(1)

Hekk kif il-preżenza tal-marda ta' l-ilsien u d-dwiefer ġiet ikkonfermata uffiċjalment fl-2001, l-Olanda rrapportat li kienet immedjatament implimentat il-miżuri ta' kontroll li għandhom jiġu applikati fil-każ ta' tfaqqigħ tal-marda kif ipprovdut fid-Direttiva 85/511/KEE tat-18 ta' Novembru 1985 li introduċiet miżuri tal-Komunità għall-kontroll tal-marda ta' l-ilsien u d-dwiefer (2), kif meħtieġ biex wieħed jikseb kontribut finanzjarju mill-Komunità għall-qerda tal-marda skond id-Deċiżjoni 90/424/KEE.

(2)

Skond id-Deċiżjoni tal-Kummissjoni 2001/652/KE (3) tas-16 ta' Awwissu 2001, ingħata kontribut finanzjarju mill-Komunità bħala kumpens lis-sidien għall-valur ta' l-annimali li kellhom jinqatlu b'mod obbligatorju skond il-miżuri ta' qerda relatati mat-tfaqqigħ tal-marda ta' l-ilsien u d-dwiefer fl-2001

(3)

Kontribut finanzjarju mill-Komunità ngħata wkoll għall-ispejjeż operazzjonali tal-qerda tal-marda ta' l-ilsien u d-dwiefer fl-Olanda fl-2001 skond id-Deċiżjoni tal-Kummissjoni 2003/182/KE ta' l-14 ta' Marzu 2003 (4).

(4)

Skond l-Artikolu 2(1) tad-Deċiżjoni tal-Kummissjoni 2001/246/KE tas-27 ta' Marzu 2001 li tistipula l-kondizzjonijiet tal-kontroll u l-qerda tal-marda ta' l-ilsien u d-dwiefer fl-Olanda fl-applikazzjoni ta' l-Artikolu 13 tad-Direttiva 85/511/KEE (5), l-Olanda ġiet awtorizzata tiddeċiedi jekk għandhiex tirrikorri għat-tilqim li jrażżan skond il-kondizzjonijiet speċifikati fl-Anness għal dik id-Deċiżjoni.

(5)

Skond l-Artikolu 1(2) tad-Deċiżjoni tal-Kummissjoni 2001/279/KE tal-5 ta' April 2001 li temenda d-Deċiżjoni 2001/246/KE (6), l-Olanda ġiet awtorizzata wkoll tiddeċiedi jekk għandhiex tirrikorri għat-tilqim protettiv skond il-kondizzjonijiet speċifikati fl-Annessi għal dik id-Deċiżjoni.

(6)

It-tilqim ta' l-annimali għandu jitqies bħala strument addizzjonali u essenzjali biex jiġi evitat it-tixrid tal-marda ta' l-ilsien u d-dwiefer u biex din tiġi kkontrollata u meqruda.

(7)

B'hekk huwa xieraq li l-UE tikkontribwixxi għall-ispejjeż li l-Olanda kellha tagħmel fit-twettiq ta' din l-operazzjoni.

(8)

Fil-21 ta' Marzu 2003, l-Olanda ppreżentat talba għal kumpens għall-ispejjeż operazzjonali tal-qerda tal-marda ta' l-ilsien u d-dwiefer; hija inkludiet ukoll l-ispejjeż għat-tilqim ta' l-annimali.

(9)

Skond l-informazzjoni pprovduta mill-Olanda ntużaw 380,150 tilqima, ix-xiri u r-riformulazzjoni tagħhom swew 0.39 euro kull doża, l-ammont eliġibbli għall-personal impjegat speċifikament għal dan huwa 608,826 euro, u l-ispejjeż eliġibbli għall-oġġetti konsumibbli użati speċifikament għal dan huma 513,726 euro.

(10)

Ir-rapporti u t-talbiet għal kumpens ippreżentati mill-Olanda juru li t-tilqim twettaq b'mod effiċjenti.

(11)

Konformi mad-Deċiżjoni 90/424/KEE, il-kontribut finanzjarju lejn din l-operazzjoni huwa 60 % ta' l-ispejjeż eliġibbli. Il-kontribut ta' l-UE lejn it-tilqim kontra l-marda ta' l-ilsien u d-dwiefer għandu b'hekk jiġi ffissat għal 762.487 euro.

(12)

Konformi ma' l-Artikolu 3 (2) tar-Regolamenti tal-Kunsill (KE) Nru 1258/1999 tas-17 ta' Mejju 1999 dwar il-finanzjament tal-politika agrikola komuni (7), miżuri veterinarji u tas-saħħa tal-pjanti li ttieħdu skond ir-regoli tal-Komunità għandhom jiġu ffinanzjati taħt is-Sezzjoni ta' Garanzija tal-Fond Agrikolu Ewropew għal Gwida u Garanzija; għal raġunijiet ta' kontroll finanzjarju, l-Artikoli 8 u 9 tar-Regolament (KE) Nru 1258/1999 għandhom japplikaw.

(13)

Il-miżuri pprovduti f'din id-Deċiżjoni jaqblu ma' l-opinjoni tal-Kumitat Permanenti għall-Katina Alimentari u s-Saħħa ta' l-Annimali,