Id-Deċiżjoni tal-Kummissjoni

tas-6 ta' Ġunju 2001

li tistabbilixxi l-Kumitat tat-Titoli Ewropej

(innotifikata permezz tad-dokument numru C(2001) 1493)

(Test b'rilevanza għaż-ŻEE)

(2001/528/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Billi:

(1) Il-libertà tal-provvediment ta' servizzi u l-moviment liberu tal-kapital jikkostitwixxu għanijiet ta' prijorità tal-Komunità, kif hemm referenza dwar dan fl-Artikoli 49 u 56 tat-Trattat tal-KE.

(2) Il-bini ta' suq intern ġenwin għas-servizzi finanzjarji huwa bi qbil mal-prinċipju ta' l-ekonomija tas-suq miftuħ b'kompetizzjoni libera, huwa kruċjali għaż-żieda fit-tkabbir ekonomiku u l-ħolqien ta' l-impjiegi fil-Komunità,

(3) Il-pjan ta' azzjoni tal-Kummissjoni għal servizzi finanzjarji [1] jidentifika serje ta' azzjonijiet li huma meħtieġa sabiex jiġi komplut is-suq waħdieni għas-servizzi finanzjarji u jagħmel enfażi fuq il-ħtieġa li jiġi stabbilit kumitat tat-Titoli sabiex jikkontribwixxi għall-elaborazzjoni tal-leġiżlazzjoni tal-Komunità fil-qasam tat-Titoli.

(4) Fil-laqgħa tiegħu f'Lisbona f'Marzu 2000, il-Kunsill ta' l-Ewropa talab għall-implimentazzjoni ta' dan il-pjan ta' azzjoni sal-2005.

(5) Fis-17 ta' Lulju 2000, il-Kunsill stabbilixxa l-Kumitat ta' Rġiel Għorriefa dwar ir-regolament tas-swieq Ewropej tat-Titoli.

(6) Fir-rapport finali tiegħu, il-Kumitat ta' Rġiel Għorriefa talab għall-istabbiliment ta' żewġ kumitati konsultattivi, il-Kumitat tat-Titoli Ewropej, li jinkludi r-rappreżentanti ta' livell għoli ta' l-Istati Membri u l-Kumitat tar-Regolaturi tat-Titoli Ewropej, li jinkludu r-rappreżentanti għoljin mill-awtoritajiet pubbliċi nazzjonali kompetenti fil-qasam tat-Titoli sabiex, inter alia, jagħtu parir lill-Kummissjoni.

(7) Fir-riżoluzzjoni tiegħu dwar ir-regolament tas-suq tat-Titoli aktar effettiv fl-Unjoni Ewropea, il-Kunsill Ewropew ta' Stokkolma laqa' l-intenzjoni tal-Kummissjoni immedjatament sabiex tistabbilixxi kumitat tat-Titoli ta' uffiċjali ta' livell għoli minn Stati Membri, ppresedut mill-Kummisssjoni.

(8) Ir-rapport finali tal-Kumitat ta' Rġiel Għorriefa emfasizza l-fatt li l-miżuri implimentattivi sejrin ikunu neċessarji għall-applikazzjoni tad-direttivi jew regolamenti sabiex jagħtu każ ta' żviluppi ġodda fis-swieq finanzjarji.

(9) Il-Kumitat tat-Titoli Ewropej għandu jservi bħala korp għal riflessjoni, dibattitu u parir għall-Kummissjoni fil-qasam tat-Titoli.

(10) Il-Kumitat tat-Titoli Ewropej għandu jaddotta ir-regoli tal-proċedura tiegħu.

(11) Din id-Deċiżjoni tistabbilixxi l-Kumitat tat-Titoli Ewropej fil-kapaċità konsultattiva tiegħu. Soġġett għall-atti leġislattivi speċifiċi proposti mill-Kummissjoni u adottati mill-Parlament Ewropew u mill-Kunsill, il-Kumitat tat-Titoli għandu jaħdem ukoll bħala kumitat regolatorju skond id-Deċiżjoni ta' l-1999 dwar il-komitoloġija sabiex jassisti lill-Kummissjoni meta tieħu deċiżjonijiet dwar miżuri implimentattivi permezz ta' l-Artikolu 202 tat-Trattat tal-KE,

IDDEĊIDIET KIF ĠEJ:

L-Artikolu 1

Kumitat dwar il-garanziji fil-Komunità, imsejjaħ "il-Kumitat tat-Titoli Ewropej" (minn hawn 'il quddiem imsejjaħ bħala "il-Kumitat"), huwa b'dan stabbilit.

L-Artikolu 2

Ir-rwol tal-Kumitat għandu jkun dak li jagħti parir lill-Kummissjoni dwar materji ta' strateġija kif ukoll dwar abbozzi ta' proposti leġislattivi li l-Kummissjoni tista' tadotta fil-qasam tat-Titoli

L-Artikolu 3

Il-Kumitat għandu jkun magħmul minn rappreżentanti ta' l-Istati Membri u għandu jkun ippresedut minn rappreżentant tal-Kummissjoni.

Il-president tal-Kumitat tar-Regolaturi tat-Titoli Ewropej stabbilit bid-Deċiżjoni tal-Kummissjoni 2001/527/KE [2] għandu jipparteċipa fil-laqgħat tal-Kumitat bħala osservatur.

Il-Kumitat jista' jistieden esperti u osservaturi sabiex jattendu għal-laqgħat.

L-Artikolu 4

Il-Kumitat jista' jistabbilixxi gruppi ta' ħidma.

L-Artikolu 5

Il-Kumitat għandu jadotta r-regoli tal-proċedura tiegħu.

Is-segretarjat tal-Kumitat għandu jkun provdut mill-Kummissjoni.

L-Artikolu 6

Il-Kumitat għandu jibda x-xogħol tiegħu nhar is-7 ta' Ġunju 2001.

Magħmula fi Brussel, fis-6 ta' Ġunju 2001.

Għall-Kummissjoni

Frederik Bolkestein

Membru tal-Kummissjoni

[1] COM(1999) 232 finali.

[2] ĠU L 191, tat-13.7.2001, p.43.

--------------------------------------------------