Ir-Regolament tal-Kummissjoni (KEE) Nru 3403/89

tat-13 ta’ Novembru 1989

li jemenda r-Regolament (KEE) Nru 2159/89 li jistabbilixxi r-regoli ddettaljati għall-applikazzjoni tal-miżuri speċifiċi għal-lewż u għall-frott tal-ħarrub kif stabbilit fit-Titolu IIa tar-Regolament tal-Kunsill (KEE) Nru 1035/72

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ekonomika Ewropea,

Wara li kkunsidrat ir-Regolament tal-Kunsill (KEE) Nru 1035/72 tat-18 ta’ Mejju 1972 dwar l-organizzazzjoni komuni tas-suq tal-frott u tal-ħxejjex [1], kif l-aħħar emendat mir-Regolament (KEE) Nru 1119/89 [2], u b’mod partikolari l-Artikolu 14g tiegħu,

Billi r-Regolament tal-Kummissjoni (KEE) Nru 2159/89 [3] jistabbilixxi l-kondizzjonijiet għall-għoti ta’ l-għajnuna li għaliha jistgħu jikkwalifikaw l-organizzazzjonijiet tal-produtturi tal-lewż u tal-frott tal-ħarub taħt ċerti kondizzjonijiet;

Billi, sabiex jiġi mħaffef il-mod kif dawk l-organizzazzjonijiet tal-produtturi joperaw u sabiex jiġu implimentati l-pjanijiet tal-kwalità u tat-titjib fil-marketing aktar malajr, għandha tiġi stabbilita disposizzjoni għall-ħlas bil-quddiem;

Billi l-kondizzjonijiet għall-għoti ta’ dan il-ħlas bil-quddiem u l-ammont tiegħu għandu jiġi speċifikat; billi, madanakollu, il-ħlas bil-quddiem għandu jkun marbut mal-kondizzjoni li tingħata garanzija li tiggarantixxi li jitwettqu l-obbligi tal-benefiċjarji; billi l-kondizzjonijiet għad-depożitu u għar-rilaxx tal-garanzija jridu jiġu stabbiliti;

Billi r-rata tal-konverżjoni proviżorja applikabbli għall-ammont massimu ta’ l-għajnuna fis-sena trid tiġi stabbilita meta l-ħlas bil-quddiem jitħallas fuq għajnuna għall-implimentazzjoni tal-pjanijiet tal-kwalita’ u tat-titjib tal-marketing;

Billi l-miżuri stabbiliti f’dan ir-Regolament huma skond l-opinjoni tal-Kumitat ta’ l-Amministrazzjoni tal-Frott u l-Ħxejjex,

ADOTTAT DAN IR-REGOLAMENT:

Artikolu 1

Ir-Regolament (KEE) Nru 2159/89 huwa hawnhekk emendat kif ġej:

1. Il-paragrafu li ġej huwa miżjud ma’ l-Artikolu 19:

"Ħlief f’każijiet ta’ forza maġġuri, applikazzjoni mibgħuta wara l-perjodu hawn fuq imsemmi għandha twassal għal tnaqqis ta’ 5 % ta’ l-għajnuna; ebda applikazzjoni ma tista’ tiġi aċċettata wara dewmien ta’ aktar minn 30 ġurnata."

2. L-Artikolu 22a li ġej huwa mdaħħal:

"L- Artikolu 22a

1. L-Istati Membri jistgħu jagħtu lill-organizzazzjonijiet tal-produtturi li japplikaw għalih ħlas bil-quddiem ta’ l-għajnuna għall-istabbiliment ta’ fond li jdur u għall-għajnuna għall-implimentazzjoni tal-pjanijiet tal-kwalità u tat-titjib tal-marketing.

2. Fil-każ ta’ l-għajnuna għall-istabbiliment tal-fond li jdur, is-self jista’ jitħallas darba biss:

- fir-rigward ta’ applikazzjoni mibgħuta sa mhux aktar tard minn 18-il xahar wara l-għarfien speċifiku u fil-forma stabbilita fl-Anness V,

- meta l-organizzazzjoni tal-produtturi applikanta ġġib provi li l-kapital tal-fond ġie kostitwit kif stabbilit fl-Artikolu 14ċ (3) tar-Regolament (KEE) Nru 1035/72.

L-ammont tal-ħlas bil-quddiem m’għandux jaqbeż is-60 % tal-kontribuzzjoni finanzjarja totali mill-Istat Membru u mill-Komunità għall-iffinanzjar tal-fond li jdur stabbilit fuq il-bażi ta’ l-informazzjoni tal-bejgħ stmat għas-sena tal-marketing ta’ wara l-għarfien speċifiku, skond il-punt 6 ta’ l-Anness V.

Meta jingħata l-ħlas bil-quddiem, l-applikazzjoni għall-bilanċ ta’ l-għajnuna għandha tiġi ppreżentata fil-forma stabbilita fl-Anness VI.

