Official Journal L 304 , 27/11/1996 P. 0012 - 0014
Id-Direttiva tal-Kunsill 96/75/KE tad-19 ta' Novembru 1996 dwar is-sistemi ta' kiri u prezzar fit-trasport nazzjonali u internazzjonali bil-passaġġi fuq l-ilma interni fil-Komunità IL-KUNSILL TA' L-UNJONI EWROPEA, Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 75 tiegħu, Wara li kkunsidra l-proposta tal-Kummissjoni [1], Wara li kkunsidra l-opinjoni tal-Kumitat Ekonomiku u Soċjali [2], Filwaqt li jaġixxi skond il-proċedura preskritta fl-Artikolu 189ċ tat-Trattat [3], Billi l-problemi dejjem jiżdiedu tas-saturazzjoni fit-toroq u fuq il-linji tal-ferrovija, tas-sigurtà tat-trasport, ta' l-ambjent, ta' l-iffrankar ta' enerġija u ta' kwalità ta' ħajja taċ-ċittadin jitolbu, fl-interess pubbliku, għal iktar żvilupp u użu aħjar tal-potenzjal tat-trasport offrut minn passaġġi fuq l-ilma interni, b'mod partikolari billi titjieb il-kompetittività tagħhom; Billi d-differenza fil-liġijiet nazzjonali dwar is-sistemi għall-operazzjoni kummerċjali tat-trasport permezz ta' passaġġi fuq l-ilma interni, ma twassalx għall-funzjonament bla diffikulta f'dan is-settur; billi, għalhekk, dispożizzjonijiet komuni għandhom ikunu introdotti fil-livell tal-Komunità għas-suq kollu tal-passaġġi fuq l-ilma interni, skond ir-Riżoluzzjoni tal-Kunsill ta' l-24 ta' Ottubru 1994 dwar it-titjib strutturali tat-trasport permezz ta' passaġġi fuq l-ilma interni [4]; Billi l-funzjonament bla diffikultà tas-suq intern jitlob aġġustament fit-trasport permezz ta' passaġġi fuq l-ilma interni lejn l-organizzazzjoni ta' kiri b'rotazzjoni, biex wieħed jersaq lejn flessibiltà kummerċjali akbar u sistema ta' ħelsien ta' kiri u prezz; Billi, għal dan il-għan għandha ssir dispożizzjoni għal perjodu transitorju, filwaqt li l-ambitu tas-sistema ta' rotazzjoni tkun gradwalment limitata għal trasportaturi biex jadattaw ruħhom għall-kondizzjonijiet ta' suq ħieles u, fejn jixraq, għall-istabbiliment ta' aggruppamenti kummerċjali iktar konvenjenti għall-ħtiġiet loġistiċi ta' shippers; Billi, skond il-prinċipju tas-sussidjarjetà, huwa kemm meħtieġ u kif ukoll adegwat li tkun stabbilita skeda uniformi ta' żmien fil-livell tal-Komunità għal-liberalizzazzjoni gradwali tas-suq, filwaqt li titħalla lill-Istati Membri r-responsabbiltà li jimplimentaw din il-liberalizzazzjoni; Billi għandhom ikunu adottati dispożizzjonijiet li jippermettu li tittieħed azzjoni fis-suq tat-trasport fil-kwistjoni fil-każ ta' tfixkil serju; billi, għal dan il-għan, il-Kummissjoni għandha tingħata l-poter li tieħu miżuri xierqa, skond il-proċedura tal-kumitat konsultattiv, ADOTTA DIN ID-DIRETTIVA: L-Artikolu 1 Għall-finijiet ta' din id-Direttiva: (a) "sistema ta' kiri b'rotazzjoni" għandha tfisser sistema li tikkonsisti f'li jkunu allokati talbiet fi skambju ta' kiri għal operazzjonijiet ta' trasport, bi prezzijiet fissi minn qabel u taħt kondizzjonijiet magħrufa, minn klijenti fuq il-bażi ta' l-ordni li fiha bastimenti jkunu disponibbli wara l-ħatt. rasportaturi jintalbu, fl-ordni tar-reġistrazzjoni tagħhom f'rota, jagħżlu kulħadd wara min imissu tagħbija minn dawk offruti. Dawk li ma jagħmlu ebda għażla jżommu madankollu l-pożizzjoni tagħhom fl-ordni; (b) "trasportatur" għandu jfisser sid jew operatur ta' wieħed jew iktar bastimenti għall-passaġġi fuq l-ilma interni; (ċ) "awtorità kompetenti" għandha tfisser l-awtorità maħtura mill-Istat Membru biex tamministra u torganizza s-sistema ta' kiri b'rotazzjoni; (d) "tfixkil serju tas-suq" għandha tfisser l-itfaċċar, fis-suq tat-trasport permezz ta' passaġġi fuq l-ilma interni, ta' problemi