunal,

(2)

Ir-responsabbiltajiet ta' l-uffiċjal tal-kontabilità ta' aġenzija eżekuttiva, li huma mniżżla fl-Artikolu 30 tar-regolament finanzjarju standard, huma limitati għall-baġit amministrattiv ta' l-aġenzija eżekuttiva, filwaqt li l-uffiċjal tal-kontabilità tal-Kummissjoni huwa responsabbli għall-ħidmiet kollha li għandhom x'jaqsmu mal-baġit operattiv li jkun implimentat mill-aġenziji eżekuttivi,

(3)	Il-Kummissjoni kellha l-problemi biex issib kandidati xierqa għall-post ta' uffiċjal tal-kontabilità ta' aġenzija eżekuttiva biex ikun issekondat lil dan il-korp,

(4)

Il-funzjoni ta' uffiċjal tal-kontabilità ta' aġenzija eżekuttiva tista' tiġi fdata f'idejn membru temporanju tal-persunal, kif imfisser minn Artikolu 2, punt a, tal-Kundizzjonijiet ta' l-Impjieg ta' Ħaddiema Oħra tal-Komunitajiet Ewropej, stabbiliti bir-Regolament tal-Kunsill (KEE, Euratom, KEFA) Nru 259/68 (3),

(5)	Għalhekk, ir-Reġolament (KE) 1653/2004 għandu jkun emendat f’dan is-sens,

ADOTTAT DAN IR-REGOLAMENT:

Artikolu 1

F’Artikolu 30 tar-Regolament (KE) Nru 1653/2004, il-frażi introduttiva ta’ l-ewwel paragrafu għandha ssir kif ġej:

“Il-bord ta' tmexxija għandu jaħtar uffiċjal għall-kontabilità li għandu jkun uffiċjal issekondat jew membru tal-persunal temporanju direttament impjegat fis-servizz mill-aġenzija u li għandu jkun responsabbli għal:”

Artikolu 2

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali ta' l-Unjoni Ewropea.