Ir-Regolament tal-Kunsill (KE) Nru 1339/2001

tat-28 ta' Ġunju tas-sena 2001

li jestendi l-effetti tar-Regolament (KE) Nru 1338/2001, li jistabbilixxi l-miżuri neċessarji għall-protezzjoni ta' l-euro mill-iffalsifikar għal dawk l-Istati Membri li m'adottawx il-euro bħala l-munita unika tagħhom

IL-KUNSILL TA' L-UNJONI EWROPEA

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 308 miġjub fih,

Wara li kkunsidra il-proposti mressqa mill-Kummissjoni [1], u

Wara li kkunsidra l-opinjoni tal-Parlament Ewropew [2];

Billi:

(1) Fil-proċess ta' l-adozzjoni tar-Regolament (KE) Nru 1338/2001 [3], il-Kunsill iddeċieda li l-Artikoli 1 sa 11 tiegħu għandhom jkollhom effett f'dawk l-Istati Membri li adottaw il-euro bħala l-munita unika tagħhom.

(2) Iżda, huwa importanti li l-euro għandu jkollu l-istess livell ta' protezzjoni f'dawk l-Istati Membri li m'adottawx, u li l-prekawzjonijiet neċessarji għandhom jittieħdu għal dak l-għan,

ADOTTAT DAN IR-REGOLAMENT:

Artikolu 1

L-applikazzjoni ta' l-Artikoli 1 sa 11 tar-Regolament (KE) Nru 1338/2001 għandha tiġi estiża għal dawk l-Istati Membri li m'adottawx il-euro bħala l-munita unika tagħhom.

Artikolu 2

Dan ir-Regolament għandu jidħol fis-seħħ fil-jum tal-pubblikazzjoni tiegħu fil-Ġurnal Uffiċjali tal-Komunitajiet Ewropej.

Għandu jidħol fis-seħħ fl-1 ta' Jannar 2002. Iżda, għandu jidħol fis-seħħ mid-data tal-publikazzjoni tiegħu, għal karti tal-flus u muniti li għadhom ma nħarġux iżda li hemm il-ħsieb li jinħarġu.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fil-Lussemburgu, it-28 ta' 2001.

Għall-Kunsill

Il-President

B. Rosengren

[1] ĠU C 337 E, tat-28.11.2000, p. 264.

[2] Opinjoni mogħtija fit-3 ta' Mejju tas-sena 2001 (għadha mhix ippubblikata fil-Ġurnal Uffiċjali).

[3] Ara paġna 6 ta' dan il-Ġurnal Uffiċjali.

--------------------------------------------------