Ir-Regolament tal-Kummissjoni (KE) Nru 2430/2001

tat-12 ta' Diċembru 2001

li jissupplementa l-Anness tar-Regolament (KE) Nru 2301/97 dwar id-dħul ta' ċerti ismijiet fir-Reġistru ta' ċertifikati ta' karattru speċifiku li hemm provvediment dwaru fir-Regolament tal-Kunsill (KEE) Nru 2082/92 dwar iċ-ċertifikati ta' karattru speċjali għall-prodotti agrikoli u l-oġġetti ta' l-ikel

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KEE) Nru 2082/92 ta' l-14 ta' Lulju 1992 dwar ċertifikati ta' karattru speċifiku għall-prodotti agrikoli u ta' l-ikel [1], u partikolarment l-Artikolu 9(1) tiegħu,

Billi:

(1) Bi qbil ma’ l-Artikolu 7 tar-Regolament (KEE) Nru 2082/92, l-Isvezja bagħtet applikazzjoni lejn il-Kummissjoni biex l-isem "Falukorv" jiddaħħal fir-Reġistru taċ-ċertifikati ta' karattru speċifiku.

(2) Id-deskrizzjoni "speċjalità tradizzjonali garantita" tista' tintuża biss ma’ l-ismijiet imdaħħla f'dak ir-Reġistru.

(3) L-ebda oġġezzjoni permezz ta' l-Artikolu 8 ta' dak ir-Regolament ma ntbagħtet lejn il-Kummissjoni wara l-pubblikazzjoni fil-Ġurnal Uffiċjali tal-Komunitajiet Ewropej [2] dwar l-ismijiet elenkati fl-Anness ta' hawnhekk.

(4) Bħala konsegwenza, l-isem elenkat fl-Anness għandu jkun imdaħħal fir-Reġistru taċ-ċertifikati ta' karattru speċifiku u b'hekk protett bħala speċjalità tradizzjonali garantita fi ħdan il-Komunità permezz ta' l-Artikolu 13(2) tar-Regolament (KEE) Nru 2082/92.

(5) L-Anness t'hawn jissupplimenta l-Anness tar-Regolament tal-Kummissjoni (KEE) Nru 2301/97 [3], kif l-aħħar emendat bir-Regolament (KE) Nru 1482/2000 [4],

ADOTTAT DAN IR-REGOLAMENT:

L-Artikolu 1

L-isem fl-Anness t'hawn huwa miżjud ma’ l-Anness tar-Regolament (KE) Nru 2301/97 u mdaħħal fir-Reġistru ta' ċertifikati ta' karattru speċjali bi qbil ma’ l-Artikolu 9(1) tar-Regolamenti (KEE) Nru 2082/92.

Għandu jkun protett bi qbil ma’ l-Artikolu 13(2) ta' dak ir-Regolament.

L-Artikolu 2

Dan ir-Regolament għandu jidħol fis-seħħ għoxrin jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jkun jorbot fl-intier tieghu u jkun direttament applikabbli fl-Istati Membri kollha.

Magħmul fi Brussel, fit-12 ta’ Diċembru 2001.

Għall-Kummissjoni

Franz Fischler

Membru tal-Kummissjoni

[1] ĠU L 208, 24.07.92, p. 9.

[2] ĠU K 78, 10.03.01, p. 16.

[3] ĠU L 319, 21.11.97, p. 8.

[4] ĠU L 167, 07.07.00, p. 8.

--------------------------------------------------

PŘÍLOHA

Masné výrobky

- Falukorv

--------------------------------------------------