Id-Deċiżjoni tal-Kunsill

tal-21 ta' Diċembru 1998

dwar id-dispożizzjonijiet dettaljati li jikkonċernaw il-komposizzjoni tal-Kumitat Ekonomiku u Finanzjarju

(98/743/KE)

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 109ċ(3) miġjub fih,

Wara li kkunsidra l-proposta mill-Kummissjoni [1],

Wara li kkunsidra l-opinjoni tal-Bank Ċentrali Ewropew [2],

Wara li kkunsidra l-opinjoni tal-Kumitat Monetarju [3],

(1) Billi t-Trattat jipprovdi li Kumitat Ekonomiku u Finanzjarju għandu jitwaqqaf fil-bidu tat-tielet stadju ta' l-unjoni ekonomika u monetarja;

(2) Billi t-Trattat jirrikjedi li l-Kunsill jadotta dispożizzjonijiet dettaljati li jikkonċernaw il-komposizzjoni tal-Kumitat Ekonomiku u Finanzjarju; billi kull wieħed mill-Istati Membri, il-Kumissjoni u l-Bank Ċentrali Ewropew għandhom jaħtru mhux iżjed minn żewġ membri tal-Kumitat;

(3) Billi l-kompiti tal-Kumitat Ekonomiku u Finanzjarju huma mniżżla fl-Artikolu 109ċ(2) tat-Trattat; billi bħala parti minn dawn il-kompiti l-Kumitat Ekonomiku u Finanzjarju għandu jżomm taħt reviżjoni is-sitwazzjoni ekonomika u finanzjarja ta' l-Istati Membri u tal-Komunità u għandu jirrapporta regolarment dwarhom lill-Kunsill u lill-Kumissjoni b'mod partikolari dwar ir-relazzjonijiet finanzjarji ma' pajjiżi terzi u ma' istituzzjonijiet internazzjonali; billi l-Kumitat Ekonomiku u Finanzjarju għandu jikkontribwixxi għall-preparazzjoni tax-xogħol tal-Kunsill, inter alia, għar-rakomandazzjonijiet meħtieġa bħala parti minn sorveljanza multilaterali u linji gwidi ekonomiċi wiesa' mniżżla fl-Artikolu 103 tat-Trattat, u għad-deċiżjonijiet meħtieġa bħala parti mill-proċedura ta' l-iżbilanċ eċċessiv imniżżla fl-Artikolu 104ċ tat-Trattat; billi minħabba n-natura u l-importanza ta' dawn il-kompiti, huwa essenzjali li l-membri tal-Kumitat u membri alternattivi jiġu magħżula minn fost esperti li jippossedu kompetenza straordinarja fil-qasam ekonomiku u finanzjarju;

(4) Billi fir-Resoluzzjoni [4] tiegħu dwar il-Koordinazzjoni tal-Policy Ekonomika fi stadju 3 tal-EMU, il-Kunsill Ewropew tal-Lussemburgu tat-12 u t-13 ta' Diċembru 1997 ikkonkluda li l-Kumitat Ekonomiku u Finanzjarju għandu jipprovdi l-istruttura li fiha d-djalogu bejn il-Kunsill u l-Bank Ċentrali Ewropew jista jiġi ppreparat u komplut fil-livell ta' uffiċjali għolja; billi dawn l-uffiċjali għandhom jiġu minn banek ċentrali nazzjonali u l-Bank Ċentrali Ewropew kif ukoll minn amministrazzjonijiet nazzjonali;

(5) Billi "amministrazzjoni" tirreferi għas-sevizzi tal-Ministri li jattendu l-Kunsill meta jiltaqgħu fil-komposizzjoni tal-Ministri Ekonomiċi u Finanzjarji;

(6) Billi s-sħubija tal-Kumitat ta' l-uffiċjali mill-Bank Ċentrali Ewropew u banek ċentrali nazzjonali għandha tkun mingħajr preġudizzju għall-Artikolu 107 tat-Trattat,

IDDEĊIEDA KIF ĠEJ:

Artikolu 1

L-Istati Membri, il-Kumissjoni u l-Bank Ċentrali Ewropew għandhom kull wieħed jaħtar żewġ membri tal-Kumitat Ekonomiku u Finanzjarju. Jistgħu wkoll jaħtru żewġ membri alternattivi oħra tal-Kumitat.

Artikolu 2

Il-membri tal-Kumitat u l-alternati għandhom jiġu magħżula minn fost esperti li jippossjedu kompetenza straordinarja fil-qasam ekonomiku u finanzjarju.

Artikolu 3

Iż-żewg membri appuntati mill-Istati Membri għandhom jiġu magħżula rispettivament minn fost uffiċjali anzjani mill-amministrazzjoni u l-bank ċentrali nazzjonali. L-alternati għandhom jiġu magħżula taħt l-istess kondizzjonijiet.

Artikolu 4

Din id-Deċiżjoni għandha tiġi pubblikata fil-Ġurnal Uffiċjali tal-Komunitajiet Ewropej.

Għandu jkollha effett mill-1 ta' Jannar 1999.

Magħmula fi Brussel, fil-21 ta' Diċembru 1998.

Għall-Kunsill

Il-President

M. Bartenstein

[1] ĠU C 125, tat-23.4.1998, p. 17.

[2] Opinjoni mogħtija fis-26 ta' Novembru 1998 (għadha mhux pubblikata fil-Ġurnal Uffiċjali).

[3] Opinjoni mogħtija fis-17 ta' Novembru 1998 (għadha mhux pubblikata fil-Ġurnal Uffiċjali).

[4] ĠU C 35, tat-2.2.1998, p. 1.

--------------------------------------------------