Official Journal L 311 , 14/12/1993 P. 0083 - 0088
Id-Direttiva tal-Kunsill 93/94/KEE tad-29 ta' Ottubru 1993 li għandha x'taqsam ma' l-ispazju għall-immuntar tal-pjanċa tar-reġistrazzjoni ta' wara ta' vetturi b'żewġ jew tliet roti IL-KUNSILL TAL-KOMUNITAJIET EWROPEJ, Wara li kkunsidra t-Trattat li jistabbilixxi l-Komunità Ekonomika Ewropea, u b'mod partikolari l-Artikolu 100a tiegħu, Wara li kkunsidra d-Direttiva tal-Kunsill 92/61/KEE tat-30 ta' Ġunju 1992 li għandha x'taqsam ma' l-approvazzjoni tat-tip ta' vetturi bil-mutur b'żewġ jew tliet roti [1], Wara li kkunsidra l-proposta mill-Kummissjoni [2], B'kooperazzjoni mal-Parlament Ewropew [3], Wara li kkunsidra l-opinjoni tal-Kumitat Ekonomiku u Soċjali [4], Billi s-suq intern jinkludi żona mingħajr fruntieri interni fejn il-moviment liberu ta' merkanzija, persuni, servizzi u kapital hu assigurat; billi l-miżuri meħtieġa għall-operazzjoni tiegħu għandhom jiġu adottati; Billi, f'dak li jirrigwardja l-ispazju għall-immuntar tal-pjanċa tar-reġistrazzjoni ta' wara, f'kull Stat Membru il-vetturi bil-mutur b'żewġ jew tliet roti għandhom juru ċerti karatteristiċi tekniċi stabbiliti mid-dispożizzjonijiet mandatorji li jvarjaw minn Stat Membru wieħed għall-ieħor; billi, bħala riżultat tad-differenzi tagħhom, dawn id-dispożizzjonijiet jikkostitwixxu barriera għan-negozju fi ħdan il-Komunità; Billi dawk l-ostakoli għall-operazzjoni tas-suq intern jistgħu jitneħħew jekk l-istess ħtiġiet ikunu adottati mill-Istati Membri kollha minflok ir-regoli nazzjonali tagħhom; Billi huwa meħtieġ li jiġu mfassla ħtiġiet armonizzati li jikkonċernaw l-ispazju għall-immuntar tal-pjanċa tar-reġistrazzjoni ta' wara ta' vetturi bil-mutur b'żewġ jew tliet roti sabiex il-proċeduri ta' l-approvazzjoni tat-tip u ta' l-approvazzjoni tat-tip ta' komponent stabbiliti fid-Direttiva 92/61/KEE ikunu jistgħu jiġu applikati għal kull tip ta' vettura ta' din ix-xorta; Billi l-objettiv ta' din id-Direttiva mhuwiex li jiġu armoniżżati id-dimensjonijiet tal-pjanċi tar-reġistrazzjoni użati fl-Istati Membri varji; billi l-Istati Membri għandhom għalhekk jassiguraw li l-pjanċi tar-reġistrazzjoni li jisbruffaw il-barra ma jikkostitwixxux periklu għall-utenti, mingħajr, madankollu, ma' dan jikkawża xi modifika f'dak li għandu x'jaqsam mal-kostruzzjoni tal-vettura; Billi, meqjusa l-iskala u l-impatt ta' l-azzjoni proposta fis-settur in kwistjoni, il-miżuri tal-Komunità koperti minn din id-Direttiva huma meħtieġa, infatti essenzjali, biex tinkiseb il-mira maħsuba, dik li tiġi stabbilita l-approvazzjoni tat-tip ta' vettura fil-Komunità; billi dik il-mira ma tistax tinkiseb kif xieraq mill-Istati Membri individwalment, ADOTTA DIN ID-DIRETTIVA: L-Artikolu 1 Din id-Direttiva u l-Anness tagħha japplikaw għall-ispazju għall-immuntar tal-pjanċa ta' reġistrazzjoni ta' wara tat-tipi kollha ta' vettura kif definiti fl-Artikolu 1 tad-Direttiva 92/61/KEE. L-Artikolu 2 Il-proċedura għall-għoti ta' l-approvazzjoni tat-tip ta' komponent f'dak li għandu x'jaqsam ma' l-ispazju għall-immuntar tal-pjanċa ta' reġistrazzjoni ta' wara ta' vettura bil-mutur b'żewġ jew tliet roti u l-kondizzjonijiet li jirrregolaw il-moviment liberu ta' dawn il-vetturi għandhom ikunu kif stabbiliti fil-Kapitoli II u III tad-Direttiva 92/61/KEE. L-Artikolu 3 Kwalunkwe emendi meħtieġa biex jaddattaw il-ħtiġiet ta' l-Annessi għall-progress tekniku għandhom ikunu adottati skond il-proċedura stabbilita fl-Artikolu 13 tad-Direttiva 70/156/KEE [5]. L-Artikolu 4 1. L-Istati Membri għandhom jadottaw u jippubblikaw id-dispożizzjonijiet meħtieġa sabiex ikunu konformi ma' din id-Direttiva qabel l-1 ta' Mejju 1995. Għandhom minnufih jinfurmaw lill-Kummissjoni b'dan. Meta l-Istati Membri jadottaw dawn id-dispożizzjonijiet, dawn għandhom ikollhom referenza għal din id-Direttiva jew ikunu akkumpanjati minn referenza bħal din fl-okkażjoni tal-pubblikazzjoni uffiċċjali tagħhom. Il-metodi li bihom issir din ir-referenza għandhom jiġu stabbiliti mill-Istati Membri. Mid-data msemmija fl-ewwel subparagrafu l-Istati Membri ma jistgħux, għal raġunijiet konnessi ma' l-ispazju għall-immuntar tal-pjanċa ta' reġistrazzjoni ta' wara, jipprojbixxu d-dħul inizjali fis-servizz tal-vetturi li jkunu konformi ma' din id-Direttiva. Għandhom japplikaw id-dispożizzjonijiet li hemm referenza dwarhom fl-ewwel subparagrafu sa mill-1 ta' Novembru 1995. 