Id-Direttiva tal-Kunsill

tad-29 ta' Lulju 1991

dwar l-iżvilupp tal-linji tal-ferrovija tal-Komunità

(91/440/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea, u b'mod speċjali l-Artikolu 75 dwar dan,

Wara li kkunsidra l-proposta mill-Kummissjoni [1],

Wara li kkunsidra l-opinjoni tal-Parlament Ewropew [2],

Wara li kkunsidra l-opinjoni tal-Kumitat Soċjali u Ekonomiku [3],

Billi l-integrazzjoni akbar tas-settur tat-trasport tal-Komunità hija element essenzjali tas-suq intern, u billi l-linji tal-ferrovija huma kull parti essenzjali tas-settur tat-trasport tal-Komunità;

Billi l-effiċjenza tas-sistema tal-linji tal-ferrovija trid titjieb, sabiex tiddaħħal f'suq kompetittiv, billi tqis il-karatteristiċi speċjali tal-linji tal-ferrovija;

Billi, sabiex it-trasport tal-ferrovija jkun effiċjenti u kompetittiv meta mqabbel ma' mezzi oħra ta' trasport, l-Istati Membri jridu jiggarantixxu li l-impriżi sottoskritti mal-ferrovija jkunu jistgħu jitħaddmu minn operaturi indipendenti li jaħdmu b'kull manjiera kummerċjali u jadattaw ruħhom għall-bżonnijiet tas-suq;

Billi l-iżvilupp fil-ġejjieni u t-tħaddim effiċjenti tas-sistema tal-ferrovija tista' teħfief jekk issir kull distinzjoni bejn il-ħolqien tas-servizzi tat-trasport u t-tħaddim ta' l-infrastruttura; billi minħabba din is-sitwazzjoni, jeħtieġ li dawn iż-żewġ attivitajiet ikunu mmmexxija b'mod separat u jkollhom żewġ kontijiet separati;

Billi, sabiex tingħata spinta lill-kompetizzjoni fit-tmexxija tas-servizz tal-ferrovija rigward il-kumdità mtejba u s-servizzi offruti lil min jużaha, jeħtieġ li l-Istati Membri jkunu responsabbli b'mod ġenerali ta' l-iżvilupp ta' l-infrastruttura xierqa tal-ferrovija;

Billi, fin-nuqqas ta' regoli komuni dwar l-allokazzjoni ta' spejjeż ta' l-infrastruttura, l-Istati Membri, wara li jikkonsultaw lit-tmexxija ta' l-infrastruttura, iridu jistabilixxu regoli li jaħsbu għall-ħlas minn impriżi tal-ferrovija u l-gruppi tagħhom għall-użu ta' l-infrastruttura tal-ferrovija; billi dawk il-ħlasijiet iridu jaqblu mal-prinċipju li ma jiddiskriminax bejn l-impriżi tal-ferrovija;

Billi l-Istati Membri jridu jiżguraw b'mod partikulari li l-impriżi eżistenti tat-trasport li huma tal-pubbliku jew ikkontrollati jingħataw struttura finanzjarja b'saħħitha, filwaqt li jieħdu ħsieb kull arranġament mill-ġdid finanzjarju jekk ikun hemm bżonn skond ir-regoli relevanti stabbiliti fit-Trattat;

Billi, sabiex jeħfief it-trasport bejn l-Istati Membri, l-impriżi tal-ferrovija jridu jkunu jistgħu jiffurmaw gruppi ma' l-impriżi tal-ferroviji stabbiliti fi Stati Membri oħra;

Billi, dawk il-gruppi internazzjonali jridu jingħataw id-dritt ta' l-aċċess u ċ-ċaqliq fl-Istati Membri tat-twaqqif ta' l-impriżi kostitwenti tagħhom, kif ukoll drittijiet ta' ċaqliq fi Stati Membri oħra kif meħtieġ għas-servizz internazzjonali konċernat;

Billi, biex ikun imħajjar it-trasport imħallat, ikun jixraq li l-aċċess għall-infrastruttura tal-ferrovija ta' l-Istati Membri l-oħra tingħata lill-impriżi tal-ferroviji mdaħħla fil-ġarr internazzjonali mħallat tal-merkanzija;

Billi jeħtieġ li jitwaqqaf kull kumitat li jagħti pariri li jkun jissorvelja u jgħin lill-Kummissjoni fit-twettiq ta' din id-Direttiva;

Billi, minħabba f'hekk, id-Direttiva tal-Kunsill 75/327/KEE ta' l-20 ta' Mejju 1975 dwar it-titjib tas-sitwazzjoni ta' l-impriżi tal-ferrovija u l-armonizzazzjoni tar-regoli li jirregolaw ir-relazzjonijiet finanzjarji bejn dawk l-impriżi u l-Istati [4] għandha titħassar,

