Official Journal L 174 , 04/07/2002 P. 0011 - 0013
Ir-Regolament tal-Kummissjoni (KE) Nru 1195/2002 tat-3 ta’ Lulju 2002 li jippreskrivi regoli dettaljati sabiex ikunu applikati l-miżuri speċifiċi dwar l-importazzjoni tat-tabakk fil- Gżejjer Kanari, li jħassar ir-Regolament (KEE) Nru 2179/92 u li jadatta r-Regolament tal-Kunsill (KE) Nru 1454/2001 dwar il-kodiċijiet tan-Nomenklatura Magħquda IL-KUMMISSJONI TAL-KOMUNITAJIET EWROPEJ, Wara li kkunsidrat it-Trattat li jistabbilixxi l-Komunità Ewropea, Wara li kkunsidrat ir-Regolament tal-Kunsill (KE) Nru 1454/2001 tat-28 ta’ Ġunju 2001 li jintroduċi miżuri speċifiċi għal xi prodotti agrikoli għall-Gżejjer Kanari u jħassar ir-Regolament (KEE) Nru 1601/92 (Poseican) [1], u b’mod partikolari l-Artikolu 16(2) tiegħu, Wara li kkunsidrat ir-Regolament tal-Kunsill (KEE) Nru 234/79 tal-5 ta’ Frar 1979 dwar il-proċedura biex tkun aġġustata t-Tariffa Doganali Komuni użata għal prodotti agrikoli [2], kif l-aħħar emendat bir-Regolament (KE) Nru 3290/94 [3], u b’mod partikolari l-Artikolu 2(1) tiegħu, Billi: (1) L-Artikolu 16 tar- Regolament (KE) Nru 1454/2001 jiddisponi għal eżenzjoni minn dazji għal importazzjonijiet diretti ġol-Gżejjer Kanari ta’ kwantità ta’ 20,000 tunnellata metrika ta’ tabakk mhux maħdum jew semi-manifatturat maħsub għall-produzzjoni lokali ta’ prodotti tat-tabakk. (2) Biex jintlaħaq l-għan li dan l-arranġament ikun imħaddem, il-perjodu annwali għandu jkun definit sabiex tkun ikkalkolata l-kwantità massima msemmija fl-Artikolu 16 tar-Regolament (KE) Nru 1454/2001 u t-terminu "produzzjoni lokali ta’ prodotti tat-tabakk" għandu jkun definit. Barra minn hekk, sabiex tkun żgurata flessibilità massima għal importazzjonijiet ta’ prodotti tat-tabakk magħmula fil-Gżejjer Kanari, għandu jkun permess li l-kwantità ġenerali ta’ tabakk mhux raffinat bla zkuk tintuża għal importazzjoni ta’ prodotti oħra, fuq il-bażi ta’ ko-effiċjenti ta’ekwivalenza, fid-dawl tar-rekwiżiti ta’ l-industrija lokali. (3) Biex jintlaħaq l-għan li dan l-arranġament ikun imħaddem, fl-interess tas-sempliċità u l-uniformità amministrattiva, ir-Regolament tal-Kummissjoni (KE) Nru 20/2002 tat-28 ta’ Diċembru 2001 li jippreskrivi regoli dettaljati għall-implimentazzjoni ta’ arranġamenti speċifiċi ta’ provvista għar-reġjuni l-aktar imbegħda introdotti bir-Regolament tal-Kunsill (KE) Nru 1452/2001 [4], kif emendat bir-Regolament (KE) Nru 474/2002 [5], għandu jkun applikat kull fejn possibbli. (4) Fl-interess taċ-ċarezza legali, ir-Regolament tal-Kummissjoni (KEE) Nru 2179/92 tat-30 ta’ Lulju 1992 li jippreskrivi regoli dettaljati għall-applikazzjoni tal-miżuri speċifiċi ta’ importazzjoni ġol-Gżejjer Kanari fejn għandu x’jaqsam it-tabakk [6] għandu jitħassar. (5) Ir-Regolament (KEE) Nru 2179/92 jiddisponi li l-kwota annwali ta’ 20,000 tunnellata għandha tkun amministrata fuq il-bażi ta’ perjodu mill-1 ta’ Lulju ta’ sena speċifika sat-30 ta’ Ġunju tas-sena ta’ wara. Sabiex dan ikun armonizzat ma’ l-arranġamenti speċifiċi ta’ provvista, il-perjodu biex tkun imħaddma l-iskema għandu jkun emendat u l-kwantità għandha tkun disponibbli fuq bażi ta’ sena kalendarja. Għall-finijiet li tkun applikata l-iskema matul il-perjodu transitorju mill-1 ta’ Lulju sal-31 ta’ Diċembru 2002, il-kwantità massima disponibbli msemmija fl-Artikolu 16 tar-Regolament (KE) Nru 1454/2001 għandha tkun 10,000 tunnellata. (6) Il-kodiċi NM għall-fdal tas-sigaretti ġie emendat. L-Artikolu 16 tar-Regolament (KE) Nru 1451/2001 għandu jkun emendat skond dan. (7) Il-miżuri previsti f’dan ir-Regolament huma skond l-opinjoni