Id-Deċiżjoni tal-Kunsill

tas-26 ta' April 2004

li temenda l-Artikoli 51 u 54 tal-Protokoll dwar l-Istatut tal-Qorti tal-Ġustizzja

(2004/407/KE, Euratom)

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunit à Ewropea, u b'mod partikolari t-tieni paragrafu ta' l-Artikolu 245 tiegħu,

Wara li kkunsidra t-Trattat li jistabbilixxi l-Komunit_ Ewropea dwar l-Enerġija Atomika, u b'mod partikolari it-tieni paragrafu ta' l-Artikolu 160 tiegħu,

Wara li kkunsidra t-talba tal-Qorti tal-Ġustizzja tat-12 ta' Frar 2003,

Wara li kkunsidra l-opinjoni tal-Parlament Ewropew ta' l-10 ta' Frar 2004,

Wara li kkunsidra l-opinjoni tal-Kummissjoni ta' l-10 ta' Novembru 2003,

Billi:

(1) Il-Punt (31) ta' l-Artikolu 2 tat-Trattat ta' Nizza jibdel l-Artikolu 225 tat-Trattat tal-KE b'dispożizzjoni ġdida li l-ewwel subparagrafu tagħha jgħid: "Il-Qorti ta' Prima Istanza għandu jkollha l-ġurisdizzjoni li tisma' u tiddeċiedi fl-ewwel istanza azzjonijiet jew proċedimenti msemmija fl-Artikoli 230, 232, 235, 236 u 238, ħlief dawk li jkunu assenjati lil xi awla ġurisdizzjonali u dawk riservati fl-Istatut tal-Qorti tal-Ġustizzja. L-Istatut jista' jiddisponi biex il-Qorti ta' Prima Istanza jkollha ġurisdizzjoni għal klassijiet oħra ta' azzjoni jew proċediment.".

(2) L-Artikolu 3(13) tat-Trattat ta' Nizza kien għamel emenda bħal din għat-Trattat tal-KEEA.

(3) Dik l-emenda ittieħdet f'konsiderazzjoni fl-abbozz provviżorju ta' l-Artikolu 51 tal-Protokoll dwar l-Istatut tal-Qorti tal-Ġustizzja li jgħid: "Bħala eċċezzjoni għar-regola stabbilita fl-Artikolu 225(1) tat-Trattat tal-KE u l-Artikolu 140(a)(1) tat-Trattat tal-KEEA, il-Qorti tal-Ġustizzja għandu jkollha ġurisdizzjoni f'azzjonijiet imressqa mill-Istati Membri, l-istituzzjonijiet tal-Komunitajiet u l-Bank Ċentrali Ewropew.".

(4) Skond il-kliem u l-iskema ġenerali ta' l-Artikolu l-ġdid 225 tat-Trattat tal-KE u ta' l-Artikolu ġdid 140(a) tat-Trattat tal-KEEA, hu meħtieġ li jerġa' jsir abbozz mill-ġdid ta' l-Artikolu 51 tal-Protokoll dwar l-Istatut tal-Qorti tal-Ġustizzja biex jiġu stabbiliti l-ġurisdizzjonijiet tal-Qorti tal-Ġustizzja u l-Qorti ta' Prima Istanza, la t-trasferiment ta' ġurisdizzjoni fl-ewwel istanza għall-Qorti ta' Prima Istanza irid ikun sinifikanti u l-kriterji dwar l-allokazzjoni ta' ġurisdizzjoni għandhom ikunu ċari biżżejjed biex ikunu mifhuma bla ebda ekwivoku mill-istituzzjonijiet u l-Istati Membri.

(5) Azzjonijiet imressqa mill-Istati Membri kontra atti tal-Kunsill li bihom jeżerċita s-setgħat ta' implimentazzjoni skond ir-regoli msemmija fit-tielet inċiż ta' l-Artikolu 202 tat-Trattat tal-KE għandhom jaqgħu fil-ġurisdizzjoni tal-Qorti ta' Prima Istanza. Dawn ikunu każi meta l-Kunsill ikun jew irriserva d-dritt li jeżerċita s-setgħat ta' implimentazzjoni jew ikun ħa lura d-dritt li jeżerċita dawn is-setgħat matul "proċedura ta' kumitat".

(6) Id-dispożizzjonijiet ta' l-Artikolu 54 tal-Protokoll dwar l-Istatut tal-Qorti tal-Ġustizzja dwar iċ-ċirkostanzi li fihom il-Qorti ta' Prima Istanza tista' ma taċċettax ġurisdizzjoni favur il-Qorti tal-Ġustizzja għandhom jiġu emendati biex ikun hemm qbil mas-setgħat ġodda tal-Qorti ta' Prima Istanza. Hemm bżonn li jkun permess li ġurisdizzjoni ma tiġix aċċettata meta f'każi relatati li jitressqu quddiem il-Qorti tal-Ġustizzja u l-Qorti ta' Prima Istanza ir-riżultat ta' xi wieħed minnhom ikun jiddependi minn dak ta' l-ieħor,

IDDEĊIEDA DAN LI ĠEJ:

