Official Journal L 081 , 30/03/1996 P. 0001 - 0002
Id-Deċiżjoni tal-Kunsill tat-22 ta' Diċembru 1995 dwar l-applikazzjoni temporanja ta' ċerti ftehim bejn il-Komunitajiet Ewropej u ċerti pajjiżi terzi dwar il-kummerċ ta' prodotti tessili. (96/223/KE) IL-KUNSILL TA' L-UNJONI EWROPEA, Wara li kkunsidra t-Trattat li jistabbilixxi il-Komunità Ewropea, u partikolarment l-Artikolu 113 flimkien ma' l-Artikolu 228(2) tiegħu, Wara li kkunsidra l-proposta mill-Kummissjoni, Billi l-Kummissjoni nnegozjat ftehim bilaterali f'isem il-Komunità fil-forma ta' skambju ta' ittri biex jiġi emendat il-ftehim bilaterali eżistenti, arranġamenti u protokolli dwar il-kummerċ ta' prodotti tessili ma' ċerti pajjiżi terzi biex tiġi kkunsidrata l-adeżjoni tar-Repubblika ta' l-Awstrija, ir-Repubblika tal-Finlandja u r-Renju ta' l-Isvezja fl-Unjoni Ewropea, kif previst fl-Artikoli 75, 100 u 127 ta' l-Att dwar il-kondizzjonijiet ta' l-adeżjoni u l-aġġustamenti fit-Trattati li fuqhom hija stabbilita l-Unjoni annessi mat-Trattat ta' l-Adeżjoni ta' l-1994; Billi dan il-ftehim bilaterali għandu jiġi applikat fuq bażi temporanja mill-1 ta' Jannar 1995, sakemm jitlestew il-proċeduri neċessarji għall-konklużjoni tagħhom, bla ħsara għall-applikazzjoni temporanja reċiproka mill-pajjiżi sħab. IDDEĊIEDA DAN LI ĠEJ: Artikolu 1 Il-ftehim bilaterali fil-forma ta' skambju ta' ittri biex jiġi emendat il-ftehim bilaterali eżistenti, arranġamenti u protokolli dwar il-kummerċ ta' prodotti tessili ma' ċerti pajjiżi terzi biex tiġi kkunsidrata l-adeżjoni tar-Repubblika ta' l-Awstrija, r-Repubblika tal-Finlandja u r-Renju ta' l-Isvezja fl-Unjoni Ewropea bejn il-Komunitajiet Ewropej, fuq naħa, u l-pajjiżi terzi li huma mniżżlin fl-anness għal din id-deċiżjoni, fuq in-naħa l-oħra, għandu jiġi applikat fuq bażi temporanja mill-1 ta' Jannar 1995, sakemm jiġu' konklużi formalment, bla ħsara għall-applikazzjoni temporanja reċiproka mill-pajjiżi sħab. Artikolu 2 It-testi tal-ftehim inizjalati huma mehmuża ma' din id-Deċiżjoni. Magħmula fi Brussel, fit-22 ta' Diċembru 1995. Għall-Kunsill Il-President L. Atienza Serna -------------------------------------------------- ANNESS LISTA TAL-PAJJIŻI ALBANIJA ARMENJA AŻERBAJĠAN ĠORĠJA KAZAKHSTAN IL-LATVJA IL-MOLDOVA IL-FEDERAZZJONI RUSSA L-ISLOVENJA IT-TAJLANDJA L-UZBEKISTAN --------------------------------------------------