Ir-Regolament tal-kunsill (KEE) Nru 1262/84

ta' l-10 ta' April 1984

li jikkonċerna l-konklużjoni tal-Konvenzjoni Internazzjonali fuq l-Armonizzazzjoni ta' Kontrolli tal-Merkanzija fuq il-Fruntieri

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea,

Wara li kkunsidra r-rakkomandazzjoni tal-Kummissjoni,

Wara li kkunsidra l-opinjoni tal-Parlament Ewropew [1],

Wara li kkunsidra l-opinjoni tal-Kumitat Ekonomiku u Soċjali [2],

Billi l-Konvenzjoni Internazzjonali fuq l-Armonizzazzjoni ta' Kontrolli tal-Merkanzija fuq il-Fruntieri, konkluża f'Ġinevra fil-21 ta' Ottubru 1982, tintroduċi disposizzjonijiet maħsuba biex jiffaċilitaw il-moviment internazzjonali ta' merkanzija, biex tikkontribwixxi għat-tneħħija kontinwa ta' ostakli għall-kummerċ u biex tippromwovi l-iżvilupp ta' kummerċ dinji, b’hekk tilħaq għanijiet konsistenti ma’ dawk tal-politika kummerċjali tal-Komunità Ekonomika Ewropea;

Billi l-Konvenzjoni, minn naħa waħda tippermetti l-Komunità fost l-oħrajn biex tapplika l-leġislazzjoni proprja tagħha fuq kontrolli li jsiru fuq il-fruntieri interni u, mill-banda l-oħra, f'dak li jirrigwardja kontestazzjonijiet fil-kompetenzi tagħha, li teserċita f'isimha d-drittijiet u li taderixxi r-responsabbilitajiet li l-Konvenzjoni msemmija tagħti lill-Istati Membri tagħha li huma Partijiet Kontraenti hekk imsemmi;

Billi l-Konvenzjoni Internazzjonali fuq l-Armonizzazzjoni ta' Kontrolli tal-Merkanzija fuq il-Fruntieri għandha għalhekk tiġi approvata f'isem il-Komunità,

ADOTTA DAN IR-REGOLAMENT:

Artikolu 1

Il-Konvenzjoni Internazzjonali fuq l-Armonizzazzjoni ta' Kontrolli tal-Merkanzija fuq il-Fruntieri hawnhekk qed tiġi approvata f'isem il-Komunità Ekonomika Ewropea.

Il-Komunità għandha tapplika l-Konvenzjoni għall-kontrolli li jsiru fuq il-fruntieri esterni tagħha skond l-Artikolu 15 tal-Konvenzjoni.

It-test tal-Konvenzjoni huwa anness ma’ dan ir-Regolament.

Artikolu 2

Il-President tal-Kunsill huwa hawnhekk awtorizzat jiddepożita, f'isem il-Komunità, l-istrument ta' ratifikazzjoni skond l-Artikolu 16(3)(a) tal-Konvenzjoni [3].

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fl-10 ta' April 1984.

Għall-Kunsill

Il-President

C. Cheysson

[1] ĠU C 46, ta' l-20.2.1984, pġ. 113.

[2] ĠU C 35, tad-9.2.1984, pġ. 3.

[3] Id-data ta' meta l-Konvenzjoni tidħol fis-seħħ għandha tiġi ippublikata fil-Ġurnal Uffiċjali tal-Komunitajiet Ewropej mis-Segretarjat tal-Kunsill Ġenerali.

--------------------------------------------------