speċifiċi għal dak is-suq li aktarx jikkawżaw forniment żejjed serju u potenzjalment persistenti iktar mid-domanda, li bih tinqala' theddida serja għall-istabbilità finanzjarja u s-sopravivenza ta' numru kbir ta' trasportaturi permezz ta' passaġġi fuq l-ilma interni, ħlief jekk it-tbassir fil-qosor jew medju tas-suq fil-kwestjoni juri titjib sostanzjali u dejjiemi. L-Artikolu 2 Fl-oqsma tat-trasport nazzjonali u internazzjonali permezz ta' passaġġi fuq l-ilma interni fil-Komunità, għandhom ikunu konklużi kontratti b'mod liberu bejn il-partijiet ikkonċernati u prezzijiet għandhom ikunu nnegozjati b'mod liberu. L-Artikolu 3 Minkejja l-Artikolu 2, L-Istati Membri jistgħu, għal perjodu transitorju sa l-1 ta' Jannar 2000, iżommu sistema ta' tariffi minimi obbligatorji u sistemi ta' kiri b'rotazzjoni, sakemm: - hemm konformità mal-kondizzjonijiet espressi fl-Artikoli 4, 5 u 6; u - is-sistemi ta' rotazzjoni u prezzijiet imposti huma liberament aċċessibbli taħt l-istess kondizzjonijiet għat-trasportaturi kollha ta' Stati Membri. L-Artikolu 4 Matul il-perjodu transitorju li jirreferi għalih l-Artikolu 3, dawn li ġejjin m'għandhomx ikunu suġġetti għal sistemi ta' kiri b'rotazzjoni bħal dawn: (a) żejt u gass, tagħbija likwida u ġarr ta' tagħbija solida, tagħbijiet speċjali bħal tagħbijiet tqal u indiviżibbli (li ma jistgħux jinqasmu), trasport ta' kontenituri, trasport ġewwa l-arji ta' portijiet, kull xorta ta' trasport għal rasu u kull tip ta' operazzjoni ta' trasport diġà barra s-sistema ta' kiri b'rotazzjoni; (b) tagħbijiet li ma jistgħux ikunu ttrattati b'mod effettiv minn sistemi bħal dawn, b'mod partikolari: - trasport li jirrikjedi tagħmir għat-tqandil ta' oġġetti, - trasport ikkombinat, jiġifieri trasport intermodali fejn ir-rotot huma prinċipalment b' passaġġi fuq l-ilma interni u l-partijiet (qosra kemm jista' jkun) inizjali u/jew terminali huma bi triq jew il-ferrovija. L-Artikolu 5 Matul il-perjodu transitorju li jirreferi għalih l-Artikolu 3, l-Istati Membri għandhom jieħdu l-passi meħtieġa biex ikabbru kemm jistgħu l-flessibilità tas-sistemi ta' kiri b'rotazzjoni, b'mod partikolari: - billi jipprovdu lix-shippers l-opportunità li jikkonkludu appalti għal vjaġġi multipli, jiġifieri. serje ta' vjaġġi suċċessivi bl-użu ta' l-istess bastiment, - billi jipprovdu li vjaġġi singli jew multipli offruti darbtejn b'mod konsekuttiv taħt is-sistema ta' kiri b'rotazzjoni mingħajr ma jinkrew għandhom jinħarġu minn dik is-sistema u jkunu nnegozjati b'mod liberu. L-Artikolu 6 Fi żmien sentejn mid-dħul fis-seħħ ta' din id-Direttiva, l-Istati Membri mdaħħlin f'sistemi ta' kiri b'rotazzjoni għandhom jieħdu l-miżuri meħtieġa biex jagħtu l-possibbiltà lil shippers li jkollhom għażla libera bejn tliet tipi ta' kuntratti: - kuntratti fuq bażi ta' żmien, inklużi kuntratti ta' kera, fejn it-trasportatur jagħmel disponibbli b'mod esklussiv bastiment jew iktar u ekwipaġġ lil klijent għal perjodu speċifiku għat-trasport ta' oġġetti għal dak il-klijent bi ħlas ta' somma ta' flus determinata għal kull jum. l-kuntratt ikun konkluż bejn il-partijiet b'mod liberu, - kuntratti ta' tunnellaġġ fejn it-trasportatur jinpenja ruħu li jittrasporta, għal perjodu preskritt fil-kuntratt, tunnellaġġ determinat bi ħlas ta' rati ta' tagħbija bit-tunnellata metrika. l-kuntratt ikun konkluż b'mod liberu bejn il-partijiet u għandu jinvolvi konsenji kbar, - kuntratti għal vjaġġi singli jew multipli. L-Artikolu 7 1. Fil-każ ta' tfixkil serju fis-suq tat-trasport permezz ta' passaġġi fuq l-ilma interni, il-Kummissjoni tista', mingħajr preġudizzju għar-Regolament tal-Kunsill (KEE) Nru 1101/89 tas-27 ta' April 1989 dwar titjib strutturali fit-trasport bil-passaġġi fuq l-ilma interni [5], wara t-talba ta' Stat Membru, tieħu miżuri adattati, u b'mod partikolari miżuri maħsuba biex jimpedixxu kull żieda ġdida fil-kapaċità tat-trasport li jista' jkun offrut fis-suq fil-kwistjoni. Din id-deċiżjoni għandha tittieħed skond il-proċedura preskritta fl-Artikolu 8(2). 