(1)

Is-sistema tal-kwota fuq il-prodotti tax-xedd tas-saqajn stabbilita fir-Regolament tal-Kunsill (KE) Nru 427/2003 tat-3 ta’ Marzu 2003 dwar mekkaniżmu transizzjonali ta’ salvagwardja speċifiku għall-prodott għall-importazzjoni li joriġina fir-Repubblika Popolari Ċiniża u li temenda r-Regolament (KE) Nru 519/94 dwar regoli komuni għall-importazzjoni minn ċerti pajjiżi terzi skadiet ( (2) fl-1 ta’ Jannar 2005.

(2)

Fis-7 ta’ Diċembru 2004, il-Kummissjoni ġiet infurmata minn xi Stati Membri li jkun xieraq li jiġu imposti miżuri ta’ sorveljanza fuq prodotti tax-xedd tas-saqajn skond ir-Regolament (KE) Nru 3285/94.

(3)

L-industrija Komunitarja tax-xedd tas-saqajn hija fil-biċċa l-kbira magħmula minn impriżi żgħar u ta’ daqs medju, li fosthom ħafna jinsabu f’reġjuni bi ftit aktar riżorsi ta’ impieg. Hija għalhekk miftuħa għall-kompetizzjoni ta’ importazzjoni bi prezz baxx li toriġina b’mod partikolari mir-Repubblika Popolari tac-Ċina.

(4)

Bi tweġiba għal din il-kompetizzjoni fl-importazzjoni, l-industrija Komunitarja tax-xedd tas-saqajn ġarbet, f’dawn l-aħħar snin, ristrutturazzjoni estensiva billi kkonċentrat il-produzzjoni tagħha fuq aktar prodotti ta’ kwalità li huma wkoll il-prodotti li kienu soġġetti għall-kwota. Dawn il-prodotti jirrappreżentaw bejn wieħed u ieħor 85 % tal-produzzjoni ta’ l-industrija tax-xedd tas-saqajn tal-Komunità. Din ir-ristrutturazzjoni wasslet għal tnaqqis qawwi ta’ kapaċità u forza tax-xogħol. Minkejja dawn l-isforzi, l-industrija Komunitarja tax-xedd tas-saqajn kompliet titlef mill-produzzjoni u mis-sehem tas-suq minħabba l-importazzjoni ta’ prodotti inferjuri minn barra.

(5)

Matul il-perijodu 2000-2003, l-importazzjoni ta’ prodotti tax-xedd tas-saqajn li joriġinaw fir-Repubblika Popolari taċ-Ċina mhux soġġetti għall-kwoti żdiedet f'daqqa kemm f'termini assoluti kif ukoll f'termini tas-sehem tas-suq tal-Komunità, bi prezzijiet li kienu sostanzjalment aktar baxxi mill-prezzijiet ta’ prodotti ekwivalenti manifatturati fil-Komunità. Iż-żieda medja fl-importazzjoni kienet ta’ 59 % bejn l-2000 u l-2003 u d-differenza medja fil-prezzijiet kienet ta’ 21 %.

(6)

Peress li l-kondizzjonijiet fis-suq bħalissa għall-prodotti kollha tax-xedd tas-saqajn huma l-istess, huwa mistenni li l-liberalizzazzjoni reċenti ser twassal għal żieda sostanzjali fl-importazzjoni. Fuq il-bażi ta’ l-aħħar tendenzi fl-importazzjoni ta’ prodotti tax-xedd tas-saqajn, dak li ser joħroġ mit-tneħħija tal-kwoti fl-2005 jista’ jwassal għal irduppjar fl-importazzjoni fil-futur qrib, x’aktarx b’telf, tas-sehem tas-suq bħala konsegwenza għall-industrija tal-Komunità ta’ 6 % u telf ta’ 17 000 impieg. Għalhekk wieħed jista’ jqis li teżisti theddida ta’ ħsara għall-produtturi tal-Komunità għall-għanijiet ta’ l-Artikolu 11 tar-Regolament (KE) Nru 3285/94.

