Ir-Regolament tal-Kunsill (KE) Nru 154/2004

tas-26 ta' Jannar 2004

dwar il-konklużjoni ta' Ftehim fil-forma ta' Skambju ta' Ittri relattiv għall-proroga tal-Protokoll li jistabbilixxi l-opportunitajiet għas-sajd u l-kontribuzzjoni finanzjarja previsti fil-Ftehim bejn il-Komunità Ekonomika Ewropea u r-Repubblika tal-Côte d'Ivoire fuq sajd 'il barra mill-kosta tal-Côte d'Ivoire matul il-perjodu mill-1 ta' Lulju 2003 sat-30 ta' Ġunju 2004

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 37 flimkien ma' l-Artikolu 300(2) u l-ewwel ta' l-Artikolu 300(3) ta' dan,

Wara li kkunsidra l-proposta tal-Kummissjoni,

Wara li kkunsidra l-opinjoni tal-Parlament Ewropew [1],

Billi:

(1) Skond il-Ftehim bejn il-Komunità Ekonomika Ewropea u r-Repubblika tal-Côte d'Ivoire fuq is-sajd 'il barra mill-kosta tal-Côte d'Ivoire [2], qabel jiskadi l-perjodu ta' validità tal-Protokoll anness mal-Ftehim, il-partijiet kontraenti għandhom jinnegozjaw sabiex jiftehmu l-kontenut tal-Protokoll għall-perjodu li ġej u kwalunkwe tibdil jew żieda li għandu jsir fl-Anness.

(2) Sakemm isiru n-negozjati fuq it-tibdil li għandu jsir fil-Protokoll eżistenti approvati mir-Regolament (KE) Nru 722/2001 [3], iż-żewġ partijiet iddeċidew jestendu l-validità tiegħu għal sena permezz ta' Ftehim fil-forma ta' Skambjar ta' Ittri.

(3) Huwa fl-interess tal-Komunità li tali estensjoni tiġi approvata.

(4) L-allokazzjoni ta' opportunitajiet għas-sajd lill-Istati Membri għandhom jiġu kkonfermati,

KIEN ADOTTA DAN IR-REGOLAMENT:

Artikolu 1

Huwa approvat, f'isem il-Komunità Ewropea, il-Ftehim fil-forma ta' Skambjar ta' Ittri relattiv għall-proroga tal-Protokoll li jistabbilixxi l-opportunitajiet għas-sajd u l-kontribuzzjoni finanzjarja previsti fil-Ftehim bejn il-Komunità Ekonomika Ewropea u r-Repubblika tal-Côte d'Ivoire fuq sajd 'il barra mill-kosta tal-Côte d'Ivoire matul il-perjodu mill-1 ta' Lulju 2003 sat-30 ta' Ġunju 2004.

It-test tal-Ftehim fil-forma ta' Skambjar ta' Ittri huwa anness ma' dan ir-Regolament [4].

Artikolu 2

L-opportunitajiet għas-sajd imniżżla fil-Protokoll għandhom jiġu allokati lill-Istati Membri kif ġej:

(a) sajd tal-qiegħ:

Spanja: 600 GRT kull xahar (medja fis-sena);

(b) sajd tat-tonn:

(i) xbieki biex jinqabad it-tonn

- Franza: 18-il bastiment,

- Spanja: 21 bastiment;

(ii) bastimenti tal-wiċċ

- Spanja: 15-il bastiment,

- Portugall: 5 bastimenti;

(iii) bastimenti tat-tonn bl-arblu u bil-kannen

- Franza: 7 bastimenti,

- Spanja: 5 bastiment.

Jekk l-applikazzjonijiet minn dawn l-Istati Membri ma jispurgawx l-opportunitajiet għas-sajd imniżżla fil-Protokoll, il-Kummissjoni tista' tikkunsidra applikazzjonijiet għal liċenzi minn kwalunkwe Stat Membru ieħor.

Artikolu 3

L-Istati Membri li għandhom bastimenti jistgħadu skond il-Ftehim fil-forma ta' Skambjar ta' Ittri għandhom jgħarrfu lill-Kummissjoni, bil-mod speċifikat mir-Regolament tal-Kummissjoni (KE) Nru 500/2001 [5], tal-kwantitajiet ta' kull ħażna meħud fiż-żona tas-sajd tal-Côte d'Ivoire.

Artikolu 4

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali ta' l-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fis-26 ta' Jannar 2004.

F'isem il-Kunsill

Il-President

B. Cowen

[1] Opinjoni mogħtija fit-18 ta' Diċembru 2003 (għadha mhix ippubblikata fil-Ġurnal Uffiċjali).

[2] ĠU L 379, 31.12.90, pġ. 3.

[3] ĠU L 102, 12.04.01, pġ. 1.

[4] ĠU L 319, 04.12.03, pġ. 19.

[5] ĠU L 73, 15.03.01, pġ. 8.

--------------------------------------------------