9.12.2008   

MT

Il-Ġurnal Uffiċjali ta’ l-Unjoni Ewropea

169

(1)

L-Artikolu 10 tar-Regolament tal-Kummissjoni (KE) Nru 1973/2004 (2) jipprevedi miżuri tranżizzjonali għall-istabbiliment tal-lista ta’ varjetajiet magħżula bħala ammissibbli għall-benefiċċju tal-primjum speċjali għall-kwalità għall-qamħ durum għas-sena 2005 L-esperjenza turi li f’ċerti Stati Membri, huwa ġustifikat li jiġu applikati fl-2006 ukoll il-miżuri tranżizzjonali previsti fil-paragrafu 2 tal-Artikolu msemmi.

(2)

L-Artikolu 15(1), it-tieni subparagrafu, tar-Regolament (KE) Nru 1973/2004 jipprevedi, b’deroga mill-ewwel subparagrafu tal-paragrafu msemmi, il-possibbiltà li l-Istati Membri jaċċettaw il-preżenza, f’masġar ta’ siġar tal-ġwież, siġar li jipproduċu frott ieħor, bil-kundizzjoni li ma jaqbżux l-10 % fl-għadd mill-għadd minimu ta’ siġar li jipproduċu, f’kull ettaru kif stabbilit fil-pargrafu 3 tal-istess Artikolu. L-applikazzjoni ta’ din id-dispożizzjoni tat lok għal interpretazzjonijiet differenti. Huwa xieraq li jiġi ċċarat l-ambitu ta’ din id-dispożizzjoni filwaqt li titqies l-ispeċifiċità tal-imsaġar tal-ġwież fl-Istati Membri, billi jiġi ppreċiżat li l-limitu ta’ 10 % msemmi qabel, ikunx għan-numru minimu ta’ siġar produtturi kull ettaru, inkella l-għadd ta’ siġar li jipproduċu l-ġwież li effettivament tħawlu fil-masġar partikolari.

(3)

Għaldaqstant, ir-Regolament (KE) Nru 1973/2004 għandu jiġi emendat skond dan.

(4)

Peress li r-Regolament (KE) Nru 1973/2004 japplika mill-1 ta’ Jannar 2005, huwa xieraq li l-emenda kkonċernata tapplika b’effett minn dik id-data.

(5)

Il-miżuri provvduti f'dan ir-Regolament huma konformi mal-opinjoni tal-Kumitat ta' Ġestjoni għall-Pagamenti Diretti,

1)

Fl-Artikolu 10, jiżdied il-paragrafu li ġej:

“4.   L-Istati Membri jistgħu jiddeċiedu li jistabbilixxu l-lista tal-varjetajiet magħżula bħala ammissibbli li jibbenefikaw mill-primjum speċjali għall-kwalità għall-qamħ durum matul l-2006 f’konformità mal-proċedura msemmija fil-paragrafu 2, sa mhux aktar tard mill-1 ta’ Ottubru 2005 f’dak li jirrigwarda l-varjetajiet tax-xitwa u sa mhux aktar tard mill-31 ta’ Diċembru 2005 f’dak li jirrigwarda l-varjetajiet tar-rebbiegħa.”

2)

It-tieni subparagrafu ta' l-Artikolu 15(1) jinbidel b’li ġej:

“B’deroga mill-ewwel subparagrafu, u bla ħsara għall-paragrafu 4, l-Istati Membri jistgħu jaċċettaw il-preżenza, f’masġar ta’ siġar tal-ġwież, siġar oħra li jipproduċu frott ieħor li mhux ġwież, bil-kundizzjoni li ma jaqbżux l-10 % fl-għadd mill-għadd minimu ta’ siġar li jipproduċu, f’kull ettaru kif stabbilit fil-pargrafu 3 jew l-għadd ta’ siġar produtturi ta’ ġwież imħawla effettivament kull ettaru ta’ masġar, skont kif jidhirlu l-Istat Membru. L-Istati Membri jistgħu jippermettu l-preżenza tas-siġar tal-qastan jew l-għadd ta’ siġar stipulat fil-paragrafu 3 jiġi rrispettat f’dak li jirrigwarda s-siġar tal-ġwież ammissibbli.”