Id-Deċiżjoni tal-Kumissjoni

tas-7 ta' Novembru ta' l-2002

li temenda d-Direttiva tal-Kunsill 94/55/KE fir-rigward ta' limiti ta' żmien li fihom it-tnabar ta' pressjoni, xkafef ċilindriċi u tankijiet għat-trasport ta' merkanzija perikoluża bit-triq għandhom jikkonformaw magħha

(in notifikata fid-dokument numru C(2002) 4344)

(Test b'rilevanza għaż-ŻEE)

(2002/886/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 94/55/KE tal-21 ta' Novembru 1994 dwar l-approssimazzjoni tal-liġijiet ta' l-Istati Membri fir-rigward tat-trasport tal-merkanzija perikoluża bit-triq [1], kif l-aħħar emendat bid-Direttiva tal-Kummissjoni 2001/7/KE [2], u b'mod partikolari l-Artikolu 6(4) tat-tielet subparagrafu tiegħu,

Billi:

(1) L-istandards Ewropej li jistabbilixxu l-ispeċifikazzjonijiet tekniċi ddettaljati li jirrelataw għall-kostruzzjoni, l-użu u l-kondizzjonijiet ta' trasport ta' tnabar ta' pressjoni, xkafef ċilindriċi u tankijiet għat-trasport ta' merkanzija perikoluża bit-triq ma ġewx miżjuda ma' l-Annessi A u B tad-Direttiva 94/55/KE, billi l-istandardizzazzjoni tas-CEN fuqhom għad mhijiex kompleta.

(2) Huwa għalhekk neċessarju li l-limiti ta' żmien, iffissati fl-Artikolu 6(4) tad-Direttiva 94/55/KE, li permezz tiegħu dawn it-tnabar ta' pressjoni, xkafef ċilindriċi u tankijiet għandhom jikkonformaw mad-Direttiva 94/55/KE, jiġu ddiferiti.

(3) Id-Direttiva 94/55/KE għandha għalhekk tiġi emendata kif meħtieġ.

(4) Sabiex tiġi evitata kull inċertezza legali din id-deċiżjoni għandha tapplika mill-1 ta' Lulju 2001,

ADOTTAT DIN ID-DEĊIŻJONI:

Artikolu 1

L-ewwel subparagrafu ta' l-Artikolu 6(4) tad-Direttiva 94/55/KE għandu jiġi ssostitwit b'li ġej:

"Kull Stat Membru jista jżomm id-disposizzjonijiet nazzjonali tiegħu fis-seħħ fil-31 ta' Diċembru 1996 li jirrelataw għall-kostruzzjoni, l-użu u l-kondizzjonijiet ta' trasport ta' tnabar ġodda ta' pressjoni u xkafef ċilindriċi fis-sens tad-disposizzjoni speċjali msemmija fil-paragrafu 4 ta' l-Anness Ċ u tankijiet ġodda li ma jikkonformawx ma' l-Annessi A u B, sakemm referenzi għall-istandards għall-kostruzzjoni u l-użu ta' tankijiet, tnabar ta' pressjoni u xkafef ċilindriċi bl-istess forza li torbot daqs id-disposizzjonijiet ta' din id-Direttiva huma miżjuda ma' l-Annessi A u B u f'kull każ sa mhux iktar tard mit-30 ta' Ġunju ta' l-2003. Tnabar tal-pressjoni, xkafef ċilindriċi u tankijiet mibnija qabel l-1 ta' Lulju ta' l-2003 u kontenituri oħrajn mibnija qabel l-1 ta' Lulju 2001 u miżmuma għall-livelli ta' sigurtà meħtieġa jistgħu jibqgħu jintużaw taħt il-kondizzjonijiet oriġinali."

Artikolu 2

Din id-Deċiżjoni għandha tapplika mill-1 ta' Lulju 2001.

Artikolu 3

Din id-Deċiżjoni hija indirizzata lill-Istati Membri.

Magħmul fi Brussel, is-7 ta' Novembru ta' l-2002.

Għall-Kumissjoni

Loyola De Palacio

Viċi-President

[1] ĠU L 319, tat-12.12.1994, p. 7.

[2] ĠU L 30, ta' l-1.2.2001, p. 43.

--------------------------------------------------