3. Fil-każ ta’ għajnuna għall-implimentazzjoni tal-pjan, l-applikazzjonijiet għas-self jistgħu jintbagħtu, fil-forma stabbilita fl-Anness VII, wara l-approvazzjoni tal-pjan. Applikazzjoni waħda biss għandha tintbagħat għal kull sena ta’ l-implimentazzjoni tal-pjan malli tintbagħat prova li bdiet il-fażi annwali ta’ l-implimentazzjoni. Il-prova, flimkien mad-dokumenti ta’ appoġġ, trid tkun relatata ma’ ta’ mill-inqas 20 % ta’ l-istima msemmija fil-punt 7 ta’ l-Anness VII.

L-ammont tal-ħlas bil-quddiem m’għandux jaqbeż it-80 % tal-kontribut finanzjarju totali mill-Istat Membru u mill-Komunità għall-ispiża totali ta’ l-implimentazzjoni tal-pjan, kif stmat mill-organizzazzjoni tal-produtturi u msemmi fil-punt 7 ta’ l-Anness VII.

Dan il-ħlas bil-quddiem m’għandux, madanakollu, jaqbeż id-90 % ta’ l-ammont imsemmi fl-Artikolu 2 tar-Regolament (KEE) Nru 790/89. Għal dan il-għan, ir-rata li għandha tiġi applikata għall-konverżjoni ta’ l-ammont massimu hawn fuq imsemmi fil-munita nazzjonali għandha tkun ir-rata agrikola tal-konverżjoni fis-seħħ fl-1 ta’ Settembru ta’ qabel l-applikazzjoni għall-ħlas bil-quddiem.

L-applikazzjoni għall-ħlas tal-bilanċ ta’ l-għajnuna, fir-rigward ta’ fażi annwali ta’ l-implimentazzjoni tal-pjan, għandha tintbagħat skond il-forma stabbilita fl-Anness VIII.

4. Il-ħlas bil-quddiem imsemmi fil-paragrafi 2 u 3 huwa marbut mal-kondizzjoni li l-applikanti jġibu prova li ngħatat garanzija ekwivalenti għal 110 % tal-ħlas bil-quddiem.

Il-garanzija għandha tiġi ppreżentata skond it-Titolu VIII tar-Regolament tal-Kummissjoni (KEE) Nru 2220/85 [1] ĠU L 205, tat-3.8.1985, p. 5..

5. Il-garanzija għandha tiġi meħlusa minnufih:

(a) fir-rigward tal-ħlas bil-quddiem imsemmi fil-paragrafu 2, hekk kif il-bilanċ ta’ l-għajnuna jitħallas;

(b) fir-rigward tal-ħlas bil-quddiem fuq l-għajnuna msemmija fil-paragrafu 3, hekk kif il-bilanċ tal-porzjon annwali ta’ l-għajnuna jitħallas.

6. Il-garanzija tintilef in parti jekk il-ħlas bil-quddiem jaqbeż l-ammont ta’ l-għajnuna li għandu jitħallas fis-sena; il-garanzija tibqa’ mitlufa sal-punt ta’ l-ammont imħallas bi żball.

7. Il-garanzija tintilef kollha:

- fir-rigward ta’ l-għajnuna biex jiġi stabbilit fond li jdur, jekk l-applikazzjoni għall-għajnuna ma tkunx ġiet ippreżentata fi żmien erba’ xhur mit-tmiem tat-tieni sena tal-marketing wara d-data ta’ l-għarfien speċifiku ta’ l-organizzazzjoni tal-produtturi,

- fir-rigward ta’ l-għajnuna għall-pjan, jekk l-applikazzjoni għall-bilanċ ta’ l-għajnuna tas-sena ma tkunx ġiet preżentata skond it-tielet subparagrafu ta’ l-Artikolu 19.

Mingħajr preġudizzju għall-paragrafu 6, jekk l-applikazzjonijiet għall-bilanċ ta’ l-għajnuna tas-sena jiġu ppreżentati wara t-terminu ta’ skadenza hawn fuq imsemmi iżda b’dewmien ta’ mhux aktar minn 15-il ġurnata, 10 % tal-garanzija tintilef."

3. L-Anness ta’ dan ir-Regolament huwa miżjud.

Artikolu 2

Dan ir-Regolament jidħol fis-seħħ fit-tielet jum ta’ wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-13 ta’ Novembru 1989.

Għall-Kummissjoni

Ray Mac Sharry

Membru tal-Kummissjoni

[1] ĠU L 118, tad-29.4.1989, p. 12.

[2] ĠU L 118, ta' l-20.5.1972, p. 1.

[3] ĠU L 207, tad-19.7.1989, p. 19.

--------------------------------------------------

ANNESS

"

“Anness V

+++++ TIFF +++++

+++++ TIFF +++++

Anness VI

+++++ TIFF +++++

+++++ TIFF +++++

Anness VII

+++++ TIFF +++++

+++++ TIFF +++++

Anness VIII

+++++ TIFF +++++

+++++ TIFF +++++

"

--------------------------------------------------