ADOTTA DIN ID-DIRETTIVA:

IT-TAQSIMA 1

Għan u kamp ta' applikazzjoni

L-Artikolu 1

L-għan ta' din id-Direttiva hu biex jgħin biex ikunu adattati l-ferroviji tal-Komunità skond il-bżonnijiet tas-Suq Wieħed u biex tiżdied l-effiċjenza tagħhom:

- billi jkun żgurat it-tmexxija indipendenti ta' l-impriżi tal-ferroviji,

- billi jifirdu t-tmexxija ta' l-operat tal-ferrovija u l-infrastruttura mill-għoti tas-servizzi tat-trasport bil-ferrovija, il-firda tal-kontijiet hi obbligatorja u l-firda ta' l-organizzazzjoni u l-istituzzjoni mhix bilfors,

- billi titjieb l-istruttura finanzjarja ta' l-impriżi,

- billi jkun żgurat l-aċċess għan-networks ta' l-Istati Membri lill-gruppi internazzjonali ta' impriżi tal-ferroviji u lill-impriżi tal-ferroviji mdaħħla fil-ġarr imħallat internazzjonali tal-merkanzija.

L-Artikolu 2

1. Din id-Direttiva se tapplika għat-tmexxija ta' l-infrastruttura tal-ferrovija u għall-attivitajiet tat-trasport bil-ferrovija ta' l-impriżi tal-ferrovija stabbiliti jew li se jkunu stabbiliti f'kull Stat Membru.

2. Impriżi ferrovjarji li l-attività tagħhom hija limitata biss għall-għoti ta' servizzi urbani, suburbani jew reġjonali għandhom jiġu esklużi mill-kamp ta' applikazzjoni ta' din id-Direttiva.

L-Artikolu 3

Għall-iskopijiet ta' din id-Direttiva:

- "impriża tal-ferrovija'" se tfisser kull impriża privata jew pubblika li n-negozju ewlieni tagħha hu li tagħti servizz ta' trasport għall-merkanzija u/jew passiġġieri bil-kondizzjoni li l-impriża trid tiżgura li ġġorrhom,

- "amministratur ta' l-infrastruttura'" se jfisser kull korp pubblika jew impriża responsabbli b'mod partikulari biex iwaqqaf u jagħmel manutenzjoni lill-infrastruttura tal-ferroviji, kif ukoll li juża sistemi ta' kontroll u sigurtà,

- "infrastruttura tal-ferroviji'" se tfisser kull ħaġa elenkat fl-Anness I.A tar-Regolament tal-Kummissjoni (KEE) Nru 2598/70 tat-18 ta' Diċembru 1970 li jispeċifika l-affarijiet li jridu jitniżżlu taħt it-titoli differenti fil-forom ta' rapporti murija fl-Anness I tar-Regolament (KEE) Nru 1108/70 [5], ħlief għall-aħħar inċiż li, għall-iskopijiet ta' din id-Direttiva biss, se tinqara kif ġej: "Bini użat mid-dipartiment ta' l-infrastruttura'",

- "gruppi internazzjonali'" se tfisser kull assoċjazzjoni ta' mill-inqas żewġ impriżi tal-ferroviji stabbiliti fi Stati Membri differenti bl-iskop li joffru servizzi ta' trasport internazzjonali bejn l-Istati Membri,

- "servizzi urbani u suburbani'" se jfissru servizzi ta' trasport imħaddma biex jaqdu l-bżonnijiet tat-trasport ta' ċentru urban jew żona urbana estiża, kif ukoll il-bżonnijiet tat-trasport bejn iċ-ċentru jew żona urbana estiża u l-inħawi tal-madwar,

- "servizzi reġjonali'" se jfissru s-servizzi ta' trasport mogħtija biex jaqdu l-bżonnijiet tat-trasport ta' reġjun.

IT-TAQSIMA II

Tmexxija indipendenti ta' l-impriżi tal-ferroviji

L-Artikolu 4

L-Istati Membri jridu jieħdu l-miżuri meħtieġa biex jiżguraw li fejn tidħol it-tmexxija, l-amminstrazzjoni u l-kontroll intern, l-affarijiet ekonomiċi u ta' rendikonti l-impriżi tal-ferroviji għandhom status indipendenti li jridu jikkonformaw miegħu, b'mod partikolari, l-assi, l-estimi tal-baġit u r-rendikonti li huma differenti minn dawk ta' l-Istat.

