Wara li kkunsidrat it-Trattat li jistabbilixxi l-Komunità Ewropea,

Artikolu 1

Il-grupp ta’ esperti mhux governattivi dwar it-tmexxija tal-kumpaniji u l-liġi tal-kumpaniji fil-komunità (minnhawn ‘il quddiem imsejjaħ il-“Grupp”) hu stabbilit.

Artikolu 2

Ir-rwol ta’ dan il-Grupp għandu jkun li jipprovdi konsultazzjoni teknika lill-Kummissjoni dwar l-inizjattivi tal-Kummissjoni fil-qasam tat-tmexxija tal-kumpaniji u l-liġi tal-kumpaniji fuq talba tal-Kummissjoni. Il-President tal-Grupp jista’ jissuġġerixxi li l-Kummissjoni tikkonsulta l-Grupp fuq kwalunkwe suġġett relatat.

Artikolu 3

Il-Grupp għandu jikkonsisti f’massimu ta’ 20 membru, mill-komunitajiet tan-negozju u ta’ l-akkademika jew is-soċjetà ċivili, li l-esperjenza u l-kompetenza tagħhom fir-rigward tat-tmexxija tal-kumpaniji u kwistjonjiet ta’ liġi tal-kumpaniji huma rikonoxxuti sew fil-livell tal-Komunità. Il-membri tal-Grupp għandhom jinħatru mill-Kummissjoni. Il-ħatra għandha tkun fil-kapaċità personali tagħhom. Membri tal-Grupp għandhom jipprovdu konsulenza lill-Kummissjoni indipendentament minn kwalunkwe struzzjoni li ġejja minn barra.

Il-lista tal-membri hi riprodotta fl-anness.

Artikolu 4

Il-mandat tal-membri tal-Grupp għandu jkun ta' tliet snin. Dan ikun jista’ jiġġedded. Wara l-iskadenza ta’ perjodu ta’ tliet snin, il-membri tal-Grupp għandhom jibqgħu fil-ħatra sakemm jiġu mibdula jew il-kariga tagħhom tiġi mġedda. Fl-eventwalità ta’ riżenja jew mewt tal-membri tal-Grupp matul il-perijodu tal-ħatra il-Kummissjoni għandha taħtar membru ġdid tal-Grupp b’mod konformi ma’ Artikolu 3.

Artikolu 5

Il-lista tal-membri għandha tkun ippubblikata mill-Kummisjoni fil-Ġurnal Uffiċjali ta’ l-Unjoni Ewropea.

Artikolu 6

Il-Grupp għandu jkun ippresedut minn rappreżentant tal-Kummissjoni.

Il-Grupp, fi ftehim mal-Kummissjoni, jista’ jistabbilixxi gruppi ta’ ħidma biex jistudjaw suġġetti speċifiċi fuq il-bażi tal-mandat. Il-gruppi ta' ħidma għandhom ikunu xolti jekk il-mandati tagħhom jitwettqu.

Il-Kummissjoni tista’ tistieden esperti u osservaturi b’għerf speċifiku biex jipparteċipaw fix-xogħol tal-Grupp u/jew tal-gruppi ta’ ħidma.

Artikolu 7

Il-Grupp u l-gruppi ta’ ħidma għandhom normalment jiltaqgħu fil-kwartieri tal-Kummissjoni, fil-forma u skond l-iskeda determinata mill-Kummissjoni.

Il-Grupp għandu jadotta r-regoli tal-proċedura fuq il-bażi ta’ abbozz ippreżentat mill-Kummissjoni.

Is-Segretarjat tal-Grupp għandu jkun ipprovdut mill-Kummissjoni. Membri ta’ l-istaff interessati mill-Kummissjoni jistgħu jkunu preżenti għal-laqgħat tal-Grupp u l-gruppi ta' ħidma u jistgħu jieħdu parti fid-dibattiti.

Il-Kummissjoni tista’ tippubblika fuq l-Internet, fil-lingwa oriġinali tad-dokument konċernat, kwalunkwe konklużjoni, taqsira, konklużjoni mhux kompleta u karta ta’ ħidma li għandha x’taqsam mal-Gruppp jew il-gruppi ta’ ħidma tiegħu.

Artikolu 8

Spejjeż ta’ vjaġġar u manteniment li jsiru mill-membri, osservaturi u esperti, flimkien ma’ l-attivitajiet tal-Grupp, għandhom ikunu mħallsa lura mill-Kummissjoni b’mod konformi mad-dispożizzjonijiet fis-seħħ fil-Kummissjoni. Il-funzjonijiet tagħhom m’għandhomx ikunu mħallsa.

Artikolu 9

Din id-deċiżjoni għandha tapplika sas-27 ta’ April 2008.