2. Fil-każ ta' talba minn Stat Membru għal miżuri adattati, deċiżjoni għandha tittieħed fi żmien perjodu ta' tliet xhur minn meta tkun irċevuta t-talba. 3. It-talba minn Stat Membru għal miżuri adattati li jittieħdu għandha tkun akkompanjata bl-informazzjoni kollha meħtieġa biex tkun stmata s-sitwazzjoni ekonomika fis-settur fil-kwistjoni, b'mod partikolari: - indikazzjoni ta' l-ispejjeż u l-prezzijiet medji għat-tipi differenti ta' trasport, - ir-rata ta' utilizzazzjoni ta' l-istiva, - tbassir tad-domanda. Din l-informazzjoni tista' tintuża biss għal għanijiet statistiċi. Ma tistax tintuża għal għanijiet ta' taxxa jew ikkomunikata lill-partijiet terzi. 4. Deċiżjonijiet meħuda skond dan l-Artikolu, li ma jistgħux jeċċedu d-dewmien tat-tfixkil fis-suq, għandhom ikunu nnotifikati mill-ewwel lill-Istati Membri. L-Artikolu 8 1. Il-Kummissjoni għandha tkun megħjuna mill-Kumitat stabbilit bid-Direttiva 91/672/KEE [6] 2. Ir-rappreżentant tal-Kummissjoni għandu jissottometti lill-Kumitat abbozz tal-miżuri li għandhom jittieħdu. Il-Kumitat għandu jagħti l-opinjoni tiegħu dwar l-abbozz, fejn meħtieġ b'vot, f'limitu ta' żmien li l-President jista' jippreskrivi skond l-urġenza tal-materja. L-opinjoni għandha tkun imniżżla fil-minuti; barra minn hekk, kull Stat Membru għandu jkollu d-dritt li jitlob li l-pożizzjoni tiegħu titniżżel fil-minuti. Il-Kummissjoni għandha tqis kemm jista' jkun l-opinjoni mogħtija mill-Kumitat. Hija għandha tgħarraf lill-Kumitat bil-manjiera li biha tkun qieset l-opinjoni tiegħu. L-Artikolu 9 1. L-Istati Membri għandhom iġibu fis-seħħ il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ruħhom ma' din id-Direttiva qabel l-1 ta' Jannar 1997. Huma għandhom mill-ewwel jinformaw b'dan lill-Kummissjoni. Meta l-Istati Membri jadottaw dawn il-miżuri, għandu jkollhom referenza għal din id-Direttiva jew għandhom ikunu akkumpanjati b'referenza bħal din fi żmien il-pubblikazzjoni uffiċjali tagħhom. Il-proċedura għal riferenza bħal din għandha tkun adottata mill-Istati Membri. 2. L-Istati Membri għandhom jikkomunikaw mill-ewwel lill-Kummissjoni it-test tad-dispożizzjonijiet tal-liġi nazzjonali li huma jadottaw fil-qasam kopert minn din id-Direttiva. L-Artikolu 10 Din id-Direttiva għandha tidħol fis-seħħ fit-tielet jum wara l-pubblikazzjoni tagħha fil-Ġurnal Uffiċjali tal-Komunitajiet Ewropej. L-Artikolu 11 Din id-Direttiva hija indirizzata lill-Istati Membri. Magħmula fi Brussel, fid-19 ta' Novembru 1996. Għall-Kunsill Il-President H. Coveney [1] ĠU C 318, tad-29.11.1995, p. 8. [2] ĠU C 39, tat-12.2.1996, p. 96. [3] L-opinjoni tal-Parlament Ewropew tat-13 ta' Frar 1996 (ĠU C 65, ta' l-4.3.1996, p. 32) pożizzjoni komuni tal-Kunsill tas-27 ta' Ġunju 1996 (ĠU C 264, tal-11.9.1996) u d-Deċiżjoni tal-Parlament Ewropew tas-17 ta' Settembru 1996 (ĠU C 320, tat-28.6.1996). [4] ĠU C 309, tal-5.11.1994, p. 5. [5] ĠU L 116, tat-28.4.1989, p. 25. Ir-Regolament kif l-aħħar emendat bir-Regolament (KE) Nru 2254/96 (ara paġna 1 ta' dan il-Ġurnal Uffiċjali). [6] ĠU L 373, tal-31.12.1991, p. 29. Id-Direttiva emendata bl-Att ta' Adeżjoni 1994. --------------------------------------------------