L-Artikolu 5

1. L-Istati Membri jridu jieħdu l-miżuri meħtieġa biex jiżguraw li l-impriżi tal-ferroviji jaġġustaw l-attivitajiet tagħhom mas-suq u jmexxu dawk l-attivitajiet taħt ir-responsabbiltà tal-korpi tat-tmexxija tagħhom, fl-interess li jagħtu servizz effiċjenti u xieraq bl-inqas prezz possibbli għas-servizz meħtieġ.

Impriżi tal-ferrovija se jkunu mmexxija b'mod konformi mal-prinċipji li jgħoddu għall-kumpanniji kummerċjali; dan se jgħodd wkoll għall-obbligazzjonijiet tas-servizzi pubbliċi tagħhom imposti mill-Istati u għall-kuntratti tas-servizzi pubbliċi li huma jiffirmaw ma' l-awtoritajiet kompetenti ta' l-Istat Membru.

2. L-impriżi tal-ferroviji jridu jiddeterminaw il-pjanijiet tad-dħul u nfiq tagħhom, inkluż l-investiment tagħhom u l-iffinanzjar tal-programmi. Dawn il-pjanijiet iridu jkunu ddisinjati biex jiksbu l-ekwilibriju finanzjarju ta' l-impriżi u l-għanijiet l-oħra tekniċi, kummerċjali u finanzjarji tat-tmexxija; dawn iridu jistabbilixxu wkoll il-metodu tat-twettiq.

3. Fil-kuntest tal-linji-gwidi tal-politika ġenerali stabbilita mill-Istat u meta jitqiesu l-pjanijiet ta' rendikont nazzjonali u l-kuntratti (li jistgħu jkunu multiannwali) inkluż il-pjanijiet ta' investiment u ta' finanzjar, l-impriżi tal-ferroviji għandhom, ikunu ħielsa biex:

- iwaqqfu ma' waħda jew aktar mill-impriżi tal-ferroviji kull gemellaġġ internazzjonali;

- iwaqqfu l-organizzazzjoni interna tagħhom, mingħajr preġudizzju għall-provedimenti tat-Taqsima III;

- jikkontrollaw il-provista u l-bejgħ tas-servizzi u jistabilixxu l-prezz tagħhom, mingħajr preġudizzju għar-Regolament tal-Kunsill (KEE) Nru 1191/69 tas-26 ta' Ġunju 1969 dwar azzjoni mill-Istati Membri rigward l-obbligazzjoni li hemm fil-kunċett tas-servizz pubbliku fit-trasport bil-ferrovija, bit-triq u bil-passaġġi ta' l-ilma intern [6];

- jieħdu deċiżjonijiet dwar l-impjegati, l-assi u l-ksib tagħhom;

- ikabbru s-sehem tagħhom fis-suq, jiżviluppaw teknoloġiji ġodda u servizzi ġodda u jadottaw kull metodu tat-tmexxija innovatiiva;

- iwaqqfu attivitajiet ġodda fl-oqsma marbuta mal-kummerċ tal-ferroviji.

IT-TAQSIMA III

Firda bejn it-tmexxija ta' l-infrastruttura u l-ħidmiet tat-trasport

L-Artikolu 6

1. L-Istati Membri jridu jieħdu l-miżuri kollha meħtieġa biex jiżguraw li r-rendikonti għan-negozju marbuta ma' l-għoti ta' servizzi tat-trasport u dawk għan-negozju marbuta mat-tmexxija ta' l-infrastruttura tal-ferrovija jinżammu b'mod separat. Għajnuna mogħtija lil waħda minn dawn iż-żewġ oqsma ta' attività ma tista tkun trasferita għall-ieħor.

Ir-rendikonti għaż-żewġ oqsma ta' attività jridu jinżammu b'tali mod li jirriflettu din il-projbizzjoni.

2. L-Istati Membri jistgħu wkoll jagħtu lok li din il-firda titlob ukoll l-organizzazzjoni ta' firdiet distinti bejn kull impriża jew li l-infrastruttura tkun immexxija minn kull entità separata.

L-Artikolu 7

1. L-Istati Membri jridu jieħdu l-miżuri neċessarji biex jiżviluppaw l-infrastruttura tal-ferrovija tagħhom nazzjonali billi jqisu, fejn ikun meħtieġ, il-bżonnijiet ġenerali tal-Komunità.

Huma jridu jiżguraw li l-istandards tas-sigurtà u r-regoli jkunu stabbiliti u li t-tħaddim tagħhom ikun sorveljat.