(7)

Dan l-impatt li x’aktarx iseħħ huwa tant sinifikanti li l-interessi tal-Komunità jitolbu li l-importazzjoni ta’ ċerti prodotti tax-xedd tas-saqajn ta’ oriġini Ċiniża għandhom ikunu soġġetti għal sorveljanza minn qabel biex ikun hemm informazzjoni statistika li tippermetti analiżi fil-pront ta’ tendenzi ta’ importazzjoni. Ix-xedd tas-saqajn ikkonċernat, primarjament xedd tas-saqajn minn kwalità medja sa kwalità għolja, huwa dak li għalih għad hemm produzzjoni sinifikanti fil-Komunità u għal din ir-raġuni jista’ jitqies bħala sensittiv. Sorveljanza minn qabel permezz ta’ reġim awtomatiku ta’ liċenzjar ta’ importazzjoni applikabbli sal-31 ta’ Jannar 2006 tipprovdi l-aktar mezz rapidu biex tinkiseb stampa ċara ta’ l-effetti tal-bidu tat-tneħħija ta’ dawn il-kwoti peress li kull sistema retrospettiva tieħu ż-żmien biex tipprovdi tagħrif sinifikanti.

(8)

Huwa wkoll xieraq, biex tinkiseb stampa ġenerali tat-tendenzi fl-importazzjoni tax-xedd tas-saqajn, li titwaqqaf sistema ta’ sorveljanza retrospettiva bbażata fuq id-dwana għall-importazzjoni tax-xedd tas-saqajn ta’ kull tip mill-imkejjen kollha. Dan jinkludi xedd tas-saqajn li jkun jeħtieġ li jsir soġġett għal sorveljanza minn qabel. Meta s-sistema ta’ sorveljanza retrospettiva tkun qed taħdem sewwa s-sorveljanza minn qabel tista’ tiġi fi tmiem, sa mhux aktar tard mill-31 ta’ Jannar 2006.

(9)

Biex is-suq intern ikun komplut jeħtieġ li l-formalitajiet li għandhom jissodisfaw l-importaturi tal-Komunità jkunu identiċi kull fejn il-prodotti jistgħu jiġu maħruġa mid-dwana.

(10)

Sabiex jitħaffef il-ġbir ta’ l-informazzjoni l-permess għaċ-ċirkolazzjoni ħielsa tal-prodotti kopert mis-sorveljanza minn qabel għandu jkun soġġett għal wiri ta’ dokument ta’ sorveljanza li jissodisfa kriterji uniformi. Dan id-dokument għandu, fuq sempliċi applikazzjoni mill-importatur, jiġi approvat mill-awtoritajiet ta’ l-Istati Membri sa ċertu perijodu iżda b’daqshekk l-importatur m’għandux ikollu xi dritt li jimporta. Id-dokument għandu għalhekk ikun validu biss sakemm ir-regoli ta’ importazzjoni jibqgħu kif inhuma; għandu jkun validu mal-Komunità kollha.

(11)

Biex żgur ikun hemm trasparenza, l-Istati Membri u l-Kummissjoni għandu jkollhom skambju ta’ l-informazzjoni miksuba mis-sorveljanza tal-Komunità, kemm jista’ jkun b'mod sħiħ.

(12)

Il-ħruġ tad-dokumenti ta’ sorveljanza, filwaqt li huma soġġetti għall-kondizzjonijiet standard fil-livell tal-Komunità, għandu jaqa’ taħt ir-responsabbiltà ta’ l-awtoritajiet nazzjonali.

(13)

Huwa mixtieq li dan ir-Regolament jidħol fis-seħħ fil-jum tal-pubblikazzjoni tiegħu sabiex tinġabar id-data kemm jista’ jkun malajr,