Artikolu 1

1. L-Artikolu 51 tal-Protokoll dwar l-Istatut tal-Qorti tal-Ġustizzja għandu jinbidel b'dan li ġej:

"L-Artikolu 51

B'deroga mir-regola stabbilita fl-Artikolu 225(1) tat-Trattat tal-KE u l-Artikolu 140(a) tat-Trattat dwar il-KEEA, ġurisdizzjoni għandha tkun riservata għall-Qorti tal-Ġustizzja fl-azzjonijiet imsemmija fl-Artikoli 230 u 232 tat-Trattat tal-KE u l-Artikoli 146 u 148 tat-Trattat tal-KEEA meta jitressqu minn Stat Membru kontra:

(a) xi azzjoni jew nuqqas ta' azzjoni mill-Parlament Ewropew jew il-Kunsill, jew minn dawk iż-żewġ istituzzjonijiet f'azzjoni konġunta, ħlief għal:

- deċiżjonijiet meħuda mill-Kunsill skond it-tielet subparagrafu ta' l-Artikolu 88(2) tat-Trattat tal-KE;

- azzjonijiet tal-Kunsill adottati skond xi regolament tal-Kunsill dwar miżuri biex iħarsu l-kummerċ fis-sens ta' l-Artikolu 133 tat-Trattat tal-KE;

- azzjonijiet tal-Kunsill li permezz tagħhom il-Kunsill jeżerċita s-setgħat ta' implimentazzjoni skond it-tielet inċiż ta' l-Artikolu 202 tat-Trattat tal-KE;

(b) kontra xi azzjoni jew nuqqas ta' azzjoni tal-Kummissjoni skond l-Artikolu 11a tat-Trattat tal-KE.

Ġurisdizzjoni għandha tkun ukoll riservata għall-Qorti tal-Ġustizzja fl-azzjonijiet imsemmija fl-istess Artikoli meta dawn jitressqu minn xi istituzzjoni tal-Komunitajiet jew mill-Bank Ċentrali Ewropew kontra xi azzjoni jew nuqqas ta' azzjoni mill-Parlament Ewropew, mill-Kunsill, minn dawk iż-żewġ istituzzjonijiet f'azzjoni konġunta, jew mill-Kummissjoni, jew jitressqu minn xi istituzzjoni tal-Komunitajiet kontra xi azzjoni jew nuqqas ta' azzjoni mill-Bank Ċentrali Ewropew."

2. It-tielet paragrafu ta' l-Artikolu 54 tal-Protokoll dwar l-Istatut tal-Qorti tal-Ġustizzja għandu jinbidel b'dan li ġej:

"Meta l-Qorti tal-Ġustizzja u l-Qorti ta' Prima Istanzajittiħdulhom minn idejhom każi fejn tkun qed tintalab l-istess tiswija ta' ġustizzja, fejn tinqala' l-istess kwistjoni ta' interpretazzjoni jew jinqalgħu dubji dwar il-validit_ ta' l-istess azzjoni, il-Qorti ta' Prima Istanza tista', wara li tkun semgħat il-partijiet, twaqqaf il-proċedimenti sakemm il-Qorti tal-Ġustizzja tkun tat sentenza. Fl-istess ċirkostanzi, il-Qorti tal-Ġustizzja tista' wkoll tiddeċiedi li twaqqaf il-proċedimenti li jkun hemm quddiemha; f'dak il-każ il-proċedimenti ta' quddiem il-Qorti ta' Prima Istanza għandhom jitkomplew."

3. il-paragrafu l-ġdid li ġej għandu jiżdied ma' l-Artikolu 54 tal-Protokoll dwar l-Istatut tal-Qorti tal-Ġustizzja:

"Meta Stat Membru u istituzzjoni tal-Komunitajiet ikunu jirrikużaw l-istess azzjoni, il-Qorti ta' Prima Istanza m'għandhiex taċċetta ġurisdizzjoni biex hekk il-Qorti tal-Ġustizzja tkun tista' tiddeċiedi dwar dawk l-applikazzjonijiet."

Artikolu 2

Każi li jaqgħu fil-ġurisdizzjoni tal-Qorti ta' Prima Istanza bis-saħħa ta' din id-deċiżjoni u li jkunu tressqu quddiem il-Qorti tal-Ġustizzja sad-data li fiha din id-deċiżjoni tkun daħlet fis-seħħ;

imma

(a) li fihom il-proċedimenti jkunu twaqqfu f'dik id-data skond l-aħħar sentenza tat-tielet paragrafu ta' l-Artikolu 54 tal-Protokoll dwar l-Istatut tal-Qorti tal-Ġustizzja;

jew

(b) li fihom il-proċedimenti sa dik id-data ma jkunux waslu sa l-għeluq tal-proċedura miktuba kif imfisser fl-Artikolu 44 tar-Regoli ta' Proċeduri tal-Qorti tal-Ġustizzja

għandhom jiġu referiti lill-Qorti ta' Prima Istanza.

Artikolu 3

Din id-Deċiżjoni għandha tidħol fis-seħħ fl-ewwel jum tat-tieni xahar wara dak tal-pubblikazzjoni tagħha fil-Ġurnal Uffiċjali ta' l-Unjoni Ewropea.

Magħmul fil-Lussemburgu, fis-26 ta' April 2004.

F'isem il-Kunsill

Il-President

B. Cowen

--------------------------------------------------