Official Journal L 331 , 03/12/1991 P. 0001 - 0001
Finnish special edition: Chapter 4 Volume 4 P. 0019
Swedish special edition: Chapter 4 Volume 4 P. 0019
Ir-Regolament tal-Kunsill (KEE) Nru 3499/91 tat-28 ta' Novembru 1991 li jistabbilixxi qafas Komunitarju għal studji u proġetti-pilota għall-konservazzjoni u l-amministrazzjoni tar-riżorsi tas-sajd fil-Mediterran IL-KUNSILL TAL-KOMUNITAJIET EWROPEJ, Wara li kkunsidra t-Trattat li jwaqqaf il-Komunità Ekonomika Ewropea, Wara li kkunsidra r-Regolament tal-Kunsill (KEE) Nru 170/83 tal-25 ta' Jannar 1983 li jwaqqaf sistema Komunitarja għall-konservazzjoni u l-amministrazzjoni tar-riżorsi tas-sajd [1], kif emendat bl-Att tas-Sħubija ta' Spanja u l-Portugall, u b'mod partikolari l-Artikolu 11 tiegħu, Wara li kkunsidra l-proposta mill-Kummissjoni, Billi, skond l-Artikolu 2 tar-Regolament (KEE) Nru 170/83, il-Kunsill irid, fid-dawl tal-pariri xjentifiċi disponibbli, jifformula l-miżuri ta' konservazzjoni meħtieġa sabiex jinkisbu l-għanijiet dikjarati fl-Artikolu 1 ta' dan ir-Regolament; Billi l-implimentazzjoni ta' politika għall-konservazzjoni u l-amministrazzjoni tar-riżorsi tas-sajd qiegħda ssir dejjem aktar vitali fir-reġjun tal-Mediterran sabiex jiġu ppreservati l-beni tas-sajd ta' ġo fih u sabiex jittejbu għall-benefiċċju, b'mod partikolari, tal-popolazzjonijiet kostali; Billi għandhom jiġu mwettqa studji u proġetti-pilota fl-istadju inizjali tal-proċess tad-dħul ta' sistema komuni sabiex jiġu identifikati l-punti fejn il-miżuri tal-Komunità x'aktarx jipprovdu soluzzjoni għal problemi speċifiċi u b'mod partikolari immedjati; Billi, għal dan l-iskop, il-Kummissjoni għandha tadotta r-regoli dettaljati sabiex jiġu applikati dawn il-miżuri, megħjuna mill-Kumitat Permanenti ta' l-Industrija tas-Sajd, ADOTTA DAN IR-REGOLAMENT: Artikolu 1 Bħala parti mid-dħul bil-mod il-mod ta' sistema komuni għall-amministrazzjoni u l-konservazzjoni tar-riżorsi tas-sajd fil-Baħar Mediterran, tista’ tiġi mogħtija għajnuna finanzjarja Komunitarja għal studji u proġetti-pilota skond kondizzjonijiet li tistabbilixxi l-Kummissjoni. Artikolu 2 L-istudji u l-proġetti-pilota msemmija fl-Artikolu 1 għandhom ikopru ż-żoni ta' prijorità li ġejjin: - l-istrutturi tat-tipi tradizzjonali tas-sajd, - l-iżvilupp ta' sajd speċjalizzat bħalma huwa s-sajd għall-isponoż, il-korall, ir-rizzi u l-ħaxix tal-baħar, - il-kontroll ta' l-attivitajiet tas-sajd, - l-iżvilupp ta' xibka ta' informazzjoni statistika, - il-kordinament tar-riċerka u ta' l-użu ta' informazzjoni xjentifika. Artikolu 3 Il-Kummissjoni għandha tiddeċiedi dwar l-istudji u l-proġetti-pilota msemmija fl-Artikolu 1 wara li tikkonsulta l-Kumitat Permanenti ta' l-Industrija tas-Sajd. Artikolu 4 Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej. Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmul fi Brussel, fit-28 ta' Novembru 1991. Għall-Kunsill Il-President J. Pronk [1] ĠU L 24, tas-27.1.1983, pġ. 1. --------------------------------------------------