2. L-Istati Membri għandhom jikkomunikaw lejn il-Kummissjoni t-testi tad-dispożizzjonijiet tal-liġi nazzjonali li huma jadottaw fis-settur kopert minn din id-Direttiva. L-Artikolu 5 Din id-Direttiva hija indirizzata lill-Istati Membri. Magħmula fi Brussel, id- 29 ta' Ottubru 1993. F'isem il-Kunsill Il-President R. Urbain [1] ĠU L 225, ta' l-10.8.1992, p. 72. [2] ĠU C 293, tad-9.11.1992, p. 38. [3] ĠU C 337, tal-21.12.1992, p. 104 u d-Deċiżjoni tas-27 ta' Ottubru 1993 (għadha mhix ippubblikata fil-Ġurnal Uffiċjali). [4] ĠU C 73, tal-15.3.1993, p. 22. [5] ĠU L 42, tat-23.2.1970, p. 1, id-Direttiva kif l-aħħar emendata mid-Direttiva 92/53/KEE (ĠU L 225, ta' l-10.8.1992, p. 1). -------------------------------------------------- L-ANNESS 1. DIMENSJONIJIET Id-dimensjonijiet għall-ispazju għall-immuntar tal-pjanċa tar-reġistrazzjoni ta' wara ta' vetturi bil-mutur b'żewġ jew tliet roti [1] huma kif ġej: 1.1. Mopeds u kwadriċikli ħfief 1.1.1. Wisa': 100 mm; 1.1.2. Għoli: 175 mm; jew 1.1.3. Wisa': 145 mm; 1.1.4. Għoli: 125 mm. 1.2. Muturi, triċikli sa saħħa massima ta' 15 kW u kwadriċikli ta' xort'oħra minn kwadriċikli ħfief: 1.2.1. Wisa': 280 mm; 1.2.2. Għoli: 210 mm. 1.3. Triċikli b'saħħa massima li teċċedi l-15-il kW: 1.3.1. Id-dispożizzjonijiet għall-karrozzi għall-passiġġieri kif stabbilita fid-Direttiva 70/222/KEE għandhom jappliaw. 2. IL-POŻIZZJONI ĠENERALI 2.1. L-immuntar għall-pjanċa ta' reġistrazzjoni ta' wara ta' mutur, kumbinar ta' mutur jew triċiklu għandu jkun jinstab fuq in-naħa ta' wara tal-vettura b'tali mod li: 2.1.1. il-pjanċa tista' tiġi mqiegħdha fi ħdan il-pjanijiet lonġitudinali li jgħaddu mill-estremitajiet ta' barra tal-vettura. 3. L-INKLINAZZJONI 3.1. Il-pjanċa tar-reġistrazzjoni ta' wara: 3.1.1. għandha tkun perpendikolari mal-pjan medjan lonġitudinali tal-vettura; 3.1.2. tista' tkun inklinata mill-vertikal b'mhux iktar minn 30° meta l-pjanċa ta' wara għan-numru tar-reġistrazzjoni tħares 'il fuq; 3.1.3. tista' tkun inklinata b'mhux iktar minn 15° meta l-pjanċa ta' wara għan-numru tar-reġistrazzjoni tħares 'l isfel; 4. L-GĦOLI MASSIMU 4.1. Ebda punt fuq l-ispazju għall-immuntar tal-pjanċa tar-reġistrazzjoni ma jista' jkun iktar minn 1,5m 'l fuq mill-art meta l-vettura hi mgħobbija (il-massa wieqfa flimkien ma' massa ta' 75kg). 5. L-GĦOLI MINIMU 5.1. Ebda punt fuq l-ispazju għall-immuntar tal-pjanċa tar-reġistrazzjoni m'għandu jkun inqas minn 0,20 m 'l fuq mill-art, jew inqas mir-radius tar-rota 'l fuq mill-art jekk dak hu inqas minn 0,20m, meta l-vettura tkun mgħobbija (il-massa wieqfa kif ukoll massa ta' 75 kg). 6. VISIBILITÀ ĠEOMETRIKA 6.1. L-ispazju għall-immuntar tal-pjanċa għandu jkun viżibbli fi ħdan spazju li jkun ikkwadrat b'żewġ diħedrali: wieħed b'tarf oriżżontali definit minn żewġ pjanijiet li jgħaddu mit-trufijiet oriżżontali ta' fuq u t'isfel ta' l-ispazju għall-immuntar tal-pjanċa, li l-angoli tagħha vis-à-vis l-oriżżontali jidhru fil-Figura 1; l-ieħor b'tarf wieqaf li jidher definit minn żewġ pjanijiet li jgħaddu minn kull naħa tal-pjanċa, li l-angoli tagħha vis-à-vis il-pjan medjan lonġitudinali tal-vettura jidhru fil-Figura 2. +++++ TIFF +++++ L-angolu tal-viżibilità ġeometrika (diħedrali b'xifer oriżżontali) +++++ TIFF +++++ L-angolu tal-viżibilità ġeometrika (diħedrali b'xifer vertikali apparenti) [1] Fil-każ ta' mopeds, din hija kwalunkwe pjanċa tar-reġistrazzjoni u/jew l-identifikazzjoni. --------------------------------------------------