2. L-Istati Membri jistgħu jagħtu lill-impriżi tal-ferroviji jew lil kull amministratur ieħor ir-responsabbiltà biex imexxu l-infrastruttura tal-ferrovija u b'mod partikulari l-investiment, il-manutenzjoni u l-flus meħtieġa għall-aspetti tekniċi, kummerċjali u finanzjarji ta' dik it-tmexxija.

3. L-Istati Membri jistgħu wkoll jagħtu lill-amministratur ta' l-infrastruttura, fuq il-premessi dovuti ta' l-Artikoli 77, 92 u 93 tat-Trattat, l-iffinanzjar li jaqbel mal-ħidmiet, daqs u ħtiġijiet finanzjarji, b'mod partikulari sabiex ikopru investimenti ġodda.

L-Artikolu 8

L-amministratur ta' l-infrastruttura jrid jimposta kull ħlas għall-użu ta' l-infrastruttura tal-ferrovija li hu responsabbli minnha, li jitħallas mill-impriżi tal-ferroviji u mill-gruppi internazzjonali li jużaw dik l-infrastruttura. Wara li jikkonsultaw lill-amministratur, l-Istati Membri jridu jistabbilixxu r-regoli biex jistabbilixxu dan il-ħlas.

Il-ħlas ta' min juża, li se jkun ikkalkulat b'tali mod li ma jkunx hemm kull diskriminazzjoni bejn l-impriżi tal-ferroviji, jista' b'mod partikulari jqis il-mili, il-binja tal-ferrovija u kull ħtieġa speċifika marbuta ma' fatturi bħal veloċità, piż fuq il-fus u l-ammont jew il-perjodu ta' l-użu ta' l-infrastruttura.

IT-TAQSIMA IV

Titjieb tal-qagħda finanzjarja

L-Artikolu 9

1. Flimkien ma' l-impriżi eżistenti tal-ferrovija li huma tal-pubbliku jew ikkontrollati, l-Istati Membri jridu jwaqqfu strutturi xierqa biex inaqqsu d-dejn ta' dawk l-impriżi fuq kull livell li ma jfixkilx it-tmexxija finanzjarja tajba u li jtejjeb il-qagħda finanzjarja tagħhom.

2. Għal dak il-għan, l-Istati Membri jistgħu jieħdu l-miżuri neċessarji biex jitolbu li jkun hemm unit separat li bil-mod imewwet id-dejn li jrid ikun imwaqqaf fid-dipartimenti tar-rendikonti ta' dawk l-impriżi.

Il-balance sheet tal-unit tista' tkun imġiegħla tħallas, sakemm jitmewwet, kull dejn li tagħmel l-impriża kemm biex tiffinanzja l-investiment kif ukoll biex tkopri l-ispiża eċċessiva biex topera minħabba n-negozju tat-trasport tal-ferrovija jew minħabba t-tmexxija ta' l-infrastruttura tal-ferrovija. Id-djun li jkunu kkawżati minn ħidmiet sussidjarji ma jistgħux jitqiesu.

3. L-għajnuna mogħtija mill-Istati Membri biex tħassar id-djun li għaliħ hemm referenza f'dan l-Artikolu tista' tingħata b'mod konformi ma' l-Artikoli 77, 92 u 93 tat-Trattat tal-KEE.

IT-TAQSIMA V

Aċċess għall-infrastruttura tal-ferrovija

L-Artikolu 10

1. Gruppi internazzjonali jridu jingħataw l-aċċess u d-drittijiet ta' ċaqliq fl-Istati Membri fejn hemm l-istabbiliment ta' l-impriżi kostitwenti tal-ferroviji tagħhom, kif ukoll id-drittijiet taċ-ċaqliq fi Stati Membri oħra, għal servizzi internazzjonali bejn l-Istati Membri fejn l-impriżi li jiffurmaw il-gruppi msemmija huma stabbiliti.

2. Impriżi tal-ferroviji skond l-iskop ta' l-Artikolu 2 se jingħataw aċċess fuq kondizzjonijiet ġusti għall-infrastruttura fl-Istati Membri l-oħra għall-iskop li jagħtu servizz internazzjonali mħallat ta' ġarr ta' merkanzija.

3. L-impriżi tal-ferroviji li huma mdaħħla fil-ġarr internazzjonali mħallat tal-merkanzija u gruppi internazzjonali jridu jiffirmaw il-patti tal-ftehim amministrattiv, tekniku u finanzjarju meħtieġ ma' l-amministraturi ta' l-infrastruttura tal-ferroviji użati bil-għan li jkun irregolat il-kontroll tat-traffiku u l-kwistjonijiet tas-sigurtà marbuta mas-servizzi tat-trasport internazzjonali li għalih hemm referenza fil-paragrafi 1 u 2. Il-kondizzjonijiet li jirregolaw dak il-ftehim ma jridx ikun diskriminatorju.