tal-Kumitat ta’ Ġestjoni dwar it-Tabakk, ADOTTAT DAN IR-REGOLAMENT: L-Artikolu 1 Dan ir-Regolament jippreskrivi regoli dettaljati għall-importazzjoni tat-tabakk fil-Gżejjer Kanari skond l-Artikolu 16 tar-Regolament (KE) Nru 1454/2001. L-Artikolu 2 Sabiex ikun applikat dan ir-Regolament: - il-perjodu annwali sabiex tkun kalkolata l-kwantità massima annwali għandu jkun mill-1 ta’ Jannar ta’ kull sena sal-31 ta’ Diċembru ta’ l-istess sena, - "produzzjoni lokali ta’ prodotti tat-tabakk" tfisser kull ħidma magħmula fil-Gżejjer Kanari biex ikunu proċessati l-prodotti elenkati fl-Anness ta’ dan ir-Regolament fi prodotti manifatturati lesti għat-tipjip, - il-kwantitajiet ta’ tabakk mhux maħdum jew semi-manifatturat għandhom ikunu konvertiti fi kwantitajiet ta’ tabakk mhux maħdum bla zkuk fuq il-bażi tal-ko-effiċjenti ta’ l-ekwivalenza mogħtija fl-Anness ta’ dan. L-Artikolu 3 L-importazzjoni ta’ prodotti elenkati fl-Anness ta’ dan minn issa ‘il quddiem għandhom ikunu suġġetti għal preżentazzjoni ta’ ċertifikat ta’eżenzjoni. Is-Sezzjoni 20 ta’ l-applikazzjonijiet għal-ċertifikati u ċertifikati għandu jkun fihom il-kliem: "prodott maħsub għal industriji li jimmanifatturaw prodotti tat-tabakk". Barra meta previst mod ieħor f’dan ir-Regolament, l-Artikoli 2, 5, 9, 10, 11, 12, 13, 15, 25 u 26 tar-Regolament (KE) Nru 20/2002 għandhom japplikaw mutatis mutandis. L-awtoritajiet kompetenti għandhom jiżguraw li l-prodotti koperti minn dan ir-Regolament jintużaw f’konformità mar-regoli rilevanti tal-Komunità, b’mod partikolari l-Artikoli 291 sa 300 tar-Regolament tal-Kummissjoni (KEE) Nru 2454/93 tat-2 ta’ Lulju 1993 li jippreskrivi disposizzjonijiet dwar l-implimentazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali tal-Komunità [7], kif l-aħħar emendat bir-Regolament (KE) Nru 444/2002 [8]. L-Artikolu 4 Ir-Regolament (KEE) Nru 2179/92 jitħassar. L-Artikolu 5 Għall-perjodu mill-1 ta’ Lulju sal-31 ta’ Diċembru 2002, il-kwantità massima ta’ tabakk mhux maħdum bla zkuk ekwivalenti eżentant minn dazji skond l-Artikolu 16 tar-Regolament (KE) Nru 1454/2001 għandha tkun 10,000 tunnellata metrika. L-Artikolu 6 Fis-seba’ inċiż ta’ l-Artikolu 16(1) tar-Regolament (KE) Nru 1454/2001 il-kodiċi "ex24031000" huwa sostitwit bil-kodiċi "ex24031090". L-Artikolu 7 Dan ir-Regolament għandu jidħol fis-seħħ fil-jum tal-pubblikazzjoni tiegħu fil-Ġurnal Uffiċjali tal-Komunitajiet Ewropej. Għandu japplika mill-1 ta’ Lulju 2002. Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmul fi Brussel, fit-3 ta’ Lulju 2002. Għall-Kummissjoni Franz Fischler Membru tal-Kummissjoni [1] ĠU L 198, tal-21.7.2001, p. 45. [2] ĠU L 34, tad-9.2.1979, p. 2. [3] ĠU L 349, tal-31.12.1994, p. 105. [4] ĠU L 8, tal-11.1.2002, p. 1. [5] ĠU L 75, tas-16.3.2002, p. 25. [6] ĠU L 217, tal-31.7.1992, p. 79. [7] ĠU L 253, tal-11.10.1993, p. 1. [8] ĠU L 68, tat-12.3.2002, p. 11. -------------------------------------------------- L-ANNESS Ko-effiċjenti ta’ ekwivalenza għal prodotti eżentati minn dazji doganali għal importazzjonijiet diretti fil-Gżejjer Kanari Kodiċi NM | Deskrizzjoni | Ko-effiċjenti ta’ ekwivalenza | 24013000 | Skart tat-tabakk | 0,28 | 240110 | Tabakk, bla zkuk/strixxi | 0,72 | 240120 | Strixxi ta’ tabakk | 1,00 | ex24021000 | Sigarri mhux lesti mingħajr tgeżwir | 1,05 | ex24031090 | Fdal tas-sigarretti (taħlitiet lesti ta’ tabakk għall-produzzjoni ta’ sigaretti, sigarri, cheroots u sigarri żgħar) | 1,05 | ex24039100 | Tabakk omoġenizzat jew rikostitwit | 1,05 | ex24039990 | Tabakk li espanda | 1,05 | --------------------------------------------------