IT-TAQSIMA VI

Dispożizzjonijiet finali

L-Artikolu 11

1. L-Istati Membri jistgħu jressqu kull kwistjoni marbuta mat-twettiq ta' din id-Direttiva quddiem il-Kummissjoni. Wara li tikkonsulta lill-kumitat kif previst fil-paragrafu 2 dwar dawn il-kwistjonijiet, il-Kummissjoni trid tieħu d-deċiżjonijiet xierqa.

2. Il-Kummissjoni trid tkun megħjuna minn kull kumitat li jagħtiha pariri magħmul mir-rappreżentanti ta' l-Istati Membri u presedut mir-rappreżentant tal-Kummissjoni.

Ir-rappreżentant tal-Kummissjoni jrid jissottometti lill-kumitat kull abbozz tal-miżuri li jridu jittieħdu. Il-kumitat irid jagħti l-fehma tiegħu dwar l-abbozz, fi żmien stipulat li l-president jista' jistabilixxi skond l-urġenza tal-każ, jekk hemm bżonn billi jittieħed kull vot.

Il-fehma se tkun imniżżla fil-minuti; barra minn hekk, kull Stat Membru se jkollu d-dritt li jitlob biex ikollu l-pożizzjoni tiegħu mniżżla fil-minuti.

Il-Kummissjoni trid tqis għal kollox il-fehma mwassla mill-kumitat. Hi se tagħrraf lill-kumitat bil-mod li fih il-fehma tqieset.

L-Artikolu 12

Id-dispożizzjonijiet ta' din id-Direttiva se jkunu mingħajr preġudizzju għad-Direttiva tal-Kunsill 90/531/KEE tas-17 ta' Settembru 1990 dwar il-proċedura ta' min jieħu ħsieb l-entitajiet li jaħdmu fis-setturi ta' l-ilma, l-enerġija, it-trasport u t-telekomunikazzjoni [7].

L-Artikolu 13

Id-Deċiżjoni 75/327/KEE hija hawnhekk imħassra mill-1 ta' Jannar 1993:

Referenza għad-Deċiżjoni mħassra se tkun meqjusa li tirreferi għal din id-Direttiva.

L-Artikolu 14

Qabel l-1 ta' Jannar 1995, il-Kummissjoni trid tressaq quddiem il-Kunsill rapport dwar it-twettiq ta' din id-Direttiva flimkien ma', jekk hemm bżonn, proposti xierqa dwar it-tkomplija ta' azzjoni tal-Komunità biex ikunu żviluppati l-linji tal-ferroviji, b'mod partikulari fil-qasam tal-ġarr internazzjonali tal-merkanzija.

L-Artikolu 15

L-Istati Membri jridu, wara li jikkonsultaw lill-Kummissjoni, jadottaw il-liġijiet, regolamenti u dispożizzjonijiet amministrattivi meħtieġa biex jaqblu ma' din id-Direttiva sa mhux aktar tard mill-1 ta' Jannar 1993. Huma jridu jagħrfu minnufih lill-Kummissjoni dwarhom.

Meta l-Istati Membri jadottaw dawk id-dispożizzjonijiet, huma jrid ikun fihom kull referenza għal din id-Direttiva jew ikollhom dik ir-referenza fl-okkażjoni tal-pubblikazzjoni uffiċjali tagħhom. Il-metodi biex issir dik ir-referenza se jkunu stabbiliti mill-Istati Membri.

L-Artikolu 16

Din id-Direttiva hi indirizzata lill-Istati Membri.

Magħmula fi Brussel, fid-29 ta' Lulju 1991.

Għall-Kunsill

Il-President

H. van den Broek

[1] ĠU C 34, ta' l-14.2.1990, p. 8 u ĠU C 87, ta' l-4.4.1991, p. 7.

[2] ĠU C 19, tat-28.1.1991, p. 254.

[3] ĠU C 225, ta' l-10.9.1990, p. 27.

[4] ĠU L 152, tat-12.6.1975, p. 3.

[5] ĠU L 278, tat-23.12.1970, p. 1, Ir-Regolament emendat mir-Regolament (KEE) Nru 2116/78 (ĠU L 246, tat-8.9.1978, p. 7).

[6] ĠU L 156, tat-28.6.1969, p. 1. Ir-Regolament emendat l-aħħar mir-Regolament (KEE) Nru 1893/91 (ĠU L 169, tad-29.6.1991, p. 1).

[7] ĠU L 297, tad-29.10.1990, p. 1.

--------------------------------------------------